Khit Thit Media

Khit Thit သတင်းဌာန၏ ဇွန် ၁၈ ရက် ညနေပိုင်း ရုပ်သံသတင်းအစီအစဉ် By ရန်ကုန်ခေတ်သစ် ဒီကနေ့ ဇွန် ၁၈ ရက် ညနေပိုင်း တင်ဆက်ပေးမယ့် သတင်းတွေကတော့ တော်လှန်ရေးဘက်က ပြည်ထောင်စုလွှတ်တော်ကိုယ်စားပြုကော်မတီ CRPH ကို မြန်မာနိုင်ငံရဲ့ တရားဝင်လွှတ်တော်အဖြစ် ကမ္ဘာ့လွှတ်တော်အဖွဲ့-IPU က အသိအမှတ် ပြုထားမှုအပေါ် ကြံ့ဖွတ်ဉက္ကဌ အကြမ်းဖက် ခင်ရီ က မကျေမနပ်ဖြစ်နေပြီး သူတို့ရဲ့ ကြံ့ဖွတ်လွှတ်တော်ကို နိုင်ငံတကာလွှတ်တော် တွေက အသိအမှတ်ပြုအောင် လုပ်မယ်ဆိုပြီး ကြုံးဝါးနေပြန်ပါတယ်။ မကွေးတိုင်း ၊ ဆိပ်ဖြူမြို့နယ်အတွင်း တပ်တွင်း ဖရဲသီးရဲ့ ကြိုတင်သတင်းပေးမှုကြောင့် အကြမ်းဖက် စစ်တပ်စစ်ကြောင်းကို တော်လှန်ရေးတပ်တွေက တိုက်ခိုက်ရာမှာ စစ်တပ်ရဲ့ ဗိုလ်ကြီး ဖြိုးသူအောင် နဲ့ အခြားစစ်ဗိုလ် ၁ ဦး အပါအဝင် စစ်သား ၁၀ ဦး အသီးသီးသေကုန်ကြပြီး လက်နက်တွေပါ သိမ်းဆည်း ရရှိထားတဲ့အတွက် သတင်းပေးတဲ့ တပ်တွင်းဖရဲသီးကို ဆုချီးမြင့်မှာဖြစ်တယ်လို့ တော်လှန်ရေးတပ် တာဝန်ရှိသူက ရန်ကုန်ခေတ်သစ်ကို ပြောဆိုလာပါတယ်။ မန္တလေးမြို့ ၊အောင်မြေသာစံမြို့နယ်မှာ အရန်မီးသတ်တပ်ဖွဲ့ဝင်ဟောင်း ကိုအောင်ချစ်မင်း ဆိုသူကို အကြမ်းဖက် စစ်တပ်က စစ်မှုထမ်းဖို့ ဖမ်းဆီးလိုက်ပြီး လက်ရှိ မန္တလေးမြို့မှာ လူငယ်တွေ ပေါ်တာဆွဲ ဖမ်းဆီးခံရမှုတွေ အကြီးအကျယ်ဖြစ်ပေါ်နေတယ်လို့ မန္တလေးမြို့ခံသတင်းရင်းမြစ်က ရန်ကုန် ခေတ်သစ်ကို ပြောပါတယ်။ အမေရိကန်အပါအဝင် G7 ခေါင်းဆောင်တွေက ရုရှး ယူကရိန်း စစ်ပွဲမှာ ယူကရိန်းရဲ့ လေကြောင်း ရန်ကာကွယ်ရေးကို ပိုပြီး ကူညီပေးဖို့နဲ့ ရုရှားအပေါ် ပိတ်ဆို့မှုတွေ ပိုမို တင်းကြပ်ဖို့ ကတိပြုလိုက်ကြတဲ့ သတင်းအပါအဝင် နောက်ဆုံးရသတင်းတွေကို တင်ဆက်ပေးပါမယ်။ https://youtu.be/0WvPIk35O2M?si=YdXVuC7b4xH1Ng1m

ဖားကန့်တွင် ပြည်သူများကို ဓားပြတိုက်နေသည့် စစ်ကောင်စီတပ်သား ၅ ဦးကို တော်လှန်ရေး ပူးပေါင်းတပ်ဖွဲ့က ဖမ်းဆီးရမိ ရန်ကုန်၊ ဇွန် ၁၈ ကချင်ပြည်နယ်၊ ဖားကန့်မြို့နယ်အတွင်းရှိ အရပ်သားပြည်သူများနှင့် လုပ်ငန်းရှင်များ၏ နေအိမ်များကို လိုက်လံဓားပြတိုက်နေသည့် စစ်ကောင်စီတပ်သား ၅ ဦးကို တော်လှန်ရေးပူးပေါင်းတပ်ဖွဲ့က ဖမ်းဆီးရရှိထားပြီး စစ်ဆေးမှုများ ပြုလုပ်နေကြောင်း ဖားကန့်ဒေသသတင်းရင်းမြစ်ထံမှ သိရသည်။ လွန်ခဲ့သည့် ဇွန်လ ၁၆ ရက်နေ့က ဖားကန့်မြို့နယ်၊ လုံးခင်းကျေးရွာအုပ်စုအတွင်းရှိ နေရာတစ်ခုတွင် KIA နှင့် KPDF ပူးပေါင်းတပ်ဖွဲ့က အဆိုပါ စစ်ကောင်စီတပ်သား ၅ ဦးကို ဖမ်းဆီးခဲ့ခြင်း ဖြစ်သည်။ ၎င်းတို့ကို ဖမ်းဆီးစစ်ဆေးရာတွင် အရပ်သားပြည်သူများနှင့် လုပ်ငန်းရှင်များ၏ နေအိမ်များအတွင်း ဝင်ရောက်ကာ ရည်ရွယ်ချက်ရှိရှိ ဓားပြတိုက်မှုများ ကျူးလွန်နေသူများဖြစ်ကြောင်း စစ်ဆေးပေါ်ပေါက်ခဲ့သည်။ ဒေသသတင်းရင်းမြစ်၏ ပြောပြချက်အရ ဖမ်းဆီးရမိထားသူများအနက် လူမှုကွန်ရက်ပေါ်တွင် ဓာတ်ပုံနှင့်တကွ ထွက်ပေါ်လာသည့် နှစ်ဦးမှာ ပြည်သူ့စစ် (ပစ) အဖွဲ့ဝင်များ ဖြစ် ကြောင်း အတည်ပြုထားသည်။ အဆိုပါ စစ်သား ၅ ဦးကို ဖမ်းဆီးရမိပြီးနောက်ပိုင်းတွင်လည်း စစ်တပ်၏ ဓားပြတိုက်မှုများ ဆက်လက်ဖြစ်ပွားနေခဲ့သည်။ ယမန်နေ့ ဇွန်လ ၁၇ ရက် ညပိုင်း ဖားကန့်မြို့နယ်၊ နမ္မဖြစ်အုပ်စု၊ ဆွတ်ဂျတ်ရွာရှိ ကုမ္ပဏီဝန်းတစ်ခုအတွင်းသို့ စစ်ကောင်စီတပ်သားအချို့က သေနတ်ပြ ဓားပြဝင်တိုက်ခဲ့ရာ ငွေကျပ် သိန်း ၂၀၀၀ ခန့် ပါရှိသွားကြောင်း သိရသည်။ ထို့ပြင် ယမန်နေ့ ည ၇ နာရီဝန်းကျင်တွင်လည်း လုံးခင်းကျေးရွာအုပ်စု၊ ဂျိတ်လပ်အနီး၌ စစ်သားများက ထပ်မံ၍ ဓားပြတိုက်မှု ကျူးလွန်ခဲ့ကြသည်။ လက်ရှိတွင် ဖားကန့်ဒေသအတွင်းရှိ ကျေးရွာများထဲ၌ စစ်ကောင်စီတပ်သားများသာမက မင်းဇေသန့် ဦးဆောင်သည့် ဝါရာဇွပ်ပြည်သူ့စစ်များနှင့် ပေါ်တာဆွဲခေါ်လာသော ပြည်သူ့ စစ်များ ရောထွေးအခြေစိုက်နေကြပြီး ရွာများအတွင်းရှိ အနှိပ်ခန်းများနှင့် ပြည့်တန်ဆာအိမ်များတွင် အခြေချနေထိုင်နေကြကြောင်း ဒေသခံများက ဆိုသည်။ စစ်ဆေးမေးမြန်းမှုများအရ စစ်ကောင်စီတပ်ဖွဲ့ဝင်များက ဓားပြတိုက်၍ ရရှိလာသော ငွေကြေးများကို မိသားစုများထံသို့ ပြန်လည်လွှဲပြောင်းပေးနေကြောင်း ဖမ်းဆီးရမိသည့် ပြည်သူ့စစ်အချို့က ဝန်ခံထွက်ဆိုထားသည်။ ပြီးခဲ့သည့် ဧပြီလမှစတင်၍ ယနေ့အချိန်အထိ နှစ်လကျော်ကာလအတွင်း ဖားကန့်မြို့နယ်အတွင်းရှိ စစ်ကောင်စီတပ်သားများနှင့် ၎င်းတို့၏လက်အောက်ခံ ဝါရာဇွပ်ပြည်သူ့စစ်တပ်ဖွဲ့ဝင်များသည် ပြည်သူလူထုအပေါ် ဓားပြတိုက်မှု အကြိမ်ရေ ၅၀ ထက်မနည်း ကျူးလွန်ထားကြောင်း သိရသည်။ ထို့အပြင် လမ်းမများပေါ်တွင် တရားမဝင်ဂိတ်များ ဖွင့်လှစ်ကာ ခရီးသွားပြည်သူများ၏ လက်ကိုင်ဖုန်း၊ ဆိုင်ကယ်နှင့် ပိုက်ဆံများကို အတင်းအဓမ္မ သိမ်းယူသည့်အပြင်၊ လူအချို့ကိုပါ ဖမ်းဆီးကာ မိသားစုများထံမှ ငွေကြေးဖြင့် ပြန်လည်ရွေးခိုင်းနေသည့် ပြန်ပေးဆွဲမှုများကိုပါ ဗြောင်ကျကျ ကျူးလွန်လျက်ရှိကြောင်း ဒေသတွင်း သတင်းရင်းမြစ်များထံမှ စုံစမ်းသိရှိရသည်။ ဓာတ်ပုံ- ဖားကန့်တွင် ဓားပြတိုက်ခဲ့သည့် စစ်ကောင်စီတပ်ဖွဲ့ဝင်တချို့။

