The Standard Time Digital

◾️ရန်ကုန်တိုင်းရှိ ဘေးတွဲဆိုင်ကယ်ရှစ်သောင်းကျော် တရားဝင်မဟုတ်၍ မှတ်ပုံတင်ပေးလို့မရ ရန်ကုန်တိုင်းအတွင်း လက်ရှိအသုံးပြုနေသည့် ဘေးတွဲဆိုင်ကယ်ပေါင်းရှစ်သောင်းကျော်မှာ တရားဝင် တင်သွင်းခဲ့ခြင်းမရှိ၍ တရားဝင်မှတ်ပုံတင်ပေး၍မရကြောင်း ရန်ကုန်တိုင်းဒေသကြီးအစိုးရအဖွဲ့ လုံခြုံရေးနှင့်နယ်စပ်ရေးရာဝန်ကြီးဗိုလ်မှူးကြီးဝင်းတင့်က ယမန်နေ့(ဇွန် ၂၂ ရက်) ကကျင်းပသည့် ရန်ကုန်တိုင်းလွှတ်တော်တွင်ပြောသည်။ မရမ်းကုန်းမြို့နယ်ကိုယ်စားလှယ် အမှတ်(၁) ဦးမင်းသိန်းထွန်းက လွန်ခဲ့သည့်ရှစ်နှစ်ခန့်မှ ရန်ကုန်မြို့ တွင်ပြေးဆွဲသွားလာနေသော ဘေးတွဲယာဉ်နှင့်ယာဉ်မောင်းများကို တရားဝင်လိုင်စင်ထုတ်ပေး၍ စနစ်တကျသွားလာခွင့်ပြုရန် အစီအစဉ်ရှိ၊ မရှိ မေးမြန်းသည့်မေးခွန်းနှင့်ပတ်သက်ပြီး ၎င်းကပြန်လည် ဖြေဆိုခြင်းဖြစ်သည်။ "ရန်ကုန်တိုင်းအတွင်းမှာ လက်ရှိအသုံးပြုနေတဲ့ ဘေးတွဲဆိုင်ကယ်အစီးရေရှစ်သောင်းကျော်ရှိပါတယ်။ ဒါတွေက တရားဝင်တင်သွင်းခဲ့ခြင်းမရှိတဲ့အတွက် တရားဝင်မှတ်ပုံတင်ပေးလို့မရပါဘူး။ တရားဝင် တင်သွင်းခွင့်ပြုထားတဲ့ သုံးဘီးဆိုင်ကယ်တွေအစားထိုးတင်သွင်းလာပါက ကုန်းလမ်းပို့ဆောင်ရေး ညွှန်ကြားမှုဦးစီးဌာန(ကညန) ရဲ့ဥပဒေနဲ့အညီခွင့်ပြုချက်ထုတ်ပေးသွားမည်ဖြစ်ပါတယ်" ဗိုလ်မှူးကြီးဝင်းတင့်က ပြောသည်။ ရန်ကုန်ုတိုင်းဒေသကြီးအတွင်း လက်ရှိခွင့်ပြုပေးထားသည့် သုံးဘီးဆိုင်ကယ်အစီးရေ ၇၂၆၀ စီးရှိပြီး အဆိုပါစာရင်းမှာ Baja၊ ဒေါင်ဖန်းစသည့် သုံးဘီးအမျိုးအစားများလည်းပါဝင်ကြောင်း၊ ယင်းဆိုင်ကယ် များအား (ခ)ယာဉ်မောင်းလိုင်စင်ဖြင့်မောင်းနိုင်ခွင့်ပြုထားသည့်အပြင် မောင်းနှင်သူ ၁၇၃၉ ဦးအား လိုင်စင်ထုတ်ပေးပြီးဖြစ်ကြောင်း ၎င်းကဆက်လက်ပြောဆိုခဲ့သည်။ သတင်း - ပိုင်လေး ဓာတ်ပုံ-စံတော်ချိန်ဒစ်ဂျစ်တယ်

#ယနေ့ထုတ်သတင်းစာ_ကာတွန်း

◾️ကလိုဆေးနှင့် မာတာတို့၏စံချိန်ကိုကျော်ဖြတ်၍ ကမ္ဘာ့ဖလား သွင်းဂိုးအများဆုံးစံချိန်ရှင်သစ်အဖြစ် မက်ဆီ သမိုင်းမှတ်တမ်းတင် ‌ အာဂျင်တီးနားအသင်းခေါင်းဆောင် လီယွန်နယ်မက်ဆီသည် ကလိုဆေး နှင့် မာတာ တို့၏ စံချိန်များကို ကျော်ဖြတ်ကာ ကမ္ဘာ့ဖလားပြိုင်ပွဲသမိုင်းတစ်လျှောက် သွင်းဂိုးအများဆုံး ကစားသမားစံချိန်ရှင်သစ်အဖြစ် ရပ်တည်သွားနိုင်ခဲ့ပြီ ဖြစ်ကြောင်း ESPN က