Addis Maleda - አዲስ ማለዳ

“ፍረጃውን እንደ ሽልማት ነው የምቆጥረው” ጌታቸው ረዳ የኤርትራ መንግስት እና ህወሓት ስልጣናቸውን ለማስቀጠል የትግራይን ህዝብ ማስያዥያ “ኮላተራል” እያደረጉት ነው በማለት የጠቅላይ ሚኒሰትሩ አማካሪ ጌታቸው ረዳ ወነጀሉ ረቡዕ፣ ሀምሌ 1 ቀን 2018 ዓ.ም (#አዲስ_ማለዳ) የጠቅላይ ሚኒስትሩ የምስራቅ አፍሪካ ጉዳዮች አማካሪ ሚኒስትር ጌታቸው ረዳ፤ የህወሓት አመራር እና የኤርትራ መንግስት የራሳቸውን የፖለቲካ ህልውና ለማራዘም ሲሉ የትግራይን ህዝብ እንደ ማስያዥያ “ኮላተራል”እያደረጉት ይገኛል በማለት ከሰሱ። አማካሪው የህወሓትን ቡድን “የወንጀለኞች ኢንተርፕራይዝ” ብለው የጠሩት ሲሆን በኪም ጆንግ ኡን ከምትመራው ሰሜን ኮሪያ ጋር በማወዳደር፣ ከመሬት በተለቀመ መሳሪያ የሚታኮስ ቡድን ነው ሲሉ በይነውታል። የቀድሞው የህወሓት ምክትል ሊቀመንበር እና የአሁኑ የስምረት ፓርቲ ፕሬዝዳንት፣ እንዲሁም የጠቅላይ ሚኒስትሩ አማካሪ የሆኑት ጌታቸው ረዳ በትግራይ ክልል ላይ የደረሰውን ታላቅ ጥፋት በስልታዊ መንገድ የፈጸመውና የክልሉን የልማት ተቋማት ያደቀቀው የኤርትራ መንግስት ቢሆንም፣ የህወሓት አመራር ግን ዛሬ ላይ የራሱን ዕድሜ ለማራዘም ሲል ከዚሁ የኤርትራ አገዛዝ ጋር ጭምር አብሮ እየሰራ መሆኑን ተናግረዋል። ጌታቸው ህወሓት እየሄደበት ያለው መንገድ ከሰሜን ኮሪያም የባሳ መሆኑን አመልክተዋል፡፡ ከብሔራዊው ቴሌቪዥን ጣያ ጋር ቆይታ ያደረጉት ጌታቸው፤ “ከሰሜን ኮሪያ ጋር ማወዳደር ልክ አይደለም፤ ቢያንስ ሥርዓት ያለው መንግስት እኮ ነው፣ ሳይንስ ልማት ምናምን የሚያደርግ፣ አቅሙ በፈቀደው መጠን እኮ ምርምሮችን ውስጥ ይገባል፤ ዓለም ጋር ተወዳዳሪ ሊያደርጉት የሚችሉ ሚሳኤሎችን፣ ባልስቲክ ይሰራል።” ያሉት ጌታቸው መልስ ብለው ደግሞ ህወሓትን “ይሄኛው ከሰፈር በተለቀመ ጥይት ገጥሜ በሰው ማዕበል ዘመቻ መንግስት እቀይራለሁ ብሎ የሚያምን ከስህተቱ በተደጋጋሚ ሳይማር አሁንም ሌላ ስህተት ለመፈጸም የኔ ሞኖፖሊ ነው ብሎ የሚያምን ነው” ብለዋል። ህወሓት፣ “አፋኝ” በሚል የተገለጸ አዋጅ ከጥቂት ሳምንታት በፊት ማውጣቱ የሚታወስ ሲሆን ይህም ከሀገር ውስጥና ዓለምአቀፍ ተቋማት ጭምር ውግዘትን እንዲከተለው ማድረጉ አይዘነጋም፡፡ጌታቸውም፣ ህወሓት ህግ የማውጣት ስልጣን የለውም ባይ ናቸው። አማካሪው፤ ከገዢው ፓርቲ ጋር በመስራታቸው እንዴ ወንጀለኛ እና የትግራይን ህዝብ እንደከዳ እንደሚቆጠሩ አንስተው “እኔ እንደ በወንጀል መጠየቅ ያለብኝ ይሄን ወንጀለኛ ቡድን በወቅቱ ባለማጋለጤ ነው” ያሉ ሲሆን “የፈለጉትን ታርጋ ቢሰጡኝ እንዴ ሽልማት ነው የምቆጥረው” ብለዋል። ጌታቸው አክለውም የትግራይ ወጣቶች በሰላም መኖርና ሌላው የሀገሪቱ ክፍል ላይ እንደሚታየው የልማት ተጠቃሚ መሆን በሚፈልጉበት ወቅት የህወሓት አመራር ግን የራሱን