ማኅበረ ቅዱሳን ዋናው ማእከል

በማኅበረ ቅዱሳን የቡርጂ ወረዳ ማእከል በዳሻቴ  ቋንቋ የተተረጎሙ 62 መዝሙራትን አስመረቀ ሰኔ ፭/፳፻፲፰   ዓ.ም በማኅበረ ቅዱሳን ዲላ ማእከል የቡርጂ ወረዳ ማእከል ስብከተ ወንጌልና ዜማ አገልግሎት ዋና ክፍል አስተባባሪነት ከአማርኛ ወደ ዳሻቴ ቋንቋ ተተርጉመው የተዘጋጁ 62 መዝሙራት በቡርጂ ዞን በሶያማ ደብረ ሣህል ቅድስት ሥላሴ ቤተ ክርስቲያን አስመርቋል። በምረቃ መርሐ ግብሩ የወረዳ ቤተ ክህነት የሥራ ኃላፊዎች፣ መምህራንና፣ ዘማሪያን ፣ የደብሩ ካህናት እና ሰበካ ጉባኤ አባላት እንዲሁም የሰ/ት/ቤት አባላትና ምእመናን  ተገኝተዋል። በጉባኤው በዋና ማእከል ደረጃ ተመርጠው ከተሰጡ 120 መዝሙራት መካከል ለ8 ወራት  የትርጉምና የዜማ ጥናት ሥራ ተጠናቆ ለኅትመት የበቁትን 62  መዝሙራት በዜማ ወጥበብ ስቱዲዮ ቀረጻና ቅንብር ሥራ በማጠናቀቅ ለምረቃ የተዘጋጁ መሆኑን በቀረበው ሪፖርት የተገለጸ ሲሆን  የትርጉም ሥራው  ዋና ዓላማ የቤተ ክርስቲያንን ትምህርት ምእመናን በአፍ መፍቻ ቋንቋቸው እያደመጡ እግዚአብሔርን እንዲያመሰግኑበትና የወንጌል አገልግሎት ይበልጥ እንዲስፋፋ ለማድረግ ነው ተብሏል። በዕለቱ በመርሐ ግብሩ የተገኙ የወረዳ ቤተ ክህነቱ የሥራ ኃላፊዎች እንደገለጹት በአካባቢያችን ስብከተ ወንጌልን  ምእመናን በሚሰሙት ቋንቋ ተደራሽ ለማድረግ  የሚያግዝ በመሆኑ ማኅበሩን   ያመሰገኑ ሲሆን  ሁሉም ደብራት፣ አጥቢያ ቤተ ክርስቲያናት፣ ሰበካ ጉባኤና ሰ/ት/ቤቶች  መዝሙሩን በማስጠናትና ተደራሽ በማድረግ ምእመኑ  ሃይማኖቱን እንዲያውቅ እንድታደርጉ በማለት አሳስበዋል።   በመጨረሻም  በአባቶች ቡራኬ  የመዝሙር ምረቃው የተከናወነ ሲሆን በዚህ ሥራ ላይ ከጅምሩ እስከ ፍጻሜ በመሳተፍ የበኩላቸውን አስተዋፅኦ ላደረጉ አካላት   ምስጋና በማቅረብ የምስክር ወረቀት ተሰጥቷቸዋል።