The Standard Time Digital

◾️ဘော့စနီးယားနိုင်ငံကို မသိကြောင်း ပြောခဲ့သည့် အမေရိကန်ရုပ်သံသတင်းထောက်ဝေဖန်ခံရ ကမ္ဘာ့ဖလားပြိုင်ပွဲ ၃၂အသင်း ရှုံးထွက်အဆင့် ပွဲစဉ်တွင် အမေရိကန်အသင်းနှင့်ယှဉ်ပြိုင်ရန်ရှိနေသည့် ဘော့စနီး ယားနိုင်ငံ မြေပုံပေါ်၌ မည်သည့်နေရာ၌ရှိနေသည်ကိုပင် မသိဟု ရုပ်သံထုတ်လွှင့်မှုတစ်ခုအတွင်း ပြောဆိုခဲ့သည့် အမေရိကန် ရုပ်သံသတင်းထောက်တစ်ဦး ဝေဖန်မှုများနှင့်ရင်ဆိုင်နေရသည်။ “ဘော့စနီးယားနဲ့ ပတ်သက်ပြီး တစ်ခုပြောရရင်၊ မြေပုံပေါ်မှာ ဘယ်နေရာမှာ ရှိလဲဆိုတာတောင် ကျွန်မ မသိပါ ဘူး။ ဒီနိုင်ငံအကြောင်း ဘာမှလည်း မသိသလို သိချင်စိတ်လည်း မရှိပါဘူး” ဟု အေမရိကန်နှင့် တူရကီအသင်းတို့ ၏ အုပ်စုနောက်ဆုံးပွဲအပြီး သတင်းတင်ဆက်ချိန်တွင် ABC7 Los Angeles ရုပ်သံဌာနမှ သတင်းထောက် အဘီဂေးဗီလပ်ဇ် ကပြောသည်။ ထိုသို့ပြောဆိုမှုသည် လူမျိုးရေးခွဲခြားသည့် အပြုအမူဖြစ်ကြောင်း ဘော့စနီးယား ဘောလုံးအဖွဲ့ချုပ်က Xလူမှု ကွန်ရက်တွင် ရေးသားခဲ့သလို ဘော့စနီးယားနိုင်ငံသားများနှင့် နိုင်ငံတကာ အားကစားသတင်းထောက်များက လည်း အဘီဂေးဗီလပ်ဇ် ၏မှတ်ချက်အပေါ် တုံ့ပြန်ဝေဖန်မှုများထွက်ပေါ်လာခဲ့သည်။ “အမေရိကန်တွေ မြေပုံပေါ်မှာ ရှာတတ်တဲ့ တစ်ခုတည်းသောအရာက အနီးဆုံး McDonald’s ဆိုင်ပဲ ဖြစ်မှာပါ” ဟု ကနေဒါသတင်းထောက် မာ့ခ်စလပ်ပင်စကီး က တုံ့ပြန်လှောင်ပြောင်ခဲ့သည်။ အုပ်စုတွင်းပွဲစဉ်များ၌ ဆွစ်ဇာလန်အသင်းကို ဂိုးပြတ်ရှုံးနိမ့်သော်လည်း ကနေဒါကိုသရေကစားကာ ကာတာကိုအနိုင်ရခဲ့သည့် ဘော့စနီးယားအသင်းသည် ရမှတ်လေးမှတ်ဖြင့် အုပ်စုတတိယနေရာသာ ရခဲ့သော်လည်း အကောင်းဆုံး အုပ်စုတတိယရှစ်သင်းစာရင်းဝင်ကာ ရှုံးထွက်အဆင့်တက်ရောက်နိုင်ခဲ့ သည်။ “ဘော့စနီးယား၊ ပြင်ဆင်ထားလိုက်တော့”ဟု အမေရိကန်ရုပ်သံသတင်းထောက် အဘီဂေးဗီလပ်ဇ်က အမေရိကန်အသင်းနှင့်ရင်ဆိုင်ရမည့် ရှုံးထွက်ပွဲစဉ်ကိုရည်ညွှန်း၍ ရုပ်သံထုတ်လွှင့်မှုအတွင်း ပြောဆိုခဲ့သည်။ သို့သော် ဝေဖန်မှုများထွက်ပေါ်ခဲ့ပြီးနောက် ၎င်း၏ စကားများအတွက် အဘီဂေးဗီလပ်ဇ် က လူမှုကွန်ရက်မှ တစ်ဆင့် ပြန်လည်တောင်းပန်ခဲ့ပြီး ပြိုင်ပွဲနှင့်ပတ်သက်၍ ပေါ့ပေါ့ပါးပါးစနောက်လိုစိတ်ဖြင့် မှားယွင်းစွာ ကြိုးစားအားထုတ်မိခဲ့သည်ဟုဆိုသည်။ “ကျွန်မ အရမ်းလွန်သွားခဲ့ပါတယ်။ လေလှိုင်းပေါ်မှာ မဆင်မခြင်နဲ့ မသင့်လျော်တဲ့ မှတ်ချက်စကား တွေကို ပြောမိခဲ့ပါတယ်။ ဘော့စနီးယား ပြည်သူတွေနဲ့ ဘော့စနီးယား ဘောလုံးအသင်းကို ကျွန်မ တောင်းပန်ပါတယ်” ဟု သူမက X တွင် ရေးသားခဲ့သည်။ ယူဂိုဆလားဗီးယားပြည်ထောင်စုအတွင်း ပါဝင်ခဲ့ဖူးပြီး ဥရောပတောင်ပိုင်းဘော်လ်ကန် ကျွန်းဆွယ်ပေါ်တွင် တည်ရှိသည့် ဘော့စနီးယားနိုင်ငံသည် ၁၉၉၀ကာလများအတွင်း