The Irrawaddy - Burmese

အမေရိကန်-အီရန် ပြန်တိုက်ခိုက်မှု ၆ ရက်မြောက် ရှိလာပြီး ဟော်မုဇ်ရေလက်ကြား တင်းမာမှု မြင့်တက် ဧရာဝတီ၊ ဇူလိုင် ၁၇၊ ၂၀၂၆ ဟော်မုဇ်ရေလက်ကြား ထိန်းချုပ်မှုနှင့် ပတ်သက်၍ အမေရိကန်စစ်တပ်က အီရန်နိုင်ငံအပေါ် ၆ ညမြောက်အဖြစ် ဆက်တိုက် ဗုံးကြဲတိုက်ခိုက်ခဲ့သည်။ အမေရိကန် အလယ်ပိုင်းစစ်ဌာနချုပ် က ဤတိုက်ခိုက်မှုများသည် အီရန်၏ စစ်ရေးစွမ်းဆောင်ရည်ကို လျှော့ချရန်ဖြစ်ကြောင်း ပြောကြားခဲ့ပြီး၊ အီရန်ဆိပ်ကမ်းများကို ပိတ်ဆို့သည့် လုပ်ငန်းစဉ်အဖြစ် သင်္ဘောတစင်းပေါ်သို့ တက်ရောက်စီးနင်းခဲ့သည်။ အမေရိကန်၏ တိုက်ခိုက်မှုများသည် တံတားများ၊ ရထားဘူတာနှင့် လေဆိပ်ကဲ့သို့သော အရပ်ဘက် အခြေခံအဆောက်အအုံများကို ထိမှန်ခဲ့ပြီး ယခုတိုက်ခိုက်မှုအတွင်း လူ ၇ ဦး သေဆုံးခဲ့ကြောင်း အီရန်အစိုးရမီဒီယာများက ဖော်ပြသည်။ စစ်ပွဲပြန်လည်စတင်ကတည်းက အီရန်နိုင်ငံတွင်း သေဆုံးသူ အနည်းဆုံး ၃၈ ဦးနှင့် ဒဏ်ရာရသူ ၄၀၀ ကျော် ရှိလာပြီဖြစ်သည်။ အီရန်တော်လှန်ရေးအစောင့်တပ် (IRGC) က အိုမန်ရှိ အမေရိကန် ရေကြောင်းစောင့်ကြည့်ရေး ရေဒါစခန်းများ၊ ကူဝိတ်နှင့် ဘာရိန်းရှိ ပစ်မှတ်များအပြင် ဆီးရီးယားရှိ အမေရိကန်အထူးစစ်ဆင်ရေး ဌာနချုပ်ကိုပါ ဒုံးကျည်များဖြင့် ပြန်လည်တိုက်ခိုက်ခဲ့သည်ဟု ဆိုသည်။ တိုက်ခိုက်မှုများ ပြင်းထန်လာစဉ်အတွင်း ဂျော်ဒန်နိုင်ငံက အီရန်ဒုံးကျည် ၃ စင်းကို ပစ်ချခဲ့သည်။ အခြားတဖက်တွင်လည်း အီရတ် ကာဒစ်စတန်ဒေသ ဆူလေမာနီယာမြို့တွင် တိုက်ခိုက်မှုကြောင့် လူ ၈ ဦး သေဆုံးခဲ့ပြီး၊ ကာဒစ်စတန်တပ်ဖွဲ့များက ယင်းတိုက်ခိုက်မှုမှာ အီရန်၏လက်ချက်ဟု စွပ်စွဲခဲ့သည်။ အရေးပါသော ဟော်မုဇ်ရေလမ်းကြောင်း ပိတ်ဆို့ထားမှုကြောင့် ကမ္ဘာ့ရေနံစီးဆင်းမှုကို ထိခိုက်နေပြီး၊ အခြေအနေများ မကြာမီ မတိုးတက်လာပါက ကမ္ဘာ့စွမ်းအင်ထောက်ပံ့မှုအပေါ် စိုးရိမ်ရကြောင်း အပြည်ပြည်ဆိုင်ရာ စွမ်းအင်အေဂျင်စီ (IEA) အကြီးအကဲက သတိပေးခဲ့သည်။ တရုတ်နှင့် ပါကစ္စတန်နိုင်ငံခြားရေးဝန်ကြီးများကလည်း တိုက်ခိုက်မှုများ ရပ်တန့်ကာ ဆွေးနွေးပွဲများ ပြန်လည်စတင်ရန် တောင်းဆိုခဲ့ကြသည်။ အိမ်ဖြူတော်က သမ္မတထရမ့်အနေဖြင့် အီရန်နှင့် တွေ့ဆုံဆွေးနွေးရန် လမ်းဖွင့်ထားဆဲဖြစ်ကြောင်း ပြောကြားခဲ့သော်လည်း၊ အီရန်ထိပ်တန်းညှိနှိုင်းရေးမှူး မိုဟာမက် ဘာဂါ ဂါလီဘတ်ဖ်ကမူ အီရန်အတွက် အကျိုးအမြတ်မရှိသော မည်သည့်သဘောတူညီချက်ကိုမဆို လိုက်နာရန် အကြောင်းမရှိကြောင်း တုံ့ပြန်ခဲ့သည်။ ကိုးကား။ ။ BBC သတင်း US launches new strikes as Iran says civilian infrastructure hit ပုံစာ - ၂၀၂၆ ခုနှစ် ဇူလိုင် ၁၄ ရက်က အမျိုးအမည်မသိရသေးသည့် နေရာတခု၌ ပေါက်ကွဲမှုဖြစ်ပွားပြီး မီးခိုးများ ပျံတက်နေပုံကို အမေရိကန် အလယ်ပိုင်းစစ်ဌာနချုပ်က ထုတ်ပြန်ခဲ့သည်/ U.S. Central Command