Addis Maleda - አዲስ ማለዳ

ሩሲያ በኪቭ ላይ በፈጸመችው የባለስቲክ ሚሳኤል ጥቃት የሰዎች ህይወት ሲያልፍ ዩክሬንም የአየር መከላከያ ሚሳኤል እጥረት እንዳጋጠማት አስታወቀች ቅዳሜ፣ ሐምሌ 25  ቀን 2018 ዓ.ም (#አዲስ ማለዳ ) ሩሲያ በዩክሬን መዲና ኪቭ እና በዙሪያዋ በሚገኙ አካባቢዎች ላይ በፈጸመችው ከባድ የባለስቲክ ሚሳኤል ጥቃት 9 ሰዎች መገደላቸውንና በርካታ ዩክሬናውያን መቆሰላቸውን እንዲሁም መኖሪያ ቤቶች እና ትምህርት ቤቶች መውደማቸውን የዩክሬን ባለሥልጣናት አስታወቁ። ሰሞኑን ሩሲያ በዩክሬን ላይ የምትፈጽመው ጥቃት ከበድ እያለ መምጣቱን ዘገባዎች ያመላክታሉ። የዩክሬኑ ፕሬዝዳንት ቮሎድሚር ዘለንስኪ እንደገለጹት ከሆነ ሩሲያ 27 የባለስቲክ ሚሳኤሎችን እንዲሁም ሌሎች 35 ሚሳኤሎችን እና 185 ድሮኖችን ወደ ዩክሬን አስወንጭፋለች። ነገር ግን ሀገራቸው ከአሜሪካ ያገኘቻቸው የፓትርዮት አየር መከላከያ ሥርዓት ሚሳኤል ማከሸፊያዎች  በመጨረሷ ምክንያት አንዱን የባለስቲክ ሚሳኤል ብቻ አምክናለች። ፕሬዝዳንት ዘለንስኪ በቴሌግራም ገጻቸው ላይ ባስተላለፉት መልዕክት “እያንዳንዱ የባለስቲክ ሚሳኤል ማከሸፊያ ድጋፍ የዜጎቻችንን ሕይወት ይታደጋል፤ ያለ እነሱ የሚያልፍ እያንዳንዱ ምሽት ግን ለተጨማሪ የሰው ሕይወት ማጣት ምክንያት ይሆናል” ሲሉ ለምዕራባውያን አጋሮቻቸው አስቸኳይ ድጋፍ እንዲደረግላቸው ጥሪ አቅርበዋል ሲል ሮይተርስ ዘግቧል። በጥቃቱ ሳቢያ በኪቭ ከተማ በሚገኙ ሰባት ወረዳዎች ላይ  በደረሰ ጉዳት 18 የመኖሪያ ሕንጻዎች፣ አንድ ትምህርት ቤት እና ሌሎች የመሠረተ ልማት ተቋማት ላይ ወድመዋል። በሌላ በኩል የሊታንያ ኤምባሲ ሕንፃ መስኮቶች የተሰባበሩ ሲሆን በግቢው ውስጥም ስብርባሪዎች መውደቃቸውን የሀገሪቱ የውጭ ጉዳይ ሚኒስቴር አስታውቋል። በጥቃቱ ከቆሰሉት ሰዎች መካከል አራት ህጻናት ይገኙበታል የተባለ  ሲሆን የቆሰሉ ሰዎች ቁጥር ከ28 በላይ መድረሱም ተገልጿል። ይህ ጥቃት ሩሲያ በዚሁ ሳምንት በኪቭ እና በዙሪያዋ በሚገኙ ከተሞች ላይ የፈጸመችው ሁለተኛው ግዙፍ የአየር ጥቃት ሲሆን፣ የዩክሬን የውጭ ጉዳይ ሚኒስትር አንድሪ ሲቢሃ ምዕራባውያን አጋሮቻቸው የአየር መከላከያ ሥርዓቶችን በአስቸኳይ እንዲያቀርቡ ድጋሚ ጥሪ አቅርበዋል። ምስል_ ሮይተርስ ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦ YouTube ➲ t.ly/vSgS Telegram ➲ t.ly/SOXU Facebook ➲ t.ly/flx8 Twitter ➲ t.ly/mxA