Khit Thit Media

ဖက်ဒရယ်ပြည်ထောင်စုပေါ်ထွန်းလာရေးအတွက် NLD ပါတီနှင် လက်တွဲ၍ အဆုံးတိုင် တွန်းလှန်တိုက်ပွဲ ဝင်သွားကြရန် ကရင်နီ ပြည်ကြားကာအုပ်ချုပ်ရေးကောင်စီနှင့် ချင်းပြည်အစိုးရတို့ တိုက်တွန်း ရန်ကုန်၊ စက်တင်ဘာ ၂၇ ဖက်ဒရယ်ပြည်ထောင်စုပေါ်ထွန်းလာရေးအတွက် NLD ပါတီနှင် လက်တွဲ၍ အဆုံးတိုင် တွန်းလှန်တိုက်ပွဲ ဝင်သွားကြရန် ကရင်နီ ပြည်ကြားကာအုပ်ချုပ်ရေးကောင်စီနှင့် ချင်းပြည်အစိုးရတို့ တိုက်တွန်းလိုက် သည်။ ယနေ့စက်တင်ဘာလ ၂၇ ရက်နေ့တွင် ကျရောက်သော အမျိုးသားဒီမိုကရေစီအဖွဲ့ချုပ် (NLD) တည် ထောင်ခြင်း ၃၈ နှစ်ပြည့် အထိမ်းအမှတ် ပေးပို့သော ဂုဏ်ပြုသဝဏ်လွှာတွင် တိုက်တွန်းထားခြင်းဖြစ် သည်။ အမျိုးသားဒီမိုကရေစီအဖွဲ့ချုပ် (NLD) သည် ၁၉၈၈ ခုနှစ်၊ စက်တင်ဘာလ ၂၇ ရက်နေ့တွင် စတင်တည် ထောင်ခဲ့ပြီးချိန်မှစ၍ ယနေ့အထိ စစ်အာဏာရှင်စနစ်၏ ဖိနှိပ်ချုပ်ချယ်မှု ပုံစံမျိုးစုံကြားမှ ပြည်သူ လူထု ၏ ဒီမိုကရေစီနှင့် လွတ်လပ်မှုအတွက် မဆုတ်မနစ် မားမားမတ်မတ် ရပ်တည်ခဲ့သည့် သမိုင်းဝင် ပါတီ ကြီးတစ်ခု ဖြစ်ကြောင်း ကရင်နီပြည်ကြားကာလအုပ်ချုပ်ရေးကောင်စီကလည်း ပြောဆိုသည်။ ဤသမိုင်းစဉ်တစ်လျှောက် ဒီမိုကရေစီအရေးအတွက် အသက်၊ ခန္ဓာနှင့် လွတ်လပ်မှုများကို စွန့်လွှတ် ပေးဆပ်ခဲ့ကြသည့် အာဇာနည်သူရဲကောင်းများ၊ မတရားဖမ်းဆီး ထိန်းသိမ်းခံထားရသည့် လူထုခေါင်း ဆောင် ဒေါ်အောင်ဆန်းစုကြည် အပါအဝင် ပါတီခေါင်းဆောင်များနှင့် အဖွဲ့ဝင်များ၏ စွန့်လွှတ်ပေးဆပ် မှုများကို လေးနက်စွာ ဦးညွှတ်ဂုဏ်ပြုအပ်ပါကြောင်း သဝဏ်လွှာတွင် ဖော်ပြထားသည်။ NLD သည် ပြည်သူလူထုတစ်ရပ်လုံး၏ ခိုင်မာသည့် ယုံကြည်အားကိုးမှုကို အပြည့်အဝရရှိထားပြီး ပြည် သူ့ ဆန္ဒနှင့်အညီ ဒီမိုကရေစီစံနှုန်းများ စိုက်ထူနိုင်ခြင်း၊ တရားဥပဒေစိုးမိုးရေးနှင့် လူထု၏ လူမှုစီးပွား ဘဝကို မြှင့်တင်ပေးနိုင်ခြင်းတို့မှာ ပါတီ၏ ထင်ရှားသော အားသာချက်များ ဖြစ်သည်ဟု ဆိုသည်။ အထူးသဖြင့် စစ်အာဏာရှင်အဆက်ဆက်၏ မတရားမှုကို ရဲရင့်ပြတ်သားစွာ ယှဉ်ပြိုင်တွန်းလှန်နိုင်သည့် စည်းလုံးညီညွတ်သော ပြည်သူ့အင်အားကို စုစည်းနိုင်ခြင်းနှင့် သမိုင်းဝင်အောင်ပွဲများကို ပြည်သူနှင့်အတူ လက်တွဲဖန်တီးနိုင်ခဲ့ခြင်းတို့မှာ စံနမူနာယူဖွယ် အားကောင်းချက်များ ဖြစ်ကြကြောင်း အသိပေးထား သည်။ ယနေ့ကာလ စစ်အာဏာရှင်စနစ် အပြီးတိုင်ချုပ်ငြိမ်းရေးနှင့် ဖက်ဒရယ်ဒီမိုကရေစီ ပြည်ထောင်စုသစ် တည်ဆောက်ရေး တော်လှန်ရေးခရီးတွင် တိုင်းရင်းသား တော်လှန်ရေးအင်အားစုများနှင့် NLD တို့အ ကြား အပြန်အလှန် လေးစားမှု၊ တန်းတူညီမျှမှုတို့ဖြင့် ပိုမိုခိုင်မာစွာ လက်တွဲဆောင်ရွက်ရန် လိုအပ် ကြောင်း ဆက်လက် အသိပေးထားသည်။ သို့ဖြစ်ပါ၍ တိုင်းရင်းသားပြည်သူများ၏ ကိုယ်ပိုင်ပြဋ္ဌာန်းခွင့်နှင့် ဖက်ဒရယ်မူများကို အပြည့်အဝ အသိ အမှတ်ပြုကာ စစ်အာဏာရှင်စနစ် အမြစ်ဖြတ်ရေးနှင့် ငြိမ်းချမ်းသာယာသော ဖက်ဒရယ်ဒီမိုကရေစီ ပြည် ထောင်စုကြီး ပေါ်ထွန်းလာရေးအတွက် တိုင်းရင်းသား အင်အားစု အသီးသီးနှင့်အတူ ဟန်ချက်ညီညီ ဆက်လက် ပူးပေါင်းပါဝင် ဆောင်ရွက်သွားပါရန် ကရင်နီပြည် ကြားကာလအုပ်ချုပ်ရေးကောင်စီက တိုက်တွန်းထားသည်။ အလားတူ အမျိုးသားဒီမိုးကရေစီအဖွဲ့ချုပ်ပါတီ၏ သမိုင်းစဉ်တလျှောက်တွင် ပါတီဥက္ကဋ္ဌလူထုခေါင်း ဆောင်ဒေါ် အောင်ဆန်း စုကြည်အပါအဝင် ပါတီခေါင်းဆောင်များ၊ အဆင့်ဆင့်သော ပါတီဝင်များ၏ စစ်အာဏာရှင် စနစ်ချုပ်ငြိမ်းရေး၊ မြန်မာ့ဒီမိုကရေစီအရေးအတွက် စွန့်လွှတ်စွန့်စားမှု၊ ပေးဆပ်မှုများ နှင့် ခိုင်မာသည့်နိုင် ငံ ရေး ဦးဆောင်မှုတို့ကြောင့် ၂ဝ၁၂ ခုနှစ်ကြားဖြတ်ရွေးကောက်ပွဲ၊ ၂၀၁၅ ခုနှစ်အထွေ ထွေ ရွေးကောက် ပွဲ၊ ၂၀၂၁ ခုနှစ်အထွေထွေရွေးကောက်ပွဲများတွင် မြန်မာပြည်သူလူထုတစ်ရပ် လုံး၏ ထောက်ခံမှုရ လဒ်ကို အကြွင်းမဲ့ရရှိထားခဲ့သည့်ပါတီကြီးတစ်ရပ်ဖြစ်ကြောင်း ချင်းပြည်(Chinland) အစိုး ရက ပြောဆိုထားသည်။ ၂၀၂၁ ခုနှစ်တွင် အစပြုခဲ့သည့် နွေဦးတော်လှန်ရေးကာလတစ်လျှောက်တွင်လည်း စစ်အာဏာရှင်စနစ် အပြီးသတ်ချုပ်ငြိမ်းရေးနှင့် ဖက်ဒရယ်ပြည်ထောင်စုပေါ်ထွန်းရေအတွက် အမျိုးသား ဒီမိုကရေစီအဖွဲ့ချုပ် ပါတီ ၏ နိုင်ငံရေးဦးဆောင်မှုအခန်းကဏ္ဍကို ချင်းပြည်(Chinland)အစိုးရ အနေဖြင့် လေးစား အသိအ မှတ်ပြုပါကြောင်း အသိပေးထားသည်။ ချင်းပြည်(Chinland)အစိုးရအနေဖြင့်လည်း အာဏာရှင်စနစ်ချုပ်ငြိမ်းရေးနှင့် တိုင်းရင်းသား ပြည်သူအား လုံးမျှော်လင့်တောင့်တနေကြသည့် ဖက်ဒရယ်ပြည်ထောင်စုပေါ်ထွန်းလာရေးအတွက် အမျိုးသားဒီမိုက ရေစီအဖွဲ့ချုပ်ပါတီ၏ နိုင်ငံရေးမူဝါဒများနှင့်ထပ်တူ အတူတကွလက်တွဲ၍ အဆုံးတိုင် တွန်းလှန်တိုက် ပွဲဝင်သွားမည်ဖြစ်ကြောင်း သဝဏ်လွှာပေးပို့ထားသည်။

မင်းလှတွင် တော်လှန်ရေးထောက်ပံ့သည်ဟု စွပ်စွဲကာ ဖမ်းဆီးခဲ့သည့် ကိုဝေဖြိုးကို ရဲစခန်းအပြင် ခေါ်ထုတ်၍ စစ်တပ်က ပစ်သတ်ခဲ့ ရန်ကုန်၊ စက်တင်ဘာ ၂၇ ပဲခူးတိုင်း၊ မင်းလှမြို့နယ်တွင် တော်လှန်ရေးထောက်ပံ့သည်ဟု စွပ်စွဲကာ ဖမ်းဆီးခဲ့သည့် ကိုဝေဖြိုးကို ရဲစခန်းအပြင် ခေါ်ထုတ်၍ အကြမ်းဖက် စစ်တပ်က ပစ်သတ်ခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။ စက်တင်ဘာလ ၁၀ ရက်နေ့မှ စတင်ပြီး မင်းလှမြို့နယ်အတွင်းရှိ စစ်တပ် သတင်းပေးများက တော်လှန်ရေးထောက်ပံ့သည်ဟု စွပ်စွဲကာ အကြမ်းဖက် စစ်တပ်ကို ဖမ်းဆီးခိုင်းသောကြောင့် ပြည်သူ ၁၀ ဦးကျော် ဖမ်းဆီးခံခဲ့ရကြောင်း သိရသည်။ ထိုသို့ ဖမ်းဆီးခံရသူများထဲတွင် မင်းလှမြို့ရှိ ဝေဖြိုး အိမ်ဆောက်ပစ္စည်းဆိုင်ပိုင်ရှင် ကိုဝေဖြိုးလည်း ပါဝင်ခဲ့ပြီး ရန်ကုန်မြို့ရှိ စစ်ကြောရေးကို ပို့ဆောင်ခံခဲ့ရကြောင်း၊ ထိုစစ်ကြောရေးမှ စက်တင်ဘာလ ၂၀ ရက်နေ့တွင် မင်းလှမြို့နယ် ရဲစခန်းသို့ ပြန်လည်ပို့ဆောင်ခံခဲ့ရကြောင်း သိရသည်။ ထိုသို့ ပို့ဆောင်ခံရပြီးနောက် စက်တင်ဘာလ ၂၀ ရက်နေ့ ညပိုင်းတွင် အကြမ်းဖက် စစ်တပ်က ရဲစခန်းမှ လာရောက်ခေါ်ဆောင်သွားပြီးနောက် ပစ်သတ်ခဲ့ခြင်းဖြစ်ကြောင်း၊ ယင်းသို့ သတ်ဖြတ်ခဲ့သည်ကို စစ်တပ်က လိမ်လည်ပြီး ကိုဝေဖြိုးကို စခန်းမှ ခေါ်ဆောင်လာစဉ် PDF တပ်များနှင့် တိုက်ပွဲဖြစ်ပြီး PDF ဘက်က ပစ်ခတ်မှုကြောင့် သေဆုံးခဲ့သည်ဟု မိသားစုဝင်များကို စစ်တပ်အရာရှိများက ပြောဆိုခဲ့သည်ဟု သိရသည်။ "စစ်ခွေးတွေက တိုက်ပွဲအတွင်းမှာ PDF ပစ်တဲ့ကျည်ထိပြီးသေတာလို့ လိမ်ပြောတယ်။ တကယ်က အချုပ်ခန်းထဲက ခေါ်ထုတ်ပြီးတော့ တောင်ပေါ်မှာ စစ်ဆေးပြီး ပစ်သတ်လိုက်တာ ကျည်ဆန်တွေ တစ်ကိုယ်လုံးမှန်ပြီး သေတာလဲအမှန်ပဲ နာရေးချချိန်ထိ သွေးမတိတ်ဘူးလို့ သိရတယ်" ဟု ဒေသသတင်းရင်းမြစ်က ပြောဆိုသည်။ ထို့ပြင် အကြမ်းဖက် စစ်တပ်က စွပ်စွဲဖမ်းဆီးမှုတွင် မင်းလှမြို့ စာဖတ်ရုံလမ်းမှ အမျိုးသမီး ၁ ဦး ၊ စက်ကြီးတန်းလမ်းမှ အမျိုးသမီး ၁ ဦး၊ လမ်းမတော်လမ်းမှ အမျိုးသမီး ၁ ဦး၊ သရက်တပင်တာဆုံမှ အမျိုးသား ၁ ဦးနှင့် စစ်ကွင်းမြို့ဘက်မှ အမျိုးသမီး ၁ ဦး အပါအဝင် ပြည်သူ ၁၀ ဦးထက်မနည်းရှိခဲ့ပြီး မင်းလှမြို့စစ်ကြောရေးတွင်လည်း အကြမ်းဖက် စစ်တပ်က ပြင်းပြင်းထန်ထန် နှိပ်စက် စစ်ဆေးနေပြီး အသက်အန္တရာယ် စိုးရိမ်ရသည့် အခြေအနေတွင်ရှိနေကြောင်း သိရသည်။ ဆက်လက်၍လည်း အကြမ်းဖက် စစ်တပ်က ပြည်သူ ၁၅ ဦးခန့်ကိုလည်း တော်လှန်ရေးထောက်ပံ့သည်ဟု စွပ်စွဲကာ ထပ်မံဖမ်းဆီးရန် ပြုလုပ်နေသောကြောင့် ပြည်သူများ စိုးရိမ်နေကြကြောင်း သိရှိရသည်။

