ننګرهار رسنيو دفتر

۲۴/۳/۱۴۴۸ ننګرهار کې د غير مالياتي ادارو د ورکړل شوي ټارګيټ ارزونه وشوه د ننګرهار مرستيال والي مولوي غلام الرحمن حيدري په مشرۍ، چې پر مهال يې دفتر رئيس مولوي شاهد نوراني هم حضور درلود، غير مالياتي ادارو ته د ورکړل شوي هدف ارزونه وشوه. د ولايت مستوفي مولوي نورالحسن محسن د لومړنيو دوو ربعو د ورکړل شويو هدف په اړه معلومات ورکړل او د هغو ادارو نوملړ يې روښانه کړ، چې ورکړل شوی هدف يې پوره کړی يا ورته نږدې شوي او ځينې د ټارګيټ په پوره کولو کې پاتې راغلي. د هغو ادارو مسوولينو چې ورکړل شوی ټارګيټ يې نه دی پوره کړی لاملونه يې شريک او په دې برخه کې يې په قانوني هڅو زياتولو ډاډ وښوده. د ولایت مرستيال هدف ته د رسيدلو ادارو ستاينه وکړه او پر نورو يې غږ وکړ چې د قانوني لارو چارو په موندلو سره ورکړل شوی ټارګيټ پوره کړي. ننګرهار رسنيو دفتر

۲۴/۳/۱۴۴۸ د ننګرهار والي د ادارو مسوولينو او ولسي وګړو سره د بېلابېلو مسايلو حل او تعقيب په موخه وليدل د ننګرهار والي حاجي ملا محمد نعيم اخند د چارو ادارې د پروژو د انسجام رئيس مولوي عزيزالله مصطفی او د دې ولايت يو شمېر مسوولينو سره د بېلابېلو مسايلو حل او تعقیب په موخه وليدل. نوموړي سره مسوولينو د يو شمېر موضوعاتو په اړه معلومات شريک کړل چې ورته لازمې سپارښتنې وشوې. د ننګرهار والي په ورته مهال قومي مشرانو، علماء کرامو او ولسي وګړو سره هم د بېلابېلو ستونزو حل په موخه وليدل او اړونده ادارو ته یې د قانوني اجرااتو سپارښتنې وکړې. ننګرهار رسنيو دفتر

۲۴/۳/۱۴۴۸ جلال اباد ښار کې سپين تاريخي جومات ته ۳ جريبه نوره ځمکه ورکړل شوه د ننګرهار ولايت مقام په وړانديز او د آميرالمؤمنين حفظه الله په حکم د چارو ادارې د پروژو د انسجام رئيس مولوي عزيزالله مصطفی له لوري د ارشاد، حج او اوقافو رئيس شيخ القرآن و الحديث مولوي عيد ولي حليمي ته سپين جومات لپاره درې جريبه نوره ځمکه په واک کې ورکړل شوه. دغه ځمکه د چارو ادارې له لوري د وږي په ۱۶مه د ولایت رسنيو دفتر کې رسماً د ارشاد، حج او اوقافو رياست ته انتقال شوه چې ډېر ژر به د جومات برخه وګرځي. د چارو ادارې د پروژو د انسجام رئيس وويل، چې په نوې درې جريبه ځمکه کې د چارو ادارې اړوند يو اندازه او د لومړۍ امنيتي حوزې ځمکه شامله ده. د ارشاد، حج اوقافو رئيس وويل، چې د سپين جومات نوې ودانۍ ډېره برخه نيولې او د ساحې پراختيا ته يې اړتيا وه چې د دې ځمکې په يو ځای کولو سره به د جومات ساحه پراخه شي. د ننګرهار والي حاجي ملا محمد نعيم اخند په هڅو د سپين جومات چارې بشپړېدو ته نږدې شوي او ټاکل شوې چې ډېر ژر دغه تاریخي او ستر جومات د لمونځ کوونکو پرمخ پرانیستل شي. ننګرهار رسنيو دفتر

