The Irrawaddy - Burmese

နီပေါရေကြီးရေလျှံမှု သင်ခန်းစာယူရန် အာဏာသိမ်းသမ္မတ ပြော ဧရာဝတီ၊ ဩဂုတ် ၃၀၊ ၂၀၂၆ မြစ်ဆုံစီမံကိန်း ပြန်အသက်သွင်းရန်ကြိုးပမ်းနေသည့် အာဏာသိမ်းသမ္မတ ဦးမင်းအောင်လှိုင်သည် ယမန်နေ့က ညောင်တုန်းကျွန်းတာ (ဧရာဝတီမြစ်ခွဲ) တိုးမြစ်ရေတိုက်စားမှုကြောင့် တာဘောင်ပဲ့ထွက်မှုကို သွားရောက်ကြည့်ရှုစဉ် လတ်တလော နီပေါနိုင်ငံတွင်ဖြစ်ပွားခဲ့သော ရေကြီးရေလျှံမှုဖြစ်စဉ်အား သင်ခန်းစာယူ၍ သဘာဝဘေးအန္တရာယ် ကြိုတင်ကာကွယ်ရေး ရေရှည်အကျိုးအတွက် စီမံတွက်ချက် ဆောင်ရွက်ရန် ပြောဆိုသည်။ တာဘောင်များ ရေတိုက်စားမှုဖြစ်စဉ်များနှင့် ရေကြီးရေလျှံမှုဖြစ်စဉ်များ လျော့ကျစေရေးအတွက် မြစ်များ၊ မြစ်လက်တက်များ၊ ချောင်းများအားလုံး၏ ရေစီးရေလာမှုနှင့် ရေဝင်ရေထွက်မှုများ၊ မြစ်ကြမ်းခင်း Bed level များအား စဉ်ဆက်မပြတ် သုတေသနပြု မှတ်တမ်းတင်ခြင်း၊ ဆန်းစစ်လေ့လာခြင်း၊ လိုအပ်သည့် ရေကြောင်းပြုပြင်ထိန်းသိမ်းခြင်းနှင့် နုန်းဆယ် ခြင်းလုပ်ငန်းများ ဆောင်ရွက်ခြင်းတို့ကို ရေရှည်အကောင် အထည်ဖော်ဆောင်ရွက်ကြရန်လိုကြောင်း ၎င်းက ဆိုသည်။ ထို့ပြင် ရေစီးဆင်းရာလမ်းကြောင်းအတိုင်း စီးဆင်းနိုင်မှုမရှိခြင်းကြောင့်သာ ရေများအထက်မှအောက်သို့ မစီးဆင်းနိုင်ဘဲ ဘေးဘက်နေရာများသို့ တိုက်စား စီးဆင်းသွား၍ ရေကြီးရေလျှံမှုနှင့် သဘာဝဘေးဒဏ်များ နှစ်စဉ်ကြုံတွေ့မှုများရှိရာ သက်ဆိုင်ရာဝန်ကြီးဌာများက တနိုင်ငံလုံးအတိုင်းအတာဖြင့် မြစ်ချောင်းများ၏ ရေစီးရေလာအခြေအနေများအား အမြဲမပြတ် လေ့လာဆန်းစစ်သုံးသပ်ပြီး လိုအပ်သည့် မြစ်ကြောင်းပြုပြင်ထိန်းသိမ်းခြင်းလုပ်ငန်းများကို နှစ်စဉ်စီမံချက်များ ချမှတ်အကောင်အထည်ဖော် ဆောင်ရွက်သွားရမည်ဟု အာဏာသိမ်းသမ္မတက ပြောဆိုသည်။ လက်ရှိတွင် ညောင်တုန်းကျွန်းတာ ရေတိုက်စားမှုဖြစ်ပွားခဲ့မှုအား ကာကွယ်နိုင်ရေးအတွက် တာခြေတွင် တုတ်တန်းရိုက် သဲအိတ်ဖြည့်ခြင်း၊ သဲအိတ်ဖြင့် တာခြေထောက်ခြင်း၊ မူရင်းတာ 2nd Bund Slope အခြေသဲအိတ် ထောက်ခြင်း၊ ယာယီပန်းတာတည်ဆောက်ခြင်း၊ ကမ်းရင်းတာ Bund Slope တည်ဆောက်ခြင်းနှင့် ယာယီပန်းတာ၏ အရှေ့ဘက် ဆင်ခြေလျှောတိုက်စားမှုကာကွယ်ရန် Geo Textile ခင်းခြင်းလုပ်ငန်းတို့ လုပ်ဆောင်လျက်ရှိသည်။ တာဝန်ရှိဌာနများ၏ ပြုပြင်ထိန်းမှုမရှိခြင်းကြောင့် ပြီးခဲ့သည့် ဇူလိုင်လကုန်းပိုင်းက ငဝန်းတာ ကျိုးပေါက်ခဲ့ရာ လေးမျက်နှာ၊ ရေကြည်၊ ငသိုင်းချောင်း၊ ကျုံပျော်၊ ဟင်္သာတ၊ ကျောင်းကုန်း စသည့် ၆ မြို့နယ်တွင် မြို့ပေါ်ရပ်ကွက်များနှင့် ကျေးရွာများ ရာချီမှ လယ်စိုက်ဧက သောင်းချီ ရေနစ်မြုပ်ပျက်စီး ဆုံးရှုံးခဲ့ရသည်။ ထို့ပြင် ရေကြီးမှုဒဏ်ကို ရက်ရှည်ကြာခံစားခဲ့ရပြီး လက်ရှိချိန်ထိလည်း ရေဘေးနောက်ဆက်တွဲ ပြဿနာနှင့် အခက်အခဲများစွာ ကြုံနေရသော်လည်း တာဝန်ရှိဌာနများ၏ ကူညီထောက်ပံ့မှု အားနည်းချက်များစွာရှိနေဆဲဖြစ်ကြောင်း ဒေသခံများနှင့် ကူညီပေးရေးအဖွဲ့များထံက သိရသည်။ အာဏာသိမ်းအစိုးရသည် ဦးသိန်းစိန်အစိုးရလက်ထက်က သဘာဝပတ်ဝန်းကျင် ထိခိုက်ပျက်စီးမှု စိုးရိမ်ချက်များကြောင့် လူထုကန့်ကွက်သဖြင့် ရပ်နားခဲ့ရသော ဧရာဝတီမြစ်ဆုံပေါ် ဆည်များဆောက်၍ လျှပ်စစ်ထုတ်မည့် စီမံကိန်းအား ပြန်အသက်သွင်းရန် ကြိုးပမ်းလျက်ရှိသလို၂၀၂၄ ခုနှစ် ဧပြီ ၂၄ ရက်တွင် ဧရာဝတီမြစ်ဆုံ-မြစ်ညာ မြစ်ဝှမ်း ရေအားလျှပ်စစ်စီမံကိန်းဦးဆောင်အဖွဲ့ကို ဖွဲ့စည်းခဲ့ပြီးနောက် လက်ရှိ ကချင်ပြည်နယ် ဒေသခံများအား လိုက်လံ စည်းရုံးလှုံ့ဆော်မှုများ ပြုလုပ်လျက်ရှိသည်။ #WhatsHappeningInMyanmar #RejectMilitaryCoup