ننګرهار رسنيو دفتر

۱/۶/۱۴۴۸ جلال اباد ښار کې د قصابانو له هټيو خرابه غوښه راټوله او لمنځه یوړل شوه. د کرنې رياست د مالدارۍ او روغتيا آمريت مسوولينو دغه ۱۷ کيلوګرامه د غټ مال او چرګانو غوښه د غنمو منډوي ساحه کې د پلټنې په ترڅ کې تثبيت کړه. قصابانو ته سپارښتنه کيږي چې په راتلونکې کې د خرابې شوې غوښې له پلور څخه ډډه وکړي او سر غړونکو سره به قانوني چلند تر سره شي. ننګرهار رسنيو دفتر

۱/۶/۱۴۴۸ *ننګرهار کې حج لپاره ۸۱۹ نوي متقاضیان د قرعه‌کشۍ له لارې وټاکل شول* د ننګرهار ارشاد، حج او اوقافو ریاست له لوري د ۱۴۴۸ هجري قمري کال د فرضي حج قرعه‌ کشي د ۳۹۵۸ عادي متقاضیانو ترمنځ ترسره شوې، چې له ډلې یې ۸۱۹ تنه د حج ادا کولو لپاره ټاکل شوي دي. سږ کال ننګرهار ته د حج ۱۲۶۷ سهمونه ځانګړي شوي، چې ۳۷۱ د پخوانیو متقاضیانو او ۸۱۹ د نویو متقاضیانو دي. د ننګرهار د ارشاد، حج او اوقافو رئیس مولوي عید ولي حلیمي ویلي، قرعه‌ کشي د ګډ هیئت او متقاضیانو په حضور کې د ولسوالیو د ځانګړو سهمونو له مخې ترسره شوې ده. نوموړي زیاته کړې، د افغانستان د حج سهم د پخواني نفوس پر بنسټ ټاکل شوی او د زیاتوالي غوښتنه یې له سعودي عربستان سره شریکه شوې ده. ننګرهار رسنيو دفتر

۱/۶/۱۴۴۸ ننګرهار کې څارويو ته د طبق مخنيوي واکسين کمپاين پيل شو د ننګرهار کرنې رياست په هڅو، FAO له لوري په ۲۲ ولسواليو کې ۵۲۳ زره لويو او وړو مالونو ته د طبق وژونکې ناروغۍ مخنيوي په موخه د واکسين کمپاين پیل شو. د کرنې رئیس مولوي عبدالستار محمد وايي، چې ۴۵ وترانو ته روزنه ورکړل شوې، ترڅو ۳۷۴ زره لويو او ۱۴۹ وړو ژويو ته واکسين تطبیق کړي. له دې کمپاين څخه موخه د طبق ناروغۍ مخنيوی، د څارويو روغتيا او د مالدارانو اقتصادي پياوړتيا ده. ننګرهار رسنيو دفتر

۱/۶/۱۴۴۸ ننګرهار کې يوې مېرمنې ته د پلار په ميراث کې حق ورکړل شو د ننګرهار امربالمعروف، نهي عن المنکر او شکايتونو اورېدلو رياست محتسبينو له لوري يوه مېرمن د خپل پلار په ميراث کې له حق برخمنه شوه. د يادې مېرمنې د پلار په ميراث باندې يې تره زامنو تصرف کړی وو او هغې ته يې پکې حق نه ورکوه چې د ۸۳ ګڼې فرمان پنځمې مادې له مخې د مېرمنې حق تأين شو. د دغه فرمان له مخې ښځه د مېړه، اولاد، پلار او نورو خپلوانو په مالونو کې د ميراث حق او ثابت سهم لري، په فرضيت يا عصبيت سره هيڅوک له خپل حق څخه نه شي بې برخې کېدلی. ننګرهار رسنيو دفتر

د پوهنې وزارت د ۱۳۹۹ کال تعليمي نصاب په مل لينک کې شتون لري! https://nexa.gov.af/ps/kankor-resource