۲۴/۳/۱۴۴۸ ننګرهار کې د پاکو اوبو يوه شبکه ګټې اخيستنې ته وړاندې شوه د ننګرهار کليو پراختيا او بيا رغونې رياست تر چتر لاندې د يونيسف په ۵.۱ ميليون افغانيو مالي لګښت د بهسودو ولسوالۍ سرپشتې سيمه کې د پاکو اوبو يوه شبکه جوړه او ګټې اخيستنې ته وړاندې شوه. دغه شبکه د ۵۰ متره مکعب په ظرفيت يوه ذخيره او د ۸۰ مترو په ژوروالي يوه څاه لري چې د سولري برښنا، ۳.۳ کيلومتره غځول شوي پايپ او ۱۳۰ شيردهنونو په وسيله ۳۶۰ کورنيو ته اوبه رسوي. په دې پروژه کې لسګونو کسانو ته د کار زمينه برابره شوه وه. ننګرهار رسنيو دفتر

۲۴/۳/۱۴۴۸ جلال اباد ښار کې د يو سړک او ويالو جوړولو چارې پيل شوې د ننګرهار مرکز جلال اباد ښار د شپږمې ناحيې په ۱۵م ګذر کې د ښاروالۍ تر چتر لاندې د نړيوال بانک په ۷.۹ ميليونه افغانيو مالي لګښت او د UNOPS په تخنيکي همکارۍ د ۵۴۸ متره په اوږدوالي او ۶ متره پراخوالي د يو سړک او ويالو په کانکريټي ډول د جوړول چارې پيل شوې. په دې پروژه کې د ګڼ شمېر راستنو شويو او داخلي بې ځايه شوو کورنيو غړو ته د کار زمينه برابره شوې ده. ننګرهار رسنيو دفتر

*د نادرکۍ خبرتيا* حسن د محمد ولي زوی او ابراهيم ولد عبدالرزاق نن مازديګر څلور بجې د جلال اباد ښار چکنوريو سيمه کې له مدرسې څخه د کور پر لور د راتګ پر مهال نادرکه شوي؛ که هر چاته يې په اړه معلومات وي د انساني همدردۍ له مخې دې لاندې شمېرو سره اړيکه وکړي. ۰۷۸۲۰۷۰۴۴۴ - ۰۷۸۷۹۷۹۶۵۸ -

۲۳/۳/۱۴۴۸ ننګرهار کې ۱۱۸ بزګرانو سره د الوګانو اصلاح شوي تخم مرسته وشوه د ننګرهار کرنې ریاست تر چتر لاندې، د اروپایي ټولنې او سویس په ۲ میلیونه، ۴۷۰ زره او ۸۰۰ افغانیو مالي لګښت او د DRC په تخنيکي همکارۍ د اچین، سپین غر او هسکې مېنې ولسوالیو ۱۱۸ بزګرانو سره د آلوګانو د اصلاح شوي تخم مرسته وشوه. هر بزګر ته ۳۵۰ کیلوګرامه اصلاح شوی تخم ورکړل شوی او ټاکل شوې ۵۰ کیلوګرامه توره او ۵۰ کیلوګرامه سپینه سره هم ورکړل شي. بزګرانو ته د آلوګانو د کرلو، اوبه‌ لګونې، ناروغیو او افتونو د مخنیوي او حاصل راټولولو په برخو کې روزنه هم ورکول کېږي. ننګرهار رسنيو دفتر

۲۳/۳/۱۴۴۸ ننګرهار کې ورزشکارانو ته ديني سيمينار پيل شو د ننګرهار بدني روزنې او ورزش ریاست او د کلمات علمي او تحقیقاتي ادارې د ختیځ زون څانګې په ګډه ۱۴۰ ورزشکارانو ته د «اسلامي فکر» تر سرلیک لاندې لس ورځنی سيمينار پیل کړ. په دې سمینار کې به ورزشکارانو لپاره لس بېلابېلې موضوعګانې وړاندې شي، چې موخه یې د بدني روزنې ترڅنګ د هغوی فکري او عقیدوي روزنه ده. د ورزش رئيس عبدالسلام وزيروال وايي، په دې پروګرام کې د اسلامي ارزښتونو پر پیاوړتیا، د باطلو افکارو او لویدیځ کلتور د اغېزو پر مخنیوي او د سالم نیت له مخې د ورزش پر ترسره کولو ټینګار کېږي. ننګرهار رسنيو دفتر

