Teaching Agency

ခန္ဓာကိုယ်လှုပ်ရှားမှုဖြင့် ဘာသာစကားသင်ကြားနည်းကို အတန်းထဲမှာ ဘယ်လိုလက်တွေ့အသုံးချရမလဲ ================= ကလေးငယ်တွေကို အင်္ဂလိပ်စာသင်တဲ့အခါ (အထူးသဖြင့် Cambridge YLE ဖြစ်တဲ့ Starters, Movers, Flyers အဆင့်တွေမှာ) စာအုပ်ကြီးအတိုင်း ချရေးခိုင်းနေရင် ကလေးတွေ စာသင်ချိန်ကို ငြီးငွေ့လွယ်တတ်ကြပါတယ်။ ဒါကြောင့် YLE အတန်းတွေမှာ အင်မတန် ထိရောက်ပြီး ဆရာ/ဆရာမတိုင်း လက်တွေ့သုံးသင့်တဲ့ TPR (Total Physical Response) - ခန္ဓာကိုယ်လှုပ်ရှားမှုဖြင့် ဘာသာစကားသင်ကြားနည်းကို အတန်းထဲမှာ ဘယ်လိုလက်တွေ့အသုံးချရမလဲဆိုတာ ဝေမျှပေးလိုက်ပါတယ်ခင်ဗျာ။ 💡 TPR (Total Physical Response) ဆိုတာ ဘာလဲ။ ကလေးတွေရဲ့ နားထောင်မှု (Listening) နဲ့ လှုပ်ရှားမှု (Action) ကို တွဲဖက်ပြီး စကားလုံးတွေရဲ့ အဓိပ္ပာယ်ကို မှတ်မိစေတဲ့ နည်းလမ်းဖြစ်ပါတယ်။ ဆရာက အမိန့်/ညွှန်ကြားချက်တစ်ခု ပေးလိုက်တာနဲ့ ကလေးက ခန္ဓာကိုယ်လှုပ်ရှားမှုနဲ့ ချက်ချင်း တုံ့ပြန်ရတဲ့ ပျော်စရာနည်းလမ်းတစ်ခု ဖြစ်ပါတယ်ခင်ဗျာ။ 🎯 YLE အတန်းများအတွက် TPR လက်တွေ့အသုံးချနည်း (၄) ဆင့် ၁။ Vocabulary (ဝေါဟာရ) အသစ်များ မိတ်ဆက်ခြင်း YLE Exam မှာ ကလေးတွေ Action Verbs တွေနဲ့ Nounsတွေကို ကောင်းကောင်းသိဖို့ လိုပါတယ်။ သင်တဲ့အခါ ဆရာက စကားလုံးကို အသံထွက်ရုံတင်မကဘဲ ကိုယ်ဟန်ပြောင်းလဲပြပါ။ ဥပမာ (Starters level) "Fly"လို့ ပြောရင် ဆရာက ငှက်တောင်ပံလို လက်နှစ်ဖက်ကို ခတ်ပြပါ။ ကလေးတွေကို လိုက်လုပ်ခိုင်းပါ။ "Swim"လို့ပြောရင် ရေကူးပြပါ။ ဒီအခါ ကလေးတွေဟာ ကောင်းကင်ပျံတာကို "Fly" လို့ ခေါ်တယ်ဆိုတာကို ဘာသာပြန်စရာမလိုဘဲ သူတို့ရဲ့ Muscle Memory နဲ့ တိုက်ရိုက်မှတ်မိသွားပါလိမ့်မယ်ခင်ဗျာ။ --------- ၂။ Listening Component အတွက် Pre-positions (နေရာပြပုဒ်) များ သင်ကြားခြင်း YLE Listening Exam မှာ "Put the watch on the table" တို့ "Put the frog under the chair" တို့လို ပုံဆွဲရ၊ မျဉ်းဆွဲရတဲ့ ပုစ္ဆာတွေ အမြဲတမ်း ပါဝင်ပါတယ်။ "Simon Says" ကစားနည်းပုံစံမျိုးကို TPR နဲ့ တွဲသုံးပါ။ "Put your hands ON your head!" "Put your hands UNDER the desk!”