ကန်ပက်လက်မြို့နယ်နှင့် ရှားတောမြို့နယ်တို့တွင် စစ်ကောင်စီတပ်က လေကြောင်းဖြင့် ဗုံးကျဲတိုက်ခိုက် ရန်ကုန်၊ စက်တင်ဘာ ၂၇ ချင်းပြည်နယ်၊ ကန်ပက်လက်မြို့နယ်အတွင်းရှိ ကျေးရွာတစ်ရွာတစ်ရွာကို စစ်ကောင်စီတပ်က လေ ကြောင်းဖြင့် ၂ ကြိမ် ဗုံးကျဲတိုက်ခိုက်ခဲ့ကြောင်း ကန်ပက်လက်မြို့နယ်၊ လူသားစာနာဘေးစီမံဌာနမှ တာဝန်ရှိသူက ရန်ကုန်ခေတ်သစ်သတင်း ဌာနထံသို့ ပြောကြားသည်။ ယနေ့ စက်တင်ဘာလ ၂၇ ရက်နေ့ မွန်းလွဲပိုင်းက ကန်ပက်လက်မြို့နယ်အတွင်းရှိ ကျေးရွာတစ်ရွာကို စစ် ကောင်စီတပ်က တိုက်ပွဲဖြစ်ပွားခြင်းမရှိပဲ လေကြောင်းဖြင့် ဗုံးကျဲတိုက်ခိုက်ခဲ့ကြောင်း၊ ယင်းကျေးရွာ သည် ယမန်နေ့ စက်တင်ဘာလ ၂၆ ရက် မွန်းတည့် ၁၂ နာရီ မိနစ် ၂၀ ခန့်ကလည်း စစ်ကောင်စီတပ်က လေကြောင်းဖြင့် ၂ ကြိမ် ဗုံးကျဲတိုက်ခိုက်ခဲ့ရာ ပြည်သူ တစ်ဦး ထိမှန်ဒဏ်ရာရရှိပြီး နေအိမ် ၅ လုံးထက်မ နည်းထိခိုက်ပျက်စီးခဲ့ကြောင်း သိရသည်။ “လောင်ရှည်ဘက်ကနေလာတဲ့စစ်ကြောင်းက အဲ့ရွာဘက်ကို လာနေလို့ လမ်းကြောင်း ကြိုရှင်းတဲ့ သ ဘောနဲ့ ပစ်တယ်ထင်တာပဲ။ တိုက်ပွဲမဖြစ်ဘူး။ ရွာသူ၊ ရွာသားတွေအကုန်ထွက်ပြေးနေကြရလို့ ထိခိုက် ပျက်စီးမှု စာရင်းကတော့ မရနိုင်ဘူး” ဟု ကန်ပက်လက်မြို့နယ်၊ လူသားစာနာဘေးစီမံဌာနမှ တာဝန်ရှိ သူက ရန်ကုန်ခေတ်သစ်သတင်း ဌာနထံသို့ ပြောကြားသည်။ ကန်ပက်လက်၊ ကျင်ဒွေးလမ်းကြောင်းတလျှောက်ရှိ ကျေးရွာများတွင်နေထိုင်ကြသော မိဘပြည်သူများ အနေဖြင့် စစ်ကောင်စီ၏ စစ်ကြောင်းသတင်း နားစွင့်ကာ စစ်ကြောင်းနှင့်ဝေးမည့်နေရာအထိ ကြိုတင် ရှောင်ရှားနေထိုင်ကြပါရန်နှင့် လေကြောင်းတိုက်ခိုက်မှုရန်ကိုလည်း သတိထားကာ အထူးဂရုစိုက်နေထိုင် ပေးကြပါရန် ကန်ပက်လက်မြို့နယ်၊ လူသားစာနာဘေးစီမံဌာနက တိုက်တွန်းထားသည်။ အလားတူ ကရင်နီပြည်နယ်၊ ရှားတောမြို့နယ်ရှိ အရှေ့ဘက်ခြမ်း ကျေးရွာတစ်ရွာကို အကြမ်းဖက်စစ် တပ်က လေယာဉ်ဖြင့် ၃ ကြိမ်တိုင်တိုင် ဗုံးကျဲတိုက်ခိုက်ခဲ့ကြောင်း ဒေသခံပြည်သူများက ရန်ကုန်ခေတ် သစ် သတင်းဌာနသို့ ပြောဆိုသည်။ စက်တင်ဘာလ ၂၆ ရက် ည ၇ နာရီဝန်းကျင်ခန့်က ရှားတောမြို့နယ် ရှေ့ခြမ်းရှိ ကျေးရွာတစ်ရွာကို အ ကြမ်းဖက်စစ်တပ်က လေယာဉ်ဖြင့် ၃ ကြိမ်တိုင်တိုင် လာရောက်၍ ဗုံး ၄ လုံး ကျဲချတိုက်ခိုက်ခဲ့ရာ ပြည် သူ များနှင့် နေအိမ်များ ထိခိုက်ပျက်စီးမှုမရှိကြောင်း သိရသည်။ "စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ ဗုံးကျဲတိုက်ခိုက်ခဲ့တာပါ။ ပြည်သူတွေ ထိခိုက်ဒဏ်ရာရ တာနဲ့ နေအိမ် ပျက်စီးတာမျိုးတော့ မရှိပါဘူး။ ၃ ကြိမ်တိုင်တိုင် ဗုံး ၄ လုံး ကျဲချသွား တာပါ" ဟု ဒေသ နေပြည်သူတစ်ဦးက ပြောဆိုသည်။ အလားတူ လွန်ခဲ့သော ဇူလိုင်လ ၁၄ ရက်နေ့ကလည်း ရှားတောမြို့နယ်၊ ပါလောင်းကျေးရွာရှိ စစ်ဘေး ရှောင်ပြည်သူများ နေထိုင်ရာနေရာကို စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ ဂျက်ဖိုက်တာဖြင့် ဗုံး ၆ လုံး ကျဲချတိုက်ခိုက်ခဲ့ရာ အသက် ၅၀ အရွယ် အမျိုးသားတစ်ဦး သေဆုံးခဲ့ပြီး နေအိမ် ၄ လုံးနှင့် မော် တော်ယာဉ် ၁ စီး ထိခိုက်ပျက်စီးခဲ့ကြောင်း သိရှိရသည်။ ဓာတ်ပုံ - စစ်ကိုင်းတိုင်းအတွင်းရှိ ကျေးရွာတစ်ရွာကို စစ်တပ်က ညအချိန် လေကြောင်း တိုက်ခိုက်ခဲ့သောကြောင့် ထိခိုက်ပျက်စီးမှုများ (ပုံအဟောင်းဖြစ်သည်)