မြန်မာအမျိုးသမီးလိဂ် ဘောလုံးပြိုင်ပွဲတွင် ပြည်ထဲရေးဝန်ကြီးဌာနပိုင် သစ္စာအားမာန် အမျိုးသမီးအသင်းမှ ကစားသမားများကို ထမင်းပင် မကျွေးဘဲ ပြိုင်ပွဲဝင် ခိုင်းနေ ရန်ကုန်၊ ဇွန် ၁၈ မြန်မာအမျိုးသမီးလိဂ်တွင် ပြိုင်ပွဲဝင်နေသော စစ်ကောင်စီလက်အောက်ခံ ပြည်ထဲရေးဝန်ကြီးဌာနပိုင် "သစ္စာအားမာန်" အမျိုးသမီးဘောလုံးအသင်းတွင် ကစားသမားများကို မည်သည့်ထောက်ပံ့မှုမျှ မလုပ်ပေးသည့်အပြင် ထမင်းပင်နပ်မှန်အောင်မကျွေးဘဲ ဝင်ရောက်ယှဉ်ပြိုင်ခိုင်းနေကြောင်း အသင်း၏နောက်ခံလူ ဒီဇင်ဘာနှင်းက ရုပ်သံအင်တာဗျူးတွင် ဖွင့်ချပြောဆိုလိုက်သည်။ ဇွန်လ ၁၇ ရက်နေ့က ယှဉ်ပြိုင်ကစားခဲ့သည့် မြန်မာအမျိုးသမီးလိဂ် ပွဲစဉ် (၁) ၏ နောက် ဆုံးပွဲစဉ်တွင် သစ္စာအားမာန်အသင်းသည် ဧရာဝတီအက်ဖ်စီ အမျိုးသမီးအသင်းကို ၄ ဂိုး - ဂိုးမရှိဖြင့် ဂိုးပြတ်အရေးနိမ့်ခဲ့သည်။ အဆိုပါ ပွဲပြီးရုပ်သံအင်တာဗျူးတွင် သစ္စာအားမာန်အသင်း နောက်ခံလူ ဒီဇင်ဘာနှင်းက ၎င်းတို့အသင်း ကြုံတွေ့နေရသည့် ဝတ်စုံထောက်ပံ့မှုမရှိခြင်း၊ စားသောက်ရေး အခက်အခဲများနှင့် လေ့ကျင့်ရေးပိုင်း ပြင်ဆင်မှု အားနည်းချက်များကို ထုတ်ဖော်ရင်ဖွင့်ခဲ့သည်။ "အားနည်းတာကတော့ အများကြီးပါပဲ။ အသင်းဘက်က ဝတ်စုံတွေဘာတွေကအစ အကုန် လုံးပေါ့၊ ထောက်ပံ့မှုမရှိဘူး။ အခုထမင်းစားရပြီး နောက်နေ့ကျ ထမင်းမစားရတဲ့နေ့တွေတောင်ရှိတယ်။ Training ကာလမှာ ကိုယ့်ဘာသာကိုယ် ကိုယ့်ထမင်းကိုယ်စားပြီး လေ့ကျင့်ရေးဆင်းခဲ့ရတာတွေရှိတယ်။ အားနည်းချက်တွေက အများကြီးပါပဲ။ လူလည်းမရှိဘူး။ လေ့ကျင့်ရေးတောင် တစ်ရက်တစ်ကြိမ် မနည်းနပ်မှန်အောင် ဆင်းနေရတာ။ သူများတွေလို ကွင်းထဲမှာဆို ဘာမှလူလဲစရာမရှိဘူး။ ကစားပုံလွဲတာကတော့ သေချာလေး လေ့ကျင့်ရေးမလုပ်ဖြစ်လို့ ထင်ပါတယ်။ ပြီးတော့လည်း ဒီလက်ရွေးစင်တွေက သေချာလေး မပူးပေါင်းရသေးဘူးပေါ့။ အဲဒီလိုမျိုး လေ့ကျင့်ရေးတွေ သေချာမဆင်းရသေးတာ ရှိနေတယ်။ အသင်းဖော်တွေကတော့ အကုန်လုံး ကြိုးစားကြပါတယ်" ဟု နောက်ခံလူ ဒီဇင်ဘာနှင်းက ပြောကြားခဲ့သည်။ သစ္စာအားမာန်အသင်းသည် မြန်မာအမျိုးသမီးလိဂ်တွင် ပုံမှန်အားဖြင့် အဆင့် ၁ မှ အဆင့် ၃ အတွင်း အမြဲဝင်ရောက်လေ့ရှိသည့် အသင်းကြီးတစ်သင်းဖြစ်ပြီး မြန်မာလက်ရွေးစင်ကစားသမား အများစု ပါဝင်နေသော်လည်း ယခုရာသီသစ် အဖွင့်ပွဲတွင်မူ စီမံခန့်ခွဲမှု အား နည်းချက်များကြောင့် ဂိုးပြတ်အရှုံးနှင့် စတင်ခဲ့ရခြင်း ဖြစ်သည်။ ပြီးခဲ့သည့်ရက်ပိုင်းက မြန်မာအမျိုးသမီးလိဂ်သည် ကုမ္ပဏီများနှင့် စပွန်ဆာစာချုပ် ချုပ်ဆိုနိုင်ခဲ့သဖြင့် ယခုကျင်းပမည့် ၂၀၂၆-၂၀၂၇ ရာသီတွင် ဆုကြေးငွေများကို သိသိသာသာ တိုးမြှင့်ထားကြောင်း သိရသည်။ ပြိုင်ပွဲ၏ ချန်ပီယံအသင်းကို ငွေကျပ်သိန်း ၁,၀၀၀ အထိ ချီးမြှင့်မည်ဖြစ်ပြီး အဆင့် ၁၀ အထိ အနည်းဆုံး ငွေကျပ် ၇၅ သိန်းအထိ ရရှိမည် ဖြစ်သည်။ ထို့ပြင် ပြိုင်ပွဲဝင်အသင်းများ ရေရှည်ဖွံ့ဖြိုးတိုးတက်စေရန်နှင့် ပရော်ဖက်ရှင်နယ်စံနှုန်းများ မြှင့်တင်ရန် ရည်ရွယ်၍ ကလပ်အသင်းတစ်သင်းလျှင် အခြေခံထောက်ပံ့ငွေ ကျပ်သိန်း ၅၀၀ စီ ကို ကြိုတင်ထောက်ပံ့ပေးထားသည့်အပြင်၊ သတ်မှတ်ချက် criteria များနှင့် ညီ ညွတ်ပါက ကလပ်ဖွံ့ဖြိုးရေးထောက်ပံ့ကြေး (Club Development Subsidy) အဖြစ် အများ ဆုံး ငွေကျပ်သိန်း ၂၀၀ အထိ ထပ်မံထောက်ပံ့ပေးရန် ကြေညာထားသည်။ သို့သော်လည်း စစ်ကောင်စီ၏ ပြည်ထဲရေးဝန်ကြီးဌာန လက်အောက်ခံ သစ္စာအားမာန်အသင်းသည် အဆိုပါ သိန်းရာချီသည့် လိဂ်ထောက်ပံ့ကြေးများကို ကစားသမားများထံ ထိရောက်စွာ အသုံးမပြုဘဲ ဝတ်စုံနှင့် အခြေခံစားသောက်ရေး ထမင်းတစ်နပ်စာကိုပင် စနစ် တကျ စီမံပေးခြင်းမရှိဘဲ ကစားသမားများကို ပစ်ပယ်ထားကြောင်း သိရှိရသည်။

