አዲስ ምልከታ🌍

በድጋሚ ለማስታወስም ያህል፣ መጽሃፈ ሄኖክም ሆነ መጽሃፈ ኩፋሌ፣ እነዚህን የወደቁ መላእክት እና ልጆቻቸውን በተመሳሳይ አጠራር ነው የሚጠሩት። ይህም መላእክት መሆናቸውን በደምብ የሚያረጋግጥ ነው። - መላእክቱን:- "መላእክተ ሰማይ"፣ "ትጉሃን" ብለው ይጠራሉ። - ልጆቻቸውን ደግሞ:- "ረዓይት" ብለው ይጠራሉ። በተጨማሪም እነዚህ መጻህፍት፣ መላእክቱ የሰዎችን ሴት ልጆች እንዳገቡና ከነሱም ልጆችን እንደወለዱ በደምብ ግልጽ አድርገው ያስቀምጣሉ። ግዕዙ ጽሁፍ "እማንቱ" "አንስት" የመሳሰሉ ቃላትን ይጠቀማል። "እማንቱ" ማለት "እነሱ" የሚለው ለሴቶች የምንጠቀመው ነው። "አንስት" ማለት ደግሞ ሴቶች ነው። ስለዚህ እነዚህ መላእክት ሚስቶችን እንዳገቡ በተደጋጋሚ ተገልጾ እናያለን። ማለትም ወንዶች ብቻ ነበሩ፣ በመካከላቸው ሴቶች አልነበሩም ማለት ነው። እናም ደቂቀ ሴት ቢሆኑ ኖሮ የቃየልን ልጆች ሚስቶች ሲያገቡ ከቃየል ልጆችም ወንዶቹ ከነሱ ሴቶችን አገቡ የሚል መኖር ነበረበት። ነገር ግን ያ የለም። ያም ብቻ ሳይሆን፣ መጽሃፈ ሄኖክም ሆነ መጽሃፈ ኩፋሌ፣ እነዚህ መላእክት ክቃየል ልጆች ጋር ተጋቡ የሚል በፍጹም አያነሱም። ነገር ግን እነዚህ መላእክት ደቂቀ ሴት ቢሆኑ ኖሮ ከቃየል ልጆች ጋር ተጋቡ ነበር መባል ያለበት። ይህም ተደጋጋሚ ማረጋገጫ ይሆነናል። ነገር ግን አሁን መጽሃፈ ኩፋሌን የምናነሳበት ምክንያት ያንን ማረጋገጫ እንዲደግምልን ሳይሆን ከኖህ ውሃ ዘመን በኋላ ስላለው መረጃ እንዲሰጠን ነው። ስለዚህ በቀጣይ ያንን ትኩረት አድርገን እንዳስሰዋለን።