ပြည်တွင်းစစ်ကိုအကြောင်းပြု၍ အမေရိကန်၊နေတိုးမဟာမိတ်အဖွဲ့နှင့် ကုလသမဂ္ဂတပ်ဖွဲ့များ၏ စစ်ရေးအရကြားဝင်တိုက်ခိုက်မှု ကိုရင် ဆိုင်ခဲ့ရဖူးသည်။ ယူဂိုဆလားဗီးယားပြည်ထောင်စုပြိုကွဲကာ သီးခြားနိုင်ငံအဖြစ် ရပ်တည်နိုင်ခဲ့ပြီးနောက် ၂၀၁၄ခုနှစ် ကမ္ဘာ့ဖလားပြိုင်ပွဲတစ်ကြိမ်တည်းတွင်သာ ခြေစစ်ပွဲအောင်မြင်ခဲ့သည့် ဘော့စနီးယားနိုင်ငံသည် ယခု တစ်ကြိမ်ပြိုင်ပွဲတွင်မူ ရှုံးထွက်အဆင့်သို့ ပထမဆုံးအကြိမ်တက်ရောက်နိုင်ခြင်းဖြစ်သည်။ သတင်း-စံတော်ချိန်ဒစ်ဂျစ်တယ် ကိုးကား-The Independent #နိုင်ငံတကာသတင်း

◾️ဖားကန့်၌ မြေစာပုံပြိုကျရာတွင်ပါသွားသူများအနက် ရုပ်အလောင်းငါးလောင်းရှာဖွေတွေ့ရှိ ကချင်ပြည်နယ်၊ ဖားကန့်၊ ဆိပ်မူကျေးရွာအုပ်စု၊ နမ့်မှော်ကျေးရွာ၌ မြေစာပုံပြိုကျခြင်းကြောင့် ယနေ့(ဇွန် ၂၉ ရက်) နံနက်ပိုင်းတွင် ပါသွားပြီး ပျောက်ဆုံးနေသူများထဲမှ ရုပ်အလောင်း ငါးလောင်းရှာဖွေတွေ့ရှိကြောင်း ဒေသခံလူမှုကကူညီရေးအသင်းတစ်ခုထံမှသိရသည်။ ယမန်နေ့(ဇွန် ၂၈ ရက်) ညသန်းခေါင်အချိန်တွင် မိုးသည်းထန်စွာရွာသွန်းပြီးနောက် မြေစာပုံပြို ကျပြီး ရေမဆေးကျောက်ရှာဖွေသူ ၁၀ ဦးခန့်ပျောက်ဆုံးလျက်ရှိကြောင်း၊ ပျောက်ဆုံးနေ သူများကို ဒေသခံလူမှုကူညီရေးအသင်းများက ရှာဖွေလျက်ရှိကြောင်းသိရသည်။ “မြေစာပုံပြိုကျတဲ့အထဲပါသွားတဲ့ ရေမဆေးသမားစာရင်းအတိအကျမရသေးဘူး။ ဒါပေမယ့် ၁၀ ဦးလောက်တော့ဖြစ်နိုင်ချေရှိတယ်။ ဒီနေ့လည်းရှာဖွေရေးတွေဆက်လုပ်ပေးနေပါတယ်။ မိုးကရွာနေတော့ ရှာဖွေရတာအခက်အခဲရှိပါတယ်။ ဒီမှာမိုးရွာရင်မြေကလည်းပြိုတတ်တော့ သတိထားပြီးရှာဖွေနေရပါတယ်” ဟု ဒေသခံလူမှုကကူညီရေးအသင်းတစ်ခုမှ တာဝန်ရှိသူ တစ်ဦးက ပြောသည်။ ရှာဖွေတွေ့ရှိသည့် ရုပ်အလောင်းများကိုလူမှုကူညီရေးအသင်းများက အခမဲ့ကူညီသင်္ဂြိုလ်ပေး ခဲ့ပြီး ပျောက်ဆုံးနေသူများကို ဆက်လက်ရှာဖွေလျက်ရှိကြောင်းသိရသည်။ သတင်း - ပိုင်လေး ဓာတ်ပုံ - CJ #ယနေ့ထုတ်သတင်းစာ_ပြည်တွင်းသတင်း

◾️စနေ၊ တနင်္ဂနွေ နှစ်ရက်တွင် လူပေါင်း ၃၃ ဦးကို ကယ်တင်နိုင်ခဲ့ကြောင်း ဗင်နီဇွဲလားသမ္မတပြော ဗင်နီဇွဲလားနိုင်ငံတွင် အင်အားပြင်းငလျင် နှစ်ခု လှုပ်ခတ်သွားခဲ့ပြီးနောက် လေးရက်နှင့် ငါးရက်မြောက်ဖြစ်သော စနေနှင့် တနင်္ဂနွေ ၂ ရက်တွင် လူပေါင်း ၃၃ ဦးကို အပျက်အစီးများအောက်မှ အသက်ရှင်လျက် ကယ်ထုတ်နိုင်ခဲ့ကြောင်း ယာယီသမ္မတ ဒယ်လ်စီ ရိုဒရီဂွက်ဇ်က ပြောကြားသည်။ ၎င်းတို့အနက် မတူညီသော အဆောက်အဦး နှစ်ခုအောက်မှ တနင်္ဂနွေနေ့က သီးခြားစီ ကယ်ဆယ်နိုင်ခဲ့သော ‌ယောင်္ကျားလေး နှစ်ဦးလည်း ပါဝင်သည်။ သို့ရာတွင် လူထောင်ပေါင်းများစွာ ပျောက်ဆုံးနေသေးချိန်တွင် အသက်ရှင်ကျန်သူများကို