ဖော်ပြထားသည်။ ကမ္ဘာ့ဖလား အုပ်စုဒုတိယပွဲစဉ်အဖြစ် အာဂျင်တီးနားက ဩစတြီးယားကို ၂ ဂိုး ဂိုးမရှိဖြင့် အနိုင်ရရှိခဲ့သောပွဲတွင် မက်ဆီက အသင်းအတွက် ၂ ဂိုးစလုံး သွင်းယူပေးခဲ့သည်။ မက်ဆီသည် လက်ရှိကမ္ဘာ့ဖလားပြိုင်ပွဲတွင် အာဂျင်တီးနားအသင်း သွင်းယူရရှိထားသည့် သွင်းဂိုး ၅ ဂိုးစလုံးကို တစ်ဦးတည်း ဒိုင်ခံသွင်းယူပေးထားခြင်းလည်း ဖြစ်သည်။ အာဂျင်တီးနားအသင်းသည် အုပ်စုအဖွင့်ပွဲစဉ် နှစ်ပွဲစလုံး၌ ဂိုးမပေးရဘဲ အနိုင်ရရှိခဲ့ကာ ၃၂ သင်း ရှုံးထွက်အဆင့်သို့ တက်လှမ်းသွားခဲ့ပြီ ဖြစ်သည်။ အာဂျင်တီးနားက အယ်လ်ဂျီးရီးယားကို ၃ ဂိုး ဂိုးမရှိဖြင့် အနိုင်ရခဲ့သော အုပ်စုအဖွင့်ပွဲစဉ်အပြီးတွင် မက်ဆီသည် အမျိုးသားကမ္ဘာ့ဖလားပြိုင်ပွဲ သွင်းဂိုးအများဆုံးစံချိန်ရှင် ကလိုဆေး၏ ၁၆ ဂိုးစံချိန်ကို လိုက်မီခဲ့ခြင်းဖြစ်သည်။ ယနေ့ပွဲစဉ်တွင်မူ မက်ဆီသည် အမျိုးသားကမ္ဘာ့ဖလားပြိုင်ပွဲ၏ စံချိန်ဟောင်းကိုသာမက အမျိုးသမီးကမ္ဘာ့ဖလားပြိုင်ပွဲ၏ သွင်းဂိုးအများဆုံးစံချိန်ကိုပါ ချိုးဖျက်၍ ကမ္ဘာ့ဖလားပြိုင်ပွဲသမိုင်းတွင် သွင်းဂိုးအများဆုံးဖြစ်သည့် စုစုပေါင်းသွင်းဂိုး ၁၈ ဂိုးဖြင့် သမိုင်းမှတ်တမ်းသစ် ရေးထိုးနိုင်ခဲ့သည်။ ယခင်အမျိုးသားကမ္ဘာ့ဖလားပြိုင်ပွဲ၏ သွင်းဂိုးအများဆုံးစံချိန်ဟောင်းမှာ ဂျာမနီတိုက်စစ်မှူး ကလိုဆေး သွင်းယူထားသည့် ၁၆ ဂိုးဖြစ်ပြီး အမျိုးသမီးကမ္ဘာ့ဖလားပြိုင်ပွဲ၏ သွင်းဂိုးအများဆုံးစံချိန်မှာ ဘရာဇီးတိုက်စစ်မှုးမာတာသွင်းယူထားသည့် ၁၇ ဂိုးဖြစ်သည်။ မက်ဆီသည် ယခုပွဲစဉ်အစတွင် ရရှိခဲ့သော ပင်နယ်တီအခွင့်အရေးကို ဂိုးအဖြစ် ပြောင်းလဲနိုင်ခြင်း မရှိခဲ့သောကြောင့်သာ ဟက်ထရစ်စံချိန်နှင့် လွဲချော်ခဲ့ရခြင်းဖြစ်ပြီး အဆိုပါပင်နယ်တီ သွင်းယူနိုင်ခဲ့ပါက နောက်ထပ်စံချိန်သစ်များစွာကို ထပ်မံပိုင်ဆိုင်နိုင်မည် ဖြစ်သည်။ မက်ဆီသည် ၎င်း၏ ကစားသမားဘဝ ဖြတ်သန်းမှုတစ်လျှောက် အာဂျင်တီးနားလက်ရွေးစင်အသင်းကို ကိုယ်စားပြု၍ ကမ္ဘာ့ဖလားပြိုင်ပွဲကို ၆ ကြိမ်မြောက်အဖြစ် ပါဝင်ကစားနေခြင်း ဖြစ်သည်။ မက်ဆီသည် အာဂျင်တီးနားလက်ရွေးစင်အသင်းအတွက် နိုင်ငံတကာပွဲစဉ်ပေါင်း ၂၀၁ ပွဲ ကစားပေးခဲ့ပြီး သွင်းဂိုး ၁၂၁ ဂိုးအထိ ရယူပေးထားနိုင်ပြီဖြစ်သည်။ သတင်း-စံတော်ချိန်ဒစ်ဂျစ်တယ် ကိုးကား-ESPN

‎◾️ဖားကန့်၌တောင်ကုန်းပေါ်မှမြေများပြို၍ နေအိမ်ပေါ်ပိမိ၊တစ်ဦးသေဆုံး ‎ ‎ကချင်ပြည်နယ်၊ ဖားကန့်မြို့နယ်၊ အေးမြသာယာရပ်ကွက်၌ မိုးအဆက်မပြတ်ရွာသွန်းပြီးနောက် နေအိမ်တစ်လုံးပေါ်သိုမြေပြိုကျကာ အမျိုးသားတစ်ဦးသေဆုံးကြောင်း ကွန်းပရဟိတလူငယ်အသင်း ထံမှသိရသည်။ ‎ ‎ယခုဇွန်လ ၂၁ ရက်၊ နံနက်ပိုင်းက ဖားကန့်မြို့၊ အေးမြသာယာရပ်ကွက်ရှိ ရှရော်ခကျေးရွာဘက် အထွက်မှတောင်ကုန်းရှိမြေများပြိုကျလာပြီး နေအိမ်တစ်လုံးပေါ်ပိမိကာအိမ်ထဲရှိအသက်(၅၀) အရွယ် အမျိုးသားတစ်ဦးသေဆုံးခြင်းဖြစ်ကြောင်း၊ ၎င်း၏ရုပ်အလောင်းကို ယမန်နေ့ (ဇွန် ၂၂ ရက်)ညနေ ၄ နာရီခွဲတွင်ရှာဖွေတွေ့ရှိကြောင်းသိရသည်။ ‎ ‎အဆိုပါ ဖြစ်စဉ်ကြောင့် အသက်(၅၀) ခန့်အမျိုးသားတစ်ဦး ပျောက်ဆုံးခဲ့သည့်အတွက် မိသာစုဝင်များမှာ လူမှုကူညီရေးအသင်းရုံးသို့ဆက်သွယ်ပြီး ပြိုကျသည့်မြေများကိုတူဖော်ရန်အကူညီတောင်းခဲ့ကြောင်း ‎သိရသည်။ ‎ ‎"မိသာစုဝင်တွေက ကျွန်တော်တို့အသင်းကို ဇွန် ၂၁ ရက်မွန်လွဲ ၃ နာရီခန့်က အကူညီတောင်းပါတယ်။ ကျွန်တော်တို့အသင်းလည်းချက်ခြင်းရှာဖွေပါတယ်။ မတွေ့ပါဘူး။ နောက်တစ်နေ့ထပ်ပြီးရှာတော့မှ ညနေ ၄ နာရီခွဲမှာသေဆုံးလျက်ပြန်တွေ့တာပါ” ဟု ကွန်းပရဟိတလူငယ်အသင်းမှတာဝန်ရှိသူ တစ်ဦးက ပြောသည်။ ‎ ‎လက်ရှိဖားကန့်မြို့နယ်၌ မိုးသည်းထန်စွာရွာသွန်းခြင်းကြောင့် မော်ဝမ်းရပ်ကွက်၊ မြို့မရပ်ကွက်၊ ငှက်ပျောတောရပ်ကွက်၊ မရှီကထောင်ရပ်ကွက်၊ အေးမြသာယာရပ်ကွက်ရှိ အနိမ့်ပိုင်းရပ်ကွက်များတွင် ပြီးခဲ့သည့် ရက်ပိုင်းကရေကြီးရေလျှံခြင်းများဖြစ်ပေါ်ခဲ့ပြီး ယနေ့တွင်ရေအနည်ငယ်ပြန်ကျနေပြီဖြစ် ကြောင်း သိရသည်။ ‎ ‎သတင်း - ပိုင်လေး ‎ဓာတ်ပုံ - ကွန်းပရဟိတလူငယ်အသင်း

◾️ပိုလန်၏ လင်းယုန်ဖြူဘွဲ့တံဆိပ် ယူကရိန်းသမ္မတ ဇီလန်စကီး ပြန်အပ်မည် ဒုတိယကမ္ဘာစစ်ကာလ ပိုလန်နိုင်ငံသားများ အစုအပြုံလိုက်သတ်ဖြတ်ခံခဲ့ရမှုနှင့်ပတ်သက်၍ နှစ်နိုင်ငံအငြင်းပွားမှု ပြင်းထန်လာခဲ့ပြီးနောက်ပိုလန်အစိုးရက ချီးမြှင့်ထားသောဂုဏ်ပြုဘွဲ့တံဆိပ်များကို ပြန်အပ်မည်ဖြစ်ကြောင်း ယူကရိန်းသမ္မတ ဇီလန်စကီးနှင့် ယူကရိန်းထိပ်တန်းတာဝန်ရှိသူများက ဇွန် ၂၀ ရက်တွင် ထုတ်ဖော်ပြောကြားထားသည်။ ယူကရိန်းသမ္မတ ဇီလန်စကီးသည် ယခုလအတွင်း ဒုတိယကမ္ဘာစစ်ကာလ ယူကရိန်းအမျိုးသားရေးဝါဒီလက်နက်ကိုင်အုပ်စုတစ်စုဖြစ်သည့်ယူကရိန်းတော်လှန်ရေးတပ်မတော်(ယူပီအေ) ကို