Baloch Yakjehti Committee

پاکستان میں عدالتی نظام پر ہر وقت سوال اٹھایا جا رہا ہے، کہ یہ عدالتی نظام قانونی تقاضوں کو پورا کرنے میں بُری طرح ناکام ہو چکاہے، بین الاقوامی سطح پر بھی عدم اطمینان کا اظہار کیا جارہا ہے، یہ عدالتی نظام مکمل طورپر ملٹری اسٹیبلشمنٹ کے احکامات کے ذریعے چلایا جارہا ہے، یہاں ایلیٹ کلاس اور عوام کیلئے الگ الگ قوانین بنائے گئے ہیں، اس عدالتی نظام کے تحت اس وقت سب سے زیادہ بلوچ عوام متاثر ہورہی ہے، آئے روز ماورائے عدالت قتل، اغوا نما گرفتاریاں، چادرو چاردیوری کی پامالی، بلوچ خواتین کی بے حُرمتی، بلا جواز گرفتاریاں، قیدو بند وغیرہ شامل ہیں ، جسکی واضح مثال ماہ رنگ بلوچ اور انکے ساتھیوں کی بلا جواز گرفتاریاں اور ناانصافی پر مبنی مقدمات اور گذشتہ چودہ مہینوں سے بے گناہ پابندِ سلاسل رکھنا سب کے سامنے روز روشن کی طرح عیاں ہیں، اور پانچ بلوچ خواتین کو جبری گمشدہ کیا گیا ہے اور جنکے بارے میں کسی کو کچھ نہیں بتایا جارہا ہے کہ وہ کہاں اور کس حال میں رکھے گئے ہیں۔ بلوچستان میں جبری طور پر لاپتہ افراد کا مسئلہ سنگین صورت اختیار کرچکا ہےجو کہ بین الاقوامی اور ملکی آئین اور قوانین کی صریحاََخلاف ورزی ہے۔بلوچ نوجوانوں کو غیر قانونی و غیر آئینی طریقے پر اغوا کرکے انکی لاشیں پھینکنا روز کا معمول بن چکا ہے۔ بی وائی سی کی قائد ماہ رنگ بلوچ اور زیلی قیادت کو غیر قانونی و غیر آئینی مقدمات کے ذریعے پابندِ سلاسل رکھا گیا ہے اور انکے وکلا، اہلِ خانہ اور رشتہ داروں کو دھمکیاں دی جا رہی ہیں۔چونکہ ڈاکٹر ماھرنگ بلوچ اور انکے ساتھی ملکی آئین و قانون کے عین مطابق پُر امن جدوجہد کررہے ہیں، انہوں نے کبھی بھی ملکی قوانین کی خلاف ورزی نہیں کی ہے، ماھرنگ بلوچ تاحال یہی مطالبہ کررہی ہیں کہ اُن پر جو مقدمات درج کئے ہیں ان مقدمات کو کھلی عدالت میں چلایا جائے۔ لہٰذا ہم بھی مطالبہ کرتے ہیں کہ ماہرنگ بلوچ اور ساتھیوں پر درج مقدمات عین قانون کے مطابق اوپن کورٹ میں چلائے جائیں۔ ہم یہ بھی مطالبہ کرتے ہیں کہ ماہرنگ بلوچ اور انکے ساتھیوں پر بلا جواز جھوٹے مقدمات فی الفور ختم کئے جائیں اور انہیں فوری طور پر باعزت بری کیا جائے۔ عصا ظفر بلوچ