علم و کتاب

سچی باتیں (27؍جنوری 1941ء)۔۔۔ قدیم جاہلیت تحریر: مولانا عبد الماجد دریابادیؒ پچھلی عیسوی صدی کے ثلث آخر کے مشاہیر یورپ میں ایک صاحب پروفیسر رابرٹسن اسمتھ ہوئے ہیں، کیمبرج یونیورسٹی میں عربی زبان کے استاد تھے، اور عرب ومتعلقات عرب پر ان کی تحقیق آج تک مستند چلی آتی ہے۔ سامی مذہب پر متعدد فاضلانہ لکچر دئیے۔ ان کا مجموعہ بعد کو Religion of the Semitesسامیوں کا مذہب، کے عنوان سے شائع ہوگیا۔ باب دوم کے آغاز میں لکھتے ہیں:- ’’جیسا کہ اوپر معلوم ہوچکاہے، ادیان قدیم کا بجائے مجموعۂ معتقدات ومسائل کے ایک رواج یا دستور کہنا زیادہ صحیح ہوگا۔ قدیم مذہب ایک جزو ہوتاتھا اُسی نظام معاشرت کا جس کے ماتحت اس کے پیرو رہاکرتے تھے۔ اس لئے قدیم مذاہب کے ساتھ لفظ ’’سسٹم‘‘ کا استعمال صرف اسی معنی میں درست ہے جیسے کسی سیاسی ’’سسٹم‘‘ کا ذکر کیاجاتاہے، نہ اس معنیٰ میں کہ ان مذاہب کے کچھ مخصوص عقائد اور اصول تھے۔ عام طور پر یہ سمجھئے کہ مذہب نام تھا چند اعمال ورسوم کا جن کے صحیح ادا کرنے پر مدارتھا دیوتاؤں کی خوشی اور ناخوشی کا۔اور ان مراسم میں شرکت پر ہر شخص اس بنا پر مجبور تھا کہ وہ پیدا اُسی خاندان یا اُس قبیلہ میں ہوا ہے ، یا یہ کہ اُسے فلاں مرتبہ یا منصب حاصل ہے۔ اپنے ارادہ اور پسند سے مذہب اختیار کرنے کے کوئی معنیٰ نہ تھے۔ مذہب تو گویا ورثہ میں مل ہی جاتاتھا جیسے اور خاندانی رسم ورواج ملتے تھے۔ اور ہر فرد کوکم وبیش مذہبی ہوناہی پڑتاتھا، جیسے آج ہرشخص کو کم وبیش وطن کا خیال رکھنا ہی پڑتاہے‘‘۔ (ص: 28) گویا دین جاہلی کوئی جسم متحرک نامی، زندہ تھا ہی نہیں، ایک جامد مردہ لاشہ تھا۔ ایک مجموعہ تھا دستوروں، رسموں، رواجوں کا۔ نہ عقل سے کوئی تعلق تھا، نہ عقل اعلیٰ یا وحی سے۔ ہر قوم یا قبیلہ میں ایک بنابنایا سانچہ۔ کچھ عقائد ورسوم کا پشتہا پشت سے چلاآتا رہتاتھا، قوم یا قبیلہ میں جو بچہ آنکھ کھولتا، وہ طبعًا واضطرارًا اُن ہی کی آبائی رسوم وعقائد کی راہ پرپڑلینا۔ دخل نہ اس میں کسب واختیار کوہوتا نہ غور وتدبر کو۔ اسی لئے اس جاہلی تخیل میں کسی نئے مذہب کے قبول واختیار کرنے اور قدیم مذہب کو ترک کرنے کے کوئی معنی ہی نہ تھے……دانایان فرنگ تو اس نتیجہ تک اب پہونچے ہیں۔ قرآن ساڑھے تیرہ سو چودہ سو برس ہوئے اس ذہنیت کو دین جاہلی کے سلسلہ میں ماوجدنا علیہ آباء نا، ما ألفینا علیہ آباء نا ، ما سمعنا بھذا فی آباء نا الأوّلین وغیرہ مختلف عنوانات کے ذریعہ سے روشناس کرچکاہے۔ تیرہ سو برس کے بعد ہَوا پھر وہی چلی ہے۔ ’’روشن خیالوں‘‘ نے دین کو ایک ’’موروثی‘‘ ’’آبائی‘‘ چیز سمجھ لیاہے۔ اور دین کی زندہ حقیقت کو ’’قوم‘‘ کی مُردہ رسمیت کے اندر گم کردیاہے۔ مذہب کا جاہلی تخیل نئے سرے سے زندہ ہواہے بس مسلمان کے گھر میں پیدا ہوجانا اور مسلمان کا سا نام رکھ لینا بالکل کافی ہے۔ قانون اسلام کے بہترین شارحین اور Juristsپر دل کھول کر مضحکہ کیجئے، احادیث رسولؐ ورجال کی جانچ پرتال میں عمریں صرف کردینے والے محدثین بلکہ رسول کے صحابیوں تک پر بازاری زبان میں پھبتیاں کسئے، اقوالِ رسول کی حجیت سے انکار کردیجئے، قرآن کی تعلیمات سے بے کھٹکے انکار کرتے چلے جائیے، یہ کہتے جائیے کہ اسلام کا قانونِ سود قابلِ ترمیم ہے، شریعت کا قانون وراثت قابل تنسیخ ہے، ضابطۂ فوجداری ناقابل عمل ہے، قرآن کے زبان کو، قرآن کے رسم الخط کو بس چلے تو جرم قرار دے دیجئے، رسولؐ کی زبان میں اذان اور نماز دونوں کی ممانعت کردیجئے، گھر کی عورتوں کو بے نقاب اور بے حجاب باہر نکالئے، لباس اُنھیں نیم برہنہ پہنائیے، ان کے جسم کی زینتوں کو نمایاں سے نمایاں تر کیجئے، گانے کو ، بجانے کو ، ناچنے کو، اداکاری کو نصاب تعلیم کا جزو بنائیے۔ فخر اپنے دین پر نہیں، اپنے وطن پر کیجئے،اور جب کوئی احتساب پر آمادہ ہو، تو اُس کا منہ یہ کہہ کر نوچ لیجئے، کہ ’’تم ہوتے کون ہو ہمارے ایمان، ہمارے اسلام میں شک کرنے والے،ہمارے عقائد پر جرح کرنے والے؟ دیکھتے نہیں ہو کہ ہمارا نام مجتبیٰ جمال ہے، عبد التواب ہے، علی رضا ہے، اور دیکھتے نہیں ہو کہ ہم کتنے کام مسلمانوں کی فلاح وبہبود کے کرچکے ہیں، اور ملّت کی راہ سے کتنی دشواریاں دور کرچکے ہیں! گویا جس طرح پیدائشی برہم سے برہمنیت اور شودر کے گھر میں پیداہوجانے والے سے شودریت کسی طرح الگ نہیں ہوسکتی، اسی طرح اسلام ہے، کہ مسلمان کے گھر میں پیدا ہوجانے والے کے ساتھ ہرحال میں چمٹا ہی رہتاہے!……چور کو اتنا اقتدار کوتوال پر، اس دَور سے قبل، کبھی کیوں حاصل ہواہوگا؟ https://whatsapp.com/channel/0029Vahcr7L4NVitnhxGr60B