ننګرهار رسنيو دفتر

۲۱/۱/۱۴۴۸ ننګرهار کې له ۱۰۰۰ اړمنو کورنیو سره د البسو مرسته وشوه د ننګرهار اقتصاد ریاست تر څارنې لاندې، د جلال‌آباد ښار په بېلابېلو ناحیو کې زر داخلي بې‌ځایه شویو، راستنو شوو او اړمنو کورنیو سره د البسو مرسته ترسره شوه. د اقتصاد رئيس مولوي جان محمد حامد وايي، یاده مرسته د مرستندویه ادارو په همکارۍ د زیانمنو کورنیو د موسمي او لومړنیو اړتیاوو د پوره کولو په موخه ترسره شوې. نوموړي همدا راز د ورته بشري مرستو د دوام غوښتنه کړې. ننګرهار رسنيو دفتر

۲۱/۱/۱۴۴۸ ننګرهار کې د دارالمجانين جوړېدو په موخه د ځمکې په ټاکنه او انتقال خبرې وشوې د ننګرهار وادې کرنیز امارتي شرکت اجرائیوي رئیس سيد محمد نعيم محمدي سره د سرې میاشتې مسؤلینو په کتنه کې د دهډې فارم پر پنځه جریبه ځمکه د بې‌سرپرسته هېوادوالو لپاره د دارالمجانین د جوړېدو او د یادې ځمکې د انتقال د قانوني پروسې په اړه خبرې وکړې. دواړو لورو د پروژې د عملي کېدو لپاره پر اړینو قانوني او اداري اقداماتو د همکارۍ ډاډ وښوده. ننګرهار رسنيو دفتر

۲۱/۱/۱۴۴۸ ننګرهار کې د ابرار مؤسسې اداري او پروژوي چارې وارزول شوې د ننګرهار د اقتصاد رئیس مولوي جان محمد حامد، د تخنیکي ټیم په ملتیا د ابرار مؤسسې له اداري او پروژوي فعالیتونو څخه نظارتي لیدنه وکړه او د روانو پروژو د کیفیت، شفافیت او د تطبیق حالت یې وڅېړه. د لیدنې پر مهال د چارو لا ښه والي، شفافیت، د اسنادو د منظم ساتنې او اغېزمنې همغږۍ په اړه لازمې سپارښتنې وشوې او ټینګار وشو، چې ټول فعالیتونه باید د نافذه قوانینو او اصولو له مخې ترسره شي. ننګرهار رسنيو دفتر

۲۱/۱/۱۴۴۸ *ننګرهار کې د ناسمو رواجونو په موخه غونډه وشوه* د ننګرهار ارشاد، حج او اوقافو ریاست اړوند د مومندرې ولسوالۍ د حج او اوقافو مدیریت د امر بالمعروف او نهی عن المنکر امریت د استازو په ګډون علماء کرامو د ناسمو رواجونو مخنيوي په موخه غونډه وکړه. په غونډه کې د ودونو، خوښیو، مصیبتونو او له حج او عمرې څخه د راستنېدو پر مهال د ناسمو رواجونو د مخنیوي، د جوماتونو د چارو د ښه تنظیم او د علماوو ترمنځ د همغږۍ د پیاوړتیا په اړه لازمې سپارښتنې او عامه پوهاوی وړاندې شو. ننګرهار رسنيو دفتر

۲۱/۱/۱۴۴۸ ننګرهار کې لسو کوچنیو کاروباریانو ته د سولر برېښنا سیستمونه ووېشل شول د ننګرهار د صنعت او سوداګرۍ ریاست په همغږۍ، د TLO مؤسسې له لوري لسو تنو د کوچنیو او منځنیو کچې کاروباریانو ته د سولر برېښنا سیستمونه ووېشل شول، ترڅو د هغوی د برېښنا اړتیاوې پوره او سوداګریز فعالیتونه یې پیاوړي شي. د صنعت او سوداګرۍ ریاست وایي، د یاد پروګرام موخه د کوچنیو کاروبارونو ملاتړ، د پاکې انرژۍ دودول او د تولیدي او سوداګریزو فعالیتونو پراختیا ده. ننګرهار رسنيو دفتر

