EFGBC GSFGBlC፡ በኢት/ሙሉ/ወ/አ/ቤ/ክ የጎሮ ሰፈራ ሙሉ ወንጌል አማኞች አጥቢያ ቤ/ክ

ከሐሰተኛ ነቢያት ተጠንቀቁ ማቴ7:15-23 ይህ በጎቹን በዓይነ ቁራኛ የሚጠብቀው የመልካሙ እረኛ የማስጠንቀቂያና የማንቂያ መልዕክት ነው። እረኛው በግ ያልሆኑ ነገር ግን የበግ ለምድ ለብሰው በበጎች መካከል ሰርገው ከገቡ ከሐሰተኛ ነብያት በጎቹ ይጠነቀቁ ዘንድ ሐሰተኞቹን ከእውነተኞቹ የሚለዩበትንና እነዚህ ሰዎች የሚገልጡትን ባህርያት እንዲሁም ፍጻሜአቸውን ጌታ በዚህ በተራራው ስብከቱ ይናገራል። ሐሰተኞች በመልክ፣ በቁመና፣ ባላቸው ነገር አይለዩም እነዚህ እንክርዳዶች የሚለዩት በቃሉ፣ በመንፈስና በፍሬአቸው ብቻ ነው። ዮሐንስ በመልዕክቱ "?ወዳጆች ሆይ፥ መንፈስን ሁሉ አትመኑ፥ ነገር ግን መናፍስት ከእግዚአብሔር ሆነው እንደ ሆነ መርምሩ፤ ብዙዎች ሐሰተኞች ነቢያት ወደ ዓለም ወጥተዋልና" 1ዮሐ4:1 በማለት ሐሰተኞች በመንፈስ መመርመር እንደሚገባ ይነግረናል። ሐሰተኞች ነበሩ ዛሬም አሉ፣ ጌታ እስኪመጣ የጥፋት ስራቸውን ይሰራሉ። በጎቹን ይጠብቁና ይመግቡ ዘንድ እውነተኛ እረኞች በመንጋው መካከል ቢሰጡትም አማኙ ራሱ ግን ቃሉን ጠንቅቆ በማወቅና በመንፈሱ ንቁ ሆኖ በመመላለሰ ራሱን ከክፉ ይጠብቅ ዘንድ ይገባዋል። ዮሐንስ ሲናገር "... ከእግዚአብሔር የተወለደው ራሱን እንዲጠብቅ ክፉውም እንዳይነካው እናውቃለን" 1ዮሐ5:18 ይላል። ጌታ በዚህ ክፍል የሐሰተኞችን ዘዴ፣ ባህሪና ፍጻሜአቸውን ይነግረናል:- 1. የለበሱት የበግ ለምድ ነው “የበግ ለምድ ለብሰው ከሚመጡባችሁ በውሥጣቸው ግን ነጣቂዎች ተኵላዎች ከሆኑ ከሐሰተኞች ነቢያት ተጠንቀቁ። ከፍሬያቸው ታውቋቸዋላችሁ ..." ማቴ7:15,16 እነዚህ ሰዎች ራሳቸውን በመሰወር የተካኑ፣ በግ ሳይሆኑ የበግ ለምድ የለበሱ፣ በውስጣቸው ግን ነጣቂ ተኩላ ናቸው ጳውሎስ ሲናገር "ይህም ድንቅ አይደለም፤ ሰይጣን ራሱ የብርሃንን መልአክ እንዲመስል ራሱን ይለውጣልና። እንግዲህ አገልጋዮቹ ደግሞ የጽድቅን አገልጋዮች እንዲመስሉ ራሳቸውን ቢለውጡ ታላቅ ነገር አይደለም፤ ፍጻሜአቸውም እንደ ሥራቸው ይሆናል" 2ቆሮ11:14,15 እነዚህ ሰዎች የበግ ለምድ ይለብሳሉ ይህ ማለት በውጫቸው ልክ እንደ ክርስቲያን፣ እንደ አገልጋይ፣ ከእግዚአብሔር የተላኩ መልእክተኞች መስለው ለመታየት ራሳቸውን ይለውጣሉ በሌላም ስፍራ ጳውሎስ “እንደ እነዚህ ያሉ ሰዎች የክርስቶስን ሐዋርያት እንዲመስሉ ራሳቸውን እየለወጡ፥ ውሸተኞች ሐዋርያትና ተንኮለኞች ሠራተኞች ናቸውና” 2ቆሮ፡11፡13 ይላል፡፡ የቱንም ያህል ሰው ራሱን ሊሸፍን ቢሞክር ሽፋኑ ማንነቱ ስላይደለ እውነተኛ ማንነቱ መገለጡ አይቀርም ነገር ግን ፈጥኖ ካልተገለጠ በቀር ደቀ መዛሙርትን ወደ ኋላ በመሳብ የሚያደርሰው ጥፋት ግን ቀላል አይሆንም ሐዋ20፡29,30፡፡ 