Khit Thit Media

ရုရှားအစိုးရနှင့် နေပြည်တော်က မေတ္တာရပ်ခံခဲ့သော်လည်း အာဆီယံက လက်မခံ၍ ရုရှား-အာဆီယံထိပ်သီးအစည်းအဝေးသို့ မင်းအောင်လှိုင် တက်ခွင့်မရ ရန်ကုန်၊ ဇွန် ၁၅ ရုရှားအစိုးရနှင့် မင်းအောင်လှိုင်က အစည်းအဝေးတက်ခွင့်ပေးရန် မေတ္တာရပ်ခံခဲ့သော် လည်း အာဆီယံက လက်မခံ၍ ရုရှား-အာဆီယံထိပ်သီးအစည်းအဝေးသို့ မင်းအောင်လှိုင် တက်ခွင့်မရကြောင်း နေ ပြည်တော်စစ်ဘက်သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။ ဇွန်လ ၁၆ ရက်နေ့မှ ဇွန်လ ၁၉ ရက်နေ့ အထိ ရုရှားနိုင်ငံတွင် ပြုလုပ်မည့် ရုရှား-အာဆီယံ အထူးထိပ် သီးအစည်းအဝေးသို့ အကြမ်းဖက် စစ်ခေါင်းဆောင် မင်းအောင်လှိုင်ကို တက်ခွင့်ပေးရန် ရုရှားအစိုးရနှင့် နေပြည်တော်က အာဆီယံနိုင်ငံခြားရေးဝန်ကြီးများနှင့်ခေါင်း ဆောင်များထံသို့ တရားဝင် မေတ္တာ ရပ်ခံခဲ့ကြောင်း၊ သို့ရာတွင် လက်ရှိ အာဆီယံအတွင်း မင်းအောင်လှိုင်ကို အာဆီယံနှင့်ပတ် သက်သော ထိပ်သီးအစည်းအဝေးများ တက်ခွင့်ပိတ်ပင်ထားသော မူဝါဒကို ဆက်လက်စွဲကိုင်ထားရန် စင်ကာပူ၊ တီမော၊ မလေးရှား၊ ဖိလစ်ပိုင်တို့က သဘောထားမှတ်ချက်ပေးသဖြင့် မင်းအောင်လှိုင် အစည်း အဝေးတက်ခွင့်မရကြောင်း သိရှိရသည်။ "ရုရှား-အာဆီယံ ထိပ်သီးအစည်းအဝေးကို မြန်မာဘက်က ကိုယ်စားလှယ်စေလွှတ်မှာပါ" ဟု နေပြည် တော်စစ်ဘက်သတင်းရင်းမြစ်က ပြောဆိုသည်။ ရုရှား-အာဆီယံ ထိပ်သီး အထူးအစည်းအဝေးကို ဇွန်လ ၁၇ ရက်နှင့် ၁၈ ရက်နေ့များတွင် ကာဇန် (Kazan) မြို့၌ တရားဝင်ကျင်းပသွားမည်ဖြစ်ပြီး အဆိုပါအစည်းအဝေးမှာ ရုရှားနှင့် အာဆီယံအကြား သံတမန်ဆက်ဆံရေး ၃၅ နှစ်ပြည့် အထိမ်းအမှတ်အဖြစ် ကျင်းပဖြစ်ကြောင်း သိရှိရသည်။ ရုရှားသမ္မတ ဗလာဒီမီယာ ပူတင်က ဘရူနိုင်း၊ တီမောလက်စ်တေ၊ ဗီယက်နမ်၊ အင်ဒိုနီးရှား၊ ကမ္ဘော ဒီးယား၊ လာအို၊ မလေးရှား၊ စင်ကာပူ၊ ထိုင်းနှင့် ဖိလစ်ပိုင် အပါအဝင် အာဆီယံအဖွဲ့ဝင်နိုင်ငံအားလုံးမှ ခေါင်းဆောင်များနှင့် အစိုးရအဖွဲ့အကြီးအကဲများကို တွေ့ဆုံမည်ဖြစ်သည်။ အဆိုပါ ထိပ်သီးအစည်းအဝေးအတွင်း အာဆီယံခေါင်းဆောင်များက ရုရှားနှင့် အာဆီယံအကြား နိုင်ငံရေး၊ စီးပွားရေးနှင့် လူသားချင်းစာနာထောက်ထားမှုဆိုင်ရာ ပူးပေါင်းဆောင်ရွက်မှု