በአዲስ አበባ ከተማ አስተዳደር የከተማ ውበትና አረንጓዴ ልማት ቢሮ

የዘንድሮው የመዲናዋ የክረምት የአረንጓዴ አሻራ መርሃ ዝግጅትና ተከላ በቴክኖሎጂ የታገዘ ነው፡፡ አዲስ አበባ በየዓመቱ የሚካሄደው የአረንጓዴ አሻራ የችግኝ ተከላ መርሃ ግብር የዘንድሮው የክረምት ወቅት ከቀደሙት ዓመታት በተሻለና በተደራጀ ዝግጅት ተግባራዊ ሊደረግ ሙሉ ዝግጅት ተጠናቋል። ይሄው መርሃ ግብር ውጤታማ እንዲሆን ካለፉት ተሞክሮዎች በመነሳት ሰፊ መሻሻሎች መደረጋቸዉ ተመልክቷል። የዘንድሮው መርሃ ግብር ካለፈው ልዩ ባህሪያት መካከል ዘመናዊ ቴክኖሎጂን በስፋት ጥቅም ላይ ማዋሉ ቀዳሚው ነው። የችግኞችን መገኛ ስፍራ፣ የተከላ ቦታዎችን ዝግጁነት እና አጠቃላይ ሂደቱን በሳተላይትና በዲጂታል መተግበሪያዎች ለመከታተል የሚያስችል አሰራር ተዘርግቷል። ይህ የቴክኖሎጂ አጠቃቀም የትኞቹ አካባቢዎች ምን ዓይነት የችግኝ ዝርያ እንደሚያስፈልጋቸው በትክክል ለመለየትና የእያንዳንዱን አካባቢ የተከላ ሂደት በቅርበት ለመቆጣጠር ከፍተኛ እገዛ ያደርጋል። ሌላው ለየት የሚያደርገው ለአረንጓዴ አሻራ ስኬታማነት ለባለሙያዎች ቀድሞ የተሰጠው ሰፊ ስልጠና ነው። ከተከላው አስቀድሞ በየደረጃው ለሚገኙ የከተማ ዉበትና አረንጓዴ ልማት ባለሙያዎች፣ አስተባባሪዎችና የበጎ ፈቃደኞች መሪዎች ስልጠናዎች ተሰጥተዋል። ይህም ባለሙያዎቹ ህብረተሰቡን በተደራጀና በሳይንሳዊ መንገድ እንዲመሩ፣ የችግኝ አተካከል ስልትን እንዲያስተምሩ እና የተከላ ስራው በዘፈቀደ ሳይሆን ጥናትን መሰረት አድርጎ እንዲከናወን ያደርጋል ተብሏል። በዘንድሮው ዝግጅት ሀገራዊ አቅምን በማሳደግ ረገድ በራስ አቅም ችግኞችን በከፍተኛ ጥራት ማዘጋጀት መቻሉ ትልቅ ስኬት ሆኖ የችግኝ ማፍያ ጣቢያዎች በሚሊዮን የሚቆጠሩ ችግኞች እንዲፈሉ ተደርጓል። ይህም ለምግብነት የሚውሉ የፍራፍሬ ፣ የዉበት ፤ ለመድኃኒትነት አግልግሎት የሚዉሉና ለደን ልማት ተስማሚ የሆኑ የሀገር በቀል ዛፎች ዝርያዎችን በራስ አቅም በበቂ ሁኔታ ማቅረብ መቻሉ ተገልጿል። ባለፉት ዓመታት ከተከናወኑ ተግባራት በተገኘ ልምድ የችግኞች የፅድቀት መጠን በከፍተኛ ደረጃ መሻሻሉ ለዘንድሮው ስራ ትልቅ መነሳሳትን ፈጥሯል። በተጨማሪ መትከል ብቻ ሳይሆን የተተከሉትን ችግኞች የመንከባከብና የማፅደቅ ስራ ላይ ትኩረት በመደረጉ፣ የፅድቀት መጠኑ ካለፉት ዓመታት የላቀ ውጤት አሳይቷል። በዘንድሮው መርሃ ግብርም ከተከላ በኋላ ያለውን ክትትልና እንክብካቤ የሚያረጋግጥ የተደራጀ የባለቤትነት አሰራር በመዘርጋቱ የፅድቀት መጠኑ ይበልጥ እንደሚሻሻል ይጠበቃል።