መጽሐፍቶችን በpdf📚

አልተዘዋወረችም – “አሮጊት እያለች ትሰድበኝ ነበር፤ቀድማኝ ሞተች” እኔ – ካልሞቱ አሮጊትነት ምን ያስፈራል? ፤ ካልኖሩስ ወጣት መሆን ምን ያኮራል? ለዛሬ “100” እያመጡ ወደቀጣይ ክፍል አለመዘዋወር እንዴት ያለ ነው? የሚለውን እንይ፣ 1. ህይወት ማናችን ወደ ነገ እንደምንዘዋወር እርግጠኞች ነን? ህይወት 100 እየሰጠች፣ አሞሌ እያላሰች ታኖረናለች፡፡ ከዚያም አንድ ቀን ድንገት ትጥለናለች፡፡ ቆንጆ ብትሆኑም፣ ሀብታም ብትሆኑም፣ ጎበዝ ብትሆኑም፣ ፍቅር ላይ ብትሆኑም፣ እቅድና አላማ ቢኖራችሁም፣ ልጆች ብትወልዱም ከዛሬ ወደ ነገ የማትዘዋወሩበት ቀን ይመጣል፤ ዛሬ ላይ ትሞታላችሁ ብላ ታስቀረናለች፡፡ መቀበሪያ ሳጥናችን አለመዘዋወራችንን በአደባባይ የሚያውጅ ካርድ ነው፡፡ ሌሎች ጉዟቸውን ይቀጥላሉ፤ እኛ በመቃብር ተወስነን እንቀራለን፡፡ እና፣ ከተስፋ ጋር ዛሬን በአግባቡ፣ ቁጭት አልባ አድርገን እንኑረው፡፡ ዛናታ በጣም አታሳዝንም? ስታነቡ ታውቋታላችሁ... 2. ሀገራት በከበረ የተፈጥሮ ሀብት፣ በተማረ የሰው ሀይል፣ በምቹ አየር ንብረት፣ በለም መሬት የታደሉ ሀገራት በድህነት፣ በመብት ረገጣ፣ በስደት፣ በጦርነት ይሰቃያሉ፡፡ ወደ ብልጽግና አይዘዋወሩም፡፡ ለምሳሌ ተራኪው ስለሞሪታንያ ያጫውተናል፡፡ ሞሪታንያ የፈረንሳይ ቅኝ ተገዥ የነበረች አፍሪካዊ ሀገር ናት፡፡ (ሞሪታኛና ሞሮኮ እንደ ኢትዮጵያ እና ኤርትራ ያደርጋቸዋል፤ አንዴ ይዋጋሉ አንዴ ይጋባሉ... ይላል) እና ይቺ ሀገር ከነዳጅ እስከ ወርቅ፣ ከብረት እስከ ዩራኒየም የተቸራት ሀገር ብትሆንም ህዝቦቿን ግን በድህነት ከመማቀቅና ወደ ስደት ከመውጣት አላስመለጠቻቸውም፡፡ ሀገሪቱ ከፈረንሳይ ቅኝ ግዛት የተረፋት ፈረንሳይኛ ቋንቋ እና ድህነት ነው ይለናል፡፡ የተፈጥሮ ሀብት አለህ ማለት ወደ ብልጽግና፣ ምቾት፣ ክብር፣ ሰላም... ትዘዋወራለህ ማለት አይደለም፡፡ 3. ሰዎች በትምህርት ጎበዝ የሆኑ፣ በስራ ታዋቂ የሆኑ፣ ጥበብ የተገለጸላቸው፣ በስልጣንና በሀብት የተንበሸበሹ ሰዎች ... ወደ ሙሉ “ሰውነት” የማይዛወሩበት ጊዜ ይኖራል፡፡ ምርጥ መስለው የሚታዩ ሰዎች የመጨረሻ ውዳቂ ስብዕና ባለቤት ሆነው ሊገኙ ይችላሉ፡፡ ያንን ሲያደርጉ ራስ ወዳድነትና ውለታ ቢስነት፣ ተጭኗቸው ክህደትና ወንጀል፣ እየፈጸሙ ነው፡፡ እነዚህን ሰዎች የሚያውቅ ያውቃቸዋል፡፡ እድሉን ካገኙ ግለሰብን ብቻ ሳይሆን ሀገርን እና ማህበረሰብን አዘቅት ውስጥ ከመጨመር የሚመልሳቸው የለም፡፡ ካሌብ ያደረገው ነገር በጣም አያሳፍርም? ስታነቡ ታገኙታላችሁ... 4. ተማሪዎች መውደቅ የተማሪውን ደደብ መሆን ያሳያል? ወይም ያረጋግጣል? ስንት ባለ ምጡቅ ኣእምሮ ባለቤቶች አልወደቁም? በተማሪዎች ካርድ ላይ የሚጻፈው ተዛውሯል፤ አልተዛወረም ወይም ተዛውራለች ፤ አልተዘዋወረችም የሚለው ቃል ቀላል ጉዳይ እንዳልሆነ ተጽፏል፡፡ በዚህ ቃል ሳብያ ስንቱ ሰው ራሱን ተጠራጠረ? ከራሱስ ተቆራረጠ? ማሂ ሰላም አታሳዝንም? ስታነቡ ታገኟታላችሁ.... በትምህርት ስርዓታችን የምንጨነቀው 100 ስለሚያመጡ ተማሪዎች እንጂ ስለ ሰብዓዊነት፣ ስለ ታማኝነት፣ ስለ ፍቅር፣ ስለ ቤተሰብ፣ ስለ ሀገር መውደድ አይደለም፡፡ ይህ ጥቂቶችን ስኬታማ ያደርጋል እንጂ እንደ ሀገር ከፍ አያደርገንም፤ ወዴትም አያዘዋውረንም፡፡ በተለምዶ “ወንድም ሴትም ሆኜ አሳድጌ” ያባብላል.....   ሴትም ወንድም ሆኖ “አልተዘዋወረችም”ን ጽፎልናል አሌክስ አብርሃም እናመሰግናለን! ©እመቤት ተሾመ ሁሌም ማንበብ!