በአዲስ አበባ ከተማ አስተዳደር የከተማ ውበትና አረንጓዴ ልማት ቢሮ

ለአንድ ጀምበር የአረንጓዴ አሻራ የችግኝ ተከላ መርሃ ግብር ቅድመ ዝግጅት ተጠናቋል! የዘንድሮው የአንድ ጀምበር የአረንጓዴ አሻራ የችግኝ ተከላ መርሃ ግብር ከባለፉት ዓመታት በላቀ ሁኔታ በታላቅ ዝግጅት ለመተግበር የመጨረሻው ምዕራፍ ላይ ደርሷል። ለመላው የመዲናችን ህዝብ የተላለፈው ጥሪ እና የተደረገው ቅድመ ዝግጅት ኢትዮጵያውያን በነቂስ ወጥተው ታሪክ ለመስራት በጉጉት እንዲጠብቁ አድርጓቸዋል። የዘመቻውን ስኬታማነት ለማረጋገጥ የሚያስፈልጉ ዋና ዋና የቅድመ ዝግጅት ስራዎች ሙሉ በሙሉ ተጠናቀዋል። ለችግኞቹ የሚሆኑ የጉድጓድ ቁፋሮዎች፣ ጥራት ያላቸው የችግኝ አይነቶች ዝግጅት እንዲሁም የችግኝ ስርጭት ስራዎች ተጠናቀው ወደ መከላው ቦታ ደርሰዋል። ይህ ስራ በሳይንሳዊ መንገድ መከናወኑ የችግኞቹን የመፅደቅ ዕድል በከፍተኛ ደረጃ ያሳድገዋል። የህብረተሰቡን ተሳትፎ ለማጠናከር ሰፊ የኮሙኒኬሽን ስራዎች ተሰርተዋል። እያንዳንዱ ዜጋ ስለ ተከላው ቦታ፣ ሰዓት እና ስለሚተከሉት የችግኝ አይነቶች (በተለይም ለምግብነትና ለጥላ የሚሆኑ) በቂ መረጃ እንዲያገኝ ተደርጓል። በዚህም ምክንያት አረንጓዴ አሻራውን ለማኖር የማይዘጋጅና የማይጓጓ አንድም ዜጋ የለም ለማለት ይቻላል። ይህ ብሄራዊ ጥሪ ለነገው ትውልድ የሚተርፍ አረንጓዴ አካባቢን ለመፍጠር፣ የአየር ንብረት ለውጥን ለመቋቋም እና የሀገራችንን የምግብ ዋስትና ለማረጋገጥ የሚደረግ ታላቅ ዘመቻ ነው። መላው ህዝብ በአንድነት በመነሳት አሻራውን የሚያኖርበትና የሀገር ፍቅሩን በተግባር የሚያሳይበት ታሪካዊ ቀን ይሆናል። ለምለምና ዉብ ሀገር ሰርተን ለቀጣይ ትዉልድ እናሻግር!