အနာဂတ်ကို ပုံဖော်နိုင်ရန်အတွက် အဓိကကျသည့် နိုင်ငံတကာနှင့် ဒေသတွင်းဆိုင်ရာ ကိစ္စရပ်များကို ဆွေးနွေးကြမည် ဖြစ်ကြောင်း၊ အဆိုပါ ဆွေးနွေးပွဲများအပြီးတွင် နှစ်ဦးနှစ်ဖက် ဆက်ဆံရေးကို ရှေ့ဆက်လမ်း ညွှန်ပေးမည့် နှစ်နိုင်ငံအပြန်အလှန် သဘောတူညီချက်အများအပြားကို လက်မှတ်ရေးထိုးသွားရန်ရှိကြောင်း အာဆီယံနှင့်ရုရှားသတင်းများအရ သိရှိရသည်။ ယင်းထိပ်သီးအစည်းအဝေးနှင့်အတူ ရုရှား-အာဆီယံ စီးပွားရေးဖိုရမ်ကိုလည်း ဇွန်လ ၁၇ ရက်နေ့တွင် ကျင်းပသွားမည်ဖြစ်ပြီး၊ ကုန်သွယ်မှု၊ ရင်းနှီးမြှုပ်နှံမှု၊ ပူးပေါင်းဆောင်ရွက်မည့် စီးပွားရေးလုပ် ငန်းသစ်များနှင့် လူငယ်ကဏ္ဍဆိုင်ရာ အစပျိုးလုပ်ငန်းများတွင် အခွင့် အလမ်းသစ်များ ရှာဖွေဖော် ထုတ်နိုင်ရန်အတွက် ထိပ်တန်းလုပ်ငန်းရှင်ကြီးများ တက်ရောက်ဆွေးနွေးကြမည် ဖြစ်ကြောင်း သိရှိရသည်။ ရုရှား-အာဆီယံ ထိပ်သီးအစည်းအဝေး ကျင်းပနေချိန် မင်းအောင်လှိုင်မှာ တရုတ်နိုင်ငံသို့ ဇွန်လ ၁၅ ရက်နေ့မှ ဇွန်လ ၁၉ ရက်နေ့အထိ သွားရောက်လျက်ရှိသည်။

သိရသည်။ အဆင့်မြင့် စားသောက်ဆိုင်နှင့် ဘားများသည် ငွေကြေးတတ်နိုင်သည့် မြန်မာလုပ်ငန်းရှင်များနှင့် ကမ္ဘာလှည့်ခရီးသွားများကိုသာ ဦးတည်သော်လည်း မြန်မာရွှေ့ပြောင်းလုပ်သားအများစုအတွက်မူ အခြားလိုအပ်ချက်များ ရှိနေသည်။ ထိုင်းနှင့် မြန်မာနှစ်နိုင်ငံသားခံယူထားသူ အတွေ့အကြုံရှိ ရင်းနှီးမြှုပ်နှံသူ ဦးအောင်ထွန်းက မြန်မာလုပ်သားများကို ထိုင်းဘဏ်များက ချေးငွေထုတ်မပေးသည့် အခွင့်အလမ်းကို မြင်တွေ့ကာ ဆင်ပီတန် (Syn Pitarn Group) အမည်ရှိ အသေးစားငွေရေးကြေးရေးလုပ်ငန်းကို တည်ထောင်ခဲ့ပြီး မြန်မာလုပ်သားများကို ဘတ် ၈,၀၀၀ မှ ၄၀,၀၀၀ အထိ အသေးစားချေးငွေများ ထုတ်ချေးပေးလျက်ရှိသည်။ ၎င်းလုပ်ငန်းသည် လက်ရှိတွင် ထိုင်းပြည်နယ် ၅ ခုတွင် ရုံးခွဲ ၁၃ ခု ဖွင့်လှစ်ကာ သုံးစွဲသူပေါင်း ၃၀,၀၀၀ ခန့်အား ထိုင်းဘတ်ငွေ ၁၂၅ မီလီယံခန့် ထုတ်ချေးထားနိုင်ခဲ့သည်။ ဦးအောင်ထွန်းက မြန်မာနိုင်ငံ၏ ပဋိပက္ခများသည် လာမည့် ၄ နှစ်မှ ၅ နှစ်အတွင်း ပြေ လည်သွားမည့် အရိပ်အယောင်မတွေ့ရသေးသဖြင့် အဆိုပါ စစ်မှုထမ်းဥပဒေအပါအဝင် အကြောင်းအမျိုးမျိုးကြောင့် ထိုင်းနိုင်ငံသို့ မြန်မာနိုင်ငံသားများ ရွှေ့ပြောင်းအခြေချနေထိုင်မည့် ဖြစ်စဉ်မှာ ရေရှည်အထိ ဆက်လက်တည်ရှိနေဦးမည်ဖြစ်ပြီး ထိုင်းနိုင်ငံအတွင်းရှိ စားသုံးသူစျေးကွက်ကိုလည်း ပိုမိုကြီးထွားလာစေမည်ဖြစ်ကြောင်း သုံးသပ်ပြောကြားသွားသည်။ ဓာတ်ပုံ-AFP။