۱/۶/۱۴۴۸ ننګرهار کې ۱۰۰ ځوانانو ته کاري وسايل ورکړل شول د ننګرهار کار او ټولنيزو چارو رياست په هڅو ستاسو غږ مؤسسې له لوري بټي کوټ ولسوالۍ کې سل بېوزله مسلکي ځوانانو سره د دوه ميليونه افغانيو په ارزښت کاري وسايل وويشل شول. هر تن ته د شل زره افغانيو په ارزښت د خياطۍ، نجارۍ، د بايسکل او موټر سايکل ترميم، بنجارګۍ، کليوالي دوکاندارۍ، د جوار پوليو، موچيتوب، رخت فروشۍ او معمارۍ وسايل ورکړل شول. د کار او ټولنيزو چارو رئيس مولوي مجيب الله عمر وايي، چې هر کس ته د هغه مسلک او خوښې سره سم وسايل ورکړل شوي دي. هغه يادو ځوانانو ته سپارښتنه کړې چې د دې وسايلو پرمټ حلال رزق ترلاسه کړي. ننګرهار رسنيو دفتر

۱/۶/۱۴۴۸ د ننګرهار والي مسوولينو او ولسي خلکو سره د ستونزو حل په موخه وليدل د ننګرهار والي حاجي ملا محمد نعيم اخند ولایت مقام کې د يو شمېر ادارو مسوولينو سره د بېلابېلو مسايلو تعقیب او حل په موخه ولیدل. د ادارو مسوولينو په يو شمېر برخو کې ستونزې او وړانديزونه شريک کړل چې ننګرهار والي له لوري د همکارۍ ډاډ ورکړل شو او د اړونده موضوعاتو په حل کې ورته لازم هدايتونه وشول. د ننګرهار والي په ورته مهال ولسي ستونزې او غوښتنې هم واورېدې او مربوطه ادارو ته يې د نافذه اصولو له مخې د اجرااتو حکمونه وکړل. ننګرهار رسنيو دفتر

۱/۶/۱۴۴۸ د ننګرهار سيمه ييز روغتون کې د MRI ماشين فعاليږي د ننګرهار سيمه ييز تخصصي روغتون کې د پوليو فنډ په ۱.۵ ميليونه امريکايي ډالرو مالي لګښت د MRI نوی او مؤدرن ماشين فعاليږي چې ور سره به د ناروغيو په تشخيص او درملنه کې لازمې اسانتياوې رامنځته شي. د ننګرهار عامې روغتيا رئيس مولوي آمين الله شريف او د روغتيا وزارت سلاکار انجينر فضل الربي کريمي چې د پولیو پروګرام مسوولينو يې ملتيا کوله په سيمه ييز روغتون کې يې د ياد ماشين نصبولو لپاره معياري ځاي وټاکه. د عامې روغتيا رئيس د پوليو پروګرام له مسوولينو مننه کړې او ټاکل شوې ياد ماشين ډېر ژر په ټاکل شوي ځای کې نصب شي. ننګرهار رسنيو دفتر

۱/۶/۱۴۴۸ ننګرهار کې د ماشومانو د اصلاح مرکز عدليې رياست ته سپارل کيږي ننګرهار کې د ماشومانو د اصلاح او روزنې مرکز د زندانونو چارو رياست څخه عدليې رياست ته سپارل کيږي او په همدې موخه د دواړو ادارو مسوولينو د لېږد په موخه ګډه ناسته کړې ده. په دې ناسته کې د ودانۍ او نورو فزيکي اسانتياوو، تشکيلاتي جوړښت، ښوونې او روزنې، اجناسو او تجهيزاتو او نورو اړوندو چارو بحث شوی دی. د ماشومانو دارالتأديب به ډېر ژر مرکز سره په همغږۍ عدليې رياست ته وسپارل شي، چې چارې به يې د نافذه اصولو له مخې همدې رياست له مخې پرمخ وړل کيږي. ننګرهار رسنيو دفتر

۱/۶/۱۴۴۸ جلال اباد ښار کې د ژباړې يو مرکز وتړل شو د ننګرهار عدليې رياست مسوولينو په جلال اباد ښار کې د ختيځ په نوم د ژباړې يو مرکز څخه هر اړخيزه څارنه او پلټنه کړې چې د ناسمو ژباړو له امله يې ياد مرکز تړلی دی. د دې مرکز ترڅنګ د ژباړو ټولو مرکزونو ته په تېر کې د اصلاحاتو سپارښتنې شوې وې؛ خو په ياد مرکز کې لا هم نيمګړتياوې موجودې وې. عدليې رياست د ژباړو مرکزونو ته سپارښتنه کوي چې د خلکو اسنادو او ژباړو کې پوره دقت وکړي ترڅو په راتلونکې کې له ستونزو وژغورل شي. ننګرهار رسنيو دفتر

