AAU - Muslim Students Union

ለግፍ ያላጐነበሰው ንጉሥ 👑 የመጨረሻው ክፍል ከዚህ ሁሉ በኋላ ሶሓቦች ወደ መዲና ተጓዙ፡፡ ጃዕፈርንና ኡሙ ሐቢባን ጨምሮ በሐበሻ የቀሩት ሶሓቦች ወደ መዲና የተመለሱት በሰባተኛው ዓ.ሂ. በኸይበር ዘመቻ ጊዜ ነበር፡፡ ነቢዩም የነጃዕፈርን መምጣት ባዩ ጊዜ ‹‹በኸይበር ዘመቻ ድል ወይስ በጃዕፈር መምጣት ልደሰት?›› ሲሉ ተናግረዋል::ቁጥራቸው ወደ ሃያ የሚጠጉ ሶሓቦች ደግሞ በሐበሻ እያሉ በማረፋቸው በስደት አገራቸው (ኢትዮጵያ) ተቀብረዋል:: ኢማሙ ጦበሪ እንደዘገቡት ነቢዩ (ሶ.ዐ.ወ) በኸይበር ዘመቻ ላይ ሳሉ እነ ኡሙ ሐቢባ መዲና ደረሱ፡፡ ኡሙ ሐቢባ ሁኔታዉን እንዲህ ትተርክልናለች፡- ‹‹ወደ ነቢዩ ገባሁ። ስለ ነጃሺ ይጠይቁኝ ነበር፤እኔም የአብረኸትን ሰላምታ አደረስኩኝ፤ነቢዩም ለሰላምታው ምላሽ ሰጡ:: እነጃዕፈር ወደ መዲና ከተመለሱ በኋላ ነጃሺ ወደ አላህ መልዕክተኛ ልጁን አዝሂያ (አርማ) ከስልሳ ሐበሻውያን ጋር  “የአላህ መልዕክተኛ ሆይ! በእርግጥ እርስዎ የአላህ መልዕክተኛ መሆንዎን እመሰክራለሁ፡፡ ….ልጄን አርማ አስሐማን ወደ እርስዎ ልኬያለሁ:: ከራሴ በቀር ሌላ የለኝም፤መምጣቴን የሚሹ ከሆነ እመጣለሁ›› የሚል መልዕክት የሠፈረበት ደብዳቤ ላከ፡፡ ይህን መልእክት ይዘው በመርከብ በመጓዝ ላይ ሳሉ በባህር ላይ በተነሳ ማዕበል ሞቱ:: የነቢዩ መሐመድን (ሶ.ዐ.ወ) አስተምህሮት እዚያው በአካል ተገኝተው እንዲያደምጡ በማለትም ነጃሺ የተመረጡ ሰባት ቀሳውስትና አምስት (ባህታውያን) መነኩሴዎችን ያቀፈ ልዑክ ወደ ነቢዩ ሙሐመድ (ሶ.ዐ.ወ) ልኳል፡፡ እነርሱም ነቢዩ (ሶ.ዐ.ወ) ዘንድ ደርሰው ቁርኣንን ሰሙ፡፡ያሏቸውን ጥያቄዎች ነቢዩን (ሶ.ዐ.ወ) ጠየቁ:: አስተምህሮታቸውን አደመጡ፡፡ በዚህ ጊዜ ከአላህ የተላኩ ነብይ መሆናቸውን አመኑ። ይጠበቅ የነበረውን ነብይ አግኝተው ከአንደበቱ እውነትን በመስማታቸው የሲቃ ለቅሶ አለቀሱ፡፡ ኢስላምንም ተቀበሉ። እምነታቸውንም ለነቢዩ ግልጽ አደረጉ:: አላህ (ሱ.ወ) ለእውነተኛ አማኝነታቸው እውቅና ሰጣቸው:: የነዚህን ሐበሻውያን የሃይማኖት አባቶችን መስለም አስመልክቶ አላህ እንዲህ ሲል ቁርኣን አወረደ፡- { وَإِذَا سَمِعُوا مَا أُنزِلَ إِلَى الرَّسُولِ تَرَى أَعْيُنَهُمْ تَفِيضُ مِنَ الدَّمْعِ مِمَّا عَرَفُوا مِنَ الْحَقِّ يَقُولُونَ رَبَّنَا آمَنَّا فَاكْتُبْنَا مَعَ الشَّاهِدِينَ (83) وَمَا لَنَا لا نُؤْمِنُ بِاللَّهِ وَمَا جَاءَنَا مِنَ الْحَقِّ وَنَطْمَعُ أَنْ يُدْخِلَنَا رَبُّنَا مَعَ الْقَوْمِ الصَّالِحِينَ (84) فَأَثَابَهُمُ اللَّهُ بِمَا قَالُوا جَنَّاتٍ تَجْرِي مِنْ تَحْتِهَا الْأَنْهَارُ خَالِدِينَ فِيهَا وَذَلِكَ جَزَاءُ الْمُحْسِنِينَ (85) وَالَّذِينَ كَفَرُوا وَكَذَّبُوا بِآيَاتِنَا أُولَئِكَ أَصْحَابُ الْجَحِيمِ (86) } ወደ መልክተኛውም የተወረደውን (ቁርኣን) በሰሙ ጊዜ እውነቱን ከማወቃቸው የተነሳ ዓይኖቻቸው እንባን ሲያፈሱ ታያለህ፤ ጌታችን ሆይ! አመንን፤ ከመስካሪዎቹም ጋር ጻፈን ይላሉ፡፡ በአላህና ከእውነትም በመጣልን ነገር የማናምን፣ ጌታችንም ከመልካም ሰዎች ጋር ሊያስገባን የማንከጅል ለኛ ምን አለን?