ព្រះខ័ន

បេសកជនពិសេសអាស៊ាន៖ ការវិលត្រឡប់របស់អ្នកដឹកនាំមីយ៉ាន់ម៉ាមកកាន់កិច្ចប្រជុំអាស៊ាន នៅជាផ្លូវវែងឆ្ងាយទៅមុខទៀត -- រដ្ឋមន្ត្រីការបរទេសហ្វីលីពីន បានថ្លែងកាលពីថ្ងៃព្រហស្បតិ៍ ទី២៣ ខែកក្កដាថា ការចូលរួមរបស់អ្នកដឹកនាំមីយ៉ាន់ម៉ាក្នុងកិច្ចប្រជុំកំពូលនៃសមាគមប្រជាជាតិអាស៊ីអាគ្នេយ៍(អាស៊ាន) គឺ «ជាផ្លូវវែងឆ្ងាយទៅមុខទៀត»។ លោកស្រី Maria Theresa Lazaro បានថ្លែងនៅក្នុងសន្និសីទសារព័ត៌មានមួយបន្ទាប់ពីកិច្ចប្រជុំរដ្ឋមន្ត្រីការបរទេសអាស៊ានថា ប្រទេសមីយ៉ាន់ម៉ា ដែលកំពុងធ្លាក់ក្នុងសង្គ្រាមស៊ីវិល អាចនឹងមិនទាន់ត្រឡប់មកវិញឡើយ ដោយសារតែការអនុវត្តគំនិតផ្តួចផ្តើមសន្តិភាពរបស់អាស៊ាន ដែលគេស្គាល់ថាជា «កុងសង់ស៊ីស ៥ចំណុច» នោះ កំពុងត្រូវបានវាយតម្លៃនៅឡើយ។ «វានៅតែឆ្ងាយទៀត» នេះជាការលើកឡើងរបស់លោកស្រី Lazaro ដែលជាប្រធានបេសកជនពិសេសរបស់អាស៊ានទទួលបន្ទុកកិច្ចការមីយ៉ាន់ម៉ា បន្ទាប់ពី«មានសំណួរជាច្រើនជុំវិញការអនុវត្តតាម (កិច្ចព្រមព្រៀង) របស់ពួកគេ»។ លោកស្រី Lazaro ដែលនឹងដឹកនាំបេសកកម្មមនុស្សធម៌ទៅកាន់ទីនោះនៅចុងឆ្នាំនេះ បានថ្លែងថា គេមិនទាន់ប្រាកដនៅឡើយទេថា តើលោកស្រីនឹងត្រូវបានអនុញ្ញាតឱ្យជួបម្ចាស់ពានរង្វាន់ណូបែល លោកស្រី អ៊ុងសាន ស៊ូជី ដែលត្រូវបានទម្លាក់ចេញពីអំណាចក្នុងរដ្ឋប្រហារយោធាឆ្នាំ២០២១ ដែរឬយ៉ាងណានោះ។ លោកស្រីបានបន្ថែមថា ប្លុកអាស៊ាននឹងបង្កើតលក្ខណៈវិនិច្ឆ័យ (benchmarks) ដើម្បីវាស់វែងពីបម្រែបម្រួលនៃផែនទីសន្តិភាព ហើយការបរាជ័យក្នុងការសម្រេចឱ្យបានតាមលក្ខណៈវិនិច្ឆ័យទាំងនោះ នឹងត្រូវចាត់ទុកជាការមិនបានអនុវត្តតាម។ សូមជម្រាបជូនថា អតីតឧត្តមសេនីយ៍កំពូលរបស់ប្រទេសមីយ៉ាន់ម៉ា លោក មីន អ៊ុង ឡាំង ដែលបច្ចុប្បន្នជាប្រធានាធិបតី បានយល់ព្រមលើផែនការនេះជាមួយអាស៊ានកាលពីខែមេសា ឆ្នាំ២០២១ ពោលគឺពីរខែបន្ទាប់ពីលោកបានធ្វើរដ្ឋប្រហារ ដែលបានរុញច្រានប្រទេសនេះ ឱ្យធ្លាក់ចូលទៅក្នុងភាពវឹកវរ។ ក្រោយមក អាស៊ានបានរារាំងថ្នាក់ដឹកនាំមីយ៉ាន់ម៉ាមិនឱ្យចូលរួមកិច្ចប្រជុំកំពូលរបស់ខ្លួន ដោយសារតែការបរាជ័យក្នុងការអនុវត្តផែនការសន្តិភាពនេះ ដែលក្នុងនោះរួមមានការអំពាវនាវឱ្យមានកិច្ចសន្ទនា ការបញ្ចប់អរិភាព និងការផ្តល់ច្រកចូលសម្រាប់ជំនួយមនុស្សធម៌៕ ប្រភព៖ The Star 🌐 ព្រះខ័ន - Preah Khan 🌐 ព្រះខ័ន 🌐 Preah Khan 🌐 ព្រះខ័ន 🫥 ព្រះខ័ន_PreahKhan