အစွဲပြု၍ ယူကရိန်းတပ်ဖွဲ့တစ်ဖွဲ့ကို အမည်ပေးခဲ့ရာ ပိုလန်နိုင်ငံအနေဖြင့် အမျက်ထွက်ခဲ့ရသည်။ ယူပီအေတပ်ဖွဲ့သည် ဒုတိယကမ္ဘာစစ်အတွင်း ပိုလန်နိုင်ငံသားများကို အစုအပြုံလိုက်သတ်ဖြတ်ခဲ့သောယူကရိန်းအမျိုးသားရေးဝါဒီ တပ်ဖွဲ့ဖြစ်သည်။ ပိုလန်သမ္မတ၏ လုပ်ရပ်ကိုတုံ့ပြန်သည့်အနေဖြင့် ၎င်းကို ချီးမြှင့်ထားသော ပိုလန်နိုင်ငံ၏ အမြင့်ဆုံး ဘွဲ့တံဆိပ်ဖြစ်သည့် လင်းယုန်ဖြူဘွဲ့တံဆိပ်ကို ပြန်လည်ရုပ်သိမ်းမည်ဖြစ်ကြောင်း ပိုလန်သမ္မတ ကာရိုးနော်ရိုစကီးက ဇွန် ၁၉ ရက်တွင် ကြေညာထားသည်။ ပိုလန်နိုင်ငံသည် ရုရှားနှင့်စစ်မက်ဖြစ်ပွားနေသော ယူကရိန်းနိုင်ငံနှင့် ယူကရိန်းပြည်သူများကို ဂုဏ်ပြုသည့်အနေဖြင့် ၂၀၂၃ ခုနှစ်တွင် ယူကရိန်းသမ္မတ ဇီလန်စကီးကိုလင်းယုန်ဖြူဘွဲ့တံဆိပ် ချီးမြှင့်ခဲ့ခြင်းဖြစ်သည်။ ပိုလန်သမ္မတ၏ ဆုံးဖြတ်ချက်ကို တုံ့ပြန်သည့်အနေဖြင့် လင်းယုန်ဖြူဘွဲ့တံဆိပ်အပါအဝင် ပိုလန်နိုင်ငံကချီးမြှင့်ထားသော ဘွဲ့တံဆိပ်များကိုပြန်အပ်မည်ဖြစ်ကြောင်း ယူကရိန်းသမ္မတနှင့် ထိပ်တန်းတာဝန်ရှိသူများက ပြောကြားထားသည်။ ကိုးကား-ရိုက်တာ

◾️ဟော်မုဇ်ရေလက်ကြားပိတ်ဆို့မှု အီရန်ကြေညာပြီးနောက် သင်္ဘောဖြတ်သန်းမှုကျဆင်း မဟာဗျူဟာမြောက် ဟော်မုဇ်ရေလက်ကြားကို ပြန်လည်ပိတ်ဆို့လိုက်ကြောင်း အီရန်နိုင်ငံက ကြေညာခဲ့ပြီးနောက် ယင်းရေလက်ကြားအား ဖြတ်သန်းနေသော သင်္ဘောအရေအတွက်မှာ ဇွန် ၂၁ ရက်တွင် သိသိသာသာကျဆင်းသွားကြောင်း ရေကြောင်းသွားလာမှု စောင့်ကြည့်ရေးအဖွဲ့အစည်းများက သတင်းထုတ်ပြန်ထားသည်။ ဇွန် ၁၇ ရက်တွင် ရယူထားသော အီရန်စစ်ပွဲပြီးဆုံးရေးဆိုင်ရာ ယာယီသဘောတူညီချက်ကို အစ္စရေးနှင့် အမေရိကန်တို့က ချိုးဖောက်နေမှုကြောင့်ဟော်မုဇ်ရေလက်ကြားကို ပြန်လည်ပိတ်ဆို့လိုက်ကြောင်း အီရန် နိုင်ငံက ဇွန် ၂၁ရက်တွင် ကြေညာခဲ့သည်။ အီရန်စစ်ပွဲပြီးဆုံးရေး ငြိမ်းချမ်းရေးဆွေးနွေးပွဲများကို ဆွစ်ဇာလန်နိုင်ငံကအမေရိကန်နှင့် အီရန် တာဝန် ရှိသူများ ဆွေးနွေးပွဲမကျင်းပမီ ဟော်မုဇ်ရေလက်ကြားကို ပြန်လည်ပိတ်ဆို့ထားကြောင်း အီရန်က ကြေညာခဲ့ခြင်းဖြစ်သည်။ အထက်ပါ ကြေညာချက်ပေါ်ထွက်လာခဲ့ပြီးနောက် ဇွန် ၂၁ ရက်တွင်ဟော်မုဇ်ရေလက်ကြားအား ဖြတ်သန်းခဲ့သော သင်္ဘောအရေအတွက် ကျဆင်းခဲ့ပြီး ငါးစင်းသာဖြတ်ကျော်ခဲ့ကြောင်း ရေကြောင်း သွားလာမှုစောင့်ကြည့်ရေး အဖွဲ့အစည်းများ၏ အဆိုအရသိရသည်။ နှိုင်းယှဉ်ကြည့်ပါက ဇွန် ၂၀ ရက်တွင် ဟော်မုဇ်ရေလက်ကြားကို သင်္ဘောစင်းရေ ၂၆ စင်းအထိ ဖြတ်သန်းခုတ်မောင်းခဲ့ကြကြောင်း သိရသည်။ ကိုးကား-ရိုက်တာ