› (ይላሉ)፡፡ ባሉትም ምክንያት አላህ በሥሮቻቸው ወንዞች የሚፈሱባቸውን ገነቶች በውስጣቸው ዘውታሪዎች ሲሆኑ መነዳቸው፤ ይህም የበጎ ሠሪዎች ዋጋ ነው:: እነዚያም የካዱና በአንቀጾቻችን ያስተባበሉ እነዚያ የእሳት ጓዶች ናቸው:: ይህ የቁርኣን ጥቅስ የወረደው ኢስላምን በተቀበሉ ሐበሻውያን ምክንያት ነበር።ታላቁ የቁርኣን ተንታኝ ኢማም ኢብኑ ከሲር ‹‹ተፍሲር አል-ቁርአኑል ዓዚም›› በተሰኘው የቁርኣን ማብራሪያ መጽሐፋቸው ላይ እንዳሰፈሩት ኢስላምን ከተቀበሉ በኋላ ወደ ነጃሺ ተመልሰዋል፡፡ ስለ ነቢዩም (ሶ.ዐ.ወ) ለነጃሺ ነግረዋል፡፡ ነጃሺ ኢስላምን ቀድሞ ቢቀበልም ከእነርሱ ከሰማ በኋላ ወደ ነቢዩ (ሶ.ዐ.ወ) ለመሄድ ጉዞ ጀምሮ ነበር። ግና ከአክሱም ከወጣ በኋላ በስደት (በጉዞ ላይ) በመንገድ ላይ ሞቷል:: በሐበሻ ነጃሺ መሞቱን በእለቱ ጂብሪል ለነቢዩ ሙሐመድ (ሶ.ዐ.ወ) ነገራቸው፤ አስሐማ የሞተው በ630 ነበር፡፡ እርሱ በሞተ እለት ነቢዩ (ሶ.ዐ.ወ) ወደ በቂእ የሶሓቦች ቀብር ስፍራ ሄደው ሶላተል ጋኢብ ሰግደውበታል፤  በሐበሻ የሞተውን የነጃሺን ቀብር አላህ እያሳያቸው ከአጠገባቸው እንዳለ አስክሬን በአደባባይ ሶላት ሰግደውበታል:: በሶላቱ ተካፋይ ከነበሩት ሶሓቦች መካከል ጃቢር፣ አነስ ኢብኑ ማሊክና ዐብደላህ ኢብኑ አባስ ስለክስተቱ አስተላልፈውልናል፡፡ ተከታዮቻቸውን ለሶላት ነቢዩ (ሶ.ዐ.ወ) ሲጣሩ አንዳንድ መናፍቃን እርስ በርሳቸው ‹‹ሙስሊም ባልሆነ ሰው ላይ እንስገድን?›› ሲሉ ተናገሩ፡፡ እንዲህም አሉ፡- انظروا إلى هذا يصلي على علج حبشي نصراني لم يره قط وليس على دينه ‹‹ይህን ሰው ተመልከቱ፡፡ በጭራሽ አይቶት በማያውቀውና የሃይማኖቱ ተከታይ ባልሆነ ሐበሻዊ ክርስቲያን ላይ ይሰግዳል ደግሞ!›› ሲሉ ተናገሩ፡፡ አላህም የሐበሻዊው ንጉሥ ነጃሺ ኢስላምን መቀበሉን በማረጋገጥ የሚከተለውን የቁርኣን አንቀጽ አወረደ:- وَإِنَّ مِنْ أَهْلِ الْكِتَابِ لَمَنْ يُؤْمِنُ بِاللَّهِ وَمَا أُنْزِلَ إِلَيْكُمْ وَمَا أُنْزِلَ إِلَيْهِمْ خَاشِعِينَ لِلَّهِ لَا يَشْتَرُونَ بِآيَاتِ اللَّهِ ثَمَنًا قَلِيلًا أُولَئِكَ لَهُمْ أَجْرُهُمْ عِنْدَ رَبِّهِمْ إِنَّ اللَّهَ سَرِيعُ الْحِسَابِ (سورة : آل عمران آية 199) ከመጽሐፉ ሰዎች መካከል አላህን ፈሪዎች፣ በአላህ አናቅጽትም ጥቂትን ዋጋ የማይሸምቱ ሆነው በአላህ የሚያምኑ፣ ወደእናንተ የተወረደውንም ወደነርሱ የተወረደውንም (እውነት የሚቀበሉ) ወገኖች በእርግጥ ይገኛሉ:: እነርሱ ከጌታቸው ዘንድ (የላቀ) ምንዳ ተዘጋጅቶላቸዋል:: አላህ ምርመራው ፈጣን ነው፡፡ እንግዲህ ይህ የእውነት እምነትና ጽናት ተምሳሌት የሆነው ውዱ ንጉሳችን ነጃሺ ታሪክ ነው። በርግጥም ይህንን የተገነዘበ ማንኛውም ሙስሊም ያለፈው ታሪኩ በዚህ ልክ መስዋእትነት የተከፈለበት፣ የኢስላም ባንዲራን ከፍ ለማድረግ ለአላህ ተብሎ ዝቅ የተባለበት መሆኑን በመረዳት እኔስ ? ዛሬ ምን ልስራ ማለት ይኖርበታል ተፈጸመ። ሃሳቦቻችሁን በ @Niqab_issueBot ያጋሩን @aaumsu