The Irrawaddy - Burmese

ပြင်သစ်တော်လှန်ရေးနေ့ အခမ်းအနားတွင် ယူကရိန်းကို ဂုဏ်ပြုပြီး ဥရောပ၏ စစ်ရေးအင်အားကို ပြသ ဧရာဝတီ၊ ဇူလိုင် ၁၅၊ ၂၀၂၆ အင်္ဂါနေ့က ပြုလုပ်ခဲ့သည့် ပြင်သစ်နိုင်ငံ၏ အမျိုးသားနေ့ဖြစ်သော ဘတ်စတီးလ်နေ့ စစ်ရေးပြအခမ်းအနားတွင် ယူကရိန်းတိုက်လေယာဉ်မှူးများနှင့် စစ်သည်တော်များကို အထူးနေရာပေး ဂုဏ်ပြုခဲ့ပြီး၊ ယင်းသည် ယူကရိန်းအပေါ် ထောက်ခံမှုကို ပြသရုံသာမက ဥရောပ၏ စစ်ရေးအင်အားကိုလည်း ပုံဖော်ပြသခဲ့သည်။ သမ္မတ အီမန်နျူရယ် မက်ခရွန်၏ သမ္မတသက်တမ်း နောက်ဆုံး ဘတ်စတီးလ်နေ့ အခမ်းအနားတွင် ဥရောပခေါင်းဆောင် ၃၀ ခန့် တက်ရောက်ခဲ့ကြသည်။ ယင်းလုပ်ရပ်သည် ရုရှားသမ္မတ ဗလာဒီမာ ပူတင်နှင့် အမေရိကန်သမ္မတ ဒေါ်နယ်ထရမ့်တို့အား ဥရောပသည် ညီညွတ်မှုရှိပြီး မိမိကိုယ်ကိုယ် ကာကွယ်ရန် အဆင့်သင့်ရှိနေကြောင်း ပြသရန် ရည်ရွယ်ပုံရသည်။ ယူကရိန်းသမ္မတ ဗိုလိုဒီမိုင်ယာ ဇီလန်းစကီးအား ဥရောပခေါင်းဆောင်များက မတ်တတ်ရပ် သြဘာပေးခဲ့ကြသလို၊ စစ်ရေးပြချီတက်သည့် ယူကရိန်းစစ်သည်များကိုလည်း လူထုက အကျယ်လောင်ဆုံး အားပေးခဲ့ကြသည်။ ဘတ်စတီးလ်နေ့ သမိုင်းကြောင်း ၁၇၈၉ ခုနှစ် ဇူလိုင် ၁၄ ရက်တွင် ပါရီမြို့သားများ ဘတ်စတီးလ်ခံတပ်နှင့် အကျဉ်းထောင်ကို စီးနင်းတိုက်ခိုက်ခဲ့ရာမှ ပြင်သစ်တော်လှန်ရေး စတင်ခဲ့ခြင်းကို အထိမ်းအမှတ်ပြု ကျင်းပခြင်း ဖြစ်သည်။ ယခုနှစ်တွင်မူ ဤအမျိုးသားနေ့သည် ပြင်းထန်သော တောမီးလောင်ကျွမ်းမှု၊ အပူလှိုင်းဖြတ်သန်းမှုတို့နှင့် တိုက်ဆိုင်နေသဖြင့် မိရိုးဖလာ မီးရှူးမီးပန်းပစ်ဖောက်မှုများကို ဖျက်သိမ်းခဲ့သည်။ ယူကရိန်းနှင့် ဥရောပတပ်ဖွဲ့များ ပူးပေါင်းချီတက်ခြင်း စစ်ရေးပြပွဲတွင် ယူကရိန်းစစ်သည်များ ချီတက်ခဲ့ကြသလို၊ ပြင်သစ်တွင် လေ့ကျင့်ထားသည့် ယူကရိန်းလေသူရဲများသည်လည်း ပြင်သစ်လေတပ်မှ Mirage 2000B တိုက်လေယာဉ်များပေါ်တွင် ပူးတွဲလိုက်ပါ ပျံသန်းခဲ့သည်။ ထို့ပြင် ယူကရိန်း၏ စစ်ပြီးခေတ် လုံခြုံရေးကို ကူညီရန် ကတိပြုထားသည့် “စေတနာ့ဝန်ထမ်းညွန့်ပေါင်းအဖွဲ့” မှ ဥရောပစစ်သည် ၅၀၀ ခန့်လည်း ၎င်းတို့၏ အမျိုးသားအလံများကို ကိုင်ဆောင်ကာ ပါဝင်ချီတက်ခဲ့ကြသည်။ ယခုနှစ် စစ်ရေးပြပွဲတွင် စစ်သည်အင်အား ၇,၆၀၀ အထိ ပါဝင်ခဲ့ပြီး ယခင်နှစ်ထက် သိသိသာသာ ပိုမိုများပြားကာ စံချိန်တင်ခဲ့သည်။ ကိုးကား။ ။ AP သတင်း European troops and warplanes join Paris Bastille Day parade in a show of unity for Ukraine ပုံစာ - ၁၇၈၉ ခုနှစ် ဇူလိုင် ၁၄ ရက်တွင် ပါရီမြို့သားများ ဘတ်စတီးလ်ခံတပ်နှင့် အကျဉ်းထောင်ကို စီးနင်းတိုက်ခိုက်ခဲ့ရာမှ ပြင်သစ်တော်လှန်ရေး စတင်ခဲ့ခြင်းကို အထိမ်းအမှတ်ပြု ကျင်းပခြင်း ဖြစ်သည်/AFP