Ethiopian Enterprise Development (የኢትዮጵያ ኢንተርፕራይዝ ልማት)

በማኑፋክቸሪንግ ኢንተርፕራይዝ ዘርፍ የተመዘገቡ ተሞክሮዎችን የመቀመርና የማስፋፋት ስራ ተጠናክሮ እንደሚቀጥል ተገለፀ የኢትዮጵያ ኢንተርፕራይዝ ልማት የ«መርድ አበበ አሻንጉሊት ሥራ»ን ስኬታማ ተሞክሮ አጋርቷል EED (ሰኔ 17/2018 ዓ.ም) የኢትዮጵያ ኢንተርፕራይዝ ልማት ከ«መርድ አበበ አሻንጉሊት ሥራ» ማኑፋክቸሪንግ ኢንተርፕራይዝ የተገኘውን ምርጥ ተሞክሮ ለአዲስ አበባ ከተማ የቆዳና ጨርቃጨርቅ ማኑፋክቸሪንግ ኢንተርፕራይዞች አካፈለ። የምርጥ ተሞክሮ ቅመራውን ያቀረቡት በልማት መ/ቤቱ የጨርቃጨርቅ ዲዛይን ባለሙያ የሆኑት አቶ ታሪኩ አበበ በሰጡት ማብራሪያ ሀገሪቱ ከግብርና ወደ ኢንዱስትሪ የምታደርገውን የልማት ሽግግር ለማፋጠን የሞዴል ተቋማትን ተሞክሮ ማስፋት ወሳኝ መሆኑን ጠቁመዋል። ለስላሳ አሻንጉሊቶችና ትራሶችን የሚያመርተው መርድ አበበ የአሻንጉሊት ስራ ማኑፋክቸሪንግ ኢንተርፕራይዝ ካሉት 30 ቋሚ ሠራተኞች ውስጥ 90 በመቶ ያህሉን (27ቱን) ሴቶች በማድረግ ለአካባቢው ወጣቶች የሥራ ዕድል የፈጠረ ሲሆን፣ ለአሻንጉሊትና ትራስ መሙያነትም መልሶ ጥቅም ላይ የዋለ ፋይበር (Recycled Fiber) በመጠቀም ለአካባቢ ተስማሚ አሰራርን ዘርግቷል። በተጨማሪም ድርጅቱ የተለያዩ ማበረታቻዎችንና ምቹ የሥራ አካባቢን በመፍጠር የሠራተኞችን የመቅረት ምጣኔ ወደ 5 በመቶ ዝቅ ማድረግ ችሏል። ኢንተርፕራይዙ ከመንግሥት ያገኘውን የ40 ካሬ ሜትር ጠባብ የማምረቻ ሼድ በአግባቡ በመጠቀምና አዳዲስ የቴክኖሎጂ ማሽኖችን በሥራ ላይ በማዋል ምርታማነቱን አሳድጓል። ያጋጠሙትን የጥሬ ዕቃ እጥረትና የዋጋ ንረት ችግሮች ለመፍታትም ጨርቅን በቀጥታ ከዱከም ምስራቅ ኢንዱስትሪ ዞን በመግዛት የተረጋጋ የምርት ፍሰት የፈጠረ ሲሆን፣ ምርቶቹን ለማስተዋወቅና ሰፊ የገበያ ትስስር ለመፍጠር እንደ ቴሌግራም፣ ፌስቡክ፣ ቲክቶክና ኢንስታግራም ያሉ የዲጂታል ማህበራዊ ገጾችን በስፋት እየተጠቀመ ይገኛል። መርድ አበበ አሻንጉሊት ሥራ ያሳየው ጠንካራ የአደረጃጀት፣ የጥራት ቁጥጥርና የገበያ ስልት በማንኛውም አነስተኛና መካከለኛ ማኑፋክቸሪንግ ኢንተርፕራይዝ ሊወሰድ የሚገባ የላቀ አርአያ መሆኑን አቶ ታሪኩ አስገንዝበዋል። በመልካም ተሞክሮ ልውውጥ መድረኩ  ላይ ከተሳተፉ ማኑፋክቸሪንግ ኢንተርፕራይዝ ባለቤቶች መካከል የባህል አልባሳት አምራች የሆኑት ወ/ሮ ዘነበች ሰሎሜ እንደገለጹት የልምድ ልውውጥ መድረኩ ቀደም ሲል የነበሩባቸውን የአሰራር ክፍተቶች በግልጽ እንዲረዱ እንዳስቻላቸው ገልፀው ፤ በተለይም በስራ ገበታቸው ላይ ይገጥሟቸው የነበሩ ማነቆዎችን እንዴት መፍታት እንደሚችሉ አዳዲስ ግንዛቤዎችን ማግኘታቸውን ጠቁመዋል።   #ኢትዮጵያ_ታምርት #እኛም_እንሸምት #ለተጨማሪ_መረጃ የማህበራዊ ሚዲያ ገጾቻችንን ይጎብኙ! https://linktr.ee/ethiopianenterprisedevelopment