ព្រះខ័ន

នៅសមុទ្រចិនខាងត្បូង៖ ចិន វៀតណាម និងហ្វីលីពីន រួមគ្នាស្វែងរកនាវិក ១៧នាក់ ក្រោយនាវាដឹកទំនិញមួយគ្រឿងលិច -- ក្រុមអ្នកជួយសង្គ្រោះមកពីប្រទេសវៀតណាម ហ្វីលីពីន និងចិន កំពុងធ្វើប្រតិបត្តិរួមគ្នាមួយ ដើម្បីស្វែងរកសមាជិកនាវិកចំនួន ១៧នាក់ ដែលបានបាត់ខ្លួន បន្ទាប់ពីនាវាដឹកទំនិញមួយគ្រឿងបានលិច ដោយសារបញ្ហាអាកាសធាតុ។ នាវាមួយគ្រឿងនេះ បានលិចនៅជិតកោះ ដែលគ្រប់គ្រងដោយប្រទេសចិន ក្នុងសមុទ្រចិនខាងត្បូង។ នាវាដឹកទំនិញវៀតណាម ឈ្មោះ Khôi Nguyên 18 ដែលមានក្រុមការងារនៅលើនោះចំនួន ៦២នាក់ បានលិច កាលពីយប់ថ្ងៃសៅរ៍ នៅជិតកោះសិប្បនិម្មិត Fiery Cross Reef ដែលជាកោះសាងសង់ដោយប្រទេសចិន និងជាមូលដ្ឋានយោធា នៅក្នុងប្រជុំកោះស្បាត់លី ដែលកំពុងមានវិវាទ។ ក្នុងចំណោមមនុស្សទាំងអស់នៅលើនាវា មាននាវិកចំនួន ៤៥នាក់ត្រូវបានជួយសង្រ្គោះ ខណៈក្រុមការងារនាវាចំនួន ១៧នាក់ទៀត កំពុងបាត់ខ្លួននៅឡើយ។ អ្នកនាំពាក្យក្រសួងការបរទេសវៀតណាម លោកស្រី ហ្វាម ធូហាំង (Phạm Thu Hằng) បានថ្លែងថា នាវាបានលិច ដោយសារលក្ខខណ្ឌអាកាសធាតុអាក្រក់ នៅក្នុងសមុទ្រខាងកើត។ ឆ្មាំសមុទ្រហ្វីលីពីនបានឱ្យដឹងថា ខ្លួនបានបញ្ជូននាវាក្បាតមួយគ្រឿង និងយន្តហោះមួយគ្រឿង ដើម្បីជួយស្វែងរកក្រុមការងារនាវា ដែលបាត់ខ្លួន បន្ទាប់ពីទទួលបានសំណើអន្តរាគមន៍ពីប្រទេសវៀតណាម។ ចំណែកឯ នាវាជួយសង្គ្រោះ និងឧទ្ធម្ភាគចក្ររបស់ប្រទេសចិន ព្រមទាំងនាវាផ្សេងទៀត នៅក្នុងតំបន់នោះ ក៏បានចូលរួមក្នុងប្រតិបត្តិការនេះដែរ។ ចំណែកឯក្រសួងការបរទេសវៀតណាម បានថ្លែងអំណរគុណដល់ប្រទេសចិន សម្រាប់ជំនួយដ៏ឆាប់រហ័សនេះ ហើយបានសម្តែងក្តីសង្ឃឹមថា ប្រតិបត្តិការស្វែងរកនឹងបន្ត ដើម្បីស្វែងរកសមាជិកនាវិក ដែលបានបាត់ខ្លួន៕ ប្រភព៖ The Star – AP 🌐 ព្រះខ័ន - Preah Khan 🌐 ព្រះខ័ន 🌐 Preah Khan 🌐 ព្រះខ័ន 🫥 ព្រះខ័ន_PreahKhan