ስልጣን ለማስጠበቅ ሲል ወጣቶችን በኃይል እያሰለፈ ይገኛል ሲሉ ከስሰዋል። ይባስ ብሎም “ስደተኞችን ለመጠበቅ በሚል” ሰበብ ወጣቶቹን እስከ ሱዳን ደማዚንና ኩርሙ ድረስ በመውሰድ በውጊያ ላይ እያስፈጃቸው ይገኛል ብለዋል። ይህ የጌታቸው የትናንት ምሽት ውንጀላ፣ ከትናንቱ የጠቅላይ ሚኒስትሩ የረፋድ ተመሳሳይ ውንጀላ ጋር እጅጉን የሚስማማ ነው፡፡ ጠቅላይ ሚኒስትር ዐቢይ አህመድ በትናንትናው ዕለት በተካሄደው የህዝብ ተወካዮች ምክር ቤት የመጨረሻ መደበኛ ስብሰባ፣ “ህወሓት የትግራይ ልጆችን እያፈሰ ለሱዳን እየሸጠ ነው” ሲሉ በተመሳሳይ መወንጀላቸው አይዘነጋም፡፡ የጠቅላዩ አማካሪ አክለውም የኤርትራ መንግስት ሁሉንም ነገር በጦርነት ለመፍታት በሚከተለው መመሪያ ምክንያት የሀገሪቱ ህዝብ ቁጥር በሚለዮን በሚቆጠር አውርዶ አፍሪካ ውስጥ ትልቁ የስደተኛ ምንጭ መሆኗን ጠቅሰው አሁን ላይ ህወሓት እየተከተለው ያለው “አምባገንናዊ” አካሄድም ትግራይን የኤርትራን እጣ ፈንታ እንድትደግም እያደረጋት ነው ሲሉ አስጠንቅቀዋል። ይህም በዚህ ከቀጠለ በቅርቡ ትግራይ በምስራቅ አፍሪካ በስደት ቀዳሚውን ደረጃ ትይዛለች ብለዋል። በትግራይ ህወሓት “ሕገ አራዊት” የሆነ ህግ አውጥቷል ያሉት ጌታቸው የትግራይን ወጣት ህይወት “ቅንጣት ታህል” አይቆጥሩትም በማለት የግዳጅ ምልመላን የሚቃወሙ ወጣቶች ላይ የተጣለውን የ50 ሺህ ብር ቅጣትና እስራት የያዘ ሰብአዊ መብትን ረገጣን የሚያበረታታ መሆኑን አመልክተዋል፡፡ የህወሓት ቡድን የትግራይን ህዝብ የህልውና አደጋ ላይ የጣለ እና “ከመወገድ ውጭ ሌላ ተስፋ የሌለው የወንጀል ኢንተርፕራይዝ” ነው በማለት የገለጹት አማካሪው ይህንን አጥፊ አካሄድ ለማስቆም የፌደራል መንግስቱ እና የትግራይ ሕዝብ ሚና ወሳኝ ነው ብለዋል። የፌደራል መንግስቱ የትግራይ ህዝብ የኢትዮጵያና የፌደሬሽኑ አካል መሆኑን በመቀበል ክልሉ ከዚህ ስቃይ የሚላቀቅበትን መንገድ ማፈላለግ አለበት ሲሉም ጥሪ አስተላልፈዋል። መንግስት እስካሁን ያሳየው ትዕግስት እንደተጠበቀ ሆኖ የትግራይ የፖለቲካ ኃይሎች ለውጥ ለማምጣት በሚያደርጉት እንቅስቃሴ ላይ በቀናነትና በደንብ በማገዝ የደጋፊነት ሚናውን መወጣት ይኖርበታል ሲሉ አሳስበዋል። ዋናው ለውጥ መምጣት ያለበት በራሱ በትግራይ ህዝብ እና በትግራይ የፖለቲካ ሀይሎች እንቅስቃሴ መሆኑን የገለጹት ጌታቸው የህውሃት ቡድን “አንድ አዳርም ቢሆን በስልጣን መንበር ላይ የሚቀጥልበት እድል” ሊዘጋ ይገባል ሲሉ ተናግረዋል። አክለውም ህወሓት ቢችል “ከፋኖ እና ሸኔ” ጋር በመሆን አዲስ አበባ መጥቶ ስልጣን መያዝ እንደሚፈልግ አንስተዋል። ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦ YouTube ➲ t.ly/vSgS Telegram ➲ t.ly/SOXU Facebook ➲ t.ly/flx8 Twitter ➲ t.ly/mxA