علم و کتاب

*سچی باتیں (10؍مارچ 1941ء)… فوج اور قحبہ خانے* *از: مولانا عبد الماجد دریابادیؒ*   گیارہوں اور بارہویں اور تیرہویں صدی مسیحی کا زمانہ ہے، اور دنیائے مسیحیت ایک شدید مذہبی بحران میں مبتلا۔ انگلستان اور فرانس اور وسطی ومشرقی یورپ کے سارے بڑے اور چھوٹے ملکوں پر یہ جوش جنوں طاری کہ جس طرح بھی ممکن ہو ، ہلہ کرکے اور یلغار کرکے بیت المقدس کو، مولد مسیحؑ، کو ’’ظالم وکافر‘‘ مسلمانوں کے ہاتھ سے، چھین لیاجائے، ’’محامڈنز‘‘ کے پنجہ سے آزاد کرالیاجائے۔ بوڑھے اور لڑکے، جوان اور نوجوان، سب کے سب سپاہی بنے ہوئے، پیدل اور سوار، فوجی کوچ مقام کرتے ہوئے فلسطین کی جانب رواں۔’’ارض مقدس‘‘ تثلیث وتوحید مسیحیت واسلام کی مستقل رزمگاہ! تثلیث کے اس ٹڈی دل لشکر کے اعداد تو تاریخ کی کتابوں میں درج ہیں، اور ’’محاربات صلیبی‘‘ (کروسیڈس) کی تاریخ سے پڑھے لکھوں میں ناواقف ہی کون ہے؟ یہاں کہنے کی بات صرف اس قدر ہے، کہ مسیحی مجاہدوں اور صلیبی سپاہیوں کے جلوس میں ایک اور مستقل فوج بیسواؤں کی تھی، اور اُن کی تعداد 30ہزار تھی!……یہ حال اس لشکر کا تھا، جو تمامتر دینی جذبۂ وجوش کے ماتحت ہوئی تھی! دنیا ، مہذب دنیا نے اور ترقیاں کیں۔ سائنس کی، علم کی، تہذیب کی، ترقیون کے نقارہ سے عالم کی فضا گونچ اُٹھی۔ بیسویں صدی عیسوی کے تیسرے عشرہ کے آخر میں مہذب وشائستہ اٹلی نے، اَن پڑھ، وحشی اور گنوار حبشہ پر چڑھائی کردی۔ دولاکھ مرد ،بغیر عورت کے رہ کیسے سکتے تھے؟ علم پرور شائستگی نواز، حکمت دوست، سرکار اٹلی کا حکم ہوا کہ ایک گرجا کے عین مقابل ایک باضابطہ قحبہ خانہ (چکلہ) قائم کردیاجائے! تعمیل ہوئی۔ بڑے افسروں، چھوٹے افسروں، سپاہیوں، سب کے لئے، گراں اور ارزاں، الگ الگ نرخ نامے مقرر کردئیے گئے، اور سب کے لئے صبح، دوپہر، شام اور رات کے گھنٹوں کے الگ الگ اوقات متعین ہوگئے!……بہت آپ لئے پھرتے ہیں’’غزا‘‘ اور ’’جہاد‘‘ کے لئے جنت اور جنت کے حور وقصور کو، کبھی خواب میں بھی نصیب ہوئی ہیں آپ کو ہوسناکیوں کی یہ فوری لذتیں یا لعنتیں؟ 1914ء تا 1918ءکی مشہور جنگ عظیم برپاہے۔ خاتمہ پر معلوم ہوتاہے کہ امراض خبیثہ میں مبتلا ہونے والے بہادروں اور جواں مردوں کے اعداد حسب ذیل ہیں:- برطانوی فوج میں    3لاکھ۔ آسٹروی فوج میں     7لاکھ اور 8لاکھ کے درمیان (صرف 18ء کے اعداد)۔ فرنچ فوج میں 16لاکھ! جرمن اور اتحادی دونوں مورچوں کے عقب میں سرکاری قحبہ خانوں کے مستقل انتظامات رہتے تھے۔ قرب وجوار کا ہرشہر اور ہر قصبہ اس ’’کارخیر‘‘ کے لئے وقف۔ راستہ کے ویرانے ، اُجاڑ مکانات، تباہ شدہ قلعے، سب اسی کی نذر! ہوٹلوں میں چائے خانوں میں، کھانے کی میزوں پر شراب کے ساتھ ساتھ اِس جنس عصمت کے نرخ نامے بھی باضابطہ درج! وقت مقرر، اُجرتیں مقرر!……گویا جس طرح فقہاء کے ہاں ایک اصطلاح آتی ہے، کفر دون الکفرکی، یعنی کفر کے علاوہ ایک اور کفر کی۔ اُسی طرح ہر فوج کے پیچھے ایک اور فوج! ایک فوج سپاہیوں کی، دوسری فوج روسیاہیوں کی!……ہے عرب قدیم کی تہذیب جاہلی میں بھی ہمت جدید تہذیبِ جاہلی سے مقابلہ کی؟……تفصیلات اس سے کہیں بڑھ بڑھ کر گندی اور مکروہ درج ہیں۔ انگل پِرشتEngle Prechtکی کتاب Report Against Warمیں۔ صفحات 137و 136 ، 142۔ 145 وغیرہا۔ صدقؔ میں ہمت سب کی نقل کی کہاں سے لائی جائے! Https://telegram.me/ilmokitab