BUREAU OF FINANCE - ADDIS ABABA CITY ADMINISTRATION - Page

"መልካም አስተዳደር የሚጀምረው ከእያንዳንዳችን ስነ-ምግባራዊ ኃላፊነት ነው" አቶ ዘላለም ሀብቴ #################################### ነሐሴ26/ 2018 ዓ.ም ፋይናንስ ቢሮ መልካም አስተዳደር የሚጀምረው ከእያንዳንዱ ሰራተኛና አመራር ግላዊና ሙያዊ ስነ-ምግባራዊ ኃላፊነት እንደሆነ የአዲስ አበባ ከተማ አስተዳደር ፋይናንስ ቢሮ የስነ-ምግባርና ፀረ-ሙስና ዳይሬክቶሬት ዳይሬክተር አቶ ዘላለም ሀብቴ ገለጹ። ዳይሬክተሩ በተቋሙ የስነ-ምግባር፣ የመልካም አስተዳደርና የፀረ-ሙስና አሰራሮችን አስመልክተው ለኮሙኒኬሽን ዳይሬክቶሬት በሰጡት ቃለ-መጠይቅ፣ የስነ-ምግባር መከበር የህዝብን እምነት ለመገንባት፣ ጥራት ያለው አገልግሎት ለማረጋገጥ እና የተቋሙን መልካም ስም ለመጠበቅ ወሳኝ መሆኑን አብራርተዋል። አቶ ዘላለም በመግለጫቸው እንደጠቆሙት፣ ስነ-ምግባር ማለት አንድ ግለሰብ ወይም ተቋም በስራና በዕለት ተዕለት እንቅስቃሴው የሚከተላቸው የሞራል መርሆዎችና የአሰራር ደንቦች ስብስብ ነው። ታማኝነት፣ ቅንነት፣ ፍትሃዊነትና ኃላፊነት የአንድን አካል ትክክለኛ ውሳኔ የመወሰን አቅም እንደሚገነቡ ያብራሩት ዳይሬክተሩ፤ መልካም አስተዳደርን በዘላቂነት ለማስፈን እንደ ግልጽነት፣ ተጠያቂነት፣ የህግ የበላይነት፣ ህዝባዊ ተሳትፎና ውጤታማነት ያሉ መሰረታዊ መርሆዎችን አጠናክሮ መተግበር እንደሚገባ አጽንኦት ሰጥተውበታል። በሌላ በኩል መልካም አስተዳደርን የሚያደናቅፉ እንደ ተቋማዊ ድክመት፣ የበቂ ግልጽነትና ተጠያቂነት ማነስ፣ የሰለጠነ የሰው ኃይል እጥረት፣ ቢሮክራሲያዊ መጓተትና ደካማ የቁጥጥር ስርዓት ያሉ ተግዳሮቶችን የመፍትሔ አቅጣጫዎች አመላክተዋል። እነዚህን ችግሮች ለመቅረፍ ግልጽ የአሰራር ስርዓት መዘርጋት፣ ተከታታይ ስልጠናዎችን መስጠት፣ የቅሬታ አቀራረብ ስርዓትን ማጠናከር፣ የቴክኖሎጂ አጠቃቀምን ማሳደግ እና ተጠያቂነት ያለው አመራር መገንባት እንደሚያስፈልግ አብራርተዋል። በመጨረሻም ዳይሬክተሩ ሙስናና ብልሹ አሰራርን በጋራ መከላከል እንደሚገባ አሳስበው፣ ሙሉ ሰራተኞችና አመራሮች ግልጽነትን፣ ተጠያቂነትንና ታማኝነትን በዕለት ተዕለት ስራቸው ውስጥ በመተግበር የተሻለና ቀልጣፋ አገልግሎት ለህዝቡ ማበርከት እንደሚገባቸው መልእክታቸውን አስተላልፈዋል።