လောင်းလုံးတွင် ရေကြီးမြေပြိုကျမှုကြောင့် ပျောက်ဆုံးနေသူ ပြည်သူအရေအတွက် ဆယ်ချီရှိလာပြီး သေဆုံးသူများ၏ ရုပ်အလောင်းများကို ဆက်လက်ရှာဖွေနေ ရန်ကုန်၊ စက်တင်ဘာ ၂၇ တနင်္သာရီတိုင်း၊ လောင်းလုံးမြို့နယ်တွင် မိုးသည်းထန်စွာရွာသွန်းပြီး တောင်ကျရေများ အရှိန်ဖြင့်ဝင်ရောက်လာခြင်း၊ မြေပြိုကျမှုများ ဖြစ်ပွားခြင်းတို့ကြောင့် ပြည်သူ ၃၀ နီးပါး ပျောက်ဆုံးနေပြီး သေဆုံးသူများ၏ ရုပ်အလောင်းများကို ကယ်ဆယ်ရေးအဖွဲ့များနှင့် ဒေသခံများက ဆက်လက်ရှာဖွေနေကြောင်း ဒေသပြည်သူများနှင့်ပရဟိတကယ်ဆယ်ရေးအဖွဲ့တချို့ထံမှ သိရှိရသည်။ လောင်းလုံးမြို့နယ်အတွင်း စက်တင်ဘာ ၂၆ ရက်မှစတင်၍ မိုးအဆက်မပြတ် သည်းထန်စွာရွာသွန်းခဲ့ပြီး တောင်ကျရေများ အရှိန်ပြင်းစွာ စီးဆင်းဝင်ရောက်လာသဖြင့် ကျေးရွာအများအပြားတွင် ရေကြီးရေလျှံမှုများ ဖြစ်ပွားခဲ့သည်။ ထို့အပြင် မိုးသည်းထန်မှုကြောင့် တောင်စောင်းများနှင့် မြေသားများ ပြိုကျမှုများ ဆက်တိုက်ဖြစ်ပွားခဲ့ပြီး နေအိမ်များနှင့် အဆောက်အအုံများ ပျက်စီးကာ လူများလည်း မြေပြိုမှုအတွင်း ပိတ်မိပျောက်ဆုံးခဲ့ကြောင်း သိရသည်။ လက်ရှိအချိန်အထိ လောင်းလုံးမြို့နယ်အတွင်း ပျောက်ဆုံးနေသူ ၃၀ နီးပါးရှိလာပြီး သေဆုံးသူ ၅ ဦး၏ ရုပ်အလောင်းများကို တွေ့ရှိထားကြောင်း ဒေသခံများက ပြောသည်။ မင်းရပ်ကျေးရွာတွင်လည်း ကယ်ဆယ်ရေးအဖွဲ့များက ရှာဖွေကယ်ဆယ်ရေးလုပ်ငန်းများ ဆောင်ရွက်နေစဉ် အမျိုးသမီးတစ်ဦး၏ ရုပ်အလောင်းကို တွေ့ရှိခဲ့ကြောင်း သိရသည်။ အလားတူ ကဒတ်ငယ်ကျေးရွာတွင်လည်း မြေပြိုကျမှုကြောင့် သေဆုံးခဲ့သူ ၅ ဦး၏ ရုပ်အလောင်းများကို တွေ့ရှိထားပြီး သေဆုံးသူများထဲတွင် ကလေးငယ်တစ်ဦးလည်း ပါဝင်ကြောင်း ဒေသခံများထံမှ သိရသည်။ ကဒတ်ငယ်ကျေးရွာတွင် တောင်ကျရေနှင့် မြေပြိုမှုများကြောင့် အခြေအနေဆိုးရွားနေပြီး ကဒတ်ငယ်ထိန်တောင် ဘုန်းကြီးကျောင်းရှိ ဆွမ်းစားဆောင်မှာ ကျောင်းဆောင်နှင့်အတူ မျောပါသွားခဲ့ကြောင်း သိရသည်။ ယင်းဖြစ်စဉ်အတွင်း ရဟန်း ၂ ပါးနှင့် ကိုရင် ၁ ပါးအပါအဝင် လူ ၁၀ ဦးခန့် မျောပါပျောက်ဆုံးနေကြောင်း ဒေသခံများက ပြောသည်။ ဒေသခံတစ်ဦးက “အခုသိရတာက ကဒတ်ငယ်ရွာတစ်ခုတည်းကို ပျောက်ဆုံးနေတာ ၁၀ ဦးလောက်ရှိတယ်။ ရုပ်အလောင်း ၅ လောင်းလည်း တွေ့ထားတယ်လို့ ပြောတယ်။ တောင်ကျရေကော မြေပြိုတာကော ရွာက တော် တော်လေးအထိနာသွားတာ။ အဲ့ရွာကို ကယ်ဆယ်ရေးတွေ သွားနေကြပေမယ့် လမ်းက အကုန်ပိတ်ဆို့သွားတာဆိုတော့ တော်တော်လေး ခက်ခက်ခဲခဲကို သွားရမယ့် အခြေအနေပဲ။ ကယ်ဆယ်ရေးအဖွဲ့တွေလည်း လာနေကြပြီလို့ ပြောပါတယ်” ဟု ပြောသည်။ ထို့အပြင် လောင်းလုံးမြို့နှင့် ထိစပ်နေသည့် သဗျာကျေးရွာတွင်လည်း တောင်ပြိုကျမှုကြောင့် မြေးအဖိုး ၃ ဦး မြေပိသေဆုံးခဲ့ကြောင်း ဒေသခံများက ပြောဆိုထားသော်လည်း လက်ရှိအချိန်အထိ ရုပ်အလောင်းများကို ပြန်လည်ရှာဖွေတွေ့ရှိနိုင်ခြင်း မရှိသေးဘဲ ရှာဖွေရေးလုပ်ငန်းများ ဆက်လက်လုပ်ဆောင်နေကြောင်း သိရသည်။ မိုးသည်းထန်စွာ ရွာသွန်းမှုနှင့် တောင်ကျရေများကြောင့် လောင်းလုံးမြို့နယ်အတွင်းရှိ စစ်ပြဲ၊ ကညုံကျွန်း၊ ကျောက်နီမော်၊ ကဒတ် အပါအဝင် ကျေးရွာ ၂၀ ခန့်တွင် ရေကြီးရေလျှံမှုများ ဖြစ်ပွားနေပြီး ထောင်နှင့်ချီသော ပြည်သူများ ရေဘေးအတွင်း ပိတ်မိနေကြောင်း သိရသည်။ ရေကြီးမှုနှင့် မြေပြိုမှုများကြောင့် ကျေးရွာများသို့ ဆက်သွယ်သွားလာသည့် လမ်းပိုင်းများလည်း ပျက်စီးပိတ်ဆို့နေသဖြင့် ကယ်ဆယ်ရေးအဖွဲ့များအနေဖြင့် ရေဘေးသင့်ဒေသများသို့ ဝင်ရောက်ရန် အခက်အခဲများ ရှိနေကြောင်း ဒေသခံများက ပြောသည်။ လက်ရှိတွင် ရေဘေးသင့်ပြည်သူများအတွက် သောက်သုံးရေ၊ စားနပ်ရိက္ခာနှင့် အရေးပေါ်ကယ်ဆယ်ရေးပစ္စည်းများ အရေးပေါ်လိုအပ်နေပြီး ပျောက်ဆုံးသူများနှင့် သေဆုံးသူများ၏ ရုပ်အလောင်းများကိုလည်း ကယ်ဆယ်ရေးအဖွဲ့များနှင့် ဒေသခံများက ဆက်လက်ရှာဖွေနေကြောင်း သိရသည်။