2. ፍሬ የላቸውም "ከፍሬያቸው ታውቋቸዋላችሁ። ከእሾህ ወይን ከኩርንችትስ በለስ ይለቀማልን? ... መልካም ፍሬ የማያደርግ ዛፍ ሁሉ ይቆረጣል ወደ እሳትም ይጣላል" ማቴ7:16,19 በመንፈስና በእግዚአብሔር ቃል በፍጥነት ካልተለዩ በቀር ፍሬ ቶሎ ስለማይገኝ፣ ጊዜ ስለሚፈልግ ሰይጣን የጥፋት ስራውን በመስራት ብዙዎችን ይነጥቃል፣ በትምህርታቸውም የብዙዎችን ልብ ያስታሉ፡፡ እያንዳንዱ ፍጥረት እንሰሳ ይሁን አትክልት እንደ ወገኑ ፍሬ ያስገኛል፣ ከእሾህ እሾህ እንጂ ወይን ሊገኝ አይችልም ምክንያቱም ተፈጥሮው አይደለም፡፡ ነገር ግን ማንም ውጤቱን ሊለውጥ አይችልም፡፡ እነዚህ ሰዎች ተኩላዎች፣ ሐሰተኞ ሰራተኞች በመሆናቸው ውጤታቸው በባህሪይ ቢሆን በአኗኗራቸው ማንነታቸው ቁልጭ ብሎ ይገለጣል፡፡ እግዚአብሔር ግን መልካም ፍሬ የሌለውን ሁሉ ማስወገዱ የማይቀር የፍጻሜ እድል ፈንታቸው ነው፡፡  3. በጌታ አይታወቁም "በሰማያት ያለውን የአባቴን ፈቃድ የሚያደርግ እንጂ፥ ጌታ ሆይ፥ ጌታ ሆይ፥ የሚለኝ ሁሉ መንግሥተ ሰማያት የሚገባ አይደለም" ማቴ7:21 እነዚህ ሰዎች ሰርገው የገቡ፣ በግ ሳይሆኑ የበግ ለምድ የለበሱ፣ ዳግመኛ ያልተወለዱ፣ በጌታ የማይታወቁ፣ መልካሙ መንፈስ የሌላቸው ሮሜ8፡9 ነገር ግን ራሳቸውን እንደ አገልጋይ የሚቆጥሩ የሐሰት ትንቢት የሚናገሩ፣ አስተምራለሁ እያሉ የሐሰት ትምህርት የሚያስተምሩ፣ በጌታ ፊት መናፍስትን አስወጣለሁ የሚሉ፣ የጌታን ስም የሚጠሩ ነገር ግን በጌታ የማይታወቁ ናቸው፡፡ እነዚህ ሰዎች ራሳቸው በሰይጣን የተታለሉ በመሆናቸው በፍርድ ቀን በጌታ ስም ያደረጉትን በመናገር ጌታን ሊሞግቱ ይነሳሉ ጌታ ግን እኔ አላውቃችሁም እናንተ አመጸኞች ከኔ ራቁ ይላቸዋል፡፡ ጌታም ወደ መንግስቱ የሚገባው የአባቱን ፈቃድ የሚያደርግ እንጂ ጌታ ሆይ፣ ጌታ ሆይ የሚል ወይም በስሙ ራሱን እንደ አገልጋይ አድርጎ የሚቆጥር አይደለም፡፡ የጌታን ፈቃድ ማድረግ የሚለውን ብዙዎች መልካም ስራ በማለት እየተረጎሙት ብዙዎችን ግራ ያጋባሉ እንዲሁም የዳነው ሰው ሁሉ ወደ እግዚአብሔር መንግሥት ላልገባ እችላለሁ ብሎ እንዲያስብ፣ ድነቱን እንዲጠራጠር ያደርጋሉ ይህ የእግዚአብሔር ፈቃድ ማድረግ ግን መልካም ስራ ሳይሆን በክርስቶስ አምኖ መዳንን የሚናገር ነው ዮሐንስ ሲናገር “ልጅንም አይቶ በእርሱ የሚያምን ሁሉ የዘላለም ሕይወትን እንዲያገኝ የአባቴ ፈቃድ ይህ ነው፥ እኔም በመጨረሻው ቀን አስነሣዋለሁ” ዮሐ6፡40 እነዚህ ሰዎች በቅዱሳን መካከል ሰርገው የገቡ እንጂ ዳግም የተወለዱ አይደሉም፡፡ መንግሥተ ሰማይ ክርስቶስን በማመንና ዳግም በመወለድ እንጂ በመልካም ሥራ አይገባም “ጸጋው በእምነት አድኖአችኋልና፤ ይህም የእግዚአብሔር ስጦታ ነው እንጂ ከእናንተ አይደለም፤ ማንም እንዳይመካ ከሥራ አይደለም” ኤፌ2፡8,9