ዝማሬ ዳዊት - Zemare Dawit

ሐምሌ ፲፬ /14/

በዚች ቀን የጌታ ክርስቶስ ጭፍራ ቅዱስ አብሮኮሮንዮስ በሰማዕትነት አረፈ። የዚህም ቅዱስ ትውልዱ ከኢየሩሳሌም ነው የአባቱ ስም ክርስቶፎሮስ ነው ትርጓሜውም ክርስቶሰን የለበሰ ማለት ነው ። ክርስቲያንም ነበረ የእናቱም ስም ቴዎዶስያ ነው እርሷ ግን ጣዖታትን ታመልክ ነበረች። አባቱም በአረፈ ጊዜ እናቱ ወስዳ ለዲዮቅልጥያኖስ ሰጠችው እርሱም ክርስቲያኖችን እንዲያሳድድ አዘዘው። በመንገድም ሳለ ከሰማይም ክርስቲያኖችን ካሳደደ ክፉ አሟሟት እንደሚሞት ሰማ። ክርስቶስም እራሱን ገለጸለት። ከዚህ በኋላ በክርስቶስ አምኖ የወርቅ መስቀል አሰርቶ ወደ እስክንድርያ ተጓዘ። በመንገድም በመስቀሉ ድል አደረገበት። በመጨረሻ ለዲዮቅልጥያኖስ ስለ እርሱ ነገሩት እርሱም በብዙ አሰቃየው እግዚአብሔር ከሁሉ አዳነው። በዚያ የነበሩ ሕዝቡም አይተው እጅግ አደነቁ እንዲህም እያሉ ጮኹ እኛ በግልጥ ክርስቲያን ነን በቅዱስ አብሮኮሮንዮስ አምላክ እናምናለን። ከእነርሱም ጋራ ሁለት መኳንንትና ዐሥራ ሁለት ሴቶች እናቱ ቴዎዶስያም ነበሩ መኰንኑም ራሶቻቸውን በሰይፍ እንዲቆርጧቸው አዘዘ። እነርሱም ቆረጡአቸው። በመንግሥተ ሰማያትም የሰማዕትነት አክሊልን ሐምሌ ስድስት ቀን ተቀበሉ። ቅዱስ አብሮኮሮንዮስን ግን እንደገና ብዙ ከአሰቃዩት በኋላ መኰንኑ ራሱን በሰይፍ ይቆርጡ ዘንድ አዘዘና ቆረጡት በመንግሥተ ሰማያትም የሰማዕትነት አክሊልን ተቀበለ። ወስብሐት ለእግዚአብሔር ምንጭ:- መጽሐፈ ስንክሳር 💚 @ortodoxmezmur 💚 💛 @ortodoxmezmur 💛 ❤️ @ortodoxmezmur ❤