Eliyah Mahmoud

የሰሞኑ የኬጂ ግራጁዌሽን .. መቼም ቀን ሄዶ ቀን ሲተካ የማናየው የማንሰማው ጉድ የለም፡፡ ድሮ ድሮ አንድ ተማሪ ኮሌጅ ወይም ዩኒቨርሲቲ ገብቶ ሲጨርስ ቤተሰቦቹ ደስታቻውን አጋፋሪ ጠርተው ድግስ በማብላት ያከብሩ ነበር፡፡ የቀድሞው ግራጁዌሽን ድግስ በትክክልም የኾኑ ዕንቅልፍ የታጣባቸው አድካሚ የሕይወት ምዕራፎች ታልፈው፣ ከዩኒቨርሲቲ የካምፕ ሕይወት ወደ ቀጣይና እረፍትም ወዳለበት የተሻለ ምዕራፍ መሸጋገሪያ ድልድይ ስለነበር፣በትክክለኛ ቦታው የሚደረግ ሷደቃ ነበር፡፡ ፊደል እየቆጠረና በመሐከልም እየተኛ ከኬጂ ወደ ክላስ የተላለፈን አንድ ተማሪ ምናልባት የተሻለ ንቃት ኖሮት ትምሕርቱን እንዲቀጥል ለማድረግ መጠነኛ የቤት ውስጥ መሰናዶ ማድረጉና በተቀረው ገንዘብ ደግሞ በዙሪያችን ላሉ ድሆች ምጽዋት ማድረጉ ተመረቀ ላልነው ሕጻን ትልቅ ማስታወሻ አዘል ትምህርት ይኾን ነበር፡፡ በተቃራኒው ግን የመቶ ሺህ ብሮች ስጦታና ድንኳን ተጥሎ፣ አሞራ የሚያወርድ ድል ያለ ድግስ ተደግሶ፤ድግሱ አልበቃ ብሎ በሙሽራ ልኬት ከሽንጠ ረዥም ሊሞዚን ውስጥ ጨቅላው አንገቱን አውጥቶ ዕጁን እያወዛወዘ ከተማ ላይ ሽር ብትን ሲል ማየት፣ ጉዳዩ የጉራና የታይታ ጥግና ጠርዝ ካልተባለ በቀር ምንም ሊባል አይችልም፡፡ እንዲያው እንዴት እንዴት ብንለካካ ነው ጃል በዚህ ልክ ገንዘብ ሰበሰብኹ ያለ ኹሉ ነጋሪት እየጎሰመ “በሃይ ሎጋ ሆ”፣ በክላክስና “በዓልምሽ ዛሬ ነው ዛሬ” የልጁን ፊደል ቆጠራ እንደ ሰርጋና ምላሽ የሚያከብረው? ገና ጎዞውን “ሀ” ብሎ ላልጀመረ ጨቅላ በዚሕ ልክ ያለንን ዕወቁልን በሚመስል መልኩ የሐብት ብክነት ሲፈጸም መንግስት ዝም ሊል አይገባውም፤ ይልቁን ብዙኃኑን ከርቸሌ ለማስገባት አጓጉል ሕግ እንዳረቀቁ ኹሉ ለዚሕም ብልግና የኾነ ሕግ ሊያበጁለት ይገባል፡፡ በዚሕ ሚሊዮኖች በቀን አንዴ መቀመስ እንኳ ተረት በኾነባቸው ሐገር ውስጥ ነገ ለኛ ይኹን አይኹን ጨርሶ ዕርግጣኛ ሳንኾን በቀቢጸ ተስፋ ብቻ እየኖርን ባለንበት ግልጽ ተጨባጭ እነ አባ ጉርምርሜ ገንዘባቸውን ሰፍተው መለበስ ከጀመሩ፣እንግዲያውስ ሳናየው ቀርተን እንጂ ደጃል ከደጃፋችን ቆሟል!!! ወዳጄ ኹላችንም በዘጠኝ ወር ተወለድን፤ከኛ መካካል አንድስ እንኳ በዘጠኝ ዓመት የተወለደ የለም፡፡ ኹላችንም ሰብዓዊ ስጋ የለበስን በተፈጥሮ ሕግ የምንዳኝ፣ ጅማሮአችን ምንም የነበረ መጨረሻችንም ትቢያ ኾኖ እስከ ትንሳኤ የሚቆይ እንጂ ከኛ መካከል በሰው አምሳል የተከሰተ መስሎ የመጣ መልዓክ የለም፡፡ ታዲያ ወዳጄ ይሕ እጅግ ቅጥ ያጣ ጎፈሬ ማበጠርና አጓጉል ቀረርቶ በመካከላችን ሐብት በቅጡ እየተሸከረከረ እንዳልኾነ፣ኹላችንም እኩል ተጠቃሚዎች እንዳልኾንና ጥቂቶች በሚሊዮኖች ተሰፍረው በኛ ላብ እየወዙ ያሉበት ዕውነታ ላይ እንደ ደረስን ያሳያል፡፡ እነ አባጉርምርሜ ለሰከሩት ድሃው የሚንገዳገድበት ዕውነታ ላይ እንዳለን አኹን በደንብ የገባን ይመስለኛል፡፡ በቀጣይ ሌላ ሰማያዊ ተዓምር እስካልመጣ ድረስ የነርሱ ስካር ከፍ ባለ ቁጥር በየገደሉ እስከ ወዲያኛው ወድቆ የሚያሸልበው ድሃ የትየለሌ እንደሚኾን ግልጽ ነው፡፡ https://t.me/E_M_ahmoud