BUREAU OF FINANCE - ADDIS ABABA CITY ADMINISTRATION - Page

የተሻሻለው የአዲስ አበባ ከተማ አስተዳደር የግዥና ንብረት አስተዳደር አዋጅ ቁጥር 92/2018 ለምን አስፈለገ? የአዋጁ መሻሻል አስፈላጊነት እና ዓላማ የአዲስ አበባ ከተማ አስተዳደር ቀደም ሲል ይገለገልበት የነበረውን የግዥና የንብረት አስተዳደር አዋጅ ቁጥር 17/2002 (ከጥቅምት 30 ቀን 2002 ዓ.ም ጀምሮ ሥራ ላይ የዋለ) እና መመሪያውን በአዲስ መልክ አሻሽሏል። አዲሱ አዋጅ 13 ምዕራፎች እና 83 አንቀፆች ያሉት ሲሆን፣ የቀደመውን አዋጅ ማሻሻል ለምን እንዳስፈለገ እና ዋና ዋና ዓላማዎቹ ምን እንደሆኑ በዝርዝር እንመልከት፦ 1. የአዋጁ መሻሻል ዋና ዋና ምክንያቶች (Necessity) የሕግ ክፍተቶችን መሙላት እና የመልካም አስተዳደር ችግሮችን መቅረፍ፡- ባለፉት ዓመታት በአፈፃፀም ወቅት ያጋጠሙ አሰራር ነክ ችግሮችን በመለየት፣ በዘርፉ ይታዩ የነበሩ የመልካም አስተዳደር ጉድለቶችን ለማስወገድ እና በግዥ ሂደት ውስጥ ግልፅነትና ተጠያቂነትን ሙሉ በሙሉ ለማረጋገጥ። ዘመናዊ የኤሌክትሮኒክ አሰራር (e-Procurement) መዘርጋት፡- የወረቀት አሰራርን በማስቀረት ፈጣን፣ ወጪ ቆጣቢ እና ዘመናዊ የሆነ የኤሌክትሮኒክ የመንግስት ግዥና ንብረት አስተዳደር ስርዓት በህግ ማዕቀፍ እንዲደገፍ ለማድረግ። የሀገር ውስጥ አምራቾችን ማበረታታት፡ በሀገር በቀል የኢኮኖሚ ማሻሻያ ዕቅድ የተቀመጡትን የልማት ግቦች ለማሳካት፣ የሀገር ውስጥ አምራቾች በሕግ ከተፈቀደላቸው የልዩ አስተያየት (Preference) መብት ተጠቃሚ እንዲሆኑ ምቹ ሁኔታን መፍጠር። የልማት ድርጅቶችን በተፈፃሚነት ወሰን ውስጥ ማካተት፡- የከተማ አስተዳደሩ የልማት ድርጅቶች በነበራቸው ነፃነት ምክንያት ይፈጠሩ የነበሩ የቁጥጥር ክፍተቶችን ለማረም፤ የንግድ ተወዳዳሪነታቸው ላይ ተጽዕኖ ሳያሳድር ተገቢውን ቁጥጥርና ተጠያቂነት ማስፈን በመፈለጉ።  2. የማሻሻያው ዋና ዋና ዓላማዎች (Objectives) አሰራርን ከቴክኖሎጂ እድገት ጋር ማጣጣም፡- አዋጁ ወቅታዊ ከሆኑ የቴክኖሎጂ ለውጦች ጋር አብሮ መራመድ እንዲችል የሚያስችሉ ድንጋጌዎችን ማካተት። አገር በቀል ተወዳዳሪዎችን ማጠናከር፡- የሀገር ውስጥ ተወዳዳሪዎችና አምራቾች በመንግሥት ግዥ ላይ ያላቸውን ተሳትፎ በከፍተኛ ደረጃ ማሳደግ። አዋጁን የተሟላ እና ለአፈጻጸም አመቺ ማድረግ፡- ቀደም ሲል በህጉ ያልተካተቱ ነገር ግን በአሰራር አስፈላጊ የነበሩ ተጨማሪ ድንጋጌዎችን በማካተት የአዋጁን አወቃቀር ለአፈፃፀም በሚያመች መልኩ ማስተካከል።  በቀጣይ ክፍል (ክፍል 2)፡ በአዲሱ አዋጅ ስለተካተቱት አዳዲስ መርሆዎች እና የኤሌክትሮኒክ አሰራር ዝርዝር ይዘን እንመልሳለን!