Addis Maleda - አዲስ ማለዳ

ለ800 የትራፊክ ቁጥጥር ባለሙያዎች የሥራ አፈጻጸም ክፍተትና አቅምን ለማሳደግ የሚረዳ ስልጠና መሰጠት ተጀመረ ሰኞ ፣ መስከረም 18 ቀን 2019 ዓ.ም (#አዲስ_ማለዳ) አዲስ አበባ ትራፊክ ማኔጅመንት ባለሥልጣን የዳሰሳ ጥናት ካደረገ በኋላ 800 የትራፊክ ቁጥጥር ባለሙያዎችን በፖሊስ ዩኒቨርሲቲ የነበሩ የሥራ አፈፃፀም ክፍተቶችን እና  የሥራ አቅምን ለማሳደግ ያለመ ሥልጠና መስጠት መጀመሩን አስታወቀ፡፡ የአዲስ አበባ ትራፊክ ማኔጅመንት ባለሥልጣን የከተማዋን የትራፊክ ፍሰት ለማቀለጠፍ፣ ሰላማዊ አጠቃቀምን ለማረጋገጥ  እንዲሁም የትራፊክ አደጋዎችን ለመቀነስ በማለም የትራፊክ ባለሙያዎች ላይ የዳሰሳ ጥናት ካከሄደ በኋላ 800 የሚሆኑ የቁጥጥር ባለሙያዎችን በኢትዮጵያ ፖሊስ ዩኒቨርሲቲ  በስነ ምግባር እና የሥራ አቅም ግንባታ ላይ ሥልጠና መስጠት መጀመሩን ይፋ አድርጓል። የአዲስ አበባ ትራፊክ ማኔጅመንት ባለሥልጣን ምክትል ዋና ዳይሬክተር አማረ ታረቀኝ ተቋሙ ከሚያከናውናቸው ዋና ዋና ተግባራት መካከል የሕግ ማስከበር ሥራ አንዱ እንደሆነ ገልፀው፤ ይህንንም ሥራ የሚያከናውኑ የቁጥጥር ሠራተኞች ላይ በተደረገ የዳሰሳ ጥናትና የአፈጻጸም ግምገማ መሠረት የነበሩ ክፍተቶችን ለመሙላት ሥልጠናው እንዳስፈለገ ተናግረዋል። አክለውም ሥልጠናው ከኢትዮጵያ ፖሊስ ዩኒቨርሲቲ ጋር በጋራ በመሆን የሚሰጥ ሲሆን፣ በሦስት ዙር ተከፋፍሎ አጠቃላይ 800 ሰልጣኞችን እንደሚያሳትፍ ተገልጻል። ምክትል ዳይሬክተሩ  ይህንን የተናገሩት  የመጀመሪያው ዙር ሰልጠኞች  ባለፈው ቅዳሜ መስከረም 16 በፖሊስ ዩኒቨርሲቲ  የምረቃ ፕሮግራም ላይ ከ240 በላይ ሰልጣኞች ባስመረቀበት ወቅት ነው። የሥልጠናውን አስፈላጊነት አስመልክቶ  ማብራሪያ የሰጡት ምክትል ዳይሬክተሩ “ያደረግነው የዳሰሳ ጥናት ላይ የነበሩ ክፍተቶች፣ ከአፈጻጸም ጋር ተያይዘው አልፎ አልፎ የሚታዩ ችግሮችን ሊሞላ የሚችል፣ እንዲሁም ደግሞ የሰራተኛውን አቅም፣ ያለውን እውቀት የበለጠ ማዳበር የሚችልበት ሁኔታ ለማመቻቸት ታሳቢ ተደርጎ የተዘጋጀ ሥልጠና ነው” በማለት ተናግረዋል። ምክትል ዳይሬክተሩ አክለውም፤  “በተለይ የቁጥጥር ሰራተኞች በሚያደርጉት የሕግ ማስከበር ሂደት ውስጥ የበለጠ ተገልጋዩን ማርካት ስለሚገባ፣ ደንበኛ ተኮር አገልግሎት እንዴት ይሰጣል የሚለውን ሥልጠና የሰጠንበት ሁኔታ ነው” ሲሉ ገልጸዋል። የባለስልጣኑ ዋና ዳይሬክተር በበኩላቸው ለተመራቂዎች የለበሱት የደንብ ልብስ ስልጣን እንደሚሰጣቸው ጠቅሰው ነገር ግን በምግባር ህግን አክበረው፣ ማህበረሰቡን ማገልገል እንዳለባቸው መመሪያ ሰጥተዋል። በወቅቱ የተለያዩ ስልጠናዎች እንደተሰጣቸው የሚያኑሱት አማረ ከስሜታዊነት ጋር የተያያዘ  ማለትም በተግባቦት ዙሪያ “ስሜትን ተቆጣጥሮ ቁጥጥር ማድረግ እና ተግባቦትን እንዴት መፈጸም ይቻላል?” በሚሉና ሥነ ምግባርን እንዲሁም ስርዓትን መሠረት ባደረጉ ይዘቶች ላይ ትኩረት ተደርጎ ስልጠናውን ወሰደዋል ብለዋል። በሌላ በኩል፣ በትራፊክ እንቅስቃሴ ወቅት የሚከሰቱ አደጋዎችንና ግጭቶችን ለመቀነስ የአሽከርካሪዎች ባህሪ ወሳኝ መሆኑ የተጠቀሰ ሲሆን፣ ጥናቶች እንደሚያመለክቱት እስከ 68 በመቶ የሚደርሱ አደጋዎች ከአሽከርካሪዎች ባህሪ ጋር የተያያዙ እንደሆነ ተመላክቷል። በመሆኑም አሽከርካሪዎች የትራፊክ ደንብን አክብረው መንቀሳቀስ አለባቸው የተባለ ሲሆን የቁጥጥር ባለሙያዎችም ህግን አክብረው እና እርምጃ በሚወስዱበት ወቅት ደግሞ ለምን እንደወሰዱበት በሚገባ መግለጽ አለባቸው ተብሏል። የሕግ ማስከበር ስራው ህግ ጥሰው በተገኙ  አሽከርካሪዎች ላይ ብቻ ሳይሆን ጥፋት ፈጽመው በሚገኙ የቁጥጥር ሠራተኞች ላይም እስከ ሥራ መሰናበት የሚያደርስ እርምጃ ለመውሰድ የሚያስችል ሕጋዊ ማዕቀፍ እንዳለው እና በዚህም መሰረት ባለስልጣኑ እየሰራ እንደሆነ ምክል ዳይሬክተሩ ተናግረዋል። ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦ YouTube ➲ t.ly/vSgS Telegram ➲ t.ly/SOXU Facebook ➲ t.ly/flx8 Twitter ➲t.ly/mxA