မြန်မာစစ်တပ်၏ စစ်မှုထမ်းဥပဒေကြောင့် ထိုင်းနိုင်ငံသို့ မြန်မာလူငယ်များနှင့် လူလတ်တန်းစားများ အလုံးအရင်းဖြင့် ရွှေ့ပြောင်းအခြေချလာပြီး ထိုင်းစျေးကွက်သစ်ကို မောင်းနှင်နေ၊ မြန်မာမှ စီးပွားရေးလုပ်ငန်းကြီးများပါ ထိုင်းဘက်သို့ ရွှေ့ပြောင်းလာ ရန်ကုန်၊ ဇွန် ၁၅ မြန်မာနိုင်ငံတွင် စစ်မှုထမ်းဥပဒေကို ပြဋ္ဌာန်းပြီး အတင်းအဓမ္မ လူသစ်စုဆောင်းမှုများ ပြု လုပ်လာခြင်းကြောင့် တိုင်းပြည်အတွင်း ဆက်လက်နေထိုင်ရန် ခက်ခဲလာသည့် မြန်မာလူ ငယ်များနှင့် လူ လတ်တန်းစား၊ အထက်တန်းစား အလွှာစုံမှ ပြည်သူအများအပြားသည် အိမ် နီးနားချင်း ထိုင်းနိုင်ငံသို့ အလုံးအရင်းနှင့် ရွှေ့ပြောင်းအခြေချ ဝင်ရောက်လာကြကြောင်း ထိုင်းအခြေစိုက် The Business Times ၏ သတင်းဖော်ပြချက်အရ သိရှိရသည်။ လက်ရှိ ထိုင်းနိုင်ငံရောက် မြန်မာနိုင်ငံသား အရေအတွက်မှာ တရားဝင် အထောက် အထားရှိသူ ၂ ဒသမ ၈ သန်းနှင့် အထောက်အထားမဲ့ ၁ ဒသမ ၃ သန်း အပါအဝင် စုစုပေါင်း ၄ ဒသမ ၁ သန်းခန့်အထိ ရှိလာနေပြီး ၎င်းတို့သည် လုပ်အားခသက်သာသည့် အလုပ်သမားထုသက်သက် မဟုတ်တော့ဘဲ လက်လီအရောင်းဆိုင်များ၊ ဆက်သွယ်ရေးကုမ္ပဏီများ၊ ငွေလွှဲလုပ်ငန်းများနှင့် အိမ်ခြံမြေလုပ်ငန်းရှင်များပါ အထူးစိတ်ဝင်စားလာရသည့် စားသုံးသူစျေးကွက်ကြီးတစ်ခုအဖြစ် ပေါ်ထွက်လာနေသည်။ စျေးကွက်အတိုင်ပင်ခံအဖွဲ့အစည်းတစ်ခုဖြစ်သည့် Happio ကုမ္ပဏီ၏ အစီရင်ခံစာအရ ထိုင်း နိုင်ငံရောက် မြန်မာနိုင်ငံသားများသည် ထိုင်းနိုင်ငံအတွင်း၌ တစ်နှစ်လျှင် ဘတ် ၂၂၁ ဘီလီယံခန့် သုံးစွဲနေကြသလို မိခင်မြန်မာနိုင်ငံသို့လည်း တစ်နှစ်လျှင် ဘတ် ၁၁၉ ဘီလီယံခန့် ပြန်လည်ပေးပို့နေကြကြောင်း သိရသည်။ Happio ကုမ္ပဏီ၏ အမှုဆောင်အရာရှိချုပ်ဖြစ်သူ နာသီ ဂျာရာယာဘန်းက True နှင့် dtac ကဲ့သို့သော ဆက်သွယ်ရေးလုပ်ငန်းများ၊ Western Union ငွေလွှဲလုပ်ငန်းများနှင့် 7-Eleven