◾️အမေရိကန်ကုမ္ပဏီ ၁၀ ခုတရုတ်အစိုးရ အရေးယူ ပိတ်ဆို့ မှုများပြုလုပ်ကာကွယ်ရေးနှင့် မြေရှားသတ္တုတူးဖော်ရေးကဏ္ဍများနှင့် ဆက်စပ်နေသော အမေရိကန်ကုမ္ပဏီ ၁၀ ခုကို တရုတ်အစိုးရက အရေးယူပိတ်ဆို့မှုများချမှတ်ခဲ့ပြီး ပို့ကုန်ထိန်းချုပ်မှုများ ပြဋ္ဌာန်းထားကြောင်း တရုတ်အစိုးရ မီဒီယာများကဇွန် ၂၂ ရက်တွင် သတင်းထုတ်ပြန်ထားသည်။ အမေရိကန်အစိုးရက ယခုလအတွင်းတရုတ်ကုမ္ပဏီ ၈၀ နှင့် လက်အောက်ခံလုပ်ငန်းခွဲများကို တရုတ် စစ်ဘက်အား ကူညီနေသူများအဖြစ် စွပ်စွဲ၍ နာမည်ပျက်စာရင်း ထည့်သွင်းခဲ့ပြီးနောက် တရုတ် နိုင်ငံကလည်း အမေရိကန်ကုမ္ပဏီများကို အရေးယူပိတ်ဆို့မှုများ ပြဋ္ဌာန်းခဲ့ခြင်းဖြစ်သည်။ အမေရိကန်အစိုးရက နာမည်ပျက်စာရင်းထည့်သွင်းခဲ့သော တရုတ်ကုမ္ပဏီများထဲတွင် အလီ ဘာဘာ၊ ပေတူနှင့် ဘီဝိုင်ဒီကဲ့သို့သော နည်းပညာကုမ္ပဏီကြီးများ ပါဝင်ခဲ့သည်။ အမေရိကန်အစိုးရ၏ အထက်ပါလုပ်ရပ်ကိုတုံ့ပြန်သည့်အနေဖြင့် တရုတ်နိုင်ငံအနေဖြင့်လည်း အမျိုးသားလုံခြုံရေးကို ကာကွယ်စောင့်ရှောက်ရေးအတွက် အမေရိကန်ကုမ္ပဏီများအား ပို့ကုန်ထိန်းချုပ်မှုများ သတ်မှတ်ပြဋ္ဌာန်းခဲ့ခြင်းဖြစ်ကြောင်း တရုတ်ဘဏ္ဍာရေးဝန်ကြီးဌာန၏ သတင်းထုတ်ပြန်ချက်၌ ဖော်ပြထားသည်။ တရုတ်နိုင်ငံသည် ပေကျင်းမြို့တော်သို့အမေရိကန်သမ္မတ ဒေါ်နယ်ထရန့် လာရောက်ခဲ့ပြီးတစ်လအကြာတွင် အမေရိကန်ကုမ္ပဏီများအား ပို့ကုန်ထိန်းချုပ်မှုများ ပြုလုပ်ခဲ့ခြင်းဖြစ်သည်။ ပေကျင်းမြို့တော်ခရီးစဉ်အတွင်း တရုတ်သမ္မတရှီကျင်ပင်းနှင့် အမေရိကန်သမ္မတဒေါ်နယ်ထရန့်တို့သည် ကုန်သွယ်ရေးအရ အပြန်အလှန်စည်းကြပ်မှုများကို လျှော့ချရန် သဘောတူခဲ့ကြသည်။ ကိုးကား-ရိုက်တာ

◾️အမေရိကန်ပြည်ထောင်စုနှင့် အီရန်တို့၏ ဆွစ်ဇာလန် ငြိမ်းချမ်းရေး ဆွေးနွေးပွဲ ပြီးဆုံး အမေရိကန်နှင့်အီရန် ထိပ်တန်းတာဝန်ရှိသူများအကြား ဆွစ်ဇာလန်နိုင်ငံ၌ကျင်းပခဲ့သော ပထမအ ကျော့ဆွေးနွေးပွဲများမှာ ဇွန် ၂၂ ရက်တွင် ပြီးဆုံးသွားပြီဖြစ်ကြောင်း သိရသည်။ အဆိုပါ ပထမအကျော့ဆွေးနွေးပွဲကို အမေရိကန်နှင့်အီရန် တာဝန်ရှိသူများသည် အပစ်အခတ် ရပ်စဲရေးကာလ ရက်ပေါင်း ၆၀ အတွင်း အီရန်စစ်ပွဲပြီးဆုံးရေးအပြီးသတ် သဘောတူညီချက် ရယူနိုင်ရေးအတွက် လမ်းပြမြေပုံတစ်ရပ်ကိုရယူခဲ့ကြကြောင်း ငြိမ်းချမ်းရေးအကျိုးဆောင် နိုင်ငံများဖြစ်ကြသော ကာတာနိုင်ငံနှင့် ပါကစ္စတန်နိုင်ငံတို့က ပူးတွဲကြေညာချက်တစ်ရပ် ထုတ်ပြန်ထားသည်။ ကာတာနှင့်ပါကစ္စတန်တို့၏ ပူးတွဲကြေညာချက်အရ အီရန်စစ်ပွဲအဆုံးသတ်ရေး အပြီးသတ် သဘောတူညီချက် ရယူရေးဆိုင်ရာ အလုပ်သဘောဆွေးနွေးပွဲများကို ယခုသီတင်းပတ်အတွင်း ဆွစ်ဇာလန်နိုင်ငံ ဘာဂျင်စတော့ခ်တောင်ပေါ်အပန်းဖြေစခန်းမြို့၌ ဆက်လက်ကျင်းပမည်ဖြစ်ကြောင်း သိရသည်။ အမေရိကန်နှင့်အီရန် ထိပ်တန်းကိုယ်စားလှယ်များ၏ ဆွေးနွေးပွဲများ မစတင်မီ အီရန်နိုင်ငံက ဟော်မုဇ်ရေလက်ကြားကို ပြန်လည်ပိတ်ဆို့ခဲ့ကြောင်းကြေညာခဲ့ပြီး အမေရိကန်သမ္မတ ဒေါ်နယ်ထရန့်ကလည်း စစ်ရေးအရပြန်လည်ခြိမ်းခြောက်ခဲ့ရာ ဆွစ်ဇာလန်ငြိမ်းချမ်းရေး ဆွေးနွေးပွဲများအပေါ် ဆိုးကျိုးသက်ရောက်မည့်အရေး စိုးရိမ်ခဲ့ကြရသည်။ ဇွန် ၁၉ ရက်တွင် လက်မှတ်ရေးထိုးခဲ့သော အီရန်စစ်ပွဲပြီးဆုံးရေး ယာယီသဘောတူညီချက်အရ ကျင်းပခဲ့သော ဆွစ်ဇာလန်ငြိမ်းချမ်းရေး ဆွေးနွေးပွဲများတွင် အမေရိကန်ပြည်ထောင်စုကို ကိုယ်စားပြု၍ ဒုတိယသမ္မတဂျေဒီဗင့်စ်နှင့်သမ္မတဒေါ်နယ်ထရန့်၏ အထူးသံတမန် စတိဗ်ဝစ်ကော့ဖ်တို့ပါဝင်ခဲ့ပြီး အီရန်နိုင်ငံတော်ကိုကိုယ်စားပြု၍ လွှတ်တော်ဥက္ကဋ္ဌနှင့် နိုင်ငံခြားရေးဝန်ကြီး အဘက်စ်အာရက်ချီတို့ ပါဝင်ခဲ့ကြသည်။ ကိုးကား-ရိုက်တာ

◾️ကာတာဓာတ်ငွေ့စက်ရုံ ပေါက်ကွဲမှု ၅၄ ဦး ဒဏ်ရာရ၊ ၁၈ ဦး ပျောက်ဆုံး ကာတာနိုင်ငံမှ စက်ရုံတစ်ခုပေါက်ကွဲမှုတွင် လူပေါင်း ၅၄ ဦး ဒဏ်ရာရရှိခဲ့ကာ ၁၈ ဦး ပျောက်ဆုံးနေသည်ဟု ပင်လယ်ကွေ့နိုင်ငံ ပြည်ထဲရေးဝန်ကြီးဌာနက ယနေ့တွင် ပြောကြားသည်။ ရက်စ်လက်ဖန် စက်မှုဇုန်တွင် နည်းပညာပိုင်းမတော်တဆမှုမှတစ်ဆင့် ပေါက်ကွဲမှုဖြစ်ပွားခဲ့ကြောင်း နှင့် ပျောက်ဆုံးနေသူများကို အာဏာပိုင်များက ရှာဖွေနေကြောင်း ပြည်ထဲ‌ရေးဝန်ကြီးဌာနက ပြောသည်။ ကမ္ဘာ့အကြီးဆုံး သဘာဝဓာတ်ငွေ့ရည်လုပ်ငန်း တည်ရှိသော စက်မှုဇုန်မှဖြစ်ရပ်ကြောင့် မီးခိုးလုံးကြီးများ တက်နေပြီး မီးတောက်များကြောင့် ညကောင်းကင်ယံ လင်းထိန်နေသည်ကို ထိုနေရာမှ ကီလိုမီတာ ၂၀ ခန့် အကွာတွင်ရှိသော အေအက်ဖ်ပီသတင်းဌာန ဂျာနယ်လစ်တစ်ဦးက