အမျိုးသားစာပေဆုရှင် စာရေးဆရာ တင်ညွန့်နှင့်သား ၁ ဦးကို အင်းစိန်ထောင်အထူး တရားရုံးက နိုင်ငံတော်အကြည်ညိုပျက်စေမှုဖြင့် ထောင်ဒဏ် ၃ နှစ်ချမှတ် ရန်ကုန်၊ ဇွန် ၁၈ မြန်မာစာပေလောက၏ အမျိုးသားစာပေဆုရှင် စာရေးဆရာ တင်ညွန့်နှင့် သား ၁ ဦးကို အင်းစိန်ထောင်တွင်းရှိ အထူးတရားရုံးက နိုင်ငံတော်အကြည်ညိုပျက်စေမှုဖြင့် ထောင်ဒဏ် ၃ နှစ်ချမှတ်လိုက်ကြောင်း မိသားစုဝင်နှင့်နီးစပ်သူတစ်ဦးက ရန်ကုန်ခေတ်သစ်သတင်း ဌာနထံသို့ ပြောကြားသည်။ ယနေ့ ဇွန်လ ၁၈ ရက်နေ့တွင် ရန်ကုန်မြို့၊ အင်းစိန်မြို့နယ်ရှိ အင်းစိန်အကျဉ်းထောင်အတွင်း၌ ဖွင့် လှစ်ထားသော စစ်ကောင်စီ၏ အထူးတရားရုံးက စာရေးဆရာ တင်ညွန့်နှင့် သား အငယ် တို့ကို နိုင်ငံတော်အကြည်အညိုပျက်စေမှု ဥပဒေပုဒ်မ ၅၀၅ - ကဖြင့် ထောင်ဒဏ် ၃ နှစ်ချမှတ် လိုက်ခြင်းဖြစ်သည်။ “ဒီနေ့ပဲ အင်းစိန်အကျဉ်းထောင်ထဲမှာရှိတဲ့ အထူးတရားရုံးက အမိန့်ချလိုက်တာ၊ ဆရာဦးတင်ညွန့်နဲ့ သူ့သားအငယ်ပါတယ်။ ထောင်ဒဏ် ၃ နှစ်ချလိုက်တယ်။ ကျန်တာတော့ မသိရသေးဘူး” ဟု မိသားစုနှင့် နီးစပ်သူတစ်ဦးက ရန်ကုန်ခေတ်သစ်သတင်း ဌာနထံသို့ ပြောကြားသည်။ ရန်ကုန်တိုင်း သန်လျင်မြို့နယ်တွင် နေထိုင်သော စာရေးဆရာဦးတင်ညွန့်ကို ဧပြီလ ၂၃ ရက် နံနက် ၂ နာရီခန့်အချိန် စစ်တပ်က လာရောက်ဖမ်းဆီးသွားခြင်းဖြစ်ပြီး ၂၀၁၅ ခုနှစ်နှင့် ၂၀၂၀ ခုနှစ်တို့တွင် ရေးသားထုတ်ဝေခဲ့သည့် ခွေးထိန်း ငတာ၊ ဗိုလ်ချုပ်တွေ ကျွန်တော့်ကို ညာခဲ့သည်၊ ဦး သန်းရွှေ၏ ယတြာများ စာအုပ်တို့နှင့် အဓိကဆက်စပ်ကာ ဖမ်းဆီးခဲ့ခြင်းဖြစ်ကြောင်း သိရသည်။ စာရေးဆရာ တင်ညွန့်သည် ၂၀၁၇ ခုနှစ် “အမျိုးသားစာပေဆု” ကို “ကျောင်းဆရာမှတ် တမ်း” စာအုပ်ဖြင့် “စာပ ဒေသာ ဆု” ရရှိခဲ့သော စာရေးဆရာတစ်ဦးဖြစ်ပြီး နိုင်ငံတော် ၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့် တွေ့ဆုံခွင့်ရရှိသော စာရေးဆရာတစ်ဦးလည်းဖြစ်သည်။ စာရေးဆရာတင်ညွန့်သည် အသက် ၇၁ နှစ်ရှိနေပြီဖြစ်ပြီး ဘ၀တစ်လျှောက်လုံး ကျောင်း ဆရာအဖြစ် လုပ်ကိုင်ခဲ့သူဖြစ်သည်။ ၁၉၈၁ ခုနှစ်တွင် ပညာရေးဌာန၌ မူလတန်းပြဆရာအဖြစ် စတင်အမှုထမ်းခဲပြီး ၊အလယ်တန်းပြကျောင်းဆရာ၊ အထက်တန်းပြ ကျောင်းဆရာအဖြစ် ဆောင်ရွက်ခဲ့ကာ ၂၀၀၁ ခုနှစ်တွင် ကျောင်းဆရာအဖြစ်မှ အငြိမ်းစားယူခဲ့သည်။ ယင်းနောက် စာပေလောကတွင် ကျင်လည်ပြီး ကွန်ပျူတာဂျာနယ်၊ ကြီးပွားရေးမဂ္ဂဇင်း၊ မျက်မှောက်ရေးရာ မဂ္ဂဇင်း၊ Personal Computer မဂ္ဂဇင်း၊ Itizen နည်းပညာဂျာနယ်၊ The Voice တို့တွင် အယ်ဒီတာအဖြစ် တာဝန်ထမ်းဆောင်ခဲ့သည်။ ၂၀၁၁ ခုနှစ်တွင် “လူငယ်နှင့်အတွေးအမြင်” စာအုပ်ဖြင့် ထွန်းဖောင်ဒေးရှင်းအဖွဲ့က ပေး အပ်သော လူငယ်စာပေဆုကိုရရှိခဲ့ပြီး ၂၀၁၂ ခုနှစ်တွင် “ဒီမိုကရေစီ ပါရာဒိုင်း” စာအုပ်ဖြင့် သုတစွယ်စုံ နိုင်ငံရေးစာပေဆုများကို ရရှိခဲ့သည်။ ကျော်ဗလ၊ မောင်ခေတ်စသည့် ကလောင်ခွဲများဖြင့်လည်း စာရေးခဲ့ပြီး စာအုပ်ပေါင်း ၅၀ ကျော်ရေးသားခဲ့ပြီးဖြစ်သည်။

ထိုင်းနိုင်ငံတွင် မြန်မာစစ်ဘေးရှောင်ဒုက္ခသည်များအတွက် အထောက်အထားသက်သေခံကတ်ပြားများ စတင်ထုတ်ပေး ရန်ကုန်၊ ဇွန် ၁၈ ထိုင်းနိုင်ငံအစိုးရသည် မြန်မာနိုင်ငံမှ လက်နက်ကိုင်ပဋိပက္ခများကြောင့် ထွက်ပြေးလာပြီး နယ်စပ်ဒေသရှိ ယာယီခိုလှုံရေးစခန်းများတွင် နေထိုင်လျက်ရှိသည့် စစ်ဘေးရှောင်ဒုက္ခသည်များအတွက် အထောက်အထားသက်သေခံကတ်ပြားများ စတင်ထုတ်ပေးသည့် အစီအစဉ်ကို ယနေ့ ဇွန်လ ၁၈ ရက်နေ့တွင် တရားဝင် စတင်လိုက်ကြောင်း သိရသည်။ အဆိုပါ အစီအစဉ် စတင်သည့် အခမ်းအနားကို ရတ်ချဘူရီခရိုင်၊ ဆွမ်ဖုန်ခရိုင်ရုံး၌ ကျင်းပခဲ့ပြီး ထိုင်းနိုင်ငံ ပြည်ထဲရေးဝန်ကြီးဌာန လက်အောက်ရှိ ပြည်နယ်အုပ်ချုပ်ရေးဌာန ညွှန်ကြားရေးမှူးချုပ် နရူချာ ကိုဆာဆစ်ဝီလိုင်းက ဦးဆောင်ဖွင့်လှစ်ခဲ့သည်။ အခမ်းအနားသို့ ရတ်ချဘူရီခရိုင်ဝန်၊ ဒုတိယခရိုင်ဝန်၊ ပြည်နယ်အုပ်ချုပ်ရေးဌာန တာဝန်ရှိသူများ၊ သက်ဆိုင်ရာ အစိုးရဌာနများမှ ကိုယ်စားလှယ်များ၊ ခရိုင်အုပ်ချုပ်ရေးမှူးများနှင့် ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) ၏ ထိုင်းနိုင်ငံဆိုင်ရာ ကိုယ်စားလှယ်တို့ တက်ရောက်ခဲ့ကြသည်။ ထိုင်းအစိုးရအနေဖြင့် ၁၉၈၄ ခုနှစ်ကတည်းက မြန်မာနိုင်ငံတွင် ဖြစ်ပွားနေသော ပဋိပက္ခများကြောင့် နယ်စပ်ဒေသသို့ ထွက်ပြေးလာသူများကို လူသားချင်းစာနာထောက်ထားမှု အခြေခံမူများအရ လက်ခံကာ ယာယီနေထိုင်ခွင့်ပေးထားကြောင်း သိရသည်။ သို့သော် စစ်ဘေးရှောင်ဒုက္ခသည်များကို ထိရောက်စွာ စီမံခန့်ခွဲနိုင်ရန် တိကျမှန်ကန်ပြီး ခေတ်မီသော လူဦးရေစာရင်းနှင့် ကိုယ်ရေးအချက်အလက် စိစစ်မှုစနစ်များ လိုအပ်လာသဖြင့် ယခုကဲ့သို့ သက်သေခံကတ်ပြားများ ထုတ်ပေးခြင်းဖြစ်ကြောင်း ထိုင်းအာဏာပိုင်များက ပြောကြားသည်။ ထိုင်းအစိုးရက ၂၀၂၆ ခုနှစ်အတွက် အထူးခွင့်ပြုချက်ဖြင့် ထိုင်းနိုင်ငံအတွင်း