Addis Maleda - አዲስ ማለዳ

ባንኮች የሚያበድሩት የብድር ካፒታል ላይ የነበረው ገደብ መነሳቱ ምን ፋይዳ አለው? ማክሰኞ፣ ሐምሌ 7 ቀን 2018 ዓ.ም (#አዲስ_ማለዳ) የኢትዮጵያ ብሔራዊ ባንክ የገንዘብ ፖሊሲ ኮሚቴ 7ኛ ስብሰባውን ተከትሎ ባወጣው ጋዜጣዊ መግለጫ፤ ሌሎች ጉዳዮች እንደተጠበቁ ሆነው የብድር ጣራን ሙሉ በሙሉ ማንሳቱን አስታውቋል። ብሔራዊ ባንክ ቀደም ሲል ተግባራዊ ያደረገው የብድር ጣራን የመገደብ ፖሊሲ፤ በአዲስ ብድር አማካይነት የሚፈጠረውን የመግዛት አቅምና ፍላጎት ለመቆጣጠር አልፎም በብድር የሚፈጠረውን ተጨማሪ ገንዘብና የገንዘብ ዝውውር ፍጥነት በመገደብ የዋጋ ግሽበትን ለመቋቋም ያለመ ነበር። ተጥሎ የነበረው የብድር ገደብ መነሳቱን ተከትሎ በኢኮኖሚውና በማኅበረሰቡ ላይ ምን ዓይነት ተጽዕኖ ይኖረዋል? ስትል አዲስ ማለዳ የምጣኔ ሀብት ባለሙያዎችን አነጋግራለች። ይህን ጉዳይ በሚመለከት ያነጋገርናቸው የምጣኔ ሀብት ባለሙያው ቆስጠንጢኖስ በርኸተስፋ (ዶ/ር)፤ ከዚህ ቀደም የነበረው አሠራር ባንኮች ካላቸው የብድር ካፒታል ውስጥ 24 በመቶውን ብቻ እንዲያበድሩ የሚገድብ እንደነበር አስታውሰዋል። ይህ እርምጃ ብሔራዊ ባንክ የዋጋ ግሽበትን ለመቆጣጠር ሲል የገንዘብ ፍሰቱን ለመቀነስ ያደረገው ጥረት አካል እንደነበርም ገልጸዋል። በተጨማሪም ብሔራዊ ባንክ ለመንግሥት የሚሰጠውን ብድር ሙሉ በሙሉ በማቆም፣ አዲስ የታተመ ገንዘብ ወደ ገበያው እንዳይገባ ለማድረግ ባከናወነው ሥራ ከ30 በመቶ በላይ የነበረውን የዋጋ ግሽበት ወደ ነጠላ አኃዝ ማውረድ ተችሎ እንደነበር ጠቅሰዋል። ነገር ግን የ24 በመቶው የብድር ገደብ ለንግዱ ማኅበረሰብ ብድር እንዳይሰጥ በማድረጉ የሀገሪቱን ኢኮኖሚ እየጎዳው እንደነበርና ሁኔታዎችን ከማባባስ ውጪ የዋጋ ግሽበትን በዘላቂነት እንደማይቀንስ አስረድተዋል። “እርምጃው በሌላ በኩል በዋጋ ግሽበቱ ላይ በተወሰነ ደረጃ ተጽዕኖ ቢኖረውም፣ ለዋጋ ግሽበቱ ዋና ምክንያት ግን አይደለም” ብለዋል። የዋጋ ግሽበት በርካታ ምክንያቶች ያሉት መሆኑን የጠቀሱት ባለሙያው፤ ከእነዚህም መካከል በብር ዋጋ ማሽቆልቆል ምክንያት ከውጭ የሚገቡ ዕቃዎች መወደድ፣ የሀገር ውስጥ አምራቾችን በከፍተኛ ደረጃ የሚጎዳው የኮንትሮባንድ እንቅስቃሴ፣ ዕቃዎች ያለ ግብር ወደ ሀገር ውስጥ መግባታቸው፣ በሀገሪቱ ያለው አለመረጋጋት ለአምራቹ ዘርፍ እንቅፋት መሆኑ እና ሙስና በዋነኝነት የሚጠቀሱ መሆናቸውን አብራርተዋል። በሙስና ምክንያት በቀላሉ ከመንግሥት የሚዘረፍ ገንዘብ ገዢዎች የገበያውን ተጽዕኖ ተቋቁመው እንዲገዙ ስለሚያስችላቸው የዋጋ ንረቱን እንደሚያባብሰውና ሕገወጥ የገንዘብ ዝውውርም ሌላው ተጠቃሽ ምክንያት እንደሆነ ገልጸዋል። ስለዚህ የብድር ገደቡ መነሳቱ መልካም መሆኑን የገለጹት ባለሙያው፤ ባለሀብቶች ከባንክ መበደር በመቻላቸው የጀመሯቸውን ሥራዎች ለማጠናቀቅ እንደሚረዳቸው ጠቁመዋል። እንዲሁም የገንዘብ ፍሰት ሲጨምርና ኢኮኖሚው ሲነቃቃ የሚፈጠሩ የሥራ ዕድሎች እንደሚጨምሩ፣ በተለይም በኢንዱስትሪ፣ በማዕድንና በግብርና ዘርፍ እስካሁን ያልነበረ በርካታ ብድር ሊወጣ ስለሚችል እርምጃው ለኢኮኖሚው ትልቅ እንድምታ ያለውና ትክክለኛ ውሳኔ እንደሆነ ገልጸውታል። በሌላ በኩል ለአዲስ ማለዳ አስተያየታቸውን የሰጡት በአዲስ አበባ ዩኒቨርስቲ፣ የኢኮኖሚክስ ትምህርት ክፍል መምህር አጥላው አለሙ (ዶ/ር) በበኩላቸው፤ በሀገራችን ካለው ልምድና ታሪክ አንጻር ፖሊሲ ሲወጣና በተግባር ሲተረጎም የሚታየው ሁኔታ የማይጣጣም በመሆኑ፣ ተጽዕኖውን አስቀድሞ ይህ ነው ብሎ ለማብራራት እንደሚያስቸግር ገልጸዋል። ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦ YouTube ➲ t.ly/vSgS Telegram ➲ t.ly/SOXU Facebook ➲ t.ly/flx8 Twitter ➲ t.ly/mxA