မြင်တွေ့ခဲ့သည်။ အမေရိကန်-အီရန် စစ်ပွဲအတွင်း အီရန်က ပင်လယ်ကွေ့စွမ်းအင်လုပ်ငန်းများကို ပစ်မှတ်ထားတိုက်ခိုက်ခဲ့ရာ ရက်စ်လက်ဖန် စက်မှုဇုန်အကြီးအကျယ်ပျက်စီးခဲ့ကာ ကာတာအစိုးရက ဓာတ်ငွေ့ထုတ်လုပ်မှုများကို ရပ်တန့်ထားခဲ့ရသည်။ အဆိုပါ စက်မှုဇုန်တွင် လုပ်ငန်းများပြန်လည် လည်ပတ်ရန် လုပ်ဆောင်ချိန်တွင် ပေါက်ကွဲမှုတစ်ရပ် ဖြစ်ပေါ်ခဲ့ကြောင်း နှင့် ပေါက်ကွဲမှုကြောင့် ၎င်းစက်မှုဇုန်ရှိ ဓာတ်ငွေ့ဖြန့်ဖြူးရေးစက်ရုံတစ်ခုတွင် ‌ပေါက်ကွဲမှုဖြစ်ပြီး မီးလောင်ခဲ့သည်ဟု အစိုးရပိုင် QatarEnergy က ပြောကြားသည်။ ယင်းဖြစ်ရပ်မှာ ပြည်တွင်း၌ဖြစ်ပေါ်သော ပေါက်ကွဲမှုဖြစ်ကြောင်း ပြည်ထဲ‌ရေးဝန်ကြီးဌာနက ပြောကြားပြီး နည်းပညာပိုင်းချို့ယွင်းမှုကြောင့် ပေါက်ကွဲခဲ့သည်ဟု နောက်ပိုင်းတွင် အပြစ်တင်ထားသည်။ အဆိုပါ စက်မှုဇုန်ကို အီရန်ဒရုန်းများ ထိမှန်ခဲ့ပြီးနောက် မတ်လ ၂ ရက်တွင် သဘာဝဓာတ်ငွေ့အရည် ထုတ်လုပ်သောလုပ်ငန်းများကို ကာတာက ရပ်တန့်ခဲ့သည်။ သေးငယ်သော ပင်လယ်ကွေ့နိုင်ငံလေးသည် အမေရိကန်၊ ဩစတြေးလျ၊ ရုရှားတို့နှင့်အတူ ကမ္ဘာပေါ်တွင် သဘာဝဓာတ်ငွေ့အရည် အများဆုံး ထုတ်လုပ်သည့် နိုင်ငံတစ်နိုင်ငံအဖြစ် ရပ်တည်နေသည်။ သတင်း-ရဲမင်း ကိုးကား-AFP

◾️လိုင်စင်မဲ့ဆိုင်ကယ်များ အရည်အသွေးမပြည့်မီဆိုင်ကယ်များဖြစ်ရန်အလားအလာများဟု ပို့ဆောင်ရေးဒုဝန်ကြီးပြော ‎လိုင်စင်မဲ့ဆိုင်ကယ်များသည် တရားမဝင်လမ်းကြောင်းများမှတင်သွင်းလာခြင်းဖြစ်သဖြင့် သက်သာသောစျေးနှုန်းဖြင့်အသုံးပြုနိုင်ရန် အရည်အသွေးမပြည့်မီခြင်း၊ ယာဉ်ကြံ့ခိုင်မှု Road Safety အားနည်းခြင်းတို့ရှိနေသည့်ဆိုင်ကယ်များဖြစ်ရန်များကြောင်း ပို့ဆောင်ရေးဝန်ကြီးဌာနဒုတိယဝန်ကြီး ဦးအောင်မြိုင်ကပြောသည်။ ‎ ‎ယနေ့(ဇွန် ၂၂ ရက်)တွင်ကျင်းပသည့် ပြည်သူ့လွှတ်တော်အစည်းအဝေး၌ နိုင်ငံတဝန်းရှိလိုင်စင်မဲ့ဆိုင် ကယ်များအားလိုင်စင်ထုတ်ပေးရန်ရှိမရှိ လွှတ်တော်ကိုယ်စားလှယ်နှစ်ဦး၏မေးခွန်းများကို ပို့ဆောင်ရေးဒုဝန်ကြီးက ပြန်လည်ဖြေကြားခြင်းဖြစ်သည်။ ‎ ‎“တရားဝင်တင်သွင်းခွင့်ပြုထားတဲ့ဆိုင်ကယ်များသည် သတ်မှတ်စံချိန်စံညွှန်းနဲ့အညီ တပ်ဆင်ထုတ်လုပ် ထားပြီးသားဖြစ်ခြင်းနှင့် သက်ဆိုင်ရာထုတ်လုပ်သည့်ကုမ္ပဏီမှလည်းတာဝန်ခံမှုရှိခြင်း၊ ဒါတွေပါရှိရမှာဖြစ်ပါတယ်” ဟု ၎င်းကပြောသည်။ ‎ ‎လိုင်စင်မဲ့ဆိုင်ကယ်များကိုလိုင်စင်ထုတ်ပေးမည်ဆိုပါက တရားမဝင်ကုန်စည်စီးဆင်းမှုကိုအားပေးရာ ရောက်နေခြင်း၊ လိုင်စင်မဲ့ဆိုင်ကယ်များသည် အရည်အသွေးမပြည့်မီရန်အလားအလာများခြင်း၊ တရားဝင်တင်သွင်းထားသည့်ဆိုင်ကယ်များသည် သတ်မှတ်စံချိန်နှင့်အညီတာဝန်ခံမှုရှိခြင်း၊ တရားဝင် အခွန်ပေးဆောင်ကာ တင်သွင်းထားသည့်အခွန်ထမ်းများနစ်နာမှုရှိစေခြင်း စသည်တို့ကြောင့် လိုင်စင်ထုတ်ပေးမှုထပ်မံပြုလုပ်ရန်မရှိခြင်းဖြစ်သည်ဟုဆိုသည်။ ‎ ‎အလားတူပြည်တွင်း၌ရင်းနှီးမြှုပ်နှံမှုပြုလုပ်ကာ ဆိုင်ကယ်တပ်ဆင်ထုတ်လုပ်သည့် ကုမ္ပဏီများလည်း ရှိနေသဖြင့် ရင်းနှီးမြှုပ်နှံမှုများထိခိုက်နစ်နာမှုရှိနိုင်သည့်အပြင် လိုင်စင်မဲ့ဆိုင်ကယ်များကို တရားဝင် စီးနင်းအသုံးပြုခွင့်ရစေရန် လိုင်စင်ထုတ်ပေးမှုအကြိမ်ကြိမ်ပြုလုပ်ခဲ့သော်လည်း တရားမဝင် ဝင်ရောက် မှုများရပ်တန့်မှုမရှိသဖြင့် လိုင်စပ်ထုတ်ပေးမှုရပ်ဆိုင်းခဲ့ခြင်းဖြစ်သည်ဟု ဒုဝန်ကြီးဦးအောင်မြိုင်က ပြောသည်။ ‎ ‎နယ်စပ်လမ်းကြောင်းများမှတစ်ဆင့် မော်တော်ဆိုင်ကယ်တရားမဝင်တင်သွင်းမှုများကိုတားဆီရန် မည်သို့ဆောင်ရွက်နေကြောင်း သံတောင်ကြီးမဲဆန္ဒနယ်ပြည်သူ့လွှတ်တော်ကိုယ်စားလှယ် ဦးစောဟေသားကြီးက ဆက်စပ်မေးခွန်းဆက်လက်မေးမြန်းရာ “ဌာနပေါင်းစုံဆောင်ရွက်ရမယ့် လုပ်ငန်းစဉ်ဖြစ်ကြောင်းဖြေကြားလိုပါတယ်”ဟု ပို့ဆောင်ရေးဒုဝန်ကြီးကပြောသည်။ ‎ ‎“လိုင်စင်မဲ့ဆိုင်ကယ်များနယ်စပ်မှပြည်တွင်းသို့ရောက်ရှိလာခြင်းသည် မည်သူ့တွင်တာဝန်ရှိသနည်းဟုမေးလျှင် ပေါက်ပင်ဘာကြောင့်ကိုင်းရတယ်၊ ဗျိုင်းနားလို့ကိုင်းရတယ်၊ ဗျိုင်းဘာကြောင့်နားရသလဲ စသဖြင့်အရှည်မပြောလိုတော့ပါ” ဟု ဦးစောဟေသားကြီးကမေးခွန်းမေးမြန်းစဉ်ပြောသည်။ ‎ ‎အစိုးရအဆက်ဆက်မှတ်တမ်းများအရ ပြည်ထောင်စုအစိုးရအစီအစဉ်ဖြင့် ၁၉၉၉ ခုနှစ်တွင် လိုင်စင်မဲ့ ဆိုင်ကယ်များအားစီမံချက်ဖြင့်လိုင်စင်စတင်ထုတ်ပေးခဲ့ရာ ၂၀၂၁ ခုနှစ်အထိ စီမံချက်(၁၀) ကြိမ်အတွင်း ဆိုင်ကယ်အစီးရေသုံးသန်းကျော်ကို တရားဝင်လိုင်စင်ထုတ်ပေးခဲ့သည့်အပြင် တိုင်းနှင့်ပြည်နယ်အစိုးရ များ၏အစီအစဉ်ဖြင့် လိုင်စင်ထုတ်ပေးမှုများလည်းရှိခဲ့ကြောင်းသိရသည်။ ‎ ‎သတင်း - စံတော်ချိန်ဒစ်ဂျစ်တယ် ‎ဓာတ်ပုံ-MOI(ဆိုင်ကယ်လိုင်စင်ထုတ်ပေးမှုပြုလုပ်ပေးနေစဉ်)ပုံဟောင်း

#ယနေ့ထုတ်သတင်းစာ_ကာတွန်း