۲۱/۱/۱۴۴۸ جلال‌آباد ښار کې د کورونو د کرايو د وضعیت څارنه وشوه د ننګرهار د عدلیې ریاست په مشرۍ د کورونو د کرايو د کنټرول ګډې کمېټې د جلال‌آباد ښار په لومړۍ او دویمه ناحیو کې د یو شمېر استوګنیزو ټاورونو د کورونو د کرايو وضعیت وڅېړه او د ټاکل شوې نرخنامې د تطبیق په اړه یې لازمې سپارښتنې وکړې. د کمېټې د معلوماتو له مخې، د يو ټاور دفتر له ټاکل شوې نرخنامې څخه د لوړو کرايو د اخیستو له امله وتړل شو. کمېټې ټینګار کړی، چې د ښار ټولې استوګنیزې ودانۍ به د کرايو د نامناسب لوړوالي د مخنیوي په موخه په دوامداره توګه وڅارل شي. ننګرهار رسنيو دفتر

۲۱/۱/۱۴۴۸ د ننګرهار مرستيال والي د ولسونو حقوقي ستونزې د حل په موخه واورېدې د ننګرهار مرستيال والي مولوي غلام‌الرحمن حيدري د کوټ، کوز کونړ او دره‌نور ولسواليو قومي مخورو سره په ليدنه کې د دوی يو شمېر حقوقي غوښتنې د حل په موخه واورېدې او ډاډ يې ورکړ چې اړونده ادارو سره به يې شريک کړي ترڅو د نافذه قوانینو په رڼا کې ورته رسيده‌ګي وشي. نوموړي په ورته مهال د جلال اباد ښار او يو شمېر نورو ولسواليو بېلابېلو قشرونو سره هم په جلا ناستو کې د دوی ستونزې او عريضې واورېدې او اړونده ادارو ته يې په کتبي او شفاهي ډول د لازمو اجرااتو تر سره کولو سپارښتنې وکړې. د ولایت مرستيال بل لور ته د ادارو مسوولينو سره د کتنو پر مهال په بېلابېلو برخو کې د لازمو اقداماتو هدایات وړاندې کړل. ننګرهار رسنيو دفتر

۲۱/۱/۱۴۴۸ د ننګرهار مرستيال والي په مشرۍ ولايتي پرمختيايي غونډه کې د انکشافي او بشري مرستو پر جلب غوښتنې وشوې د ننګرهار مرستيال والي مولوي غلام‌الرحمن حيدري په مشرۍ ولايتي پرمختيايي غونډه کې، چې پر مهال يې د بېلابېلو سکتورونو او مؤسسو مسوولينو حضور درلود دې ولايت لپاره د انکشافي او بشري مرستو وړانديزونه وشول. د ننګرهار مرستيال والي د مؤسسو له مسوولينو مننه وکړه چې د راستنو شويو، داخلي بې‌ځايه شوو او د طبیعي پېښو زيانمنو کورنیو ترڅنګ يې په بېلابېلو برخو کې مرستې کړي دي. نوموړي يو ځل بيا په لرو پرتو سيمو کې د ولسونو اړتياو سره سم د پروژو په پلې کېدو، خلکو ته د کاري زمينو برابرولو، د اوبو مديريت، د کرنې، مالدارۍ، روغتيا، پوهنې، حرفوي زده‌‌کړو او ګڼ شمېر نورو برخو کې وړانديزونه وکړل. د اقتصاد رئيس مولوي جان محمد حامد د مؤسساتو مرستې حياتي وبللې او د ولسونو لومړيتوبونو ته په کتلو يې غوښتنه وکړه ترڅو خپلو مرستو ته لا نوره پراختيا ورکړي. هغه دغه راز د سواد زده‌کړې، راستنو شويو زده‌کوونکو ته د زده‌کړو اسانتياوو او په لرو پرتو سيمو کې د ښوونځيو ودانيو جوړولو او تجهيز وړانديزونه وکړل. د ننګرهار صنعت او سوداګرۍ استازي د صنعتي پارک سړکونو جوړولو او د برښنا پروژو په تطبیق، د کرنې خونې مسوول حاجي اجمل رحماني د سړو خونو او نندارتون لپاره د ودانۍ جوړولو او د کرنې رياست نماينده د جنغوزيو ټولولو لپاره د مسلکي وسايلو غوښتنې وکړې. دغه راز د کليوپراختيا، سينديزې حوزې، اطلاعاتو فرهنګ او ننګرهار ګمرک مسوولينو په لرو پرتو سيمو کې د اړتياوو، د ځمکې لاندې اوبو کنترول، په فريلانس برخه کې د ځوانانو روزنې او يو شمېر نورو اقتصادي او پرمختيايي برخو کې خپل نظرونه او وړانديزونه شريک کړل. د مؤسساتو په استازيتوب ډاکتر ايميل نړيوال د ولایت مقام او اړونده ادارو له مسوولينو مننه وکړه چې دوی سره ښه همکاري او همغږي لري. نوموړي ډاډ څرګند کړي چې بحث شوي ستونزې او وړانديزونه به اړونده مؤسسات خپلو مرکزي دفترونو سره شریک او د امکاناتو له مخې به همکارۍ ته دوام ورکړل شي. ننګرهار رسنيو دفتر