Khit Thit သတင်းဌာန၏ စက်တင်ဘာ ၂၇ ရက် ညနေပိုင်း ရုပ်သံသတင်းအစီအစဉ် By ရန်ကုန်ခေတ်သစ် ဒီကနေ့ စက်တင်ဘာ ၂၇ ရက် ညနေပိုင်း တင်ဆက်ပေးမယ့် သတင်းတွေကတော့ -ရခိုင်ပြည်နယ်အတွင်းမှာရှိတဲ့ ကျောက်ဖြူ၊ စစ်တွေ၊ ပုဏ္ဏားကျွန်းမြို့နယ်တွေ အပြင် ရခိုင်ပြည်နဲ့ ဆက်စပ် နေ တဲ့ မကွေး၊ ပဲခူး၊ ဧရာဝတီတိုင်းဒေသကြီးအစပ်တွေ၊ ချင်းပြည်နယ် ပလက်ဝဒေသနဲ့ ရခိုင်ရိုးမ တစ်လျှောက် မှာ မိုးကုန်ဆောင်းကူးကာလအတွင်း တိုက်ပွဲတွေ ပိုမိုပြင်းထန်လာနိုင်ကြောင်း အာရက္ခ တပ်တော် (AA) ဒုတိယဥက္ကဋ္ဌ (၁) ဒေါက်တာညိုထွန်းအောင်က သတိပေးပြောဆိုလိုက်ပါတယ်။ - မလေးရှားနိုင်ငံက ထိန်းသိမ်းရေးစခန်းတွေမှာ ရှိနေတဲ့ မြန်မာနိုင်ငံသား ၅,၀၀၀ ကို “မိမိဆန္ဒအလျောက်” နေရပ်ပြန်ပို့ဖို့ စီစဉ်နေပြီး ပထမအသုတ်အဖြစ် ၁,၅၀၀ နီးပါးကို လာမယ့်သီတင်းပတ်အတွင်း ပြန်ပို့ဖို့ စီစဉ်ထားတယ်လို့ သိရပါတယ်။ - မန္တလေး အိုးဘိုဗဟိုအကျဉ်းထောင်မှာ စစ်အုပ်စုနဲ့ ထောင်အာဏာပိုင်တွေ ပူးပေါင်းပြီး အကျဉ်းထောင် အတွင်းစစ်မှုထမ်းဖို့ ဖိအားပေး စည်းရုံးတာ၊ သီးခြားခွဲထုတ်တာနဲ့ နိုင်ငံရေးအကျဉ်းသားတွေကို စစ်ဘက်ဆိုင်ရာ လုံခြုံရေးအဖွဲ့ (စရဖ) က ခြိမ်းခြောက်ဖိနှိပ်တာတွေ စနစ်တကျ လုပ်ဆောင်နေတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) မှ မရောင်နီလင်းက ရန်ကုန်ခေတ်သစ်ကို ပြောဆိုပါတယ်။ - ကမ္ဘာတစ်ဝန်း ရေနံထောက်ပံ့မှုတွေ လျော့ကျလာပြီး ရေနံဈေးတွေ မြင့်တက်လာနေချိန်မှာ အမေရိကန်သမ္မတ ဒေါ်နယ်ထရမ့်က တရုတ်သမ္မတ ရှီကျင့်ဖျင်နဲ့ တွေ့ဆုံစဉ် တရုတ်နိုင်ငံအနေနဲ့ ရေနံထုတ်လုပ်မှု တိုးမြှင့်ပေးဖို့ တိုက်တွန်းခဲ့တဲ့ သတင်းအပါအဝင် ညနေခင်းသတင်းတွေကို တင်ဆက်ပေးပါမယ်။https://youtu.be/kndtT-yzVRY

ဖာပွန်မြို့နယ်၊ ကမမောင်းမြို့တိုက်ပွဲများတွင် စစ်တပ်ဘက်မှ ၇ ဦးသေဆုံးကာ လက်နက်အချို့ သိမ်းဆည်းရမိ ရန်ကုန်၊ စက်တင်ဘာ ၂၇ ကရင်ပြည်နယ်၊ ဖာပွန်မြို့နယ်၊ ကမမောင်းမြို့တွင် တိုက်ပွဲများဖြစ်ပွားပြီး စစ်တပ်ဘက်မှ ၇ ဦး သေဆုံးခဲ့ပြီး လက်နက်အချို့ သိမ်းဆည်းရမိခဲ့ကြောင်း KNU မူတြော်ခရိုင်က သတင်းထုတ်ပြန်သည်။ စက်တင်ဘာလ ၂၅ ရက်နေ့ နံနက် ၇ နာရီ ၅၀ မိနစ်အချိန်တွင် KNLA တပ်ဖွဲ့များက ကမမောင်းမြို့အတွင်းရှိ စစ်ကောင်စီတပ်၏ ဘုရားကုန်းစခန်းကို ဝင်ရောက်တိုက်ခိုက်ခဲ့ရာ စစ်ကောင်စီဘက်မှ ၃ ဦး သေဆုံးခဲ့သည်။ အဆိုပါတိုက်ပွဲမှ MA-1 သေနတ် ၃ လက်၊ MA-3 သေနတ် ၁ လက်နှင့် K3 သေနတ် ၃ လက်တို့ကို သိမ်းဆည်းရမိခဲ့သည်။ ထို့ပြင် စက်တင်ဘာလ ၁၆ ရက်နေ့တွင်လည်း KNLA တပ်ဖွဲ့နှင့် စစ်ကောင်စီတပ်တို့ တိုက်ပွဲဖြစ်ပွားခဲ့ရာ စစ်ကောင်စီဘက်မှ ၂ ဦး သေဆုံးခဲ့ပြီး MA-1 သေနတ် ၂ လက်၊ MA-3 သေနတ် ၁ လက်နှင့် ခဲယမ်းအချို့ကို သိမ်းဆည်းရမိခဲ့သည်။ စက်တင်ဘာလ ၁၄ ရက်နေ့ကလည်း KNLA တပ်ဖွဲ့များ၏ တိုက်ခိုက်မှုကြောင့် စစ်ကောင်စီတပ်ဖွဲ့ဝင် ၂ ဦး သေဆုံးခဲ့ပြီး အခြား ထိခိုက်ဒဏ်ရာရရှိသူများလည်း ရှိခဲ့ကြောင်း သိရှိရသည်။ အကြမ်းဖက် စစ်တပ်က ဖာပွန်မြို့နယ်ကို ပြန်လည် ထိန်းချုပ်နိုင်ရန်အတွက် အပြင်းအထန် ထိုးစစ်ဆင် တိုက်ခိုက်နေသော်လည်း တော်လှန်ရေးတပ်ဖွဲ့များ၏ ခုခံ တိုက်ခိုက်မှုကြောင့် ပြန်လည် ဆုတ်ခွာနေရခြင်းဖြစ်ကြောင်း ဒေသစစ်ရေးသတင်းရင်းမြစ်များ ပြောဆိုချက်အရ သိရသည်။