နေထိုင်ခွင့်ရရှိထားသည့် နယ်မြေသတ်မှတ်ဒေသများရှိ နိုင်ငံခြားသားများကို မှတ်ပုံတင်ခြင်းနှင့် သက်သေခံကတ်ပြား ထုတ်ပေးခြင်းဆိုင်ရာ စည်းမျဉ်းသစ်များကို ပြဋ္ဌာန်းခဲ့ပြီး ယင်းစည်းမျဉ်းများအရ အချက်အလက် စိစစ်အတည်ပြုပြီးသူများကို ကတ်ပြားထုတ်ပေးမည်ဖြစ်ကြောင်း သိရသည်။ အဆိုပါ သက်သေခံကတ်ပြားများကို အစိုးရဌာနများနှင့် ဆက်သွယ်ဆောင်ရွက်ရာတွင်လည်းကောင်း၊ အစိုးရဝန်ဆောင်မှုများ ရယူရာတွင်လည်းကောင်း အသုံးပြုနိုင်မည်ဖြစ်ပြီး အစိုးရထုတ်ပေးထားသည့် အခြားခွင့်ပြုစာရွက်စာတမ်းများနှင့် တွဲဖက်အသုံးပြုရမည်ဖြစ်ကြောင်း သိရသည်။ ထိုင်းနိုင်ငံဆိုင်ရာ UNHCR ကိုယ်စားလှယ်က ယခုအစီအစဉ်သည် ဒုက္ခသည်များ၏ ဘဝ၊ ဂုဏ်သိက္ခာနှင့် အနာဂတ်အတွက် အရေးပါသော ခြေလှမ်းတစ်ရပ်ဖြစ်ကြောင်း ပြောကြားသည်။ ၎င်းက သက်သေခံကတ်ပြားများသည် ကျန်းမာရေးဝန်ဆောင်မှုများ၊ ဘဏ္ဍာရေးဝန်ဆောင်မှုများ၊ ဆက်သွယ်ရေးကဏ္ဍများ၊ အလုပ်အကိုင်အခွင့်အလမ်းများနှင့် အခြားလူမှုဘဝဆိုင်ရာ အခွင့်အရေးများ ရရှိနိုင်ရန် အထောက်အကူပြုမည်ဖြစ်ကြောင်း ပြောဆိုသည်။ ထို့ပြင် ယင်းစနစ်သည် လုံခြုံရေးကို တိုးမြှင့်ပေးရုံသာမက ဒုက္ခသည်များ၏ နေ့စဉ်ဘဝတွင် လွတ်လပ်စွာ ဆုံးဖြတ်နိုင်မှု၊ ကိုယ်တိုင်ရပ်တည်နိုင်မှုနှင့် အနာဂတ်အစီအစဉ်များ ချမှတ်နိုင်မှုကိုလည်း အားပေးကူညီပေးမည်ဖြစ်ကြောင်း ၎င်းက ဆိုသည်။ ထိုင်း ပြည်နယ်အုပ်ချုပ်ရေးဌာန ညွှန်ကြားရေးမှူးချုပ် နရူချာကမူ သက်သေခံကတ်ပြား ထုတ်ပေးခြင်း၏ အဓိကရည်ရွယ်ချက်မှာ ဒုက္ခသည်များ၏ အထောက်အထားများကို တိကျစွာ စိစစ်နိုင်ရန်၊ မည်သူဖြစ်ကြောင်း၊ မည်သည့်နေရာတွင် နေထိုင်ကြောင်းနှင့် မည်သည့်အခြေအနေဖြင့် ထိုင်းနိုင်ငံအတွင်း နေထိုင် သို့မဟုတ် အလုပ်လုပ်ကိုင်ခွင့် ရရှိထားကြောင်း အတည်ပြုနိုင်ရန်ဖြစ်ကြောင်း ပြောကြားသည်။ ယင်းအချက်အလက်များသည် စီမံခန့်ခွဲမှု၊ စောင့်ကြည့်ထိန်းသိမ်းမှု၊ ဥပဒေစိုးမိုးရေးလုပ်ငန်းများနှင့် အမျိုးသားလုံခြုံရေးအတွက် အကျိုးပြုမည်ဖြစ်ကြောင်းလည်း ၎င်းက ဆိုသည်။ ထို့ပြင် ယခုထုတ်ပေးမည့် သက်သေခံကတ်ပြားသည် လူဦးရေစာရင်းစီမံခန့်ခွဲမှုနှင့် အထောက် အထားစိစစ်ရေးအတွက်သာ ဖြစ်ပြီး ထိုင်းနိုင်ငံသားအဖြစ် အသိအမှတ်ပြုခြင်း မဟုတ်ကြောင်း၊ ထိုင်းနိုင်ငံသားများ ရရှိသည့် အခွင့်အရေးများကိုလည်း ပေးအပ်ခြင်းမရှိကြောင်း ထိုင်းအစိုးရက အထူးအလေးပေး ပြောကြားထားသည်။

တောင်သာတွင် စစ်တပ်က ပြည်သူ ၉ ဦးထက်မနည်းကို သတ်ဖြတ်ပြီး ကျေးရွာများကို မီးရှို့ဖျက်ဆီး၊ ပွင့်ဖြူရှိ ကျေးရွာများကိုလည်း စစ်တပ်က လက်နက်ကြီးဖြင့် ပစ်ခတ် ရန်ကုန်၊ ဇွန် ၁၈ မန္တလေးတိုင်း၊ တောင်သာမြို့နယ်အတွင်း စစ်ကောင်စီတပ် စစ်ကြောင်းတစ်ခုက ပြည်သူ ၉ ဦးထက်မနည်းကို ဖမ်းဆီးသတ်ဖြတ်ခဲ့ပြီး ကျေးရွာ ၄ ရွာထက်မနည်းကို မီးရှို့ဖျက်ဆီးထားသည့်အပြင် ကျေးရွာ ၁၀ ရွာခန့်မှ ဒေသခံထောင်နှင့်ချီ ဘေးလွတ်ရာသို့ ထွက်ပြေးတိမ်းရှောင်နေရကြောင်း ဒေသခံများထံမှ သိရသည်။ ဒေသခံများ၏ ပြောကြားချက်အရ မေလ ၃၁ ရက်နေ့ နံနက်ပိုင်းမှစတင်၍ အင်အား ၈၀၀ ခန့်ပါဝင်သည့် စစ်ကောင်စီတပ်စစ်ကြောင်းသည် ဝဲလောင်တိုက်နယ်အတွင်းသို့ ဝင်ရောက်လာပြီး ကျောက်ပန်းတောင်း-တောင်သာနယ်စပ်၊ ငါးသရောက်-တောင်သာနယ်စပ်၊ ဝဲလောင်-တောင်သာလမ်းပိုင်းနှင့် ဘုရားလှကျေးရွာဘက်သို့ စစ်ကြောင်းများခွဲကာ နယ်မြေရှင်းလင်းရေးအမည်ဖြင့် ကျေးရွာများကို ဆက်တိုက် ဝင်ရောက်စီးနင်းခဲ့ကြောင်း သိရသည်။ ယင်းစစ်ကြောင်းသည် ဇွန်လ ၁ ရက်နေ့တွင် တောင်သာ-ဝဲလောင်လမ်းပိုင်းရှိ ကိုင်းချောင်းတံတားအနီး လမ်းပိတ်စစ်ဆေးမှုများ ပြုလုပ်စဉ် လမ်းသွားလမ်းလာ ပြည်သူ ၇ ဦးကို ဖမ်းဆီးသတ်ဖြတ်ခဲ့ပြီး ရုပ်အလောင်းများကို မီးရှို့ဖျောက်ဖျက်ခဲ့ကြောင်း ဒေသခံများက ပြောသည်။ ထို့ပြင် အင်းတဲကျေးရွာမှ ၁၂ တန်းကျောင်းသား ၂ ဦးကိုလည်း စစ်တပ်က ဖမ်းဆီးခေါ်ဆောင်သွားပြီး နတ်စောင့်ကျေးရွာအနီးတွင် သတ်ဖြတ်ခဲ့ကြောင်း ဒေသသတင်းရင်းမြစ်များထံမှ သိရသည်။ “စစ်ကောင်စီတပ် အင်အားက ၈၀၀ လောက်ရှိတယ်။ စစ်ကြောင်းတွေ ခွဲပြီး နေရာအနှံ့ စစ်ကြောင်းထိုးနေတာပါ။ ကိုင်းချောင်းတံတားအနီးမှာ ပြည်သူ ၇ ဦးကို သတ်ဖြတ်ခဲ့သလို အင်းတဲရွာက ၁၂ တန်းကျောင်းသား ၂ ဦးကိုလည်း ဖမ်းဆီးခေါ်ဆောင်သွားပြီး သတ်ဖြတ်ထားတယ်လို့ သိရတယ်” ဟု ဒေသသတင်းရင်းမြစ်က ပြောသည်။ စစ်တပ်က ဇွန်လ ၂ ရက်နေ့မှစတင်၍ ယနေ့အချိန်အထိ ကျေးရွာများအတွင်း စစ်ကြောင်းထိုးလျက်ရှိပြီး ထန်းကျင်းကျေးရွာ၊ ကျားမတွင်းကျေးရွာ၊ ထန်းပင်ခြံကျေးရွာနှင့် ညောင်ကုန်းကျေးရွာတို့အပါအဝင် ကျေးရွာအချို့ကို မီးရှို့ဖျက်ဆီးခဲ့ကြောင်း သိရသည်။ ယင်းစစ်ကြောင်းကြောင့် ကျေးရွာ ၁၀ ရွာခန့်မှ ဒေသခံထောင်နှင့်ချီ ဘေးလွတ်ရာသို့ ထွက်ပြေးတိမ်းရှောင်နေရပြီး လက်ရှိတွင် စစ်ကြောင်း၏ တစ်စိတ်တစ်ပိုင်း ပြန်လည်ဆုတ်ခွာသွားသော်လည်း ဝဲလောင်-တောင်သာ လမ်းပိုင်းတစ်လျှောက်၌ ဆက်လက်တပ်စွဲထားကာ စစ်ရေးလှုပ်ရှားမှုများ ဆက်လက်လုပ်ဆောင်နေကြောင်း ဒေသခံများက ပြောသည်။ ဒေသခံများ၏ အဆိုအရ ဧပြီလအတွင်းကလည်း စစ်ကောင်စီတပ်သည် တောင်သာမြို့နယ်ရှိ ဆည်ကုန်းကျေးရွာ၊ ထန်းပင်ကုန်းကျေးရွာတောရိုး၊ သံချေးကုန်းကျေးရွာ၊ ရုံးစည်ကြီးကျေးရွာ၊ သံဘိုကျေးရွာနှင့် ခလဗျားကျေးရွာတို့ကို ဆက်တိုက် မီးရှို့ဖျက်ဆီးခဲ့ဖူးကြောင်း သိရသည်။ အလားတူ မကွေးတိုင်း၊ ပွင့်ဖြူမြို့နယ်ရှိ ကျေးရွာများကိုလည်း စစ်တပ်က တိုက်ပွဲဖြစ်ပွားခြင်းမရှိဘဲ လက်နက်ကြီးများဖြင့် ပစ်ခတ်တိုက်ခိုက်ခဲ့သောကြောင့် ဒေသခံထောင်နှင့်ချီ ညတွင်းချင်း ထွက်ပြေးတိမ်းရှောင်ခဲ့ရကြောင်း သိရသည်။ ဇွန်လ ၁၇ ရက်နေ့ ည ၁၀ နာရီခွဲခန့်တွင် ပွင့်ဖြူမြို့ရှိ ဝါစိုက်ပျိုးရေးတပ်မှ စစ်ကောင်စီတပ်ဖွဲ့ဝင်များက ညောင်ပင်စောက်ကျေးရွာနှင့် မုန်းဇလဲကျေးရွာများဘက်သို့ လက်နက် ကြီးများဖြင့် ပစ်ခတ်ခဲ့ကြောင်း ဒေသခံများက ပြောသည်။ “တိုက်ပွဲဖြစ်တာမရှိဘဲ လက်နက်ကြီးတွေနဲ့ ပစ်ခတ်တာဖြစ်ပါတယ်။ ထိခိုက်ပျက်စီးမှု အခြေအနေကိုတော့ မသိရသေးဘူး။ ဒါပေမဲ့ ညောင်ပင်စောက်နဲ့ မုန်းဇလဲကျေးရွာက ပြည်သူထောင်နဲ့ချီပြီး ညတွင်းချင်း ဘေးလွတ်ရာ ထွက်ပြေးတိမ်းရှောင်ခဲ့ရတယ်” ဟု ဒေသပြည်သူတစ်ဦးက ပြောသည်။ လက်ရှိတွင် အဆိုပါဒေသများ၌ စစ်ရေးတင်းမာမှုများ ဆက်လက်ရှိနေပြီး ဒေသခံများမှာ နေရပ်မပြန်နိုင်သေးဘဲ ဘေးလွတ်ရာနေရာများတွင် တိမ်းရှောင်နေရဆဲဖြစ်ကြောင်း သိရသည်။ ဓာတ်ပုံ- အကြမ်းဖက်စစ်တပ်က ပြည်သူများနေထိုင်သော ကျေးရွာများကို မီးရှို့ဖျက်ဆီးနေစဉ်။ (ပုံအဟောင်းကို အသုံးပြုထားပါသည်။)

မြန်မာနိုင်ငံတွင် မူးယစ်ဆေးထုတ်လုပ်သည့်နေရာ ၁၃ ခု ဖျက်ဆီးနိုင်ခဲ့ဟု တရုတ်မူးယစ်ဆေးဝါးကော်မရှင်ပြော ရန်ကုန်၊ဇွန် ၁၈ မြန်မာနိုင်ငံအတွင်း မူးယစ်ဆေးထုတ်လုပ်သည့်နေရာ ၁၃ ခုကို မြန်မာစစ်တပ်နှင့် ရဲတပ်ဖွဲ့တို့က တရုတ်နိုင်ငံမှ ပေးပို့သည့် သတင်းအချက်အလက်များအပေါ် အခြေခံ၍ ဖျက်ဆီးနိုင်ခဲ့ကြောင်း တရုတ်နိုင်ငံ မူးယစ်ဆေးဝါးထိန်းချုပ်ရေးအမျိုးသားကော်မရှင် (China National Narcotics Control Commission) က ဇွန်လ ၁၇ ရက်နေ့ သတင်းစာရှင်းလင်းပွဲတွင် ထုတ်ပြန်ပြောကြားသည်။ မြန်မာနိုင်ငံအတွင်း မူးယစ်ဆေးထုတ်လုပ်သည့်နေရာ ၁၃ ခုကို မြန်မာစစ်တပ်နှင့် ရဲတပ်ဖွဲ့တို့က တရုတ်နိုင်ငံမှ ပေးပို့သည့် ထောက်လှမ်းရေးသတင်းအချက်အလက်များအပေါ် အခြေခံ၍ ဖျက်ဆီးနိုင်ခဲ့ကြောင်း တရုတ်နိုင်ငံ မူးယစ်ဆေးဝါးထိန်းချုပ်ရေးအဖွဲ့က သတင်းစာရှင်းလင်းပွဲတွင် ပြောကြားသည်။ တရုတ်ပြည်သူ့လုံခြုံရေးဝန်ကြီးဌာန မူးယစ်ဆေးဝါးထိန်းချုပ်ရေးဗျူရို၏ အမှုဆောင် ဒုညွှန်ကြားရေးမှူး ဝေရှောင်ကျွန်းက အဆိုပါ စစ်ဆင်ရေးသည် မြန်မာနိုင်ငံအတွင်း စံချိန်တင် အကြီးမားဆုံး မူးယစ်ဆေးဖမ်းဆီးမှု ဖြစ်ကြောင်း ပြောကြားသည်။ ၎င်းက ယခုဝင်ရောက်စီးနင်းမှုသည် မူးယစ်ဆေးထုတ်လုပ်ရေးစက်ရုံများ အများအပြားကို တစ်ပြိုင် နက် ဖျက်ဆီးနိုင်ခဲ့သည့်အပြင် မူးယစ်ဆေးထုတ်လုပ်ရာတွင် အသုံးပြုသည့် ပစ္စည်းပမာဏအလွန်များပြားစွာ သိမ်းဆည်းရမိခဲ့သည့် ဖြစ်စဉ်ဖြစ်ကြောင်း ဆိုသည်။ ၎င်း၏ ပြောကြားချက်အရ ၂၀၂၆ ခုနှစ် ဇန်နဝါရီလအတွင်း တရုတ်နိုင်ငံမှ ပေးပို့သည့် သတင်းအချက်အလက်များအပေါ် အခြေခံ၍ မြန်မာစစ်တပ်နှင့် ရဲတပ်ဖွဲ့တို့က မြန်မာနိုင်ငံမြောက်ပိုင်းတွင် မူးယစ်ဆေးထုတ်လုပ်မှု၊ သယ်ယူရောင်းဝယ်မှုနှင့် ကျားဖြန့် အွန်လိုင်းလိမ်လည်မှုလုပ်ငန်းများကို တစ်ပြိုင်နက်တည်း တိုက်ဖျက်သည့် စစ်ဆင်ရေးတစ်ခု လုပ်ဆောင်ခဲ့ကြောင်း သိရသည်။ အဆိုပါ စစ်ဆင်ရေးအတွင်း မူးယစ်ဆေးထုတ်လုပ်ရေးနေရာ ၁၃ ခုကို ဖျက်ဆီးနိုင်ခဲ့ပြီး မက်သာဖက်တမင်း ၂ ဒသမ ၄၇ တန်၊ ထိန်းချုပ်ထားသော ဓာတုပစ္စည်းများ ၄၉၀ တန်၊ ထိန်းချုပ်မထားသော ဓာတုပစ္စည်းများ ၉၅၂ တန်နှင့် မူးယစ်ဆေးထုတ်လုပ်ရာတွင် အသုံးပြုသည့် စက်ကိရိယာ ၈၃ ခုကို သိမ်းဆည်းရမိခဲ့ကြောင်း ထုတ်ပြန်ထားသည်။ တရုတ်အရာရှိက ယခုလုပ်ဆောင်မှုသည် တရုတ်နှင့် မြန်မာနိုင်ငံအကြား မူးယစ်ဆေးဝါးတိုက်ဖျက်ရေး ပူးပေါင်းဆောင်ရွက်မှုတွင် အရေးပါသည့် တိုးတက်မှုတစ်ခုဖြစ်ကြောင်း