አዲስ ምልከታ🌍

በመላው ዓለም ከኖህ ዘመን የጥፋት ውሃ ጋር የሚመሳሰሉ አፈታሪኮች አሉ። በህንድ፣ በሱሜሪያ፣ በቻይና፣ በላቲን አሜሪካ ወዘተ። በእስልምናም ጭምር ይህ ታሪክ እንዳለ ይነገራል። እነዚህ ህዝቦች በሙሉ በአንድም ሆነ በሌላ መንገድ ከዚያ ታሪክ ጋር የሚመሳሰል ነገር ይተርካሉ። ሁሉንም አንድ የሚያደርጋቸው አንድ የሆነ ጎርፍ መጥቶ ዓለምን እንዳጥለቀለቀ እና ጥቂት ሰዎች ብቻ እንደተረፉ ነው። አልፎም ስምንት ሰዎች ብቻ ተረፉ የሚሉም አሉ። በመርከብ ተረፉ የሚለውም ብዙዎቹ የሚጋሩት ነው። የኖህን ታሪክ ካየን ደግሞ በመርከቧ የተረፉት ስምንት ሰዎች ናቸው። ኖህ እና ሚስቱ ሁለት ሰው፣ ከዚያ ሶስቱ ልጆች ከነ ሚስቶቻቸው ስድስት ሰው። አንድ ላይ ስምንት ይሆናሉ። እነዚህ አፈታሪኮች ጨምረውም፣ ከሰማይ የወረዱ አማልክት ለሰው ልጆች እውቀትን እንዳስተማሩ፣ ከነሱም ከፊል ሰው የሆኑ እንደነበሩ እና እነሱና አባቶቻቸው አማልክቶቹ የሰው ልጆችን በሙሉ እንደ ነገስታት ሆነው እንደገዙ፣ እንደ አምላክ ሆነውም እንደተመለኩ ይተርካሉ። በጥንት ታሪክ ዘመን፣ እስከ ሮም ኢምፓየር ድረስ ነገስታት እንደ አምላክን የመመለክ ነገሩ የቀጠለ ነበር። ይህም የወደቁት መላእክት ታሪክ በመጽሃፍ ቅዱስ ብቻ ያለ እንዳልሆነ እና የነሱ ዘሮች ኔፍሊሞችም በተመሳሳይ ታሪካቸው እንደቀጠለ ያሳያል። አነዚህ ታሪኮች ደግሞ በተደጋጋሚ ከዘንዶ ጋር የተያያዘ ነገርም አላቸው። አንዳንዴ ከፊል ሰው ከፊል አሳ፣ ከፊል ዘንዶ ወዘተ ያሉ ፍጡራን እንደነበሩም በነዚህ አፈታሪኮች ማየት እንችላለን። ይህም በመጽሃፈ ሄኖክ ተነግሯል። የወደቁት መላእክት የዘር ማዳቀል ሙከራ ያደርጉ እንደነበር የሚያሳዩ ፍንጮች መጽሀፈ ሄኖክ ላይ አሉ። ስለዚህ የዚህ ውጤትም እነዚያ ከፊል ሰው ከፊል ዘንዶ ወይም ከፊል አሳ የሆኑ ሰዎች በዚያ መልኩ ከምድር በታች ሆነው ወይም ዋኝተው የጥፋት ውሃውን ተረፉ የሚለውን መልስ ሊሰጠን ይችላል። እንደውም አንዳንድ ህዝቦች በግልጽ ከፊል ሰው ከፊል ዘንዶ ከሆኑ ሰዎች ተገኘን የሚል አፈታሪክ አላቸው። እነዚህ አፈታሪኮች ተራ አፈታሪክ አይደሉም፣ ምክንያቱም በመላው ዓለም፣ ሺዎች ኪሎሜትር ተራርቀው ባሉ ሃገራት ተመሳሳይ ይዘት ያላቸው ታሪኮች ተፈጥረዋልና ነው። ይህም የሚነግረን አፈታሪኮቹ አንዳች እውነት እንዳላቸው ነው። ስለዚህ በቀጣዩ ክፍል ተከታታይ ጽሁፋችን ይህንን በሰፊው እንዳስሳለን።