ព្រះខ័ន

អ៊ុយក្រែនប្រើប្រាស់ថវិការបស់សហភាពអឺរ៉ុប ដើម្បីទិញគ្រឿងដ្រូនពីប្រទេសចិន -- អ៊ុយក្រែននឹងត្រូវបានអនុញ្ញាតឱ្យប្រើប្រាស់កញ្ចប់ថវិកាពីកម្ចីការពារជាតិរបស់សហភាពអឺរ៉ុប (EU) ដើម្បីទិញគ្រឿងបន្លាស់ដ្រូនពីប្រទេសចិន។ ការណ៍នេះ បានបង្ហាញឱ្យឃើញពីការពឹងផ្អែករបស់អឺរ៉ុបលើទីក្រុងប៉េកាំង សម្រាប់គ្រឿងបន្លាស់សំខាន់ៗ ស្របពេលដែលអឺរ៉ុបកំពុងជួបការលំបាកក្នុងការកសាងឧស្សាហកម្មការពារជាតិផ្ទាល់ខ្លួន។ ទីក្រុងកៀវទទួលបានការលើកលែង សម្រាប់ផ្នែកខ្លះនៃកញ្ចប់ថវិកាដំណាក់កាលដំបូងចំនួន ៦.៨ពាន់លានដុល្លារ ដើម្បីទិញគ្រឿងបន្លាស់ដ្រូនពីប្រទេសចិន។ នេះបើយោងតាមប្រភពជិតស្និទ្ធនឹងការសម្រេចចិត្តនេះ ពីររូប។ ថវិកានេះ គឺជាចំណែកលើកដំបូងចេញពីកម្ចីគាំទ្រអ៊ុយក្រែន ក្នុងទំហំធំជាងនេះ ដែលក្នុងនោះថវិកាចំនួន ៦០ពាន់លានអឺរ៉ូ (៦៨.៦ពាន់លានដុល្លារ) ត្រូវបានកំណត់ទុក សម្រាប់គ្រឿងបរិក្ខារការពារជាតិ។ ការសម្រេចចិត្តនេះ បានគូសបញ្ជាក់ពីចន្លោះប្រហោង ដែលនៅតែមាន នៅក្នុងផលិតកម្មការពារជាតិក្នុងស្រុករបស់សហភាពអឺរ៉ុប បើទោះបីជាមានការជំរុញឱ្យពង្រឹងមូលដ្ឋានឧស្សាហកម្មរបស់អឺរ៉ុបក៏ដោយ។ ការលើកលែងនេះ ក៏បានបង្ហាញឱ្យឃើញយ៉ាងច្បាស់ដែរនូវតួនាទីរបស់ប្រទេសចិន ក្នុងការផ្គត់ផ្គង់ដល់ភាគីទាំងសងខាង នៅក្នុងជម្លោះ ដែលមានរយៈពេលជាង ៤ឆ្នាំមកនេះ។ ខណៈពេលដែលសហភាពអឺរ៉ុបបានចោទប្រកាន់ទីក្រុងប៉េកាំងថា ជា«អ្នកផ្គត់ផ្គង់ជួយដល់សង្គ្រាមរបស់រុស្ស៊ី» ប្រឆាំងនឹងអ៊ុយក្រែន សហភាពអឺរ៉ុបក៏បានទទួលស្គាល់ដែរថា ឧស្សាហកម្មសព្វាវុធរបស់ទីក្រុងកៀវក៏ពឹងផ្អែកលើគ្រឿងបន្លាស់របស់ចិនដូចគ្នា។ ប្រទេសអ៊ុយក្រែនផ្ទាល់ ក៏បានកសាងឧស្សាហកម្មការពារជាតិប្រកបដោយភាពច្នៃប្រឌិតបំផុតមួយនៅក្នុងតំបន់អឺរ៉ុប បន្ទាប់រងការវាយប្រហារខ្លាំងៗ ពីសំណាក់រុស្ស៊ី។ ក្រុមហ៊ុនផលិតក្នុងស្រុកអ៊ុយក្រែន បានបោះជំហានទៅមុខលឿនជាងក្រុមហ៊ុនសព្វាវុធបែបប្រពៃណីរបស់អឺរ៉ុបមួយចំនួនផង៕ ប្រភព៖ The Financial Times 🌐 ព្រះខ័ន - Preah Khan 🌐 ព្រះខ័ន 🌐 Preah Khan 🌐 ព្រះខ័ន 🫥 ព្រះខ័ន_PreahKhan