The Irrawaddy - Burmese

စစ်မှုထမ်းအကြောင်းပြ မိဘထံ ငွေညှစ်သူ အဖမ်းခံရ ဧရာဝတီ၊ ဇူလိုင် ၂၊ ၂၀၂၆ စစ်မှုထမ်းရန်အတွက် လူငယ်လူရွယ်များ ပေါ်တာဆွဲဖမ်းဆီးခံနေရပြီး ကျပ်သိန်းရာချီပေးကာ ပြန်လည်ရွေးထုတ်မှုများရှိနေသည့် ကာလအတွင်း ရန်ကုန်တိုင်း၊ သင်္ဃန်းကျွန်းမြို့နယ်နေ မောင်ငြိမ်းချမ်းဦးသည် စစ်မှုထမ်းကိစ္စအကြောင်းပြ၍ မိဘထံ ခြိမ်းခြောက်ငွေတောင်းမှုကြောင့် ၎င်းနှင့်ကြံရာပါ ဒေါက်တာဖြစ်သူ ရည်းစားကိုပါ ဖမ်းဆီးခဲ့သည်ဟု အာဏာသိမ်းအစိုးရ ယနေ့ထုတ် သတင်းစာများ၌ ဖော်ပြသည်။ မောင်ငြိမ်းချမ်းဦးသည် ဇွန်လ ၂၅ ရက်တွင် နေအိမ်မှ ၎င်း၏အလုပ်သို့ သွားရောက်စဉ် မိသားစုနှင့် အဆက်အသွယ် ပြတ်တောက်သွားသဖြင့် လူပျောက်ကြော်ငြာခဲ့ပြီးနောက် ဇွန်လ ၂၇ ရက်တွင် အမျိုးသားတဦးက ငြိမ်းချမ်းဦး၏ မိခင်ထံ ဖုန်းဖြင့်ဆက်သွယ်၍ “ ငြိမ်းချမ်းဦးအား ပြန်ပေးဆွဲထားကြောင်း၊ မိသားစုဝင်များ လူမှုကွန်ရက်ပေါ်မှ လူပျောက်ကြော်ငြာ ပို့စ်များ ပြန်ဖျက်ပေးကာ ကျပ်သိန်း ၁၀၀ ဖြင့် ပြန်ရွေးရမည်ဟု ပြောဆိုလာကြောင်း သိရသည်။ ထို့နောက် ဇွန် ၃၀ ရက်နံနက်ပိုင်းတွင် ဖုန်းဖြင့် ငြိမ်းချမ်းဦးက အသံဖျက်၍ ပြန်ပေးဆွဲသူအယောင်ဆောင်ကာ ထပ်မံဆက်သွယ်လာပြီး ပိုက်ဆံလွှဲပေးရန် အချိန်ပေးထားသည်မှာ ၃ ရက်ရှိသွားပြီဖြစ်ကြောင်း၊ KBZ Pay ဖြင့်သာ လိုချင်ကြောင်း၊ မလွှဲပေးပါက ငြိမ်းချမ်းဦးမှာ ပြည်သူ့စစ်မှုထမ်းစာရင်းထဲသို့ ပါသွားမည်ဖြစ်ကြောင်း၊ ငွေကျပ် သိန်း ၁၀၀ အား ငြိမ်းချမ်းဦး၏ KBZ Pay အကောင့်ထဲသို့ လွှဲပေးရန်ထပ်မံပြောကြားလာသည်ဟု ဆိုသည်။ ထိုသို့ဆက်သွယ်လာပြီးနောက် ယင်းနေ့ နေ့လယ် ၁၂ နာရီခန့်တွင် တာမွေမြို့နယ်ရှိ ဟိုတယ်တခု၌ ငြိမ်းချမ်းဦးနှင့် ဒေါက်တာခိုင်ဆုရည်တို့ကို ဖမ်းဆီးရမိခဲ့ပြီး ရည်းစားဖြစ်သူနှင့် အချိန်ကြာကြာ တွေ့ဆုံနိုင်ရန် မိသားစုနှင့် အဆက်အသွယ်ဖြတ်တောက်ကာ ယခုကဲ့သို့ ပြန်ပေးဆွဲခံရသည်ဟု လိမ်လည်ပြောဆိုကြောင်း ထွက်ဆိုခဲ့ကြသဖြင့် ၎င်းတို့နှစ်ဦးအား တရားဥပဒေလုပ်ထုံးလုပ်နည်းများနှင့်အညီ ဆောင်ရွက်သွားမည်ဟု ဖော်ပြထားသည်။ ဓာတ်ပုံ-MOI #WhatsHappeningInMyanmar #RejectMilitaryCoup