တွေ့ရှိရေး မျှော်လင့်ချက်များမှာ နာရီနှင့်အမျှ မှေးမှိန်လာနေသည်။ ကပ်ဘေးတစ်ခု ကျရောက်ပြီးနောက် လူများကို အသက်ရှင်လျက် တွေ့ရှိရေးအတွက် ပထမ ၄၈ နာရီ နှင့် ၇၂ နာရီကြားကာလသည် အလွန် အရေးပါကြောင်း အကူအညီပေးရေးအေဂျင်စီများက ပြောကြားကြသည်။ ပျောက်ဆုံးနေသူများ၏ ဆွေမျိုးသားချင်းများသည် ချစ်ရသူများ၏ သတင်းကြားရရန် ငါးညမြောက်စောင့်ဆိုင်းရမှု နှင့် ရင်ဆိုင်နေရသည်။ ယမန်နေ့အထိ အနည်းဆုံး လူပေါင်း ၁၄၅၀ ဦး သေဆုံးခဲ့ကြောင်း သမ္မတ ရိုဒရီဂွက်ဇ် က ပြောကြားပြီး ယခုငလျင်လှုပ်ခတ်မှုသည် ဗင်နီဇွဲလားနိုင်ငံသမိုင်းတွင် အရက်စက်ဆုံးသဘာဝကပ်ဘေးဖြစ်သည်ဟု ၎င်းက ပြောကြားခဲ့သည်။ ဗုဒ္ဓဟူးနေ့က ဗင်နီဇွဲလားနိုင်ငံတွင် ပြင်းအား ၇ ဒသမ ၂ နှင့် ၇ ဒသမ ၅ ရှိသော ငလျင် နှစ်ခု ၃၉ စက္ကန့်သာခြား၍ လှုပ်ခတ်သွားခဲ့ရာတွင် အဆောက်အဦး ၈၀၀ ပြိုကျသွားခဲ့ပြီး လူပေါင်းများစွာ အပျက်အစီးများအောက် ရောက်ရှိပိတ်မိသွားခဲ့ကြသည်။ အသက်ရှင်ကျန်ရန် အရေးကြီးသော ၇၂ နာရီ ကာလကို ကျော်လွန်သွားခဲ့ပြီ ဖြစ်သော်လည်း တနင်္ဂနွေနေ့တွင် ကယ်ဆယ်ရေးသမားများက လက်မလျှော့ကြသေးဘဲ ရေ နှင့် အစားအစာသာ ရရှိနေခဲ့ပါက အပျက်အစီးများအောက်တွင် အသက်ရှင်ကျန်သူများ ရှိနေနိုင်ကြောင်း ပြောကြားကြသည်။ တွန့်လိမ်ကောက်ကွေးနေသော အပျက်အစီးများအောက်မှ ဆွဲထုတ်လာခဲ့ရသော အသက် ၁၁ နှစ်အရွယ် ယောင်္ကျားလေး မွိုင်ဆက်အား ယမန်နေ့က ကယ်ဆယ်ခဲ့သည့် ဗီဒီယိုများကို ကယ်ဆယ်ရေးသမားများက မျှဝေခဲ့ကြသည်။ က‌လေးငယ် မွိုင်ဆက်သည် ဆယ်ပေခန့်ထူထပ်သော အပျက်အစီးများအောက်တွင် ရှိနေခဲ့ပြီး ၎င်းအား ကယ်ဆယ်ရန် ကယ်ဆယ်ရေးအဖွဲ့များက စနေနေ့တွင် ခြောက်နာရီခန့် ကြိုးစားခဲ့ရကြောင်း ကိုလံဘီယာဘေးအန္တရာယ်လျော့ပါးရေးအေဂျင်စီ ဗဟိုအဖွဲ့ က ပြောသည်။ ထို့နောက် နာရီပိုင်းအကြာတွင် ကာရာဘာလီဒါမြို့မှ ကယ်ဆယ်ရရှိခဲ့သော ဒုတိယမြောက် အသက် ၁၁ နှစ်အရွယ် ယောင်္ကျားလေး၏ ဗီဒီယိုကို သမ္မတ ရိုဒရီဂွက်ဇ် က အွန်လိုင်းတွင် မျှဝေခဲ့သည်။ “ဒီနာရီပိုင်းတွေမှာတော့ အသက်တိုင်းဟာ ဗင်နီဇွဲလားအတွက် မျှော်လင့်ချက်ဖြစ်ပါတယ်” ဟု မစ္စက် ရိုဒရီဂွက်ဇ်က ရေးသားသည်။ သတင်း-ရဲမင်း ကိုးကား-BBC

#ယနေ့ထုတ်သတင်းစာ_ကာတွန်း

◾️တိုက်ခိုက်မှုများရပ်တန့်ပြီး ဆွေးနွေးပွဲများ ပြန်စရန် အီရန်နှင့် အမေရိကန်သဘောတူ ဟောမုဇ်ရေလက်ကြားတွင် အငြင်းပွားမှုနှင့်ပတ်သက်၍ ပြီးခဲ့သည့်ရက်ပိုင်းက ပင်လယ်ကွေ့၌ ဖြစ်ပေါ်ခဲ့သော တိုက်ခိုက်မှုများကို ရပ်တန့်ပြီး ဆွေးနွေးပွဲများ‌ ပြန်လုပ်သွားရန် အီရန်နှင့် အမေရိကန်တို့က သဘောတူလိုက်ကြသည်ဟု အမေရိကန်အရာရှိကြီးတစ်ဦးက ပြောကြားခဲ့ရာ အပြန်အလှန်တိုက်ခိုက်မှုများကြောင့် ဖိအားပေးခံနေရသော ယာယီအပစ်အခတ်ရပ်စဲမှုကို ကယ်တင်နိုင်မည်ဟူသော မျှော်လင့်ချက်များ မြင့်တက်လာခဲ့သည်။ “နားလည်မှုစာချွှန်လွှာရဲ့ ဧရိယာအားလုံးမှာ သဘောတရားပိုင်း ဆွေးနွေးမှုတွေ လုပ်သွားဖို့ ရှိပါတယ်။ နှစ်ဖက်စလုံးက တိုက်ခိုက်မှုတွေ ရပ်တန့်ထားမှာဖြစ်လို့ သင်္ဘောတွေ လွတ်လပ်စွာသွားလာနိုင်ပါတယ်” ဟု ဇွန် ၁၇ ရက် က လက်မှတ်ရေးထိုးခဲ့သော အချက် ၁၄ ချက်ပါ နားလည်မှုစာချွှန်လွှာကို ရည်ညွှန်း၍ အမေရိကန်အရာရှိကြီးက ပြောသည်။ နှစ်ဖက်ဆွေးနွေးပွဲများကို အင်္ဂါနေ့တွင် ကာတာနိုင်ငံ၌ ပြန်လည် စတင်သွားမည်ဖြစ်ကြောင်း အမေရိကန်အရာရှိကြီးတစ်ဦးကို ကိုးကား၍ အပစ်ရပ်မည့်အကြောင်း ပထမဦးစွာ သတင်းပို့ခဲ့သည့် Axios သတင်းဌာနက ပြောကြားသည်။ ကြာသပတေးနေ့က ဟောမုဇ်ရေလက်ကြားတွင် ကုန်တင်သင်္ဘောတစ်စီး တိုက်ခိုက်ခံခဲ့ရပြီးနောက် ဇွန် ၁၇ ရက်က လက်မှတ်ရေးထိုးခဲ့ကြသော ယာယီအပစ်အခတ်ရပ်စဲမှုကို အခြားတစ်ဖက်က ချိုးဖောက်ခဲ့ကြောင်း အမေရိကန်နှင့်အီရန်က အပြန်အလှန်စွပ်စွဲကြကာ နှစ်ရက်၊ သုံးရက် ခန့် တစ်ဖက်နှင့်တစ်ဖက် တိုက်ခိုက်ခဲ့ကြသည်။ စစ်ပွဲ အဆုံးသတ်ရန် သဘောတူညီချက်ကို အီရန်က မလိုက်နာခဲ့ပါက ၎င်းတို့နိုင်ငံ ဆက်လက်တည်ရှိတော့မည်မဟုတ်ကြောင်း အမေရိကန်သမ္မတ ဒေါ်နယ်ထရန့်က ယမန်နေ့တွင် ခြိမ်းခြောက်ခဲ့ပြီးနောက် ကူဝိတ်နှင့်ဘာရိန်းနိုင်ငံရှိ အမေရိကန်စစ်စခန်းများကို အီရန်က ဒုံးကျည်များ ၊ ဒရုန်းများဖြင့် တိုက်ခိုက်ခဲ့သည်။ ပဋိပက္ခကာလအများစုတွင် အီရန်က ပိတ်ထားခဲ့ပြီး ကမ္ဘာ့အရေးအပါဆုံး စွမ်းအင်လုပ်ငန်းသင်္ဘောလမ်းကြောင်းဖြစ်သော ဟောမုဇ်ရေလက်ကြားတွင် ရေနံတင်သင်္ဘော တိုက်ခိုက်ခံခဲ့ရပြီးနောက် နာရီပိုင်းအကြာတွင် အီရန်ကို ထပ်မံ တိုက်ခိုက်ခဲ့ကြောင်း အမေရိကန်စစ်ဘက်က အစောပိုင်းတွင် ပြောကြားသည်။ ထိုအတောအတွင်းမှာပင် အီရန်ကျောထောက်နောက်ခံပေးထားသော ဟစ်ဇ်ဘိုလာအဖွဲ့က အသုံးပြုသော လက်ဘနွန်နိုင်ငံမှ မြေအောက်စခန်းတစ်ခုကို ဖျက်ဆီးပစ်လိုက်ကြောင်း အစ္စရေးစစ်တပ်က တနင်္ဂနွေနေ့တွင် ပြောကြားသည်။ လက်ဘနွန်နှင့်အပစ်အခတ်ရပ်စဲရေး နောက်ဆုံး သဘောတူညီချက်ကို သောကြာနေ့က လက်မှတ်ရေးထိုးခဲ့ပြီးနောက် အစ္စရေးတို့၏ အဆိုပါ တိုက်ခိုက်မှု ဖြစ်ပေါ်ခဲ့ခြင်းဖြစ်သည်။ ကျယ်ပြန့်သော သဘောတူညီချက်တည်မြဲရန် ဆိုလျှင် လက်ဘနွန်နိုင်ငံမှ တိုက်ခိုက်မှုများကိုလည်း အဆုံးသတ်ရမည်ဟု အီရန်က ပြောကြားထားသည်. သတင်း-ရဲမင်း ကိုးကား-Reuters

