Ethiopian Enterprise Development (የኢትዮጵያ ኢንተርፕራይዝ ልማት)

በላብ፣ በፈጠራና በጽናት የሚረጋገጥ የኢኮኖሚ ሉዓላዊነት **** ኢትዮጵያ ሁለንተናዊ ብልጽግናዋን ለማረጋገጥ መነሻና መድረሻዋን ያደረገችው በራስ ውስጣዊ አቅም ማምረትን ነው። በዘመናዊው ዓለም ሉዓላዊነት በድንበር ጥበቃ አይወሰንም፤ ይልቁንም የዜጎችን መሠረታዊ ፍላጎቶች በገዛ እጅ በማሟላት፣ ከውጭ ጥገኝነት በመላቀቅና የኢኮኖሚ ነፃነትን በማጽናት ይገለጻል። የማምረት አቅም የሌለው ሕዝብ ነፃነቱ ለውጭ ተጽዕኖ የተጋለጠ በመሆኑ፣ ዛሬኢትዮጵያ በሁሉም መስኮች የምታካሂደው የኢንዱስትሪና የምርታማነት ጉዞ የህልውናችን፣ የክብራችንና የታላቅነታችን መሰረታዊ ምሰሶ ነው። ባለፉት ዓመታት የተተገበሩት ሀገር በቀል የኢኮኖሚ ማሻሻያዎችና የ«ኢትዮጵያ ታምርት» ንቅናቄ፣ ሀገራዊ ኢኮኖሚያችንን ከጥሬ ዕቃ አቅራቢነትና ከሸማችነት ስነ-ልቦና ወደ አምራችነትና ፈጣሪነት እያሸጋገሩት ይገኛሉ። በተለያዩ ውስጣዊና ውጫዊ ማነቆዎች ምክንያት ተዳክመውና ሥራ አቁመው የነበሩ በርካታ ፋብሪካዎች ዳግም ወደ ምርት እንዲመለሱ መደረጉ እንዲሁም አዳዲስ አነስተኛ፣ መካከለኛና ከፍተኛ ኢንዱስትሪዎች በስፋት መፈጠራቸው የዚህ ታሪካዊ መዋቅራዊ ሽግግር ማሳያ ነው። በልዩ የኢኮኖሚ ዞኖች ዉስጥ የሀገር ውስጥ ባለሀብቶች ተሳትፎ በከፍተኛ ደረጃ እየጎለበተ መምጣቱ፣ ሀገራዊ ብልጽግናችን በልጆቻችን ክንድ፣ ካፒታልና ዕውቀት እየተገነባ መሆኑን ያረጋግጣል። ግብርናን ከኢንዱስትሪ ጋር በማስተሳሰር በምግብ እህል፣ በተለይም በስንዴ ምርት ራስን ከመቻል አልፎ፣ በፋብሪካዎች እሴት የተጨመረባቸው የግብርና ውጤቶችን ለውጭ ገበያ ማቅረብ መጀመራችን የኢኮኖሚ ሉዓላዊነታችንን ወደ አዲስ ምዕራፍ አሸጋግሮታል። ይህ የውስጥ የማምረት አቅምን የማጎልበት ጉዞ ከዓለም አቀፍ ተለዋዋጭ ሁኔታዎች አንጻር ሲመዘን ስትራቴጂካዊ ትርጉሙ ይበልጥ ይገዝፋል። በመካከለኛው ምስራቅና በቀይ ባሕር ቀጠና የሚታየው ጂኦ-ፖለቲካዊ ውጥረት እንዲሁም ዓለምን ያናወጡ የጤናና የንግድ ሰንሰለት ቀውሶች፣ በውጭ አቅርቦት ላይ የተንጠለጠለ ሀገር ምን ያህል ለአደጋ እንደሚጋለጥ በተግባር አስተምረውናል። ኢትዮጵያ እነዚህን ዓለም አቀፍ ፈተናዎች ወደ ቁጭት፣ የፈጠራ አቅምና ታሪካዊ ዕድል