စတိုးဆိုင်များအတွက် မားကတ်တင်းပိုင်းဆိုင်ရာ ကူညီပေးနေရပြီး၊ အချို့သော 7-Eleven ဆိုင်ခွဲများတွင် ထိုင်းဖောက်သည်များထက် မြန်မာဖောက်သည် အရေအတွက်က ပိုမိုများပြားနေသည့်အတွက် ၎င်းတို့၏ လိုအပ်ချက်နှင့် ကိုက်ညီမည့် ကုန်စည်များနှင့် အဖွဲ့ဝင်ပရိုဂရမ်များကို ပြောင်းလဲပြင်ဆင်ပေးနေရကြောင်း ပြောကြားသည်။ ယခင်က ထိုင်းနိုင်ငံသို့ လာရောက်ကြသည့် မြန်မာရွှေ့ပြောင်းလုပ်သားအများစုမှာ စိုက် ပျိုးရေး၊ ရေလုပ်ငန်း၊ ဆောက်လုပ်ရေးနှင့် အိမ်အကူလုပ်ငန်းကဲ့သို့သော လုပ်အားအခြေပြု အခြေခံလူ တန်းစားကဏ္ဍများတွင်သာ အဓိကလုပ်ကိုင်ခဲ့ကြသော်လည်း စစ်မှုထမ်းဥပဒေ ပြဋ္ဌာန်းချက်နောက်ပိုင်းတွင်မူ ငွေကြေးတတ်နိုင်သည့် လူလတ်တန်းစားနှင့် အထက်တန်းစားများပါ တိမ်းရှောင်လာကြခြင်း ဖြစ်သည်။ ထိုသို့ ရွှေ့ပြောင်းလာပြီးနောက် ၎င်းတို့သည် မြန်မာနိုင်ငံသို့ ပြန်ရန်မဖြစ်နိုင်တော့သည့်အတွက် ဘန်ကောက်နှင့် ချင်းမိုင်မြို့ကြီးများရှိ ကွန်ဒိုမီနီယံတိုက်ခန်းများကို အဝယ်ဆုံးနိုင်ငံခြားသားများစာရင်းတွင် ထိပ်ဆုံးအဆင့် ၃ အတွင်း ပါဝင်လာသည်အထိ အိမ်ခြံမြေစျေးကွက်ကို လွှမ်းမိုးလာခဲ့ကြသည်။ ထို့ပြင် ထိုင်းနိုင်ငံရှိ အပြည်ပြည်ဆိုင်ရာ အထက်တန်းကျောင်းများနှင့် တက္ကသိုလ်များတွင် တက်ရောက်ပညာသင်ကြားနေသည့် မြန်မာကျောင်းသား အရေအတွက်မှာလည်း ၁၅,၀၀၀ ကျော်အထိ ရှိလာကြောင်း သိရသည်။ ဘန်ကောက်အခြေစိုက် AVA Ventures အကျိုးတူရင်းနှီးမြှုပ်နှံမှုလုပ်ငန်း၏ တည်ထောင်သူ ကိုတင်မင်းထွဋ်က စစ်မှုထမ်းဥပဒေ ထွက်လာပြီးနောက်ပိုင်း ချမ်းသာကြွယ်ဝသူများ၏ သားသမီးများနှင့် အမေရိကန်အပါအဝင် နိုင်ငံတကာက ဘွဲ့ရလာသည့် လူငယ်ပညာတတ်အများအပြား မြန်မာနိုင်ငံတွင် မနေနိုင်တော့ဘဲ ထိုင်းနိုင်ငံသို့ ပြောင်းရွှေ့လာကြကာ ၎င်းတို့ကိုယ်တိုင် စားသောက်ဆိုင်၊ ဘားနှင့် ကလပ်များကဲ့သို့သော အသေးစားစီးပွားရေးလုပ်ငန်းများကို စတင်လုပ်ကိုင်လာကြကြောင်း ရှင်းပြသည်။ သူ၏ ရင်းနှီးမြှုပ်နှံမှုကုမ္ပဏီသည် ထိုင်းနိုင်ငံခြေစိုက် မြန်မာစတင်တည်ထောင်သူများ၏ လုပ်ငန်းပေါင်း ၁၄ ခုတွင် ရင်းနှီးမြှုပ်နှံထားပြီး ယင်းတို့အထဲတွင် ရန်ကုန်၌ နာမည်ကြီးသည့် Burbrit Craft Beer