ပြောကြားသည်။ ၎င်းက နယ်စပ်ဖြတ်ကျော် မူးယစ်ဆေးဝါးတိုက်ဖျက်ရေးပူးပေါင်းဆောင်ရွက်မှုသည် နှစ်နိုင်ငံအကြား အချက်အလက်မျှဝေမှုနှင့် ပူးတွဲဥပဒေစိုးမိုးရေးလုပ်ငန်းများအတွက် အတွေ့အကြုံသစ်များ ပေးစွမ်းနိုင်ခဲ့ကြောင်းလည်း ဆိုသည်။ တရုတ်အာဏာပိုင်များ၏ အဆိုအရ ၂၀၂၅ ခုနှစ်အစပိုင်းမှစ၍ မြန်မာနိုင်ငံအစိုးရ မူးယစ်ဆေးတိုက်ဖျက်ရေးအဖွဲ့များနှင့် ဆက်သွယ်ညှိနှိုင်းမှုများ ပြုလုပ်ခဲ့ပြီး မြောက်ပိုင်းဒေသရှိ မူးယစ်ဆေးထုတ်လုပ်မှုနှင့်ပတ်သက်သည့် သတင်းအချက်အလက်များကို မျှဝေခဲ့ကြောင်း သိရသည်။ လာမည့်ကာလတွင်လည်း နှစ်နိုင်ငံပူးပေါင်းဆောင်ရွက်မှုများကို ပိုမိုတိုးမြှင့်သွားမည်ဖြစ်ပြီး သတင်းအချက်အလက်မျှဝေမှု၊ ပူးတွဲစစ်ဆင်ရေးများနှင့် နိုင်ငံတကာအဆင့် မူးယစ်ဆေးတိုက်ဖျက်ရေးပူးပေါင်းမှုများကို ဆက်လက်တိုးချဲ့သွားမည်ဖြစ်ကြောင်း တရုတ်အာဏာပိုင်များက ထုတ်ပြန်ထားသည်။

လွိုင်ကော်ထောင်တွင် အကျဉ်းဦးစီး ဝန်ထမ်း သက်ခိုင်နှင့်ဟန်ထွန်းတို့က နိုင်ငံရေးအကျဉ်း သားများအပေါ် ငွေကြေးကောက်ခံပြီး အဓမ္မလုပ်အားပေး ဖိနှိပ်အနိုင်ကျင့်နေ ရန်ကုန်၊ ဇွန် ၁၈ ကရင်နီပြည်နယ်၊ လွိုင်ကော်မြို့ရှိ စစ်ကောင်စီလက်အောက်ခံ လွိုင်ကော်အကျဉ်းထောင်တွင် အကျဉ်းထောင်တာဝန်ရှိသူအချို့က နိုင်ငံရေးအကျဉ်းသားများအပေါ် ငွေကြေးအဓမ္မကောက်ခံခြင်း၊ ခွဲခြားဆက်ဆံခြင်း၊ အဓမ္မလုပ်အားခိုင်းစေခြင်းနှင့် ကိုယ်ထိလက်ရောက်ကျူးလွန်မှုများ ပြုလုပ်နေကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ပြောကြားသည်။ PPNM ၏ အဆိုအရ လွိုင်ကော်အကျဉ်းထောင်မှ လက်ထောက်ကြီးကြပ်ရေးမှူး သက်ခိုင်သည် ထောင်သို့ ပြန်လည်တာဝန်ထမ်းဆောင်လာပြီးနောက်ပိုင်း အကျဉ်းသားများအပေါ် ခွဲခြားဆက်ဆံမှုနှင့် ဖိနှိပ်မှုများ ပိုမိုဆိုးရွားလာကြောင်း သိရသည်။ သက်ခိုင်သည် ငွေကြေးပေးဆောင်နိုင်သည့် အကျဉ်းသားများနှင့် မပေးဆောင်နိုင်သည့် အကျဉ်းသားများကို ခွဲခြားဆက်ဆံလေ့ရှိပြီး ငွေမပေးနိုင်သူများအား ဆဲဆိုကြိမ်းမောင်းခြင်း၊ ရိုက်နှက်ခြင်းများ ပြုလုပ်နေကြောင်း PPNM က ဆိုသည်။ ထို့ပြင် ထောင်တွင်းလိုအပ်ချက်အမျိုးမျိုးကို အကြောင်းပြကာ အကျဉ်းသားများထံမှ ငွေကြေးများ အတင်းအဓမ္မ ကောက်ခံမှုများလည်း ရှိနေကြောင်း သိရသည်။ အလားတူ အကျဉ်းဦးစီးဌာနမှ ဒုတပ်ကြပ် ဟန်ထွန်းအောင်သည် နိုင်ငံရေးအကျဉ်းသားများအတွက် မိသားစုဝင်များက ပေးပို့သည့် ထောင်ဝင်စာငွေများကို ကာယကံရှင်များထံ အပြည့်အဝ မပေးအပ်ဘဲ ဖြတ်တောက်ရယူမှုများ ရှိနေကြောင်း PPNM က ထုတ်ပြန်ထားသည်။ ထို့ပြင် ထောင်အာဏာပိုင်များက နိုင်ငံရေးအကျဉ်းသားများကို အဓမ္မလုပ်အားခိုင်းစေလျက်ရှိပြီး ပိုမိုသက်သာသည့် အလုပ်များသို့ ပြောင်းရွှေ့လုပ်ကိုင်လိုပါက ငွေကျပ် ၅ သိန်းခန့်အထိ ပေးဆောင်ရန် တောင်းခံမှုများ ရှိကြောင်း သိရသည်။ ငွေကြေးပေးဆောင်နိုင်ခြင်း မရှိသည့် အကျဉ်းသားများမှာ ခိုင်းစေသည့် အလုပ်များကို အပြည့်အဝ လုပ်ကိုင်ရသည့်အပြင် အိပ်ဆောင်များအတွင်း ကောင်းမွန်သည့် နေရာများတွင် နေထိုင်ခွင့်မရဘဲ ကြမ်းပြင်နေရာများတွင်သာ အိပ်စက်နေထိုင်ရကြောင်း PPNM က ပြောသည်။ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) ဦးဆောင်ကော်မတီဝင် မရောင်နီလင်းက အဆိုပါ လုပ်ရပ်များသည် အကျဉ်းသားများ၏ အခြေခံအခွင့်အရေးနှင့် လူ့ဂုဏ်သိက္ခာကို ပြင်းထန်စွာ ချိုးဖောက်နေခြင်းဖြစ်ကြောင်း ပြောကြားသည်။ “လွိုင်ကော်အကျဉ်းထောင်အတွင်းမှာ နိုင်ငံရေးအကျဉ်းသားတွေအပေါ် ငွေကြေးအဓမ္မကောက်ခံတာ၊ ခွဲခြားဆက်ဆံတာ၊ အဓမ္မအလုပ်ခိုင်းစေတာ၊ ဆဲဆိုရိုက်နှက်တာတွေက အကျဉ်းသားအခွင့်အရေးနဲ့ လူ့ဂုဏ်သိက္ခာကို ပြင်းထန်စွာ ချိုးဖောက်တဲ့ လုပ်ရပ်တွေဖြစ်ပါတယ်” ဟု မရောင်နီလင်းက ပြောသည်။ ၎င်းက ဆက်လက်၍ “လူသားတစ်ဦးအနေနဲ့ ရသင့်ရထိုက်တဲ့ အခြေခံအခွင့်အရေးတွေကို ခံစားခွင့်ရှိရပါမယ်။ ဒါကြောင့် အခုလို ငွေညှစ်တာ၊ ဖိနှိပ်တာ၊ ကိုယ်ထိလက်ရောက် ကျူးလွန်တာတွေကို တာဝန်ရှိသူတွေအနေနဲ့ စနစ်တကျ စုံစမ်းဖော်ထုတ်ပြီး တာဝန်ခံမှု၊ တာဝန်ယူမှုရှိစွာ အရေးယူဆောင်ရွက်ဖို့ တိုက်တွန်းပါတယ်” ဟု ပြောဆိုသည်။ PPNM ၏ အဆိုအရ လွိုင်ကော်အကျဉ်းထောင်အတွင်း ဖြစ်ပေါ်နေသည့် ငွေညှစ်မှုများ၊ ဖိနှိပ်မှုများနှင့် လူ့အခွင့်အရေးချိုးဖောက်မှုများအပေါ် အကျဉ်းသားများနှင့် ၎င်းတို့၏ မိသားစုဝင်များအကြား မကျေနပ်မှုများ မြင့်တက်လျက်ရှိကြောင်း သိရသည်။ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) အနေဖြင့် နိုင်ငံရေးအကျဉ်းသားများအပေါ် အာဏာပြငွေညှစ်မှုများ၊ လူ့အခွင့်အရေးချိုးဖောက်မှုများနှင့် ထောင်တွင်းအခြေအနေများကို ဆက်လက်စောင့်ကြည့်ကာ ထုတ်ဖော်သွားမည်ဖြစ်ကြောင်း တရားဝင် ကြေညာထားသည်။