በመቀየር፣ የውጭ ጥገኝነትን የሚቀንስ የማይበገር የኢኮኖሚ ምሽግ በመገንባት ላይ ትገኛለች። ከጸጥታና መከላከያ አካላት አልባሳት እስከ ግብርና ግብዓቶች፣ ከመድኃኒትና የሕክምና መገልገያዎች እስከ ውስብስብ የኢንጂነሪንግ፣ የብረታብረትና የኮንስትራክሽን ቁሳቁሶች ድረስ በሀገር ውስጥ በመተካት፣ ከፍተኛ የውጭ ምንዛሬ ማዳን፣ የኑሮ ውድነትን ማቃለልና ለዜጎች ሰፊ የሥራ ዕድል መፍጠር ተችሏል። ከዚህም ባለፈ፣ ሁለንተናዊ ብልጽግናን የማረጋገጡ ሂደት ከዘመኑ የቴክኖሎጂ ዕድገትና ከአረንጓዴ ልማት ጋር በጥብቅ የተቆራኘ ነው። የማኑፋክቸሪንግና የግንባታው ዘርፍ ከባሕላዊና አዝጋሚ አሠራር ተላቆ፣ ፍጥነትንና ጥራትን ባጣመሩ ዘመናዊ የግንባታ ቴክኖሎጂዎች እንዲሁም በዲጂታል የፕሮጀክት አስተዳደር ሥርዓቶች እየታገዘ የከተሞቻችንንና የኢኮኖሚያችንን ገጽታ በፍጥነት እየቀየረው ይገኛል። ይህንን የማምረት አቅም ከፍታ በዓለም አቀፍ የጥራት መመዘኛዎች ለማስደገፍ የተገነባው የጥራት መሠረተ ልማት ሀገራዊ ምርቶቻችን የውጭ ሸቀጦችን ከመተካት ባለፈ «የኢትዮጵያ ይሸጥ» በሚል እሳቤ በዓለም ገበያ ተወዳዳሪ እንዲሆኑ የሚያስችል መተማመኛ ፈጥሯል። በአጠቃላይ የኢትዮጵያ የኢንዱስትሪና የማምረት ጉዞ ከፋብሪካ ግንባታና ከሸቀጥ ግብይት የዘለለ፣ የሀገርን ክብር የመመለስና የትልቅ ሕዝብን ታላቅ ርዕይ የማሳካት የታሪክ ግዴታ ነው። አሁንም ግን በተለያዩ ዘርፎች የሚስተዋሉ ተግዳሮቶችን በጠንካራ የሕግ ማዕቀፍ፣ በቴክኖሎጂ ሽግግር፣ የንግድ መስመሮችን አማራጭ በማስፋትና በመንግሥትና በግሉ ዘርፍ የጠበቀ አጋርነት መሻገር ይጠበቅብናል። የራሳችንን አምርተን፣ በራሳችን ምርት ተኩራርተንና የውስጥ አቅማችንን አሟጠን ስንጠቀም የብልጽግና ጉዟችን በየትኛውም ዓለም አቀፍ ማዕበል የማይናወጥ ይሆናል። ትልቅ ሀገርና ትልቅ ሕዝብ ይዘን የሰነቅነው ታላቅ ርዕይ በተሟላ ሁለንተናዊ ብልጽግና እውን የሚሆነው፣ በእያንዳንዱ ዜጋ የላብ ጠብታ፣ የፈጠራ ክህሎትና የማምረት ጽናት የኢኮኖሚ ነፃነታችንን በገዛ እጃችን መጻፍ ስንችል ነው፡፡ የኢቢሲ ዶትስትሪም ኤዲቶሪያል ​#ኢትዮጵያ_ታምርት #እኛም_እንሸምት ለወቅታዊ መረጃዎች የማህበራዊ ሚዲያ ገጾቻችንን ይከታተሉ፦ https://linktr.ee/ethiopianenterprisedevelopment