አልፋና ዖሜጋ የንጽጽርና የትምህርት መገኛ አደባባይ (አዖተ)

🟢🟡🔴 መስከረም 29 | #ቅድስት_አርሴማ #ከእመምኔቷ_ከአጋታ እና ሌሎች ደናግላን ጋር በሰማዕትነት ዐረፈች፤ ●  #ቅዱስ_ዮሐንስ_ነባቤ_መለኮት (ወንጌላዊው) እንደ ንስር መጥቆ "ቀዳሚሁ ቃል..በመጀመርያው ቃል ነበር" (ዮሐ. ፩፥፩) ብሎ ወንጌሉን የጻፈበት ዕለት ነው። የቅድስት #አርሴማ እናት አትናስያ ትባላለች። ልጅ በማጣት ለረጅም ዘመን ታዝን ታለቅስ ነበር። በኋላም እግዚአብሔር ልመናዋን ሰማትና ይህችን ክብርት ቅድስት ልጅንም ሰጣት። ቅድስት አርሴማ ጥር 6 ተወለደች። 15 ዓመት ሲሆናት ሊያጋቡአት አሰቡ። እርሷ ግን ይህን አልወደደችምና በደናግል ገዳም ገብታ በተጋድሎ መኖር ጀመረች። ከዚህ በኋላ እንዲህ ሆነ፦ ከሃዲው ንጉሥ ዲዮቅልጥያኖስ ሊያገባት ወደደ። ቅድስት አርሴማ ግን ከደናግሉ ጋር ሸሽታ ወደ አርማንያ ሄደች። በዚያም በበርሃ ለጥቂት ቀናት ተቀመጠች። በኋላ ላይ ድርጣድስ የሚባል አገር ገዢ በበርሃ እንደሚኖሩ ሰማ። ወታደሮችንም ልኮ አስመጣቸው። የቅድስት አርሴማን መልክ በተመለከተ ጊዜ ፈዞ ደንዝዞ ቀረ። የፊቷ ውበት እጹብ ድንቅ፤ ግርማዋ የሚያስደነግጥ ልብ የሚያርድ ነበርና። ስለዚህም ሊያሰቃያት አልደፈረም። በእንክብካቤ በሰገነት ላይ አኖራት እንጂ። ሌሎቹን ግን ለጣዖት እንዲሰግዱ ገረፋቸው። ቅድስት አርሴማ እኔንም አሰቃዩኝ እያለች አምርራ ታለቀስ ነበር። ድርጣድስ ብዙ ጊዜ ሊሸነግላት ሞከረ። እርሷ ግን ትዘልፈው ጣኦታቱንም ትረግም ነበር። እርሷ ጸንታ ደናግሉን ታጸና ነበር። ትመክራቸው ታረጋጋቸው ነበር። ድርጣድስ ሽንገላው እንደማያዋጣው በአወቀ ጊዜ ማሰቃየት ጀመረ። በመጨረሻም ከብዙ ስቃይ በኋላ መስከረም 29 ቀን አንገቷን ቆረጣት ከእርሷ ጋር 27 ሰማዕታት አብረው ተሰይፈዋል። t.me/Ewnet1Nat