SABBATH SCHOOL (ሰንበት ትምህርት)

ሐሙስ ነሐሴ 28 Sep 3 መጽናኛና ደስታ 2ኛ ቆሮንቶስ 7ን አንብቡ። የቆሮንቶስ ሰዎች ንስሐ መግባታቸውን ሲሰማ ጳውሎስ የተሰማው ስሜት ምንድን ነው? Save Notes “በልባችን ውስጥ ናችሁ” ከሚሉት ቃላት ውስጥ ምን ያህል ፍቅር ይፈስሳል! (2ኛ ቆሮ. 7:3፤ እንዲሁም 2ኛ ቆሮ. 6:11ን ይመልከቱ)። ጳውሎስ ለእነርሱ ያለው ፍቅር በምላሹ እንዲሰጠው ካለው ጥልቅ ምኞት የተነሣ “በልባችሁ ስፍራ አድርጉልን” ይላል (2ኛ ቆሮ. 7:2)። ምንም እንኳ “በልባችሁ” የሚለው ሐረግ በግሪኩ ቅጂ ውስጥ ባይኖርም፣ አውዱ የሚደግፈው በመሆኑ አብዛኞቹ ትርጉሞች አካተውታል። በእርግጥም የቆሮንቶስ ሰዎች ልባቸውን ለጳውሎስና ለሥራ ባልደረቦቹ ከፈቱ። ለዚህ ነው ቁጥር 4 ኃይለኛ የሆነ የደስታ መግለጫ የሆነው። የጳውሎስ ቃላት በዚህ ቅጽበት ያለውን በጎ ስሜት ይገልጻሉ፦ “ለእናንተ ያለኝ መታመን ታላቅ ነው፤ በእናንተም መመካቴ ታላቅ ነው፤ መጽናናት ሞልቶብኛል፤ በመከራችን ሁሉ ደስታዬ ከልክ በላይ ሆኖአል” (2ኛ ቆሮ. 7:4)። ጳውሎስ በመጽናኛና በደስታ ተሞልቷል። አብያተ ክርስቲያናቶቻችን ራሳቸውን በታማኝነት ለክርስቶስ አሳልፈው በመስጠት፣ ለአገልጋዮቻቸው ልብ ምን ያህል መጽናኛና ደስታ ሊያመጡ ይችላሉ! በ2ኛ ቆሮንቶስ 7:5–16 ላይ ጳውሎስ ለመጽናኛውና ለደስታው ያለውን ምክንያት የበለጠ ያብራራል። እነዚህ ሁለት ጽንሰ-ሐሳቦች በክፍሉ ውስጥ በጉልህ ይታያሉ። “ማጽናናት” (parakaleō) የሚለው ግስ ወይም “መጽናናት” (paraklēsis) የሚለው ስም በ2ኛ ቆሮንቶስ 7 ውስጥ በአጠቃላይ ሰባት ጊዜ ተጠቅሰዋል። ይህ የደብዳቤው ክፍል የተጀመረውም የተመሰረተውም እግዚአብሔር በሚሰጠው ታላቅ መጽናኛ ላይ ነው (2ኛ ቆሮ. 1:3–7)። በምዕራፍ 7 ላይ ያለው የጳውሎስ መጽናኛ የመጣው ያ ያስጨነቀው ደብዳቤ የፈለገውን ውጤት በማምጣቱ ከተሰማው እረፍት ነው። ምንም እንኳ ይህ እረፍት የቲቶ በጎ ሪፖርት ውጤት ቢሆንም፣ በመጨረሻ ግን ጳውሎስ ለተለማመደው መጽናኛ ዋናው ባለቤት እግዚአብሔር ነው (2ኛ ቆሮ. 7:6)። በእርግጥም እግዚአብሔር “በመከራችን ሁሉ የሚያጽናናን... የመጽናናትም ሁሉ አምላክ” ነው (2ኛ ቆሮ. 1:3፣ 4)። የሚገርመው ጳውሎስ “በመጽናናት ሲሞላ”፣ በተመሳሳይ ጊዜ ደግሞ “ደስታው ከልክ በላይ” ነበር (2ኛ ቆሮ. 7:4፣ 7፣ 13)። ምንም እንኳ ያ ያስጨነቀው ደብዳቤ ብዙ ሐዘን ቢያመጣም፣ ያ ሐዘን ግን ንስሐን ለማምጣት የታለመ እንደ እግዚአብሔር ፈቃድ የሆነ ሐዘን ነበር (2ኛ ቆሮ. 7:9–11)። የቆሮንቶስ ሰዎች “እንደ እግዚአብሔር ፈቃድ አዝነዋል” (2ኛ ቆሮ. 7:11)፤ ይህም ሐዘን “ለደኅንነት የሚሆንና ጸጸት የሌለበትን ንስሐ” የሚያስገኝ ነው (2ኛ ቆሮ. 7:10)። ታዲያ ለእውነተኛ የእግዚአብሔር አገልጋይ ከዚህ የበለጠ ምን ደስታ ሊኖር ይችላል? በህይወታችሁ ውስጥ እንደ እግዚአብሔር ፈቃድ የሆነን ሐዘን ተለማምዳችሁ ታውቃላችሁ? ያ ሐዘን ወደ ንስሐ የሚመራ የእግዚአብሔር ፈቃድ መሆኑን እንዴት አወቃችሁ? @SabbathSchool @TekalignSorato