Khit Thit သတင်းဌာန၏ ဇွန် ၁၈ ရက် နေ့လယ်ပိုင်း ရုပ်သံသတင်းအစီအစဉ် By ရန်ကုန်ခေတ်သစ် ဒီကနေ့ ဇွန် ၁၈ ရက် နေ့လယ်ပိုင်း တင်ဆက်ပေးမယ့် သတင်းတွေကတော့ မြန်မာနိုင်ငံမှာ တိုက်ပွဲတွေနဲ့ မတည်ငြိမ်မှုတွေ ဖြစ်ပွားနေပေမယ့် တရုတ်နိုင်ငံအနေနဲ့ကတော့ ကျောက်ဖြူရေနက်ဆိပ်ကမ်းနဲ့ မူဆယ်-မန္တလေး ရထားလမ်း အပါအဝင် အဓိကစီမံကိန်းတွေ ဆက်လက် အကောင် အထည်ဖော်မယ်ဆိုပြီး ယမန်နေ့ကပဲ တရုတ် နဲ့ မြန်မာစစ်အုပ်စု နှစ်နိုင်ငံပူးတွဲ ကြေညာချက် ထုတ်ပြန်လာပါတယ်။ ချင်းပြည်နယ် တောင်ပိုင်း တိုက်ပွဲတွေမှာ အကြမ်းဖက် စစ်တပ်က အထိနာနေပြီး လေယာဉ်နဲ့ လူအင်အားဖြည့်တင်းတာတွေနဲ့ ဒဏ်ရာစစ်သားတွေကို ပြန်သယ်တာတွေလုပ်နေတယ်လို့ ယောအလင်းတန်း တာဝန်ရှိသူတစ်ဦးက ရန်ကုန် ခေတ်သစ်ကိုပြောပါတယ်။ ကချင်ပြည်နယ်၊ ရွှေကူမြို့နယ်မှာ အကြမ်းဖက် စစ်တပ်နဲ့ KIA ပူးပေါင်းတပ်တွေအကြား တိုက်ပွဲတွေ ဖြစ်ပွားနေရာမှာ စစ်တပ်က အထိနာနေတဲ့အတွက် KIA/PDF ဝတ်စုံတွေပါ ဝတ်ဆင်ပြီး တိုက်ပွဲ ဖော်ဆောင် ရတဲ့အခြေနေအထိ ဖြစ်နေတယ်လို့ ရွှေကူ PDF တပ်ရင်းက ဇွန်လ ၁၇ ရက်နေ့ဖြစ်တဲ့ မနေ့ကပဲ ထုတ်ပြန်လာပါတယ်။ အမေရိကန်နဲ့ အီရန်နိုင်ငံအကြား ရရှိထားတဲ့ ယာယီငြိမ်းချမ်းရေး သဘောတူညီချက်အရ အီရန်ဟာ နူကလီးဗုံးထုတ်နိုင်တဲ့ သန့်စင်ပြီး ယူရေနီယံ သိုလှောင်မှုတွေကို လျှော့ချ ဖို့ သဘောတူညီလိုက်ပါတယ်။ ဒါဟာ "အမေရိကန် ပြည်ထောင်စုအတွက် အရမ်းကို ကြီးမားတဲ့ အောင်ပွဲတစ်ခုဖြစ်တယ်" လို့ အမေရိကန် အရာရှိတစ်ဦးက သတင်းထောက်တွေကို ပြောတဲ့ သတင်းအပါအဝင် နေ့လယ်ခင်းသတင်း တွေကို တင်ဆက်ပေးပါမယ်။ https://youtu.be/O26amApVirw?si=aW04tAVi2AjR5wXK

ရေးမြို့နယ် ချောင်းနှစ်ခွကျေးရွာရှိ ဂျပန်နီပွန်ဖောင်ဒေးရှင်းက တည်ဆောက်ထားသည့် စစ်ဘေးရှောင်အိမ်ရာများကို စစ်တပ်က လေကြောင်းဗုံးကျဲဖျက်ဆီး ရန်ကုန်၊ ဇွန် ၁၈ မွန်ပြည်နယ်၊ ရေးမြို့နယ် ချောင်းနှစ်ခွကျေးရွာတွင် ဂျပန်နိုင်ငံ နီပွန်ဖောင်ဒေးရှင်းက တည် ဆောက်ပေးထားသည့် စစ်ဘေးရှောင်နေအိမ်များရှိရာနေရာကို အကြမ်းဖက် စစ်တပ်က ဇွန်လ ၁၈ ရက်နေ့ နံနက် ၁ နာရီဝန်းကျင်ခန့်တွင် လေကြောင်းမှ ဗုံးကျဲတိုက်ခိုက်ခဲ့ကြောင်း ဒေသခံသတင်းရင်းမြစ်များနှင့် ရေးဘီလူးတပ်ရင်းမှ တာဝန်ရှိသူတစ်ဦးက ပြောကြားသည်။ စစ်တပ်က တိုက်ပွဲဖြစ်ပွားခြင်းမရှိဘဲ လေကြောင်းမှတစ်ဆင့် ဗုံးကျဲတိုက်ခိုက်ခဲ့ခြင်းဖြစ်ပြီး နေအိမ်အဆောက်အဦးအချို့ ပျက်စီးသွားခဲ့ကြောင်း၊ လူထိခိုက်ဒဏ်ရာရရှိမှု မရှိကြောင်း ဒေသပြည်သူများက ပြောဆိုကြသည်။ ရေးဘီလူးတပ်ရင်းမှ တာဝန်ရှိသူတစ်ဦးက “စစ်ခွေးတွေက တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်ခဲ့တာပါ။ ပြည်သူတွေတော့ ထိခိုက်ဒဏ်ရာရတာတွေတော့ မရှိဘူး။ ဒါပေမယ့် နေအိမ်တော့ ပျက်စီးသွားတယ်။ ည ၁ နာရီ ဝန်းကျင်လောက်လာကျဲသွားတာပါ” ဟု ပြောကြားသည်။ အဆိုပါ နေရာမှာ ဂျပန်နီပွန်ဖောင်ဒေးရှင်းက တည်ဆောက်ပေးခဲ့သော စစ်ဘေးရှောင် အိမ်ရာနေရာဖြစ်ပြီး စစ်တပ်က စစ်ဘေးရှောင်ဒုက္ခသည်များ၏ နေရာပါမကျန်ဗုံးကျဲလာခြင်းဖြစ်သည်ဟု သုံးသပ်ပြောဆိုကြသည်။ “ရေးမြို့နယ် ချောင်းနှစ်ခွကျေးရွာကို ကျဲသွားတာက စစ်ဘေးရှောင်တွေနဲ့ ဒုက္ခသည်နေတဲ့နေရာပေါ့။ ဒုက္ခသည်နေရာတောင် မရှောင်ဘူး” ဟု ရေးဘီလူးတပ်ရင်းမှ တာဝန်ရှိသူက ဆက်လက်ရှင်းပြပြော ဆိုသည်။ သမ္မတ ဦးသိန်းစိန်အစိုးရလက်ထက် ငြိမ်းချမ်းရေးကာလ ဂျပန်နီပွန်ဖောင်ဒေးရှင်းက မွန် ပြည်နယ်အတွင်း စစ်ဘေးရှောင်များအတွက် အထောက်အပံ့အဖြစ် ယင်းစစ်ဘေးရှောင် အိမ်ရာများကို တည် ဆောက်ပေးခဲ့ခြင်းဖြစ်သည်ဟု သိရှိရသည်။ ဂျပန်နီပွန်ဖောင်ဒေးရှင်းသည် အကြမ်းဖက်စစ်တပ်နှင့် အလွန်အဆင်ပြေသော ဂျပန်အခြေစိုက် အကူအညီပေးရေး အဖွဲ့အစည်း တစ်ခုဖြစ်ပြီး သမ္မတဦးသိန်းစိန်အစိုးရခေတ်တွင် မြန်မာ့ငြိမ်းချမ်းရေးအတွက် ထောက်ပံ့မှုများစွာ အကူအညီပေးခဲ့သော အဖွဲ့အစည်းတစ်ခုဖြစ်သည်။