۲۰/۱/۱۴۴۸ ننګرهار کې تېر کال له ۵۵ زره جريبه څخه زياته ځمکه له غصب خلاصه شوې ده د ننګرهار ولایت مقام د حقوقي او امنيتي چارو کارپوه حافظ عبدالصمد سعيد وايي چې تېر کال په دې ولايت کې ۵۵ زره او ۳۳ جريبه ځمکه له غصب خلاصه شوې ده. نوموړی وايي چې په ياده موده کې ۴۸۰۰ جريبه او ۱۸ بسوې ځمکه بررسي شوې چې له جملې يې ۲۵۸۹ جريبه او ۱۸ بسوې ځمکه امارتي تثبيت شوې ده. د تثبيت شوې ځمکې په اړه د غصب مخنيوي تخنيکي پلاوي مرکزي کميسيون ته معلومات ورکړي چې د اسنادو او نافذه قوانينو په رڼا کې به يې په هکله لازمه پرېکړه وشي. ننګرهار رسنيو دفتر

۲۰/۱/۱۴۴۸ د ختیځ زون د اوبو رسولو ریاست له یونیسف سره د همکاریو پر پراختیا خبرې وکړې د ختیځ زون د ښاري اوبو رسولو او د فاضلابو تنظيم رئيس مولوي يارمحمد محمدي د یونیسف استازو سره په کتنه کې خلکو ته د پاکو اوبو رسولو، د فاضلابو د سیستمونو د تنظیم او په دې برخه کې د شته ننګونو او فرصتونو په اړه خبرې وکړې. نوموړي د خپلو روانو فعالیتونو او راتلونکو پلانونو په اړه معلومات وړاندې کړل او د یونیسف د تخنیکي او مالي همکاریو غوښتنه یې وکړه. د يونيسف مسوولينو د پاکو اوبو د پروژو ملاتړ په برخه کې د همکاريو د دوام ډاډ ورکړ. ننګرهار رسنيو دفتر

۲۰/۱/۱۴۴۸ ننګرهار کې بزګرانو سره د تخمونو او وسايلو مرسته وشو د ننګرهار د اقتصاد ریاست په هڅو، د کرنې رياست تر چتر لاندې، د کوارډيډ په مالي او د RRAA په تخنيکي همکارۍ د کوټ او نازیانو ولسوالیو ۱۰۰ بزګرانو ته د هایبرډ غنمو اصلاح شوي تخمونه، کیمیاوي سرې او لومړني کرنیز وسایل ووېشل شول. د یادې مرستې موخه د بزګرانو ملاتړ، د کرنیزو حاصلاتو زیاتوالی، د خوړو خوندیتوب او د کلیوالو کورنیو د اقتصادي وضعیت ښه‌ والی دی. ننګرهار رسنيو دفتر

