قناة أبي ايمن دروس القرأن مع التجويد

(በውስጥ መስመር የተላከ ታሪክ)-01- ❝ሁሉም ነገር የጀመረው 10ኛ ክፍል እያለሁ ነው። እስከዚያ ጊዜ ድረስ ጭንቅላቴ ብሩህ፣ ህልሜ ሰፊ ነበር። ከቁርዓን ሂፍዜ ጎን ለጎን የትምህርት ቤት ውጤቴ ሁልጊዜም ከ1ኛ እስከ 3ኛ አይጠፋም። ወደፊት ትልቅ ቦታ ደርሼ ቤተሰቦቼንና ኡማውን የምጠቅምበት ትልቅ ተስፋ ነበረኝ። አንድ ቀን ግን… ያ ቀን ህይወቴን ቀየረው። አንድ የክፍሌ ጓደኛዬ ወደ እኔ መጣ። ስልኩን እያሳየኝ «አንድ ነገር ላሳይህ፣ አትደንግጥ ግን ተመልከተው» አለኝ። የማወቅ ጉጉት አሸነፈኝ። ስክሪኑ ላይ ያየሁት አስጸያፊ የወሲብ ምስል በነፍሴ ውስጥ ያልታወቀ እሳት ለኮሰ። ያቺ ቅጽበት የጥፋቴ መጀመሪያ ነበረች። ጓደኛዬ «ምንም ችግር የለውም፣ ወጣት ነህ፤ ስሜትህን በራስህ አበርደው» እያለ እንደ ቀላል ነገር ነገረኝ። ለመጀመሪያ ጊዜ ብቻዬን ሳደርገው የተሰማኝ የጥፋተኝነት ስሜት ዛሬም ድረስ ትዝ ይለኛል። አልቅሼ ከአላህ ምህረትን ጠየቅኩ። «ዳግመኛ አልደግመውም» ብዬ ቃል ገባሁ። ነገር ግን ሸይጣን እና የስልኬ ስክሪን ተባብረው አጠመዱኝ። አንድ ቀን… ሁለት ቀን… ሳምንት… እያለ ሳላስበው በየቀኑ ካላደረግኩት እንቅልፍ የማይወስደኝ እስረኛ ሆንኩ። ቀስ በቀስ ያ ያማረው ህይወቴ መናድ ጀመረ። ማታ ሰው ሁሉ ሲተኛ፣ እኔ ከብርድ ልብሴ ስር ሆኜ ከቆሻሻ ቪዲዮዎች ጋር እጋፈጣለሁ። ስሜቴን አርክቼ ስጨርስ የሚሰማኝ የባዶነት፣ የውርደት እና የጸጸት ስሜት ልቤን ይሰብረዋል። መስጂድ ሄጄ ሶላት ላይ ስቆም አእምሮዬ ውስጥ የሚመላለሰው ያ ያየሁት ቆሻሻ ምስል ሆነ። ኹሹዕ ጠፋ። የቁርዓን ጣዕም ከልቤ ተነነ። የአእምሮዬ ንቃት ተሟጠጠ። ጭንቅላቴን የሆነ ድቅድቅ ጭጋግ ሸፈነው፤ ምንም ነገር ማስታወስም ሆነ ትኩረት ማድረግ አቃተኝ። እንደ ምንም ብዬ በብዙ መከራ 12ኛ ክፍልን አልፌ ዩኒቨርሲቲ ገባሁ። በልቤ «ግቢ ስገባ አካባቢዬን እቀይራለሁ፣ ራሴን አድሳለሁ፣ ከዚህ ሱስ እወጣለሁ» ብዬ ቃል ገብቼ ነበር። ነገር ግን እውነታው ተቃራኒ ሆነ። ዩኒቨርሲቲ ውስጥ ነፃነት አለ። ማንም አይቆጣጠርህም። ዶርም ውስጥ ጓደኞቼ ወደ ቤተ-መጽሐፍት ሲሄዱ፣ እኔ ብቻዬን ቀርቼ ያንኑ አጸያፊ ተግባር እፈጽማለሁ። ጉልበቴ ደከመ፤ አይኖቼ ስር ጠቆሩ። ፈተና ሲደርስ ለማጥናት እቀመጣለሁ፣ ነገር ግን አንብቤ ገጽ ማለፍ አልችልም። አእምሮዬ በ ራቁት ፎቶ እና ቪዶዎ ሱስ ስለተቃጠለ ተራ ነገር ላይ ማተኮር አልቻለም። ውጤቴ ክፉኛ ወደቀ። አንድ ወቅት የትምህርት ቤት ኮከብ የነበርኩት ልጅ፣ ዩኒቨርሲቲ ውስጥ በውጤት ማነስ ከግቢ ልባረር ጫፍ ደረስኩ። ዛሬ ላይ ትልቁ ህመሜ ውጤቴ መበላሸቱ ብቻ አይደለም። ትልቁ ፍርሃቴና ስብራቴ ሌላ ነው። አሁን ላይ እድሜዬ እየገፋ ነው። ቤተሰቦቼና ዘመዶቼ «ማሻአላህ ልጃችን ተመርቋል፤ አሁን ደግሞ ጥሩ፣ ሷሊህ ልጅ ፈልገን እናጋባህ» ይሉኛል። ይህን ሲሉኝ ልቤ በፍርሃት ይርዳል፣ ደሜ ይቀዘቅዛል። እኔ እንዴት ብዬ አገባለሁ? ማግባት እፈራለሁ! ለዓመታት በፈጸምኩት ራስን በራስ የማርካት ሱስ እና በተመለከትኳቸው ምናባዊ የወሲብ ቪዲዮዎች ምክንያት አካሌም ሆነ ስነ-ልቦናዬ ወድሟል። እንደ አንድ ጤነኛ ወንድ ትዳር ውስጥ ገብቼ ሚስቴን በሃላል ማስደሰት የምችል አይመስለኝም። የወንድነት ብቃቴን ያጣሁ ያህል ይሰማኛል። ያቺ ምስኪን ልጅ አግብቼ እርሷን ከማሳፍርና ህይወቷን ከማበላሽ፣ ብቸኝነቴን መርጬ በጸጸት መኖር ይቀለኛል እያልኩ ራሴን እሸውዳለሁ። የነበረኝ በራስ መተማመን ሙሉ በሙሉ ከስሟል። የውጪዬን ጸባይ አይተው ሰዎች ሲያመሰግኑኝ በውስጤ እደማለሁ። «እናንተ የምታውቁት እኔን አይደለም፤ እኔ በራሴ ስሜት የተሸነፍኩ፣ በጨለማ ክፍል ውስጥ ወንድነቴንና ወጣትነቴን የገበርኩ ምስኪን ነኝ» እላለሁ በሆዴ።ታሪኬን የነገርኳችሁ መማሪያ ይሆን ዘንድ እና ከልባችሁ ዱዓ እንድታደርጉልኝ ነው።❞ t.me/Sle_qelbachn1