CRPH ကို မြန်မာနိုင်ငံ၏ တရားဝင်လွှတ်တော်အဖြစ် ကမ္ဘာ့လွှတ်တော်အဖွဲ့-IPU က အသိအမှတ် ပြုထားမှုအပေါ် အကြမ်းဖက် ခင်ရီ မကျေမနပ်ဖြစ်နေ 🟥ကြံ့ဖွတ်လွှတ်တော်ကို နိုင်ငံတကာလွှတ်တော်များက အသိအမှတ်ပြုရေး လုပ်မည်ဟု ခင်ရီ ကြွေးကြော် ရန်ကုန်၊ ဇွန် ၁၈ ပြည်ထောင်စုလွှတ်တော်ကိုယ်စားပြုကော်မတီ-CRPH ကို မြန်မာနိုင်ငံ၏ တရားဝင်လွှတ်တော်အဖြစ် အသိ အမှတ်ပြုထားမှုအပေါ် အကြမ်းဖက် ခင်ရီက မကျေနပ်ဘဲ ကြံ့ဖွတ်လွှတ်တော်ကို နိုင်ငံတကာက အသိအမှတ်ပြုရေး ကြိုးပမ်းမည်ဖြစ်ကြောင်း အကြမ်းဖက် ပြည်သူ့လွှတ်တော် ဥက္ကဋ္ဌ ခင်ရီက ထုတ်ဖော်ကြွေးကြော်သည်။ ဇွန်လ ၁၆ ရက်နေ့ နေပြည်တော်တွင်ပြုလုပ်သော အကြမ်းဖက် ကြံ့ဖွတ် ပြည် သူ့လွှတ် တော်၏ နိုင်ငံ တကာရေးရာကော်မတီအစည်းအဝေးတွင် အကြမ်းဖက် ခင်ရီက ထိုသို့ ပြောဆိုလာခြင်းဖြစ်သည်။ လက်ရှိ စစ်တပ်၏ ရွေးကောက်ပွဲ အတုဖြင့် ဖွဲ့စည်းထား​သော ကြံ့ဖွတ်လွှတ်တော်များကို နိုင်ငံတကာ၏ အသိအမှတ်ပြုမှု မရရှိသေးသဖြင့် နိုင်ငံတကာ အသိအမှတ်ပြုရရှိစေရန် ကြိုးပမ်းရမည်ဖြစ်ကြောင်း၊ နံပါတ် ၁ အနေဖြင့် အာဆီယံလွှတ်တော်အဖွဲ့၏ အသိ အမှတ် ပြုမှု ရရှိရန် ၊ နံပါတ် ၂ အနေဖြင့် ကမ္ဘာ့လွှတ်တော်များအဖွဲ့ -IPU ၏ အသိအမှတ်ပြု ရရှိရေး ဆောင်ရွက်ရမည်ဖြစ်ကြောင်း၊ သို့မှသာ မြန်မာနိုင်ငံ၏ အခြေအနေမှန်ကို ကမ္ဘာသို့ ချပြနိုင်မည်ဖြစ်ကြောင်း အကြမ်းဖက် ခင်ရီက ပြောဆိုသည်။ "လတ်တလော လုပ်ရမယ့် လုပ်ငန်းတွေမှာ နံပါတ် ၁ က AIPA အိုက်ပါ။ ASEAN Inter-Parliamentary Assembly ဒါကို ပြန်လည် ဝင်ဆန့်ရေးအတွက် ဆောင်ရွက်ရပါမယ်။ နောက်တစ်ခုကတော့ Inter-Parliamentary Union-IPU ကမ္ဘာမှာ ရှိနေတဲ့ ကမ္ဘာ့လွှတ်တော်များအဖွဲ့ ဒါကို ဆောင်ရွက်ရပါမယ်။ လွှတ်တော်ချင်း ချစ်ကြည်ရင်းနှီးရေးအဖွဲ့တွေ စပြီး ဖွဲ့ပါ့မယ်။ ကျနော်တို့ ဒါကို စပြီး လုပ်ပါ့မယ်။ ကျနော်တို့ စလုပ်မယ်။ ဒါတွေ လုပ်ပါ့မယ်။ နောက်ဆုံးအချက်က Open လွှတ်တော်ဖြစ်အောင် လွှတ်တော်က ဘာတွေ လုပ်နေလဲ သိအောင်။ လွှတ်တော်က အိပ်မနေဘူး/ ဒါတွေ လုပ်နေတယ်။ တက်ကြွလှုပ်ရှားတဲ့ လွှတ်တော် တစ်ခု။ နိုင်ငံတော်မှာ လွှတ်တော်ဆိုတာ ဒီလိုရှိတယ်။ ကျနော်တို့ ခင်ဗျားတို့ လက်ထက်မှာ ခြေလှမ်းသစ်တွေနဲ့ စနိုင်အောင် ၀ိုင်းဝန်းကြိုးစားပေးပါ" ဟု အကြမ်းဖက် ခင်ရီက ပြောဆိုသည်။ လက်ရှိတွင် နိုင်ငံတကာလွှတ်တော်အဖွဲ့များက အကြမ်းဖက်စစ်တပ်၏ ရွေးကောက်ပွဲ အတုဖြင့် ဖြစ်ပေါ်လာသော ကြံ့ဖွတ်လွှတ်တော်များကို အသိအမှတ်မပြုဘဲ ၂၀၂၀ ရွေး ကောက်ပွဲ ရလဒ်ဖြင့် ဖွဲ့စည်းထားသော ပြည်ထောင်စုလွှတ်တော်ကိုယ်စားပြုကော်မတီ-CRPH ကို နိုင်ငံတကာပါလီမန်များအဖွဲ့ (IPU) က မြန်မာနိုင်ငံ၏ တရားဝင် လွှတ်တော် အဖြစ် အသိအမှတ်ပြုထားသည်။ ယခုနှစ် ဧပြီလ ၁၉ ရက်နေ့ ကျင်းပခဲ့သော ၁၅၂ ကြိမ်မြောက် IPU ခေါ် နိုင်ငံတကာပါလီမန်များညီလာခံ၏ အမှုဆောင်ကောင်စီအစည်းအဝေးက ပြည်ထောင်စုလွှတ်တော်ကိုယ်စားပြုကော်မတီ (CRPH) ကို နိုင်ငံတကာပါလီမန်များအဖွဲ့ (IPU) ၏ အဓိကဆွေးနွေးဖက်မိတ်ဖက်အဖြစ် ဆက်လက်အသိအမှတ်ပြုကြောင်း ဆုံးဖြတ်ခဲ့သည်။ မြန်မာနိုင်ငံ၌ ပို၍ တရားဝင်မှုရှိသည့် ရွေးကောက်ပွဲများ ကျင်းပနိုင်သည့်အချိန်နှင့် မြန်မာပြည်သူများ၏ ဆန္ဒများကို ၎င်းတို့၏ အဖွဲ့အစည်းများတွင် ပြည့်ပြည့်ဝဝ ကိုယ်စားပြုနိုင်သည့်အချိန်အထိ နိုင်ငံတကာပါလီမန်များအဖွဲ့ (IPU) အနေဖြင့် ပြည်ထောင်စုလွှတ်တော်ကိုယ်စားပြုကော်မတီ (CRPH) နှင့် ဆက်လက်ထိတွေ့ဆက်ဆံသွားရန် IPU-အမှုဆောင်ကော်မတီက ဆုံးဖြတ်ထားခဲ့သည်။ မြန်မာနိုင်ငံတွင် ဒီမိုကရေစီဖြစ်စဉ် ရှိခဲ့ပါကြောင်း၊ ၂၀၂၁ ခုနှစ်တွင် ကျင်းပပြီးစီးခဲ့သည့် ရွေးကောက်ပွဲများကို ဖျက်သိမ်းခဲ့ခြင်းကြောင့် အခြေအနေများ ပြောင်းလဲသွားခဲ့ရကြောင်း၊ ယင်းရွေးကောက်ပွဲများသည် လွတ်လပ်ပြီး တရားမျှမှုရှိသည်ကို တွေ့ရှိခဲ့ရပါကြောင်း၊ ထိုအချိန်ကတည်းက IPU အနေဖြင့် မြန်မာပြည်သူတို့၏ ကိုယ်စားပြုကော်မတီနှင့်သာ ထိတွေ့ဆက်ဆံသွားရန် ဆုံးဖြတ်ခဲ့ပါကြောင်း၊ မြန်မာနိုင်ငံတွင် ယခုနှစ်အစောပိုင်းကာလတွင် ရွေးကောက်ပွဲများ ပြုလုပ်ခဲ့ပါကြောင်း၊ သို့သော် ယင်းရွေးကောက်ပွဲများကို အိမ်နီးချင်း အာဆီယံကပင် အသိအမှတ်မပြုထားပါကြောင်း IPU ၏ အထွေ ထွေအတွင်း ရေးမှူးချုပ်က ထုတ်ဖော်ပြောဆိုခဲ့သည်။ အကြမ်းဖက်စစ်အုပ်စု၏ အတုအယောင်ရွေးကောက်ပွဲဖြင့် ဖန်တီးထားသော အတု အယောင် လွှတ် တော်ပေါ်ပေါက်ပြီးချိန်တွင်ပင် ပြည်ထောင်စုလွှတ်တော်ကိုယ်စားပြုကော်မ တီ (CRPH) ကို မြန်မာပြည်သူတို့အား ကိုယ်စားပြုသည့် တရားဝင် ပြည်သူ့ကိုယ်စားလှယ်များအဖြစ် ဆက်လက်အသိ အမှတ်ပြုခံနေရဆဲဖြစ်ပြီး CRPH ကို နိုင်ငံတကာလွှတ်တော်အသိုက်အဝန်း၏ အသိအမှတ်ပြုမှုကို ဆက်လက်ရရှိနေခြင်းကြောင့် ပြည်သူလူထု၏ အသံများကို ကမ္ဘာ့စင်မြင့်များတွင် ထုတ်ဖော်ပြောကြားခွင့် ရနေခြင်းဖြစ်သည်ဟု CRPH က ကြေညာချက် ထုတ်ပြန်ခဲ့သည်။