◾️မိုးလယ်ကာလအတွင်း ဧရာ၀တီမြစ်ရေ အပါအဝင် မြစ်ရေများစိုးရိမ်ရေမှတ်အထက် တစ်ကြိမ်ခန့်စီ ကျော်လွန်ရောက်ရှိနိုင် မိုးလယ်ကာလဖြစ်သည့် ဇူလိုင် ၁ ရက်မှ ဩဂုတ် ၃၁ရက်အတွင်း ဧရာ၀တီမြစ်ရေ အပါအဝင် မြစ်ရေများစိုးရိမ်ရေမှတ်အထက်သို့ တစ်ကြိမ်ခန့်စီကျော်လွန်ရောက်ရှိနိုင်ကြောင်း မိုးလေ ၀သနှင့် ဇလဗေဒညွှန်ကြားမှုဦးစီးဌာန၏ ဇွန် ၂၈ ရက်နံနက်ပိုင်းထုတ်ပြန်ချက်အရ သိရသည်။ ဧရာ၀တီမြစ်ရေသည် ဗန်းမော်မြို့၊ ရွှေကူမြို့၊ ကသာမြို့၊ သပိတ်ကျင်းမြို့၊ မန္တလေးမြို့၊ စစ်ကိုင်း မြို့၊မြင်းမူမြို့၊ ပခုက္ကူမြို့၊ ညောင်ဦးမြို့၊ချောက်မြို့၊ မင်းဘူးမြို့၊ မကွေးမြို့၊ အောင်လံမြို့၊ ပြည်မြို့၊ ဆိပ်သာမြို့၊ဟင်္သာတမြို့နှင့် ဇလွန်မြို့တို့တွင်တစ်ကြိမ်ခန့်စီ စိုးရိမ်ရေမှတ်အထက် ကျော်လွန် ရောက် ရှိနိုင်ကြောင်း သိရသည်။ ချင်းတွင်းမြစ်ရေသည် ခန္တီးမြို့၊ဟုမ္မလင်းမြို့၊ ဖောင်းပြင်မြို့၊ မော်လိုက်မြို့၊ ကလေး၀မြို့၊ မင်းကင်းမြို့၊ကနီမြို့နှင့် မုံရွာမြို့တို့တွင် တစ်ကြိမ်ခန့်စီ၊ မြစ်သာမြစ်ရေသည် ကလေးမြို့တွင် တစ်ကြိမ်ခန့်၊ ဒုဋ္ဌ၀တီမြစ်ရေသည် မြစ်ငယ်မြို့တွင် တစ်ကြိမ်ခန့်၊စစ်တောင်းမြစ်ရေသည် တောင်ငူမြို့တွင် တစ်ကြိမ်ခန့်နှင့် မဒေါက်မြို့တွင်နှစ်ကြိမ်ခန့် စိုးရိမ်ရေမှတ်အထက် ကျော်လွန် ရောက်ရှိနိုင်ကြောင်း သိရသည်။ ရွှေကျင်မြစ်ရေသည် ရွှေကျင်မြို့တွင် နှစ်ကြိမ်ခန့်၊ ပဲခူးမြစ်ရေသည်ပဲခူးမြို့တွင် တစ်ကြိမ်ခန့်၊ သံလွင်မြစ်ရေသည် ဘားအံမြို့တွင် နှစ်ကြိမ်ခန့်၊သောင်ရင်းမြစ်ရေသည် မြ၀တီမြို့တွင် တစ်ကြိမ်ခန့်၊ ငဝန်မြစ်ရေသည်ငါးသိုင်းချောင်းမြို့၊ သာပေါင်းမြို့နှင့်ပုသိမ်မြို့တို့တွင် တစ်ကြိမ် ခန့်စီ စိုးရိမ်ရေမှတ်အထက်ကျော်လွန်ရောက်ရှိနိုင်ကြောင်းနှင့် တိုးမြစ်ရေသည် မအူ ပင်မြို့တွင် တစ်ကြိမ်ခန့်နှင့် ဘီးလင်းမြစ်ရေသည် ဘီးလင်းမြို့တွင်တစ်ကြိမ်ခန့် စိုးရိမ်ရေမှတ်အထက် ကျော်လွန်ရောက်ရှိနိုင်ကြောင်း သိရသည်။ သတင်း-မြင့်မိုရ် ဓာတ်ပုံ-MOI (ပုံဟောင်း)

◾️မလေးရှိ စားသောက်ဆိုင်နှင့်လုပ်ငန်းခွင်များအား စစ်ဆေးစဉ်မြန်မာအပါ နိုင်ငံခြားသား ၅၀ ဖမ်းဆီးခံရ မလေးရှားနိုင်ငံ ဂျိုးဟိုး၊ စကူဒိုင်းဒေသရှိ စားသောက်ဆိုင်များနှင့်လုပ်ငန်းခွင်တို့ကို ဇွန် ၂၆ ရက် က ဝင်ရောက်စစ်ဆေးခဲ့ရာ မြန်မာနိုင်ငံသား၂၇ ဦးအပါအဝင် နိုင်ငံခြားသား အလုပ်သမား ၅၀ ဖမ်းဆီးခံခဲ့ရကြောင်းမလေးရှားလူဝင်မှုကြီးကြပ်ရေးဌာနက ထုတ်ပြန်ထားသည်။ မလေးရှားနိုင်ငံတွင် တရားမဝင် ဝင်ရောက်ပြီး အလုပ်လုပ်ကိုင်နေသည့် မြန်မာနိုင်ငံသား အပါအဝင် နိုင်ငံခြားသားအလုပ်သမားများအား အာဏာပိုင်များက ဖမ်းဆီးမှုများဆက် တိုက်ပြုလုပ်နေရာ ဇွန်လအတွင်း ကလေးငယ်များအပါအဝင် မြန်မာလုပ်သား ရာနှင့်ချီပြီး ဖမ်းဆီးထိန်းသိမ်းခံခဲ့ရကြောင်း သိရသည်။ ဇွန် ၂၅ ရက်နှင့် ၂၄ ရက်တို့ကလည်း တရားမဝင်နိုင်ငံခြားသားများအား