ព្រះខ័ន

លោក ម៉ាក្រុង កោះប្រជុំបន្ទាន់ ខណៈពេលដែលភ្លើងព្រៃកំពុងគំរាមកំហែងក្រុងប៊រដូ (Bordeaux) ហើយរលកកម្តៅថ្មីមួយកាន់តែខិតជិតមកដល់ -- ប្រធានាធិបតីបារាំង លោក អេម៉ានុយអែល ម៉ាក្រុង នឹងរៀបចំកិច្ចប្រជុំគណៈរដ្ឋមន្ត្រីបន្ទាន់មួយនៅថ្ងៃចន្ទ ទី២៧ ខែកក្កដានេះ ខណៈដែលភ្លើងឆេះព្រៃកំពុងខិតជិតមកដល់ទីក្រុង ប៊រដូ (Bordeaux) ភាគនិរតីនៃប្រទេសបារាំង។ អភិបាលក្រុង លោក ថូម៉ាស ខាហ្សឺណាហ្វ (Thomas Cazenave) បានឱ្យដឹងថា រលកកម្តៅមួយទៀត ដែលជិតមកដល់ នឹងធ្វើឱ្យកិច្ចខិតខំប្រឹងប្រែងបង្ក្រាបអគ្គិភ័យកំពុងរីករាលដាលនេះ កាន់តែមានភាពស្មុគស្មាញ ខណៈដែលបច្ចុប្បន្នភ្លើងឆេះព្រៃនេះ មានចម្ងាយប្រមាណ ១៥ គីឡូម៉ែត្រពីក្រុងប៊រដូ។ ភ្លើងឆេះព្រៃបានឆាបឆេះយ៉ាងសន្ធោសន្ធៅ នៅទូទាំងអឺរ៉ុប ក្នុងកំឡុងសប្តាហ៍កន្លងមកនេះ ជាពិសេសនៅប្រទេសបារាំង និងអេស្ប៉ាញ ដែលធ្វើឱ្យប្រជាជនជាង ៣៣០ ០០០នាក់ត្រូវជម្លៀសចេញ ទៅកន្លែងសុវត្ថិភាព។ ប្រធានាធិបតីបារាំង លោក ម៉ាក្រុង បានថ្លែងកាលពីថ្ងៃសៅរ៍ថា ប្រទេសបារាំងនឹង "ស្តារឡើងវិញ" ហើយរដ្ឋាភិបាលរបស់លោកនឹងនៅជួយជ្រោមជ្រែងរហូតដល់ចប់គ្រោះមហន្តរាយនេះ។ គួរជម្រាបថា មនុស្សរាប់ម៉ឺននាក់ត្រូវបានជម្លៀសចេញពីតំបន់ជុំវិញក្រុងប៊រដូ រួចរាល់ហើយ ខណៈដែលរដ្ឋមន្ត្រីក្រសួងមហាផ្ទៃបារាំង លោក ឡូរ៉ង់ នុយញ៉ែស (Laurent Nuñez) បានលើកឡើងថា ស្ថានការណ៍នៅតែ "អាក្រក់ខ្លាំង" ហើយអគ្គិភ័យកំពុងរាលដាល ដោយគ្មានទិសដៅច្បាស់លាស់ សំដៅទៅរកទីក្រុង។ ការព្យាករណ៍ធាតុអាកាស បានឱ្យដឹងថា សីតុណ្ហភាពអាចកើនឡើងខ្លាំងរហូតដល់ ៤០អង្សារសេ នៅតំបន់មួយចំនួន ចាប់ពីថ្ងៃអង្គារ ទី២៨ ខែកក្កដា តទៅ។ សូមជម្រាបជូនថា ភ្លើងឆេះព្រៃបានប៉ះពាល់យ៉ាងធ្ងន់ធ្ងរដល់ប្រទេសបារាំង។ ជាក់ស្តែងផ្ទៃដីប្រមាណ ៤២ ០០០ហិកតា ត្រូវឆេះខូចខាតនៅភាគនិរតី ដែលនេះជាគ្រោះអគ្គិភ័យឆេះព្រៃធំបំផុតមួយចាប់តាំងពីសង្គ្រាមលោកលើកទីពីរមក។ គិតចាប់តាំងពីដើមឆ្នាំ២០២៦មក ផ្ទៃដីប្រមាណ ៩៨ ០០០ហិកតាហើយ ត្រូវបានភ្លើងឆេះបំផ្លាញ៕ ប្រភព៖ BBC 🌐 ព្រះខ័ន - Preah Khan 🌐 ព្រះខ័ន 🌐 Preah Khan 🌐 ព្រះខ័ន 🫥 ព្រះខ័ន_PreahKhan