စသဖြင့် ညွှန်ကြားပြီး ကလေးတွေကို လိုက်လုပ်ခိုင်းပါ။ On, Under, In, Next to စတဲ့ နေရာပြပုဒ်တွေကို Listening ပုစ္ဆာတွေ နားထောင်တဲ့အခါ မျက်စိထဲ ချက်ချင်း မြင်သာသွားစေပါတယ်။ ------------ ၃။ Flashcard Games များဖြင့် ပေါင်းစပ်ခြင်း Flashcards တွေကို အတန်းထဲက နံရံတွေ၊ ကစားကွင်းတွေမှာ ကပ်ထားပြီး ဆရာက ညွှန်ကြားချက်ပေးပါ။ "Run to the crocodile!" (မိကျောင်းပုံဆီ ပြေးသွားပါ) သို့မဟုတ် "Jump to the apple!" (ပန်းသီးပုံဆီ ခုန်သွားပါ)စတဲ့ gameလေးတွေနဲ့ ကလေးတွေဟာ ထိုင်ခုံမှာ ငြိမ်ငြိမ်မထိုင်နိုင်တဲ့ သဘာဝရှိတာကြောင့် ဒီလိုဆော့ကစားပေးခြင်းက အတန်းကို ပျော်စရာကောင်းစေပြီး စကားလုံးတွေကို စွဲစွဲမြဲမြဲ မှတ်မိစေပါတယ်ခင်ဗျာ။ --------- ၄။ Speaking (စကားပြောစွမ်းရည်) မြှင့်တင်ခြင်း TPR ကို နားထောင်ဖို့တင်မကဘဲ Speaking ရောက်တဲ့အထိ သုံးနိုင်ပါတယ်ခင်ဗျာ။ ကလေးတစ်ယောက်ကို ရှေ့ထွက်ခိုင်းပြီး ဆရာက နားထဲမှာ စကားလုံးတစ်လုံး တိုးတိုးလေးပြောပြပါ။ အဲဒီကလေးက အမူအရာ လုပ်ပြရမှာဖြစ်ပြီး ကျန်တဲ့ကလေးတွေက "Is he running?" သို့မဟုတ် "She is eating an ice cream!"စသဖြင့် အင်္ဂလိပ်လို ပြိုင်တူအော်ပြီး ခန့်မှန်းရမှာ ဖြစ်ပါတယ်။ ရလဒ်ကတော့ ကလေးတွေက စာကြောင်း ဖွဲ့စည်းပုံအမှန် တွေကိုပါ သဘာဝကျကျ ပြောဆိုတတ်လာပါလိမ့်မယ်ခင်ဗျာ။ ➡️ဆရာက အစပိုင်းမှာ ပူးတွဲလုပ်ဆောင်ပေးပါ။ ကလေးတွေ အစမှာ အမိန့်ကို နားမလည်သေးရင် ဆရာကိုယ်တိုင် အမူအရာအရင် လုပ်ပြပါ။ နောက်ပိုင်း ရသွားတဲ့အခါကျမှ ဆရာက အသံပဲထွက်ပြီး ကလေးတွေကိုပဲ ကိုယ်တိုင်လှုပ်ရှားခိုင်းပါ။ ➡️ကလေးတွေရဲ့ စွမ်းအင်ကို ထိန်းညှိပါ။ TPR က ကလေးတွေကို တက်ကြွလန်းဆန်းစေတာ မှန်ပေမဲ့ အတန်းအရမ်းဆူညံမသွားအောင် စည်းကမ်းလေးတစ်ခုထားပါ။ (ဥပမာ - ဆရာက လက်ခုပ် ၃ ချက်တီးရင် နေရာမှာ ငြိမ်ငြိမ်ပြန်ထိုင်ရမယ်) ဆိုတာမျိုး ကြိုတင်သတ်မှတ်ထားဖို့ လိုအပ်ပါတယ်ခင်ဗျာ။ ဒီ TPR နည်းလမ်းကို YLE သင်ကြားရေးမှာ ထည့်သွင်းအသုံးပြုခြင်းဖြင့် ဆရာ၊ဆရာမတို့ရဲ့အတန်းဟာ ကလေးတွေအတွက် အပျော်ဆုံးနဲ့ အထိရောက်ဆုံး အတန်းတစ်ခု ဖြစ်လာမှာ သေချာပါတယ်။ ဆရာ၊ ဆရာမတို့အနေနဲ့ကော အတန်းထဲမှာ TPR ကို ဘယ်လိုပုံစံမျိုးတွေ သုံးဖူးကြလဲ ဆိုတာကိုလည်း မျှဝေပေးခဲ့လို့ရပါတယ်ခင်ဗျာ။ 🔹Teaching Agency အနေနဲ့ ဆရာ၊ ဆရာမတို့ရဲ့ သင်ကြားရေးခရီးစဉ်အတွက် အစဉ်အမြဲ ကူညီပံ့ပိုး ပေးလျက်ရှိနေပါတယ်