အခန်းငှားခြင်း၊ ခိုလှုံခွင့် ပေးခြင်း၊ အလုပ်ပေးခြင်း စသည့် နေရာများအား ဝင်ရောက်စစ်ဆေးခဲ့ရာ မြန်မာလုပ်သားအ ပါအဝင် နိုင်ငံခြားသား ၂၀၀ ကျော် ဖမ်းဆီးခံခဲ့ရကြောင်း သိရသည်။ ထို့အပြင် ဇွန် ၂၃ ရက်ကလည်း ဆလန်ဂေါပြည်နယ် ပေါ့ကလန်းမြို့တွင် မြန်မာအပါအဝင် အထောက်အထားမဲ့ နိုင်ငံခြားသား ၂၇၀ ခန့်ဖမ်းဆီးခံခဲ့ရပြီး ဇွန် ၁၉ ရက်တွင်လည်း မြန်မာ လုပ်သား ၄၂ ဦး ဖမ်းဆီးခံခဲ့ရကြောင်း သိရသည်။ သတင်း-အာကာနွေ ဓာတ်ပုံ-မလေးရှားလူဝင်မှုကြီးကြပ်ရေးဌာန

◾️အထောက်အထား စုံလင်စွာ တင်ပြလာသူ၇၉ ဦးအား ပြည်ပသို့ ထွက်ခွာခွင့်ပြု မိမိအစီအစဉ်ဖြင့် ကျွမ်းကျင်ဖြစ်စေ၊ ခွင့်ပြန်ဖြစ်စေ OWIC လက်ဝယ်ရှိ၍ ပြည်ပထွက်ခွာ ခွင့်ပြုရန် အထောက်အထားစုံလင်စွာတင်ပြသူ ၇၉ ဦးအား ဇွန် ၂၅ ရက်နှင့် ၂၆ရက်က ပြည်ပသို့ထွက်ခွာခွင့်ပြုခဲ့ကြောင်း အလုပ်သမားဝန်ကြီးဌာနက ထုတ်ပြန်ထားသည်။ ထိုသို့ ထွက်ခွာခွင့်ပြုသော်လည်း OWIC ထုတ်ပေးရေးတာဝန်ခံက လူကိုယ်တိုင် လူတွေ့ စစ်ဆေးခြင်း၊ စာရွက်စာတမ်းများကို မှန်ကန်မှုရှိ၊ မရှိစိစစ်ခြင်းတို့ ဆောင်ရွက်ရာတွင် မှန်ကန်မှုမရှိကြောင်း စိစစ်တွေ့ရှိရပါက OWIC ထုတ်ပေးမည်မဟုတ်ကြောင်း သိရသည်။ ပြည်ပသို့ ထွက်ခွာခွင့်ရရှိသူများမှာ သတ်မှတ်ရက်တွင်မဖြစ်မနေ ထွက်ခွာရန်လိုအပ်ပြီး အကြောင်းအမျိုးမျိုးကြောင့်ထွက်ခွာရက်ပြောင်းလဲပါက ပြည်ပထွက်ခွာခွင့်ကို သတ်မှတ်ပုံစံအတိုင်း ပြည့်စုံစွာပြန်လည်တင်ပြရမည်ဖြစ်ကြောင်း သိရသည်။ ပြည်ပထွက်ခွာရာတွင် မိမိအမည်ပါသည့်စာရွက်ကိုလေဆိပ်တွင် ပြသရန်လိုအပ်မည်ဖြစ် ကြောင်း အလုပ်သမားဝန်ကြီးဌာနက ထုတ်ပြန်ထားသည်။ သတင်း-မြင့်မိုရ် ဓာတ်ပုံ-MOI (ပုံဟောင်း)

◾️ဇူလိုင် ၁ ရက်မှ ဩဂုတ် ၃၁ ရက်မိုးရွာသွန်းမှုမှာ ရွာသွန်းမြဲထက် ပိုနိုင် မိုးလေ၀သနှင့် ဇလဗေဒညွှန်ကြားမှုဦးစီးဌာန၏ ဇွန် ၂၈ ရက်နံနက်ပိုင်းက ထုတ်ပြန်ခဲ့သည့် ၂၀၂၆ခုနှစ် မိုးလယ်ကာလ (ဇူလိုင် ၁ ရက်မှဩဂုတ် ၃၁ ရက်) အတွက် မိုးလေ၀သနှင့် ဇလဗေဒ ခန့် မှန်းချက်အရ ရန်ကုန်တိုင်းဒေသကြီးအပါအဝင် တိုင်းနှင့်ပြည်နယ် ကိုးခု၌ မိုးရွာသွန်းမှုမှာ ရွာသွန်းမြဲထက် ပိုနိုင်ကြောင်း သိရသည်။ ရန်ကုန်တိုင်း ဒေသကြီး၊နေပြည်တော်၊ မန္တလေးတိုင်းဒေသကြီး၊ပဲခူးတိုင်းဒေသကြီး၊ စစ်ကိုင်းတိုင်းဒေသကြီး (အောက်ပိုင်း)၊ ဧရာ၀တီတိုင်းဒေသကြီး၊ ကရင်ပြည်နယ်၊ မွန် ပြည်နယ်နှင့် ရခိုင်ပြည်နယ်တို့တွင် ရွာသွန်းမြဲထက် ပိုနိုင်ကြောင်း သိရသည်။ ထို့ပြင် မကွေးတိုင်းဒေသကြီး စစ်ကိုင်းတိုင်းဒေသကြီး(အထက်ပိုင်း)၊တနင်္သာရီ တိုင်းဒေသကြီး၊ ကချင်ပြည်နယ်၊ ကယားပြည်နယ်၊ ချင်းပြည်နယ်နှင့်ရှမ်းပြည် နယ်တို့တွင် ရွာသွန်းမြဲခန့် မိုးထစ်ချုန်းရွာသွန်းနိုင်ကြောင်း