۲۳/۳/۱۴۴۸ ننګرهار کې د آريانا پوهنتون نوی رئيس مسوولينو ته ور وپېژندل شو ننګرهار کې د آريانا پوهنتون نوی رئيس مفتي عبدالوهاب منيب د لوړو زده کړو وزارت له منظورۍ وروسته مسوولينو او استادانو ته ور وپېژندل شو. د يادې پېژندنې پر مهال د ولايت مقام د فرهنګي او ټولنيزو چارو کارپوه مولوي سميع الله سمون وويل، چې په دې ولايت کې اته خصوصي پوهنتونونه فعاليت کوي چې په کې شاوخوا پنځلس زره محصلين په زده کړو بوخت دي. نوموړي وويل، چې ولايت مقام ټولو علمي بنسټونو سره ښه همکاري لري او ډاډ ورکوي چې دوی ته به په راتلونکې کې په نورو برخو کې هم اسانتياوې رامنځته کړي. د آریانا پوهنتون بنسټګر او مالک د پوهنتون د علمي او اکاډميکو خدمتونو په پراختيا، د ننګرهار د علماوو شورا رئیس شيخ حضرت جان حنفي او د کرنې، وزارت استازي د علم او پوهې، د دیني او عصري علومو ارزښت، د مسوولیتونو د اهلیت او د پوهنتونونو او دیني مدرسو ترمنځ د همغږۍ پر ارزښت ټینګار وکړ. د ننګرهار پوهنتون د ژبو او ادبیاتو پوهنځي رئیس، د آریانا پوهنتون د امنا‌ء هئیت استازي او د دغه پوهنتون نوي رئیس د پوهنتون علمي خدمتونه، د رهبرۍ او چارو د لا ښه تنظیم، د علمي، اداري او تدریسي چارو د پرمختګ او د پوهنتون د اعتبار او علمي جایگاه د پیاوړتیا په اړه خپل لیدلوري وړاندې کړل. ننګرهار رسنيو دفتر

۲۳/۳/۱۴۴۸ د ننګرهار تودو سيمو ښوونځيو کې نوی ښوونيز کال پيل شو د ننګرهار پوهنې رئيس شيخ الحديث محمد شريف حليمي او ور سره مسوولينو د ګوشتې عبدالحميد بابا لېسه کې د ښوونځي د زنګ په وهلو سره د دې ولایت د تودو سيمو په ښوونځيو کې نوی ښوونيز کال پيل کړ. د پوهنې رئيس وويل، چې زده کړې د ملتونو د برياليتوب او پرمختګ اساس دی او پر والدينو يې غږ وکړ چې خپل اولادونه ښوونځيو ته وليږي. ننګرهار کې دا مهال ۵۲۳ زره او ۱۰۸ هلکان او ۲۸۲ زره او ۲۲۳ نجونې په ښوونځيو کې په زده کړو بوخت دي چې د لس زره او ۳۵ نارينه او ۱۷۷۰ ښځينه ښوونکو له لوري ورته زده کړې ورکول کيږي. ټاکل شوې چې سږکال له ۹۴ زره ۹۶۴ څخه زيات نوي زده کوونکي په ښوونځيو کې شامل شي. ننګرهار رسنيو دفتر

۲۳/۳/۱۴۴۸ د ننګرهار والي د حصارک قومي مخورو حقوقي ستونزې د حل په موخه واورېدې د ننګرهار والي حاجي ملا محمد نعيم اخند، چې پر مهال يې د حصارک ولسوال قاري محمد ياسر هم حضور درلود، د دې ولسوالۍ د يو شمېر قومي مخورو حقوقي ستونزې د حل په موخه واورېدې. يادو قومي مخورو وويل، چې د حصارک ولسوالۍ يوه برخه لوګر سره نږدې پرته چې له همدې امله يې وخت ناوخت د ياد ولايت خلکو سره حقوقي ستونزې رامنځته کيږي او د حل غوښتنه يې وکړه. د ننګرهار والي حاجي ملا محمد نعيم اخند وويل، چې افغانستان د ټولو قومونو او ولسونو ګډ کور دی او ټول وګړي بايد د نافذه قوانينو او اصولو په چوکاټ کې له خپلو حقه حقونو څخه برخمن شي. نوموړي يادو قومي مخورو ته ډاډ ورکړ چې ستونزې به يې مرکز سره شريکې کړي او په حل کې به يې د عدالت له مخې لازم اجراات تر سره شي. ننګرهار رسنيو دفتر