ជី សុផាត - Sophat CHY

មានប្អូនស្រីម្នាក់ ជាអ្នកផលិតមាតិកាអប់រំលើបណ្តាញសង្គម វីដេអូរបស់នាង មិនដែលបង្កើតជម្លោះ ឬនិយាយប៉ះពាល់អ្នកណាម្នាក់ឡើយ គឺគ្រាន់តែចង់ចែករំលែកចំណេះដឹងដែលនាងមានប៉ុណ្ណោះ។ ដំបូងឡើយ មានអ្នកចូលមើលច្រើន ហើយគ្រប់គ្នាសុទ្ធតែសរសើរនាង ប៉ុន្តែយូរៗទៅ អ្វីៗក៏ចាប់ផ្តើមប្រែប្រួល... មតិមួយចំនួនឈប់និយាយពីខ្លឹមសារវីដេអូ ហើយបែរជាមកនិយាយដេញដោលពីរូបរាង សម្លៀកបំពាក់ និងប្រើពាក្យសម្តីបៀតបៀននាងទៅវិញ។ អ្នកខ្លះទៀត ថែមទាំងផ្ញើសារអាក្រក់ៗចូលប្រអប់សារទៅនាងផ្ទាល់ទៀតផង។ ដំបូងឡើយ នាងខំមិនខ្វាយខ្វល់ ព្រោះគិតក្នុងចិត្តថា៖ ប្រហែលជាពួកគេគ្រាន់តែចង់លេងសើចតើ... តែរឿងដែលគេហៅថា លេងសើច នោះ វាបានកើតឡើងរៀងរាល់ថ្ងៃ រាល់ពេលបង្ហោះវីដេអូថ្មី នាងលែងបានរង់ចាំមើលការរិះគន់ដើម្បីស្ថាបនាទៀតហើយ ប៉ុន្តែបែរជាត្រូវមកអង្គុយបារម្ភ និងភ័យខ្លាចថា តើថ្ងៃនេះនឹងមាននរណាសរសេរពាក្យអាក្រក់ៗមកលើនាងទៀត។ ចុងក្រោយ... នាងក៏សម្រេចចិត្តបិទប្រអប់សារ លុបមតិចោល បន្ថយការបង្ហោះ ហើយបន្តិចម្តងៗ នាងក៏បាត់មុខរហូតពីបណ្តាញសង្គមតែម្តង។ ប្រហែលជាមានមនុស្សខ្លះនិយាយថា៖ - បើមិនចូលចិត្ត កុំអានទៅ! - ធ្វើជាអ្នកល្បី ត្រូវតែចេះទ្រាំ! - គ្រាន់តែពាក្យសម្តីលើអនឡាញសោះ មានបាត់បង់អីណា... ប៉ុន្តែ សំណួរដែលយើងត្រូវសួរខ្លួនឯងគឺ៖ ហេតុអ្វីបានជាជនរងគ្រោះត្រូវជាអ្នកដកខ្លួន និងបាត់បង់ឱកាស ខណៈដែលអ្នកបៀតបៀននៅតែអាចប្រើប្រាស់បណ្តាញសង្គម និងដើរធ្វើបាបគេបានយ៉ាងរលូនបែបនេះ? រឿងនេះ គឺជាឧទាហរណ៍ជាក់ស្តែងមួយនៃពាក្យថា៖ Technology-Facilitated Gender-Based Violence (TFGBV) មានន័យថា៖ អំពើហិង្សាផ្អែកលើយេនឌ័រតាមប្រព័ន្ធបច្ចេកវិទ្យា។ ការវាយប្រហារ មិនចាំបាច់ទាល់តែមានការប្រើហិង្សាលើយើងផ្ទាល់ដៃ ទើបហៅថាហិង្សានោះទេ។ ពាក្យសម្តីបៀតបៀន សារអសុរោះ ការបន្ទាបបន្ថោកស្ត្រី និងការធ្វើឱ្យគេភ័យខ្លាចរហូតមិនហ៊ានបញ្ចេញសំឡេង... សុទ្ធតែជារបួសផ្លូវចិត្តដ៏ពិតប្រាកដ។ បច្ចេកវិទ្យាមិនមែនជាអ្នកបង្កើតកំហុសទេ ប៉ុន្តែវាបានក្លាយជាឧបករណ៍ដែលជួយឱ្យមនុស្សមួយចំនួន អាចតាមរំខានអ្នកដទៃបានគ្រប់ពេល បង្កើតអាខោនក្លែងក្លាយបានយ៉ាងងាយ និងទាញមនុស្សផ្សេងទៀតឲ្យចូលរួមវាយប្រហារតាមហ្វូងសត្វ។ មុននឹងយើងសរសេរមតិ លេងសើច លើនរណាម្នាក់ សូមចំណាយពេលគិតបន្តិច... សម្រាប់យើង វាប្រហែលជាពាក្យសម្តីតែមួយបន្ទាត់ ប៉ុន្តែសម្រាប់អ្នកទទួល វាអាចជាពាក្យអាក្រក់មួយបន្ទាត់ ដែលកើតឡើងរាប់រយដងក្នុងមួយថ្ងៃសម្រាប់ពួកគេ។ #TFGBV #អំពើហិង្សាផ្អែកលើយេនឌ័រ #អំពើហិង្សាតាមអនឡាញ #សុវត្ថិភាពឌីជីថល #ការបៀតបៀនតាមអនឡាញ #CyberHarassment #OnlineSafety #DigitalSafety #GenderBasedViolence #EndTFGBV