علم و کتاب

اس پر یاد آیا کہ ایک بڑے عالم حدیث گزرے ہیں شیخ محمد ناصر الدین البانی رحمۃ اللہ علیہ، خوش قسمتی سے اس ناچیز کو آپ کی مجالس میں بیٹھنے کا شرف ملا ہےاور ان لوگو ں کی بھی رفاقت رہی ہے جنہوں نے آپ کو دمشق کے تاریخی مکتبہ ظاہریہ میں قلمی کتابوں اور مخظوطات میں سرکھپاتے دیکھا ہے، یہ لوگ بتاتے ہیں کہ شیخ صبح سویرے کتب خانے آتے اور شام کو اس کے بندہونے تک روزانہ پابندی سے دھول اور غبار سے اٹی الماریوں کے بیچ بیٹھتے، اس دوران دوپہر میں دو ایک سینڈویچ آپ کا ظہرانہ ہوتا، علمی میدان میں آپ کی کامیابی کا راز یہ بتایا جاتا ہے کہ آج سے پچاس ساٹھ سال قبل، ایک ایسے دور میں جب کہ مکتبہ ظاہریہ کا زیادہ تر علمی مواد زیور طبع سے آراستہ نہیں ہوا تھا اورابھی کتابوں کے اشارئیے عام نہیں تھے، ”المعجم المفھرس لالفاظ الحدیث“ جیسی اس موضوع پر ابتدائی کتابیں ابھی ابھی چھپنی شروع ہوئی تھی اور سالہا سال میں کبھی اس کی بھی ایک ایک جلد چھپتی تھی، شیخ البانی نے ظاہریہ کے حدیثی مخطوطات میں محفوظ ذخیرہ حدیث کا اشاریہ اپنے لئے تیار کیا،جو اندازاً بیس جلدوں پر مشتمل تھا، لہٰذا جب شیخ البانی نے ”سلسلۃ الاحادیث الصحیحہ “ اور”سلسلۃ الاحادیث الضعیفہ“ وغیرہ میں ان مخطوطات کے ذخیروں سے ایسی روایات اور اسانید نقل کیں جو ابھی تک ان قلمی کتابوں کے دفتروں میں محفوظ تھیں تو علم حدیث کے متوالوں کی آنکھیں خیرہ ہوکر رہ گئیں اور پھر شیخ البانی ؒ کی رہنمائی اور نشاندہی پر سنہ ساٹھ(۶۰ء) کی دہائی سے علم حدیث کے خزانوں پر مدتوں سے ڈھکی دھول ہٹنے لگی تو ان پر تحقیقی کام کرنے والے طلبہ اور محققین کا ایک تانتا لگ گیا، ان پر کام کرنے کے لئے ماجستیر اور دکتوراہ کے طلبہ کی ہمت افزائی کی گئی اور گزشتہ نصف صدی میں حدیث کی وہ وہ کتابیں معیاری طباعت کے ساتھ منظر عام پر آئیں، جن کے لئے ہمارے اسلاف کی آنکھیں ترس گئی تھیں،شیخ البانی ؒ کی بعض آراء اور افکار سے لاکھ اختلاف کے باوجود آپ کے اس کنٹریبیو شن کو بھلایا نہیں جاسکتا۔ حدیث شریف قرآن کریم کی تفسیر ہے، اس کے مطالعہ کے ضمن میں ایک مصنف نے اس بات کی ضرورت کا احساس دلایا ہے کہ قاری کو قرآن شریف کی طرح حدیث کی بھی موضوعاتی فہرست بنانی چاہئے جس میں ایک موضوع کی حدیثیں یکجا کی جائیں اور ان ذیلی عنوانات کے تحت ان کی فنی ترتیب کا خیال رکھا جائےتاکہ بوقت ضرورت آپ ان سے استدلا ل کرسکیں۔ اس کے اہتمام سے بھی آپ کے حافظے میں ازبر کرنے کی شعوری کوشش کے بغیر بہت ساری حدیثیں یکجا ہوجائیں گی اور تھوڑی سی تحریک سے یاد آجایا کریں گی۔ قرآن وحدیث کا علمی و دعوتی مواد ترتیب دینے کا یہ کام زندگی بھر جاری وساری رہنا چاہئےاور وقتا فوقتا اس کی تدوین وترتیب جاری رہنی چاہئے، کیونکہ یہ کوئی مستقل تصنیف نہیں ہوگی، بلکہ یہ مواد ، مضامین اور تصنیف و تالیف میں خام مال کی حیثیت رکھے گا۔ اپنی موضوعاتی فہرست خود بنانے کا بڑا فائدہ یہ بھی ہے ہر شخص کا اپنا ایک پس منظر اور فکر کا زاویہ ہوتا ہے، دعوتی اور فکری دلچسپیاں بھی الگ الگ ہواکرتی ہیں، لہٰذا ایک محنتی قاری کی نظرمیں اس قسم کی بہت سی تیار شدہ فہرستیں بڑی بے جان سی محسوس ہوتی ہیں جیسے مستشرق جول لابو م کی کتاب” تفصیل آیات القرآن“اور مستشرق فینسک کی کتاب” مفتاح کنوز السنۃ“ قرآن و حدیث کی فنی لحاظ سے بہترین اور بے مثال موضوعاتی فہرستوں میں شامل ہونے اور بہت مفید ہونے کے باوجود، قرآن وحدیث جو دعوتی روح ایک انسان میں پیدا کرتے ہیں، ان میں اس کا احساس نہیں ہوپاتا۔ قرآنی تعلیمات کو ذہن مین پختہ طور پر جاگزیں کرنے کا ایک طریقہ یہ بھی ہے کہ تفاسیرقرآن کا اجتماعی طور پر موازناتی مطالعہ کیا جائے، اس طرح کہ کئی ایک باذوق احباب مقررہ دنوں میں یکجا ہوں، ان پر مختلف تفسیریں تقسیم کی جائیں اور ہر ایک سے مقررہ آیات کی تفسیر بہ آواز بلند سنی جائے، موازناتی مطالعہ سے مضمون بڑی پختگی سے ذہن نشین ہوکر یاد رہتا ہے۔ ۱۹۸۰ء کی دہائی میں چند احباب کے ساتھ اجتماعی مطالعہ کتب تفسیر کا یہ سلسلہ ہم لوگوں نے شروع کیا تھا، اب کئی ایک جگہوں سے ان سلسلوں کے جاری ہونے کی اطلاعات ملنے لگی ہیں۔ جاری علم وکتاب https://whatsapp.com/channel/0029Vahcr7L4NVitnhxGr60B