۲۰/۱/۱۴۴۸ د ننګرهار مدرسو کې څلور‌نيم مياشتنۍ ازموينې پيليږي د ننګرهار مرکز جلال‌اباد ښار او ۲۲ ولسواليو په مدراسو کې به د چنګاښ میاشتې په ۲۰مه نېټه څلور نيم مياشتنۍ ازموينې پيل شي. د پوهنې رئیس شيخ محمد شريف حليمي د يادو مدرسو استادانو سره ليدلي او ورته يې سپارښتنه کړې چې د ازموينې شفافيت او معيار ته لازمه پاملرنه وکړي. ننګرهار رسنيو دفتر

۲۰/۱/۱۴۴۸ ننګرهار کې سږ کال د ۱۴۰ مټریک ټنه جلغوزیو د تولید اټکل شوی د ننګرهار د کرنې، اوبولګولو او مالدارۍ ریاست وایي، د روان کال په ترڅ کې به د دې ولایت د طبیعي ځنګلونو څخه شاوخوا ۱۴۰ مټریک ټنه خالص جلغوزي ترلاسه شي، چې د تېر کال په پرتله د حاصلاتو د پام وړ زیاتوالی ښيي. د حاصلاتو زیاتوالی غوره مدیریت، د مسلکي کارګرو روزنه او د ځنګلونو ښه ساتنه بلل شوې ده. د جلغوزیو طبیعي ځنګلونه د حصارک، شیرزادو، خوږیاڼو، پچیراګام، هسکې مېنې او د سپین غر ولسوالیو په نږدې ۱۱ زره او ۹۱۰ هکټاره ځمکه کې شتون لري. ننګرهار رسنيو دفتر

۲۰/۱/۱۴۴۸ د ننګرهار والي سره د غصب مخنيوي تخنيکي پلاوي د همغږۍ ناسته وکړه د ننګرهار والي حاجي ملا محمد نعيم اخند سره د غصب مخنيوي تخنيکي پلاوي د همغږۍ په ناسته کې د غصب شويو ځمکو راپور شريک کړ او د يو شمېر ملکيتونو په اړه يې هدايات ترلاسه کړل. نوموړي د ياد کميسيون د ترسره کړيو اجرااتو مننه او سپارښتنه وکړه چې د مرکزي کمیسيون سره په همغږۍ اصولو سره سم په اړونده چارو کې اقدامات تر سره کړي. د ننګرهار والي دغه راز د غصب مخنيوي، د عامه شتمنيو خونديتوب، ولس سره د ښه چلند او په اړونده نورو برخو کې لازمې سپارښتنې وکړې. ننګرهار رسنيو دفتر

۱۹/۱/۱۴۴۸ ننګرهار کې د روزنتونونو زده کوونکو سره د روغتيايي کيټونو مرسته وشوه د ننګرهار کار او ټولنيزو چارو رياست اړوند د امام بخاري او د نجونو روزنتونونو ۲۵۰ زده کوونکو سره د HHRD مؤسسې له لوري د روغتيايي کيټونومرسته وشه. د يادې مرستې د وېش پر مهال د کار او ټولنيزو چارو رئیس مولوي مجيب‌الله عمر د يادې مؤسسې له همکارۍ مننه وکړه همدا راز يې زده کوونکو ته د روغتيا خونديتوب په موخه د خپل ځان او چاپيريال د پاک ساتنې سپارښتنې وکړې. ننګرهار رسنيو دفتر

۱۹/۱/۱۴۴۸ ننګرهار کې د طبيعي پېښو ۶۰۰ زيانمو کورنيو سره نغدي مرسته کيږي د ننګرهار اقتصاد رياست په هڅو د پېښو پر وړاندې د چمتووالي رياست تر چتر لاندې او د SWISS RELIEF مؤسسې له لوري په ۲۲ ولسواليو کې د طبيعي پېښو له امله ۶۰۰ زيانمنو کورنيو سره نغدي مرسته کيږي. د اقتصاد رئيس مولوي جان محمد حامد وايي چې هرې کورنۍ ته به ۷۰ امريکايي ډالر ورکړل شي. نوموړي پر نورو مرستندويه ادارو هم غږ وکړ چې مستحقو کورنيو سره اړينې مرستې وکړي. ننګرهار رسنيو دفتر