ဝေါမြို့နယ်တွင် ကျေးရွာနှင့်ရပ်ကွက်အုပ်ချုပ်ရေးမှူးအများစုကို ပြန်လည်ရွေးချယ်ခြင်းမပြုတော့ဘဲ ကြံ့ဖွတ်နှင့် ထွေ/အုပ်က လူဟောင်းများကိုသာ ပြန်ခန့် ရန်ကုန်၊ စက်တင်ဘာ ၂၇ ပဲခူးတိုင်း၊ ဝေါမြို့နယ်အတွင်းရှိ ကျေးရွာနှင့် ရပ်ကွက်အုပ်ချုပ်ရေးမှူးအများစုကို ပြန်လည်ရွေးချယ်ခြင်းမပြုတော့ဘဲ ကြံ့ခိုင်ရေးပါတီနှင့် အထွေထွေအုပ်ချုပ်ရေးဦးစီးဌာန (ထွေ/အုပ်) တို့နှင့် နီးစပ်သည့် အုပ်ချုပ်ရေးမှူးဟောင်းများကိုသာ ဆက်လက်တာဝန်ပေးအပ်နေကြောင်း ဒေသခံများထံမှ သိရသည်။ ဝေါမြို့နယ်အတွင်း ကျေးရွာနှင့် ရပ်ကွက်အုပ်ချုပ်ရေးမှူးများ ပြန်လည်ရွေးချယ်ရေးလုပ်ငန်းစဉ်ကို ဆောင်ရွက်နေသော်လည်း မြို့နယ်တစ်ခုလုံးရှိ အုပ်ချုပ်ရေးမှူးများကို တပြေးညီ ပြန်လည်ရွေးချယ်ခြင်းမပြုဘဲ နေရာအများစုတွင် ယခင်တာဝန်ယူခဲ့သည့် အုပ်ချုပ်ရေးမှူးများကိုပင် ဆက်လက်ခန့်အပ်နေကြောင်း ဒေသခံများက ပြောသည်။ ဒေသခံများ၏ ပြောဆိုချက်အရ ယခင်ကတည်းက ကြံ့ခိုင်ရေးပါတီနှင့် နီးစပ်သူများ၊ ထွေ/အုပ်နှင့် နီးစပ်သည့် အုပ်ချုပ်ရေးမှူးဟောင်းများကို ပြန်လည်ရွေးချယ်ခြင်း မပြုဘဲ ဆက်လက်တာဝန်ပေးထားပြီး နေရာအချို့တွင်သာ အုပ်ချုပ်ရေးမှူးအသစ် ပြန်လည်ရွေးချယ်မှုများ ပြုလုပ်နေကြောင်း သိရသည်။ ထိုသို့ အုပ်ချုပ်ရေးမှူးများ ပြန်လည်ရွေးချယ်မှုကို နေရာအလိုက် ကွဲပြားစွာ ဆောင်ရွက်နေခြင်းကြောင့် ဒေသခံများအကြား မေးခွန်းထုတ်မှုများနှင့် မကျေနပ်မှုများ ဖြစ်ပေါ်နေကြောင်း သိရသည်။ “မြို့နယ်တစ်ခုလုံးကို အုပ်ချုပ်ရေးမှူးတွေ ပြန်ရွေးတာမျိုး မဟုတ်ဘဲ လူဟောင်းတွေကိုပဲ နေရာအများစုမှာ ပြန်ခန့်ထားတာပါ။ ကြံ့ဖွတ်နဲ့ ထွေ/အုပ်ဘက်က လူတွေကိုတော့ ပြန်မရွေးဘဲ ဆက်ထားပြီး တချို့နေရာတွေကိုပဲ ပြန်ရွေးနေတယ်ဆိုတော့ ပြည်သူတွေကြားမှာ မကျေနပ်မှုတွေ ရှိနေပါတယ်” ဟု ဝေါမြို့နယ် ဒေသခံတစ်ဦးက ပြောသည်။ ဒေသခံများက အုပ်ချုပ်ရေးမှူးများ ပြန်လည်ရွေးချယ်ရာတွင် စံနှုန်းတစ်ခုတည်းဖြင့် မြို့နယ်တစ်ခုလုံးကို ဆောင်ရွက်ခြင်းမရှိဘဲ သက်ဆိုင်ရာအဖွဲ့အစည်းများနှင့် နီးစပ်သူများကို ဆက်လက်ခန့်အပ်ထားပြီး အချို့နေရာများတွင်သာ ရွေးချယ်မှုများ ပြုလုပ်နေခြင်းအပေါ် ဝေဖန်မှုများ ရှိနေကြောင်း သိရသည်။ လက်ရှိကျေးရွာနှင့်ရပ်ကွက် အုပ်ချုပ်ရေးမှူးအများစုမှာလည်း စစ်အာဏာသိမ်းပြီးနောက် စစ်တပ် အလိုကျ လိုက်ပါ လုပ်ဆောင်နေသူများဖြစ်ပြီး လူငယ်များကို စစ်မှုထမ်းအဖြစ် ဖမ်းဆီးခြင်း၊ စစ်မှုထမ်းကြေး အဓမ္မ ကောက်ခံခြင်းနှင့် ပြည်သူများကို ဖိနှိပ်အုပ်ချုပ်နေသူများဖြစ်ကြောင်း ဒေသပြည်သူများက ပြောဆိုကြသည်။ ဓာတ်ပုံ- အကြမ်းဖက် စစ်တပ်လက်အောက်ခံ မြို့နယ်အုပ်ချုပ်ရေးရုံးတစ်ခု။ (ပုံအဟောင်းကိုအသုံးပြုထားပါသည်။)

အုတ်ဖိုမြို့နယ် အိုးသည်ကုန်းမြို့ရှိ ဂုံညင်းတန်းတာဆုံစစ်တပ်ဂိတ်ကို PDF တပ်ဖွဲ့များ ဝင်ရောက်တိုက်ခိုက်၊ လက်နက်ကြီး၊ လက်နက်ငယ်များဖြင့် အပြန်အလှန်ပစ်ခတ်နေပြီး ယာဉ်ကြောများ ပိတ်ဆို့နေ ရန်ကုန်၊ စက်တင်ဘာ ၂၇ ပဲခူးတိုင်းအနောက်ခြမ်း၊ သာယာဝတီခရိုင်၊ အုတ်ဖိုမြို့နယ်၊ အိုးသည်ကုန်းမြို့ရှိ ဂုံညင်းတန်းတာဆုံဂိတ်ကို ယနေ့ စက်တင်ဘာ ၂၇ ရက် နံနက် ၄ နာရီခန့်တွင် ပြည်သူ့ကာကွယ်ရေးတပ်ဖွဲ့များက ဝင်ရောက်တိုက်ခိုက်ခဲ့ပြီး လက်ရှိတွင် လက်နက်ကြီး၊ လက်နက်ငယ်များဖြင့် အပြန်အလှန်ပစ်ခတ်မှုများ ဖြစ်ပွားနေကြောင်း ဒေသခံများထံမှ သိရသည်။ ဂုံညင်းတန်းတာဆုံဂိတ်သည် အုတ်ဖိုမြို့နယ်အတွင်း ခရီးသွားပြည်သူများနှင့် ကုန်တင်ယာဉ်များ ဖြတ်သန်းသွားလာရာ လမ်းဆုံနေရာတစ်ခုဖြစ်ပြီး အဆိုပါဂိတ်တွင် ဖြတ်သန်းသွားလာသည့် ယာဉ်များထံမှ ဆက်ကြေးတောင်းခံမှုများ ရှိနေကြောင်း ဒေသခံများက ပြောသည်။ ထို့ပြင် အဆိုပါဂိတ်သည် ပျူစောထီး စိုးမင်းအဖွဲ့က စစ်တပ်နှင့်အတူ ဂိတ်ထိုင်၍ လုံခြုံရေးယူထားသည့် ဂိတ်စခန်းတစ်ခုလည်း ဖြစ်ကြောင်း သိရသည်။ ယနေ့ နံနက်အစောပိုင်း ၄ နာရီခန့်တွင် အဆိုပါဂိတ်ကို ပြည်သူ့ကာကွယ်ရေးတပ်ဖွဲ့များက ဝင်ရောက်တိုက်ခိုက်ခဲ့ပြီးနောက် ဂိတ်ဘက်မှလည်း ပြန်လည်ပစ်ခတ်မှုများ ပြုလုပ်ခဲ့သဖြင့် နှစ်ဖက်အကြား