Addis Maleda - አዲስ ማለዳ

የሀገራዊ ምክክር ኮሚሽን የክልል ተወካዮች ምርጫ መጠናቀቁንና ወደ ውሳኔ አሳላፊዎቹ የ500 ተሳታፊዎች ምዕራፍ የሚሸጋግርበት ላይ ነው ተባለ ዓርብ ፣ ሐምሌ 24 ቀን 2018 ዓ.ም (#አዲስ ማለዳ ) የሀገራዊ ምክክር ኮሚሽን በሀገራዊ የምክክር ሂደቱ ላይ የክልሎች፣ የከተማ አስተዳደሮች እና የፌደራል ተቋማት ተወካዮች የምርጫ ሂደት በዛሬው ዕለት የመረጠ ሲሆን በ250 ስልታዊ ቡድኖች የነበረው ምክክር በመጠናቀቁ በቀረቡት ምክረ ሃሳቦች ላይ ውሳኔ ማሳለፍ የሚችለው የ500 ተሳታፊዎች ቡድን በቀጣይ ሰኞ እንደሚጀመር አስታወቀ። ኮሚሽኑ ከሰኞ ጀምሮ የሚካሄደው ምክክር አለመግባባቶች እና የሃሳብ ፍትጊያዎች ሊኖር እንደሚችሉ እና ይህም የሚጠበቅ እንደሆነ ተገልጿል። ኮሚሽኑ በዛሬው ዕለት በሰጠው ጋዜጣዊ መግለጫ ላይ “አልጋ በአልጋ ይሆናል ብለን አንጠብቅም” ያለ ሲሆን ይህም በመስጠት እና መቀበል ላይ የተመረኮዘ እንደሆነ ተነስቷል። የክልል ጉባኤተኞችን መረጣ በተመከለተ ኮሚሽኑ እንዳስታወቀው ከየክልሉ የመጡ የማህበረሰብ ክፍሎች፣ የሲቪክ ማህበራት፣ ወጣቶች፣ ሴቶች፣ መምህራን፣ አካል ጉዳተኞች፣ የፖለቲካ ፓርቲዎችና የኃይማኖት ተቋማት ተወካዮች በተሰጣቸው ኮታ መሰረት በክልልና በፌደራል ደረጃ ተወካዮቻቸውን መርጠው አጠናቅቀዋል ተብሏል። አዲስ ማለዳ እንዳገኘችው መረጃ ከሆነ ከእያንዳንዱ ክልል ከዘጠኝ ማህበረሰብ ማለትም ከላይ በተጠቀሱት 22 ተወካዮችን እንደተመረጡ ሰምታለች። እንደ ኮሚሽኑ ገለፃ ከ15ቱ ማለትም በ12 ክልሎች፣ በ2 የከተማ አስተዳደሮች እና በፌደራል ተቋማት ተከፋፍለው በመነጋገርና በተቀመጠው መስፈርት መሰረት ወደ 330 የሚሆኑ ተወካዮችን ተመርጠዋል። በተጨማሪም ኮሚሽኑ አቅጣጫ ከማሳየት ባለፈ በምርጫው ሂደት ውስጥ ጣልቃ እንዳልገባና ተሳታፊዎቹ ራሳቸው መምረጣቸው ገልጿል። ሰሞኑን በ250 ሰዎች ደረጃ በ16 ቦታዎች ተከፋፍሎ ሲካሄድ የነበረው ውይይት የሃሳቦች ማቀራረብና የጎደሉ ሃሳቦችን የማሟላት ሂደት ተጠናቅቋል። በየቡድኑ የቀረቡት ቃለ-ጉባኤዎችም ተሳታፊዎቹ ያቀረቧቸውን ሀሳቦችና ምላሾች ትክክለኛነት የሚያረጋግጡ መሆናቸው ተነብቦ በሁሉም ተሳታፊዎች ፊርማ ይጸድቃል። ይህ የተጠናቀረው ሰነድም ለቀጣዩ ትልቅ ጉባኤ በዋና መነሻነት የሚያገለግል ይሆናል። ኮሚሽኑ ወደ 500 ተሳታፊዎች ምዕራፍ ተሸጋግሮ ወይይት በሚያካሂድበት ወቅት የሚጠበቁ አለመግባባቶች እንደሚኖሩም ዋና ኮሚሽነር መስፍን አርዓያ (ፕሮፌሰር) ተናግረዋል። ከቀጣዩ ሰኞ ጀምሮ የምክክር ሂደቱ ወደሚቀጥለው ትልቅ ምዕራፍ በመሸጋገር 500 ተሳታፊዎችን በያዙ 8 ቡድኖች በስምንቱ አጀንዳዎች ላይ የሚመክር ሲሆን በዚህም ከዚህ ቀደም ከንዑሳን ቡድኖች እስከ ስልታዊ ቡድኖች ሲነሱ የነበሩ ሃሳቦች ለወይይት ቀርበው ውሳኔ ይሰጥባቸዋል ተብሎ ይጠበቃል። ኮሚሽኑ አክሎ እንዳመለከተው፣ በ500 ሰዎች ደረጃ የሚካሄደው ስብሰባ ከፍተኛ የሰው ቁጥር የሚሳተፍበት በመሆኑና ሁሉም ተሳታፊ የመናገር እንዲሁም የመደመጥ ፍላጎት ስለሚኖረው፣ የተለያዩ ተግዳሮቶችና አለመግባባቶች ሊፈጠሩ እንደሚችሉና ይህም የሚጠበቅ እንደሆነ ገልጿል። ነገር ግን ሂደቱ “በመስጠትና በመቀበል” መርሃ ግብር ላይ የተመሰረተ በመሆኑ፣ ተሳታፊዎች በውይይትና በመቀራረብ ሂደት በመጨረሻ ወደ አንድ የጋራ መግባባትና ሰላማዊ አቅጣጫ እንደሚደርሱ ትልቅ ተስፋ አለን ሲሉ ዋና ኮሚሽነሩ ገልጸዋል። ከንዑሳን ቡድኖች ጀምሮ ስልታዊ ቡድኖች ድረስ የተሰበሰቡ አጀንዳዎች ለ500 ተመካካሪዎች ሲቀርብ በመወያየት ዉሳኔ የሚያገኙበት እንደመሆኑ አንድ ሃሳብ የሚፀድቀው ከ75 በመቶ በላይ መግባባት ከተደረሰበት ነው። በሌላ በኩል ደግሞ በዛሬው ዕለት የተመረጡት የክልል ጉባኤተኞች በ500 ተመካካሪዎች ውይይት ከመጀመራቸው በፊት ገለጻ የሚሰጣቸው ይሆናል። የ250 ስልታዊ ቡድኑ በዛሬው ዕለት ቃለ ጉባኤ በማጠናቀር መስማማታቸውን ለማሳወቅ ፊርማቸውን በማስቀጥ ቀጣይ ሰኞ ለ500ው ቡድን የሚያቀርቡ ይሆናል። ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦ YouTube ➲ t.ly/vSgS Telegram ➲ t.ly/SOXU Facebook ➲ t.ly/flx8 Twitter ➲ t.ly/mxA