DW Amharic

ጅቡቲና የአውሮፓ ኅብረት፣ በቀይ ባሕር ለሚቀዝፉ መርከቦች የሕብረቱ ባሕር ኃይል ለሚያደርገዉ ጥበቃ ቁልፍ ጠቀሜታ አለው የተባለ ሥምምነት ተፈራረሙ። ሥምምነቱ ሑቲዎች በቀይ ባሕር ላይ የሚፈጽሟቸውን ጥቃቶች የመመከት ኃላፊነት የተጣለበት ዘመቻ “አስፒደስ” አካል ነው። ከጅቡቲ ውጭ ጉዳይ ሚኒስትር አብዱልቃድር ሑሴን ኦስማን ጋር የአውሮፓ ኅብረት የውጭ ግንኙነት ኃላፊ ካያ ካላስ ሥምምነቱን የተፈራረሙት ትላንት ሐምሌ 9 ቀን 2018 ነው። የኅብረቱ ከፍተኛ ዲፕሎማት ሥምምነቱን የሚመፈራረሙት ከውጭ ጉዳይ ሚኒስትር አብዱልቃድር በተጨማሪ የጅቡቲ መከላከያ ሚኒስትር ከነበሩት ሐሰን ኦማር ሞሐመድ ቡርኻን ጋር እንደሚሆን ተገልጾ ነበር። ይሁንና ትላንት ሐሙስ ጠዋት የመከላከያ ሚኒስትሩ በፈረንሳይ ዋና ከተማ ፓሪስ በሕክምና ላይ ሳሉ ከዚህ ዓለም በሞት ተለይተዋል። የጅቡቲ ፕሬዝደንት ኢስማኤል ዑመር ጉሌሕ የቀድሞው መከላከያ ሚኒስትር “አገር ወዳድና ታማኝ የሕዝብ አገልጋይ” እንደነበሩ ገልጸዋል። ጅቡቲ ወታደራዊ ሥምምነት ከአውሮፓ ኅብረት ስትፈራረም ላለፉት ስምንት ገደማ ዓመታት መከላከያ ሚኒስትር በነበሩት ሐሰን ኦማር ሞሐመድ ቡርኻን ምትክ ተጠባባቂ ሆነው ኃላፊነቱን የተረከቡት ኦማር አብዲ ሰዒድ ተገኝተዋል። ሥምምነቱ የአውሮፓ ኅብረት የባሕር ኃይል መርከቦች እና የአየር የጦር መሣሪያዎች (air assets) የጅቡቲን ግዛት እንደ ማረፊያ እንዲጠቀሙ ሕጋዊ ፈቃድ ይሰጣል። በቀይ ባሕር ቁልፍ የሆኑ የባሕር መተላለፊያ መስመሮችን በመጠበቅ ረገድ የአውሮፓ ኅብረት ጠቃሚ ሚና መጫወቱን እንዲቀጥል ሥምምነቱ እንደሚያረጋግጥ ካያ ካላስ ገልጸዋል።