သိရသည်။ ယင်းကာလအတွင်း ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် လေဖိအား နည်းရပ်ဝန်းလေးကြိမ်ဖြစ်ပေါ်နိုင်ပြီး နှစ်ကြိမ်မှာ ပိုမိုအားကောင်း၍ မုန်တိုင်းငယ် အဖြစ် ရောက်ရှိနိုင်ပြီး အနောက်တောင်မုတ်သုံလေသည်ကပ္ပလီပင်လယ်ပြင်နှင့် ဘင်္ဂလား ပင်လယ်အော်တို့တွင် အားကောင်းနိုင်ကြောင်းသိရသည်။ သတင်း-မြင့်မိုရ် ဓာတ်ပုံ-မိုး/ဇလ

◾️ဗင်နီဇွဲလားငလျင်အတွင်း ပျောက်ဆုံးနေသူ ခုနစ်သောင်းနီးပါးရှိ ဗင်နီဇွဲလားနိုင်ငံ၌ ယခုသီတင်းပတ်အစောပိုင်းက ပြင်းထန်သော ငလျင်နှစ်ခု လှုပ်ခတ်ခဲ့ပြီးနောက် လက်ရှိအချိန်အထိ ပျောက်ဆုံးနေသူဦးရေမှာ ၆၈၀၀၀ ကျော်ရှိနေပြီဖြစ်ကြောင်း သတင်းထုတ်ပြန်ချက်များအရ သိရသည်။ ဗင်နီဇွဲလားနိုင်ငံ၌ ပြီးခဲ့သည့် ဗုဒ္ဓဟူးနေ့က ပြင်းအား ရစ်ခ်ျတာစကေး ၇ ဒသမ ၂ နှင့် ၇ ဒသမ ၅ အဆင့်ရှိ ပြင်းထန်သော အမြွှာငလျင်များ ဆက်တိုက်လှုပ်ခတ်ခဲ့ရ လူနေရပ်ကွက်များ ကျယ်ကျယ်ပြန့်ပြန့် ပျက်စီးဆုံးရှုံးခဲ့ပြီး သေဆုံးသူဦးရေ ၁၄၃၀ ဦးအထိ ရှိလာကာ အခြားလူပေါင်း ၃၂၃၈ ဦးလည်း ဒဏ်ရာရရှိခဲ့သည်။ အာဏာပိုင်များအနေဖြင့် အသက်ရှင်ကျန်ရစ်သူများကို ကယ်ဆယ်နိုင်ရေး အချိန်နှင့်အမျှ အသည်းအသန် ကြိုးပမ်းနေကြရပြီး မြေပြင်တွင် ရှာဖွေကယ်ဆယ်ရေးလုပ်ငန်းများကို ဦးဆောင်နေသည့် ဗင်နီဇွဲလား ကျွမ်းကျင်ပညာရှင်အဖွဲ့ဝင် ၃၀၀၀၀ အား ပံ့ပိုးကူညီရန်အတွက် ကမ္ဘာတစ်ဝန်းမှ အရေးပေါ်တုံ့ပြန်ရေးအဖွဲ့များလည်း လေကြောင်းခရီးဖြင့် ရောက်ရှိလာကြပြီဖြစ်သည်။ လက်ရှိအချိန်အထိ နိုင်ငံပေါင်း ၂၄ နိုင်ငံမှ လာရောက်ကူညီပေးလျက်ရှိပြီး၊ ကယ်ဆယ်ရေးပစ္စည်း တန်ချိန် ၅၂၁ တန်၊ ရှာဖွေရေးခွေးအဖွဲ့ ၈၆ ဖွဲ့နှင့် ရှာဖွေကယ်ဆယ်ရေးနှင့် ပံ့ပိုးကူညီရေးဆိုင်ရာ ကျွမ်းကျင်သူ ၂၇၄၁ ဦးထက်မနည်း စေလွှတ်ပေးထားကြောင်း ဗင်နီဇွဲလား ယာယီသမ္မတ ဒယ်လ်ဆီ ရိုဒရီဂွက်ဇ်က ပြောကြားသည်။ ဒေသခံပြည်သူအများအပြားမှာလည်း ၎င်းတို့၏ ဆွေမျိုးသားချင်းများကို ရှာဖွေနိုင်ရန် အပျက်အစီးပုံကြီးများကို ကိုယ်တိုင်ကိုယ်ကျ လိုက်လံတူးဆွကာ ကယ်ဆယ်ရေးလုပ်ငန်းများကို လုပ်ဆောင်နေကြရသည်။ လူမှုကွန်ရက်စာမျက်နှာများပေါ်တွင် ပျံ့နှံ့နေသည့် စိတ်မကောင်းဖွယ် ဗီဒီယိုဖိုင်များ၌ ကယ်ဆယ်ရေးသမားများက နို့စို့ကလေးငယ်များအပါအဝင် ပိတ်မိနေသူများကို ပြိုကျနေသောအဆောက်အအုံများအတွင်းမှ ဆွဲထုတ်ကယ်ဆယ်နေကြသည်ကို မြင်တွေ့ရသည်။ ရှာဖွေကယ်ဆယ်ရေးလုပ်ငန်းများ အောင်မြင်ရန် ပထမဆုံး ၇၂ နာရီသည် အရေးအကြီးဆုံး ရွှေရောင်အချိန်ဖြစ်သည်ဟု ဆိုကြသော်လည်း လက်ရှိတွင် ထိုအချိန်အပိုင်းအခြားမှာ ကျော်လွန်သွားခဲ့ပြီဖြစ်သည်။ ငလျင်ဘေးအန္တရာယ်နှင့် ပတ်သက်၍ ဗင်နီဇွဲလား‌ ခေါင်းဆောင် ‌ ရိုဒရီဂွက်ဇ်နှင့် တနင်္ဂနွေနေ့တွင် ဖုန်းဖြင့် ဆက်သွယ်စကားပြောဆိုခဲ့ကြောင်း ဥရောပသမဂ္ဂ (EU) ၏ နိုင်ငံခြားရေးမူဝါဒအကြီးအကဲ ကာဂျာ ကာလက်စ်က ပြောကြားသည်။ "ဗင်နီဇွဲလားပြည်သူတွေနဲ့အတူ EU တစ်ရပ်လုံးက အပြည့်အဝ စာနာရပ်တည်နေကြောင်းနဲ့ အသက်ဆုံးရှုံးခဲ့ရသူတွေရဲ့ မိသားစုဝင်တွေနဲ့အတူ ထပ်တူထပ်မျှ ဝမ်းနည်းကြေကွဲရပါကြောင်း ကျွန်မအနေနဲ့ ပြောကြားခဲ့ပါတယ်" ဟု ၎င်းက X လူမှုကွန်ရက်စာမျက်နှာပေါ်ရှိ ပို့စ်တစ်ခုတွင် ရေးသားဖော်ပြထားသည်။ ထို့ပြင် "ထိခိုက်ခံစားခဲ့ရတဲ့ လူမှုအသိုက်အဝန်းတွေအတွက် EU အနေနဲ့ အရေးပေါ်အကူအညီအဖြစ် ယူရို ၅ သန်း မတည်ပေးထားပြီးဖြစ်ပါတယ်" ဟုလည်း ၎င်းက ဖြည့်စွက်ပြောကြားခဲ့သည်။ ကုလသမဂ္ဂ ဖွံ့ဖြိုးမှုအစီအစဉ် (UNDP) ၏ ကနဦးခန့်မှန်းချက်များအရ အဆိုပါ ငလျင်ဘေးအန္တရာယ်ကြောင့် တိုက်ရိုက်ထိခိုက်ပျက်စီးခဲ့ရသည့် ရုပ်ပိုင်းဆိုင်ရာ ဆုံးရှုံးမှုတန်ဖိုးမှာ အမေရိကန်ဒေါ်လာ ၆ ဒသမ ၇ ဘီလျံခန့် ရှိကြောင်း သိရသည်။ သတင်း-လင်းခေတ် ကိုးကား-Euro News

◾️ရုရှားထိန်းချုပ်နယ်မြေများကို မောင်းသူမဲ့လေယာဉ်များဖြင့် ယူကရိန်းတိုက်ခိုက် ရုရှားထိန်းချုပ်ထားသော ကရိုင်းမီးယားကျွန်းဆွယ်အပါအဝင် ရုရှားဒေသအများအပြားကို ယူကရိန်းနိုင်ငံက ဇွန် ၂၆ ရက် ညပိုင်းတွင် မောင်းသူမဲ့လေယာဉ်များဖြင့်ပြင်းထန်စွာ တိုက်ခိုက်ခဲ့ကြောင်း သိရသည်။ ဇွန် ၂၆ ရက် မောင်းသူမဲ့လေယာဉ်တိုက်ခိုက်မှုသည် လေးနှစ်ကျော်ကြာ ယူကရိန်းစစ်ပွဲအတွင်း ယူကရိန်းစစ်ဘက်က ပြုလုပ်ခဲ့ဖူးသမျှ အကြီးမားဆုံး မောင်းသူမဲ့လေယာဉ်တိုက်ခိုက်မှုများတွင် ပါဝင်ကြောင်း သိရသည်။ ဇွန် ၂၆ ရက် ညပိုင်းတွင် ရုရှားလေကြောင်းရန်ကာကွယ်ရေးတပ်များက ယူကရိန်းမောင်းသူ မဲ့လေယာဉ် ၆၆၀ ကို ကြားဖြတ်ဖျက်ဆီးခဲ့ ရကြောင်း ရုရှားကာကွယ်ရေးဝန်ကြီးဌာနက သတင်းထုတ်ပြန်ထားသည်။ ယူကရိန်း၏ ဇွန် ၂၆ ရက် မောင်းသူမဲ့လေယာဉ်တိုက်ခိုက်မှုကြောင့် ရုရှားနိုင်ငံတွင်း၌ အပျက်အစီးမည်မျှရှိခဲ့သည်ကို ရုရှားကာကွယ်ရေးဝန်ကြီးဌာနက ထုတ်ဖော် ပြောကြားခြင်းမရှိပေ။ ဇွန် ၂၆ ရက်တွင် မော်စကိုမြို့တော်ကို တိုက်ခိုက်ရေးအတွက် ယူကရိန်းက စေလွှတ်လိုက်သည့် မောင်းသူမဲ့လေယာဉ် ၄၇ စင်းကိုလည်း ရုရှားလေကြောင်းရန်ကာကွယ်ရေးတပ်များက ပစ်ချခဲ့ရကြောင်း မော်စကိုမြို့တော်ဝန် ဆာဂေးဆိုဗျာနင်က ပြောကြားထားသည်။ ယူကရိန်းနိုင်ငံသည် လေးနှစ်ကျော်ကြာစစ်ပွဲကို အဆုံးသတ်ရေးအတွက် ရုရှားကိုဖိအားပေး သည့်အနေဖြင့် တာဝေးပျံမောင်းသူမဲ့လေယာဉ်များဖြင့် ရုရှားစွမ်းအင်လုပ်ငန်းများကို တိုက်ခိုက်လျက်ရှိသည်။ ကိုးကား-အေပီ #ယနေ့ထုတ်သတင်းစာ_နိုင်ငံတကာသတင်း S