۱/۶/۱۴۴۸ د جلال اباد – تورخم دويم لين سړک چارې بشپړېدو ته نږدې شوي د ننګرهارولایت مقام کارپوه انجينر صفي الله صادق په مشرۍ د ګډو ادارو تخنيکي ټيم د جلال اباد – تورخم دويم لين سړک له چارو څارنه کړې او وايي چې کارونه په ښه کيفيت او چټکۍ روان دي چې ډېر ژر به بشپړ شي. نوموړی وايي: « د دويم لين سړک قيرريزي بشپړه شوې، د سراچې پل کارونه هم شل سلنه تر سره شوي او ډېر ژر به دويم ځل قيرريزي پيل شي.» هغه زياتوي اوسمهال د سړک په شولډرونو کار روان دی او قراردادي شرکت ته سپارښتنه شوې چې خپل وخت دغه پروژه بشپړه کړي. د ټولګټو چارو رئيس مولوي احمد احمدي هم د تخنيکي ټيم په ملتيا د ياد سړک له چارو دوامداره څارنه کوي چې له امله يې کارونه د انجينرۍ اصولو او ښه معياري له مخې تر سره شوي دي. ننګرهار رسنيو دفتر

۲۹/۵/۱۴۴۸ د ننګرهار د صنعت او سوداګرۍ نوی رئيس مسوولينو ته ور وپېژندل شو د ننګرهار ولایت مقام د کار کوونکو چارو رئيس مولوي مطيع الله طلحه او د صنعت او سوداګرۍ وزارت معين مولوي شهاب الدين ثاقب له لوري د صنعت او سوداګرۍ نوی رئيس مولوي حضرت موسی ابو منصور مسوولينو او د دې اداري کار کوونکو ته ور وپېژندل شو. د کار کوونکو چارو رئيس وويل، چې دغه ټاکنه د رياست الوزراء عالي مقام په حکم تر سره شوې. هغه د مخکيني رئيس سيد عبدالبصير پاچا د تر سره کړيو خدمتونو ستاينه وکړه او نوي رئیس ته يې ولایت مقام له لوري په ټولو قانوني چارو کې د همکارۍ ډاډ ورکړ. د صنعت او سوداګرۍ وزارت معين نوی رئيس په دې ولایت کې د صنعت او سوداګرۍ پراختيا ته وهڅوه او سپارښتنه يې وکړه ترڅو په دې برخه کې چارې لا اغيزمنې شي. د ولایت مقام کارپوه مولوي سميع الله سمون وويل، چې ننګرهار کې شاوخوا ۴۵۰ فابريکې، ملي سوداګر او د صنعت اړوند بېلابېلې سرچينې شتون لري چې په ښه مديريت سره يې لا مثبت پرمختګ رامنځته کېدلی شي. په پای کې نوي رئيس ته د ښه خدمت او په چارو کې د بريا دعاء وشوه. ننګرهار رسنيو دفتر

۲۹/۵/۱۴۴۸ ننګرهار کې ۳۹ ځوانان د خیاطۍ او سولر ترمیم له حرفوي زده‌ کړو فارغ شول د ننګرهار هسکې مېنې ولسوالۍ کې ډاکار مؤسسې له لوري ۳۹ ځوانان د خیاطۍ او سولر سیستمونو د ترمیم له اووه میاشتنۍ نظري او عملي روزنې وروسته فارغ او هر تن ته د ۲۰۰ ډالرو په ارزښت د کار وسایل ورکړل شول. د کار او ټولنیزو چارو رئیس مولوي مجیب الله عمر ویلي، هڅه کوي د فني او حرفوي زده ‌کړو له لارې بې ‌روزګاره ځوانانو ته د کار زمینه برابره کړي. ننګرهار رسنيو دفتر