Addis Maleda - አዲስ ማለዳ

የሀገራዊ ምክክር ኮሚሽን በምክክሩ ላይ “የማይካተቱ አጀንዳዎች” ወደ ክልሎች ይመለሳሉ አለ ሐሙስ፣ ሰኔ 04 ቀን 2018 ዓ.ም (#አዲስ_ማለዳ) የኢትዮጵያ ሀገራዊ ምክክር ኮሚሽን ከሕዝብ የተሰበሰቡ የአጀንዳ ግብዓቶችን የመለየት ሥራ እያከናወነ መሆኑን በመግለጽ፣ በሀገራዊ ምክክሩ መድረክ ሊካተቱ የማይችሉ አካባቢያዊ ጉዳዮች ምላሽ እንዲያገኙ ወደ ክልሎችና ወደሚመለከታቸው አስፈጻሚ አካላት እንደሚመለሱ አስታወቀ። ኮሚሽኑ ይህንን የገለጸው በትናንትናው ዕለት ረቂቅ አጀንዳዎችን ለፖለቲካ ፓርቲዎች አቅርቦ ግብዓት በሚሰበስብበት ወቅት ነው። ኮሚሽኑ እንደተናገረው ከሆነ፣ ከአንደኛው ዙር የአጀንዳ ማሰባሰብ ሂደት በርካታ ጥያቄዎችና ግብዓቶች የተገኙ ቢሆንም፣ ሁሉም ጉዳዮች ለሀገራዊ ምክክር የሚቀርቡ አይደሉም። በመሆኑም የተሰበሰቡት አጀንዳዎች በሁለት ዋና ዋና ዘርፎች ተከፍለው እንዲታዩ ተደርጓል። የመጀመሪያው ዘርፍ ወደ ክልሎችና ወደ አስፈጻሚ አካላት የሚመለሱ አጀንዳዎች ናቸው። እነዚህም በነባር የሕግና የፖሊሲ ማዕቀፎች ምላሽ ሊያገኙ የሚችሉ፣ ነገር ግን በተለያዩ ምክንያቶች ሳይፈጸሙ የቆዩ የሕዝብ ጥያቄዎችና “የሕዝብ እሮሮዎች” ናቸው። እነዚህ አጀንዳዎች የሕዝብ ድምፅ በመሆናቸው መጥፋት የለባቸውም ያለው ኮሚሽኑ፤ ጉዳዩ በቀጥታ ወደሚመለከታቸው የክልል መንግሥታትና የፌዴራል አስፈጻሚ አካላት ተመልሰው መፍትሔ እንዲያገኙ እንደሚደረግ አስታውቋል። ሁለተኛው ደግሞ ለሀገራዊ ምክክሩ መስፈርቱን የሚያሟሉ አጀንዳዎች ናቸው። እነዚህ አጀንዳዎች በኮሚሽኑ መቋቋሚያ አዋጅ ላይ በተቀመጡት መስፈርቶች ተመዝነው የሚለዩ ሲሆን፤ እንደ ሕገ መንግሥት ማሻሻያ፣ የፖለቲካ ሥርዓት ለውጥ እና መሠረታዊ የሀገረ መንግሥት ግንባታ ጉዳዮችን ያካተቱ ናቸው። በእነዚህ አጀንዳዎች ላይ በቅርቡ በሚደረገው ጉባኤ ከአራት ሺህ በላይ ተሳታፊዎችን ያካተተ ምክክር እንደሚደረግ ተገልጿል። የኢትዮጵያ ሀገራዊ ምክክር ዋና ኮሚሽነር ፕሮፌሰር መስፍን አርዕያ(ፕሮፌሰር) እንደገለጹት፤ አጀንዳዎቹን ወደ ክልል መላክ ያስፈለገው በኮሚሽኑ ሕግ መሠረት የተሻለና ፈጣን መፍትሔ እንዲያገኙ ለማድረግ ነው። ዋና ኮሚሽነሩ፣ “አንዳንድ አጀንዳዎች እዚያው በየክልላቸው ማለቅ የሚገባቸው፣ አንዳንዶቹ አካባቢያዊ ናቸው፤ አንዳንዶቹ ደግሞ በሁለት ክልሎች መካከል ውይይት የሚያስፈልጋቸው ናቸው” ካሉ በኋላ፣ እነዚህ ጉዳዮች ሀገራዊ የሚያሰኛቸውን መመዘኛ በሕጉ መሠረት ማሟላት የማይችሉ መሆናቸውን አስረድተዋል። ፕሮፌሰር መስፍን አክለውም፣ አጀንዳዎችን የመመለስ ሂደት የምክክር መድረኩ ትኩረት ሊሰጣቸው በሚገቡ ዋና ዋና ሀገራዊ ጉዳዮች ላይ ብቻ እንዲያተኩር ለማስቻል እንደሆነ አስገንዝበዋል። ወደ ክልል የሚመለሱ ጉዳዮች ይጣላሉ ማለት እንዳልሆነ የገለጹት ዋና ኮሚሽነሩ፣ “አጀንዳዎች በክብር ወደመጡበት ይመለሱ እንጂ ምንም ይሁን ምን የሚጣል አጀንዳ የለም” ሲሉ አረጋግጠዋል። ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦ YouTube ➲ t.ly/vSgS Telegram ➲ t.ly/SOXU Facebook ➲ t.ly/flx8 Twitter ➲ t.ly/mxA