SABBATH SCHOOL (ሰንበት ትምህርት)

ዓርብ ሐምሌ 24 Jul 31 ተጨማሪ ሀሳብ ኤለን ጂ ኋይት፣ “ጣዖት አምልኮ በሲና”፣ ገጽ 315–330፣ በኃይማኖት አባቶችና ነቢያት። “እርስ በርሳችን ካለን ግንኙነት ትክክለኛ አጠቃቀም ብናደርግ ምንኛ ብዙ መልካም ነገር በተሠራ ነበር! ሰማያዊ በረከቶችን የተቀበለ እያንዳንዱ ሰው በሌሎች ጎዳና ላይ ብርሃን የመፈንጠቅ ግዴታ አለበት.... ያን ጊዜ እግዚአብሔርን በእውነት የሚወዱ ሁሉ ለራስ ያላቸውን ጣዖታዊ የሆነን አምልኮ ያቆማሉ።” — ኤለን ጂ ኋይት፣ በ Advent Review and Sabbath Herald፣ ኅዳር 18፣ 1884፣ ገጽ 730። “ጳውሎስ ወንድሞቹ ንግግራቸውና ተግባራቸው በሌሎች ላይ ምን ዓይነት ተጽዕኖ ሊኖረው እንደሚችል ራሳቸውን እንዲጠይቁ አሳስቧል። በራሱ ምንም ጉዳት የሌለው ቢሆንም እንኳ፣ ጣዖት አምልኮን የሚደግፍ የሚመስል ወይም በእምነት ደካማ የሆኑትን ሕሊና የሚጎዳ ማንኛውንም ነገር እንዳያደርጉ መክሯል። “እንግዲህ ብትበሉ ወይም ብትጠጡ ወይም ማንኛውንም ነገር ብታደርጉ ሁሉን ለእግዚአብሔር ክብር አድርጉት....” “ሐዋርያው ለቆሮንቶስ ቤተ ክርስቲያን የሰጠው የማስጠንቀቂያ ቃል ለሁሉም ዘመናት የሚሠራ ሲሆን፣ በተለይም ለእኛ ዘመን የሚስማማ ነው። ጣዖት አምልኮ ሲል የጣዖታትን አምልኮ ብቻ ሳይሆን፣ ራስን ማገልገልን፣ ምቾትን መውደድን፣ የምግብ ፍላጎትንና ሥጋዊ ስሜትን ማርካትንም ጭምር ማለቱ ነው።” — ኤለን ጂ ኋይት፣ The Acts of the Apos- tles፣ ገጽ 316፣ 317። “አንዳንድ በትክክል የማድረግ መብት ያላችሁን ነገሮች በማድረጋችሁ የእግዚአብሔር ሥራ እንዲሰናከል የምታዩ ከሆነ፣ እነዚያን ነገሮች ከማድረግ ተቆጠቡ። የሌሎችን አእምሮ ለእውነት የሚዘጋ ምንም ነገር አታድርጉ.... ሁሉ ተፈቅዶልኛል፣ ሁሉ ግን አይጠቅምም።” — ኤለን ጂ ኋይት፣ Testimonies for the Church፣ ቅጽ 9፣ ገጽ 215። የመወያያ ጥያቄዎች 1. ጳውሎስ እንደሚለው፣ የበሰለ ክርስቲያን ባሕርይ አንዳንድ ጊዜ ገና ያልበሰለ ክርስቲያንን ዕድገት ሊያደናቅፍ ይችላል። ይህ ሊከሰት የሚችልባቸውን ሁኔታዎች አስቡ። ይህንን ፈተና ለመወጣት ብቸኛው መንገድ ከሁሉ በላይ እግዚአብሔርን መውደድ እና ሌላውን እንደ ራስ መውደድ የሚለው መመሪያ የሆነው ለምንድን ነው? 2. ክርስቲያኖች እንኳ ጥንቃቄ ካላደረጉ ሊያመልኳቸው የሚችሏቸው አንዳንድ ጣዖታት የትኞቹ ናቸው? ወደ ጣዖት ልንቀይራቸው የምንችላቸው አንዳንድ መልካም ነገሮችስ የትኞቹ ናቸው? እንዲሁም፣ በጣም የሚንከባከቡት ነገር ወደ ጣዖትነት መለወጡን እንዴት ማወቅ ይችላሉ? 3. ጳውሎስ ወንጌልን በሚሰብክበት ጊዜ ውድቅ እንዳይሆን ሥጋውን እየጎሰመ እንደሚያስገዛው ተናግሯል (1ኛ ቆሮ. 9፡27)። በዚህ ሳምንት ጥናት ላይ በመመስረት፣ አንድን ሰው በወንጌል ሰባኪነት ብቁ እንዳይሆን ሊያደርጉት የሚችሉ ነገሮች ምን እንደሆኑ አስቡ። 4. በ1ኛ ቆሮንቶስ 10 ላይ ጳውሎስ የጣዖት አምልኮን አደገኛነት በማንሳት “ከጣዖት አምልኮ ሽሹ” ይላል (1ኛ ቆሮ. 10፡14)። የጣዖት አምልኮ እንዲህ የከፋ የሆነው ለምንድን ነው? @SabbathSchool @TekalignSorato