လက်နက်ကြီး၊ လက် နက်ငယ်များဖြင့် အပြန်အလှန်ပစ်ခတ်မှုများ ဖြစ်ပွားခဲ့ကြောင်း ဒေသခံများက ဆိုသည်။ ပစ်ခတ်မှုများကြောင့် ဂုံညင်းတန်းတာဆုံဂိတ်အနီးရှိ လမ်းပိုင်းများတွင် ယာဉ်အသွားအလာများ ရပ်တန့်သွားပြီး ယာဉ်ကြောပိတ်ဆို့မှုများလည်း ဖြစ်ပေါ်နေကြောင်း သိရသည်။ လမ်းပေါ်တွင် ခရီးသည်တင်ကားများ၊ ကုန်တင်ယာဉ်များနှင့် အခြားယာဉ်များ ရပ်တန့်ထားရပြီး တိုက်ပွဲအခြေအနေကြောင့် ဆက်လက်ဖြတ်သန်းသွားလာရန် အခက်အခဲရှိနေကြောင်း ဒေသခံများက ပြောသည်။ “အခု လမ်းတွေ ပိတ်နေပါတယ်။ မနက်ကတည်းက ပစ်ခတ်သံတွေကြားနေရပြီး ကားတွေကလည်း ရှေ့ဆက်သွားလို့မရဘဲ ရပ်ထားရပါတယ်။ တာဆုံဘက်မှာ ပစ်ခတ်မှုဖြစ်နေတာကြောင့် လူတွေကလည်း လမ်းပေါ်မှာ သွားလာဖို့ စိုးရိမ်နေကြပါတယ်” ဟု ဒေသခံတစ်ဦးက ပြောသည်။ အဆိုပါဂိတ်တွင် ယခင်ကတည်းက ဖြတ်သန်းသွားလာသည့် ကားများနှင့် ကုန်တင်ယာဉ်များထံမှ ဆက်ကြေးကောက်ခံမှုများ ပြုလုပ်နေကြောင်း ဒေသခံများက ပြောဆိုထားပြီး လက်ရှိတိုက်ပွဲသည် ထိုဂိတ်စခန်းကို ပစ်မှတ်ထား တိုက်ခိုက်ခြင်းဖြစ်ကြောင်း ဒေသတွင်းသတင်းရင်းမြစ်များက ဆိုသည်။ တိုက်ပွဲဖြစ်ပွားနေသည့်အချိန်အတွင်း ဂုံညင်းတန်းတာဆုံအနီး လမ်းပိုင်းများတွင် ယာဉ်အသွားအလာများ ရပ်တန့်နေသဖြင့် ခရီးသွားပြည်သူများနှင့် ကုန်တင်ယာဉ်များအနေဖြင့် လမ်းခရီးဆက်လက်သွားလာနိုင်ခြင်း မရှိသေးကြောင်း သိရသည်။ လက်ရှိတွင် ပစ်ခတ်မှုအခြေအနေ ဆက်လက်ဖြစ်ပွားနေသဖြင့် ဂုံညင်းတန်းတာဆုံနှင့် အနီးဝန်းကျင်ကျေးရွာများရှိ ဒေသခံများအနေဖြင့်လည်း လမ်းမများနှင့် တိုက်ပွဲဖြစ်ပွားရာနေရာအနီးသို့ သွားလာခြင်းမပြုဘဲ နေထိုင်နေကြရကြောင်း သိရသည်။ ယခုဖြစ်ပွားနေသည့် ပစ်ခတ်မှုအတွင်း နှစ်ဖက်ထိခိုက်သေဆုံးမှု အခြေအနေ၊ ဂိတ်စခန်း၏ ပျက်စီး ဆုံးရှုံးမှု အခြေအနေများကို လတ်တလော မသိရှိရသေးဘဲ တိုက်ပွဲနှင့် ယာဉ်ကြောပိတ်ဆို့မှု အခြေအနေများ ဆက်လက်ဖြစ်ပေါ်နေကြောင်း ဒေသခံများထံမှ သိရသည်။

လက်ရှိတွင် လောင်းလုံး၊ သရက်ချောင်းနှင့် ပလောက်ဒေသများ၌ မိုးဆက်လက်ရွာသွန်းမှု၊ တောင်ပြိုမှုနှင့် ရေကြီးရေလျှံမှုများကြောင့် လမ်းပန်းဆက်သွယ်ရေး ပြတ်တောက်မှုများ ဖြစ်ပေါ်နေပြီး ထိခိုက်ပျက်စီးမှုနှင့် ပျောက်ဆုံးသူ အရေအတွက်များကို ဆက်လက်စုံစမ်းနေဆဲဖြစ်ကြောင်း သိရသည်။

လောင်းလုံးမြို့နယ်၊ တောကျဲကျေးရွာတွင် တောင် ၂ ကြိမ်ပြိုပြီး တောင်ကျချောင်းရေကြောင့် လူ ၈ ဦး ပျောက်ဆုံးနေ၊ ရေကြီးမှုများ အကြီးအကျယ်ဖြစ်နေသော်လည်း ကယ်ဆယ်ရေးမရောက်၍ ပြည်သူအများစု ဒုက္ခရောက်နေရ ရန်ကုန်၊ စက်တင်ဘာ ၂၇ တနင်္သာရီတိုင်း၊ ထားဝယ်ခရိုင်၊ လောင်းလုံးမြို့နယ်၊ တောကျဲကျေးရွာတွင် မိုးသည်းထန်စွာရွာသွန်းမှုကြောင့် တောင် ၂ ကြိမ်ပြိုကျပြီး တောင်ကျချောင်းရေများ အရှိန်အဟုန်ဖြင့် စီးဆင်းလာသဖြင့် နေအိမ်များ ပျက်စီးကာ လူ ၈ ဦးထက်မနည်း ပျောက်ဆုံးနေကြောင်း ဒေသခံများထံမှ သိရသည်။ တောကျဲကျေးရွာတွင် မြေပြိုမှုသည် စက်တင်ဘာ ၂၆ ရက် ညပိုင်းတစ်ကြိမ်နှင့် စက်တင်ဘာ ၂၇ ရက် နံနက်ပိုင်းတစ်ကြိမ် စုစုပေါင်း ၂ ကြိမ် ဖြစ်ပွားခဲ့ခြင်းဖြစ်ပြီး နေအိမ်အများအပြား ပျက်စီးခဲ့ကြောင်း သိရသည်။ “မြေက ညပိုင်းတစ်ခါ၊ မနက်ပိုင်းတစ်ခါ နှစ်ခါတိတိ ပြိုပါတယ်။ လောင်းလုံးမြို့နယ်ကနေ အောက်ဘက်ရွာတွေအကုန်လုံးနီးပါး ရေကြီး၊ တောင်ပြိုပြီး လမ်းတွေ သွားလာလို့မရ ဖြစ်နေပါတယ်။ ကြီးတဲ့ရေက မိုးရေနဲ့ တောင်ကျရေ ဖြစ်ပါတယ်” ဟု ဒေသခံတစ်ဦးက ပြောသည်။ တောကျဲကျေးရွာအနီး လမ်းဘေးတွင်ရှိသည့် တောကျဲရေတံခွန်မှ တောင်ကျရေများ အရှိန်ပြင်းစွာ စီးဆင်းလာခြင်းကြောင့်လည်း ရေကြီးရေလျှံမှု