Addis Maleda - አዲስ ማለዳ

ግብፅ የባህር በር የሌላቸው ሀገራት በሚያደርጉት ስምምነት የንግድ ልውውጥ ተጠቃሚ ሊሆኑ እንደሚችሉ ገለጸች፤ በሌላ በኩል የባህር ዳርቻ የሌላቸው ሀገራት በቀይ ባህር ወታደራዊ ይዞታ እንዲኖራቸው እንደማትፈቅድ ዳግም አስታወቀች ዓርብ፤ጥቅምት 06 ቀን 2019ዓ.ም (#አዲስ ማለዳ) በቀይ ባህር ቀጣና ላይ መስፈር ያለበት ወታደራዊ ይዞታ እና የደኀንነቱ ጉዳይ የሚመለከተው የባህር ዳርቻ ያላቸውን ሀገራት ብቻ ነው አለች። ይሁን እንጂ በቀጣናው ላይ ኃያላን የሚባሉት የጦር ሰፈር እንዳላቸው ይታወቃል፡፡ የግብፅ የውጭ ጉዳይ ሚኒስትር ባድር አብደላቲ አሻርቅ ብሉምበርግ ከተሰኘ ብሮድካስት ጋር ባደረጉት ቃለ-መጠይቅ ግብፅ በቀይ ባህር  ላይ የባህር ዳርቻ የሌላቸው ሀገራት የሚያደርጉትን ማንኛውንም ወታደራዊ እንቅስቃሴ ፈጽሞ እንደማትቀበል መግለፃቸውን አህራም ኦንላይን ዘግቧል።   ሆኖም ግን ሚኒስትሩ  የባህር በር የሌላቸው ሀገራት  ከሚመለከታቸው ሀገራት ጋር በሚፈጽሙት ስምምነት መሰረት ለንግድ መስጠት እና መጠቀም ብቻ ይቻላል ብለዋል። አክለውም የቀይ ባህር አስተዳደር እና ደኀንነት ባለቤትነት የባህር ዳርቻው ሀገራት ብቻ መሆን አለበት ብለዋል። በተጨማሪም ከዚህ ቀደም የቀይ ባህር ወሰን ያላቸውን ስምንት ሀገራት ግብፅ፣ ሳዑዲ አረቢያ፣ ዮርዳኖስ፣ ሱዳን፣ ኤርትራ፣ ጂቡቲ፣ ሶማሊያ እና የመን ያቀፈውን ጥረት ለማጠናከር ከሳዑዲ ዓረቢያ ጋር ውይይት እያካሄዱ መሆናቸውን ጠቁመዋል። በተጨማሪም ካይሮ እና ሪያድ በባህር ደኀንነት ዙሪያም ተወያይተዋል ተብሏል። አሁን ላይ በሰሜን ኢትዮጵያ በተባበሰው ጦርነት፣ ግብፅ እጇእንዳለበት ኢትዮጵያ የከሰሰች ሲሆን ሳውዲ ዓረቢያ ደግሞ ኤርትራን እንደምትደግፍ ተዘግቧል፡፡ ሳዑዲ በሌላ በኩል ደግሞ ሁለቱን ሀገራት ለማሸማገል ጥያቄ መቅረቧ መዘገቡ ይታወሳል። ግብፅ የኢትዮጵያን የባህር በር ማግኘት በተደጋጋሚ ስትቃወም የቆየች ሲሆን ይህ የውጭ ጉዳይ ሚኒስትሩ ንግግርም ከዚሁ ጋር ስምም መሆኑን ለመረዳት ተችሏል፡፡ ግብፅ ይህን ትበል እንጂ በአፍሪካ ቀንድ የባህር ዳርቻ የሌላቸው የባህር ጠረፉ ላይ ወታደራዊ ተቋማት ያላቸው በርካታ ሀገራት አሉ። ካይሮ፤ ከዚህ ቀደም በአዲሱ ከተማ ባካሄደችው ስብሰባ ላይ በቀይ ባህር ላይ ተዋሳኞቹ እነርሱ ብቻ እንደሆኑ በመግለፅ በዓባይ ጉዳይ ግን ኢትዮጵያ የተናጠል ውሳኔ መውሰድ እንደማትችል ከሱዳን ሶማሊያ እና ኤርትራ ጋር በጋራ ባወጡት መግለጫ ማሳወቋ አይዘነጋም። ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦ YouTube ➲ t.ly/vSgS Telegram ➲ t.ly/SOXU Facebook ➲ t.ly/flx8 Twitter ➲t.ly/mxA