ပိုမိုဆိုးရွားနေကြောင်း ဒေသခံများက ပြောသည်။ လက်ရှိတွင် တောင်ပြိုမှုကြောင့် လူ ၈ ဦးထက်မနည်း ပျောက်ဆုံးနေပြီး ကယ်ဆယ်ရေးအဖွဲ့များ အချိန်မီ မရောက်ရှိသေးသဖြင့် ဒေသခံများအနေဖြင့် အခက်အခဲများနှင့် ရင်ဆိုင်နေရကြောင်း သိရသည်။ ထို့အပြင် ပလောက်၊ သရက်ချောင်းနှင့် လောင်းလုံးမြို့နယ်တို့တွင်လည်း မိုးသည်းထန်စွာ ရွာသွန်းမှုကြောင့် ရေကြီးရေလျှံမှုများ ဖြစ်ပွားနေပြီး ရေဝင်ရောက်နေသည့် နေအိမ်များမှ ပြည်သူများကို ရေဘေးလွတ်ရာသို့ ရွှေ့ပြောင်းပေးနေရကြောင်း မြန်မာနိုင်ငံမီးသတ်တပ်ဖွဲ့၏ ထုတ်ပြန်ချက်အရ သိရသည်။ ပလောက်မြို့တွင် ပလောက်ချောင်းရေ မြင့်တက်လာမှုကြောင့် အမှတ် (၁) ရပ်ကွက်၊ ကမ်းနားလမ်းရှိ နေအိမ်များအတွင်း ရေဝင်ရောက်ခဲ့ပြီး စက်တင်ဘာ ၂၇ ရက် နံနက်ပိုင်းတွင် ပလောက်နယ်မြေ မီးသတ်စခန်းမှ တပ်ဖွဲ့ဝင်များက ရေဘေးသင့်အိမ်ထောင်စုများကို ဘေးလွတ်ရာသို့ ကူညီရွှေ့ပြောင်းပေးခဲ့ရသည်။ အလားတူ သရက်ချောင်းမြို့တွင်လည်း မိုးသည်းထန်စွာ ရွာသွန်းမှုကြောင့် မြို့မရပ်ကွက်၊ ရေတံခွန်လမ်းနှင့် ဌာနလမ်းတို့ရှိ နေအိမ်များအတွင်း ရေဝင်ရောက်ခဲ့သဖြင့် သရက်ချောင်းမြို့နယ် မီးသတ်စခန်းမှ တပ်ဖွဲ့ဝင်များက ရေဘေးသင့် အိမ်ထောင်စုများကို ရေဘေးလွတ်ရာသို့ ရွှေ့ပြောင်းပေးခဲ့ကြောင်း သိရသည်။ လောင်းလုံးမြို့နယ်အတွင်းတွင်လည်း မိုးသည်းထန်စွာ ရွာသွန်းမှုကြောင့် ပလောက်ချောင်းရေ မြင့်တက်လာပြီး (က) ရပ်ကွက်၊ (ခ) ရပ်ကွက်နှင့် (ဂ) ရပ်ကွက်တို့ရှိ နေအိမ်များအတွင်း ရေဝင်ရောက်ခဲ့သဖြင့် လောင်းလုံးမြို့နယ် မီးသတ်စခန်းမှ တပ်ဖွဲ့ဝင်များက သက်ဆိုင်ရာအဖွဲ့အစည်းများနှင့် ပူးပေါင်းကာ ပြည်သူများကို ဘေးလွတ်ရာသို့ ရွှေ့ပြောင်းပေးခဲ့ကြောင်း သိရသည်။ ထားဝယ်အမျိုးသားအဖွဲ့ချုပ်ကလည်း စက်တင်ဘာ ၂၇ ရက်တွင် “ထားဝယ်ဒေသအတွင်း ရေကြီးရေလျှံမှုများ၊ တောင်ပြိုမှုများနှင့် ပတ်သက်၍ သတင်းထုတ်ပြန်ချက်” အမှတ် (၀၀၂/၂၆) ကို ထုတ်ပြန်ခဲ့သည်။ အဆိုပါ ထုတ်ပြန်ချက်အရ စက်တင်ဘာ ၂၄ ရက်မှစတင်၍ မိုးသည်းထန်စွာ ရွာသွန်းမှုကြောင့် ထားဝယ်ဒေသတစ်ဝန်း နေရာအနှံ့အပြားတွင် ရေကြီးရေလျှံမှုများနှင့် တောင်ပြိုမှုများ ဖြစ်ပွားနေပြီး ပြည်သူများ၏ အသက်အိုးအိမ်စည်းစိမ်များ ထိခိုက်ပျက်စီးနေကြောင်း သိရသည်။ လတ်တလော ရရှိထားသည့် အချက်အလက်များအရ ထားဝယ်ဒေသတစ်ဝန်းရှိ ကျေးရွာပေါင်း ၄၀ နီးပါးတွင် ရေကြီးရေလျှံမှုနှင့် တောင်ပြိုမှုများ ဖြစ်ပွားနေပြီး လူ ၅ ဦးထက်မနည်း သေဆုံးကာ နေအိမ် ၂၀ ထက်မနည်း ပြိုကျပျက်စီးခဲ့ကြောင်း ထားဝယ်အမျိုးသားအဖွဲ့ချုပ်က ထုတ်ပြန်ထားသည်။ သို့သော် ဆက်သွယ်ရေးလိုင်းများ ပြတ်တောက်နေခြင်းနှင့် အခြားအခက်အခဲများကြောင့် ဘေးအန္တရာယ်ဖြစ်ပွားရာ ဒေသများ၏ အခြေအနေအပြည့်အစုံကို လက်ရှိအချိန်တွင် မရရှိသေးဘဲ အမှန်တကယ် ထိခိုက်ပျက်စီးဆုံးရှုံးမှုမှာ ထုတ်ပြန်ထားသည့် အချက်အလက်များထက် ပိုမိုများပြားနိုင်ကြောင်းလည်း ထားဝယ်အမျိုးသားအဖွဲ့ချုပ်က သတိပေးထားသည်။ ထားဝယ်အမျိုးသားအဖွဲ့ချုပ်အနေဖြင့် သဘာဝဘေးအန္တရာယ်ကြောင့် ထိခိုက်ခံစားနေရသည့် ပြည်သူများအတွက် အရေးပေါ်ကူညီကယ်ဆယ်ရေးလုပ်ငန်းများကို လက်လှမ်းမီသည့် ဒေသများတွင် ဆောင်ရွက်နေကြောင်း သိရသည်။ ထို့အပြင် အရေးပေါ်ကူညီကယ်ဆယ်ရေးလုပ်ငန်းများ ပိုမိုထိရောက်စွာ ဆောင်ရွက်နိုင်ရေးအတွက် စစ်အုပ်စုနှင့် မသက်ဆိုင်သည့် လွတ်လပ်သောအဖွဲ့အစည်းများ၊ လူမှုကူညီကယ်ဆယ်ရေးအဖွဲ့များနှင့် သက်ဆိုင်ရာ ဒေသခံအဖွဲ့အစည်းများနှင့် အပြည့်အဝ ပူးပေါင်းဆောင်ရွက်ရန် အသင့်ရှိကြောင်းလည်း ထားဝယ်အမျိုးသားအဖွဲ့ချုပ်က ထုတ်ပြန်ထားသည်။