ဘား၏ ဘန်ကောက်ဆိုင်ခွဲလည်း ပါဝင်ကာ လာမည့် စက် တင်ဘာလတွင် ထိုင်းနိုင်ငံ၌ ကိုယ်ပိုင် ဘီယာချက်စက်ရုံတစ်ခု အပြီးသတ်တည်ဆောက်သွားမည် ဖြစ်သည်။ ထို့အပြင် ရန်ကုန်တီးဟောက်စ် (Rangoon Tea House) နှင့် Feel စားသောက်ဆိုင်ကဲ့သို့သော မြန်မာ အမှတ်တံဆိပ်ကြီးများလည်း ဘန်ကောက်တွင် ဆိုင်ခွဲများ ဖွင့်လှစ်လာကြသည်။ နာမည်ကြီး မြန်မာကော်ဖီအမှတ်တံဆိပ် Genius ၏ တည်ထောင်သူ ဦးငွေထွန်းကလည်း ထိုင်းနိုင်ငံ အနောက်ပိုင်း မဲဆောက်မြို့နှင့် မြောက်ပိုင်း ချင်းမိုင်မြို့တို့တွင် Blue Pond Cafe အမည်ဖြင့် ကော်ဖီဆိုင် ၃ ဆိုင်ကို ဖွင့်လှစ်ခဲ့ပြီး ချင်းမိုင်၌ ကော်ဖီလှော်လုပ်ငန်းကိုပါ စတင်ခဲ့သည်။ မြန်မာနိုင်ငံအတွင်း စစ်မှုထမ်းဥပဒေကြောင့် လုပ်သားရှားပါးမှု ပြဿနာများဖြင့် ရင်ဆိုင်နေရသဖြင့် အဆိုပါလုပ်ငန်းရှင်သည် ကော်ဖီထုတ်လုပ်မှုကို လျှော့ချခဲ့ရပြီး လက်ရှိတွင် ၎င်းတို့၏ ကော်ဖီအများစုကို ထိုင်းမြောက်ပိုင်းက တောင်သူများထံမှ ရယူကာ တရုတ်နှင့် စင်ကာပူနိုင်ငံများသို့ တင်ပို့နိုင်ရန် ကြိုးပမ်းနေကြောင်း

အမေရိကန်နှင့် အီရန် စစ်ပွဲအဆုံးသတ်ရန် သဘောတူညီချက်ရရှိထားပြီး လာမည့်သောကြာနေ့ နှစ်နိုင်ငံလက်မှတ်ရေးထိုးမည်၊ ရေနံတင်သင်္ဘောများ ဖြတ်သန်းရာ ဟော်မုခ်ရေလက် ကြား အပြည့်အ၀ ပြန်လည်ဖွင့်လှစ်တော့မည် ရန်ကုန်၊ ဇွန် ၁၅ အမေရိကန်ပြည်ထောင်စုနှင့် အီရန်အာဏာပိုင်များသည် ၎င်းတို့အကြား ဖြစ်ပွားနေသည့် စစ်ပွဲကို အဆုံးသတ်ရန်၊ အမေရိကန်၏ ပိတ်ဆို့ဖြတ်တောက်မှုများကို ရပ်ဆိုင်းရန်နှင့် ဟော်မုဇ်ရေလက်ကြား (Strait of Hormuz) ကို ပြန်လည်ဖွင့်လှစ်ရန်အတွက် မူဘောင်သဘောတူညီချက်တစ်ရပ် ရရှိခဲ့ကြပြီဖြစ်ကြောင်း ယနေ့ နှစ်ဖက်စလုံးက ထုတ်ပြန်လိုက်ကြသည်။ ယခု ပဏာမသဘောတူညီချက်ကြောင့် ကမ္ဘာ့ရေနံဈေးနှုန်းများ ကျဆင်းသွားခဲ့သော် လည်း အီရန်၏ နျူကလီးယားအစီအစဉ် ကံကြမ္မာကိုမူ ရှေ့ဆက်ဆွေးနွေးမှုများတွင် ဆက်လက်ညှိနှိုင်းသွားရမည် ဖြစ်သည်။ အမေရိကန်သမ္မတ ဒေါ်နယ်ထရမ့်က အီရန်အစိုးရနှင့် သဘောတူညီချက် ရရှိသွားပြီဖြစ်ကြောင်း ၎င်း၏ Truth Social လူမှုကွန်ရက်စာမျက်နှာတွင် ရေးသားခဲ့ပြီး၊ ကြားခံစေ့စပ်ပေးခဲ့သည့် ပါကစ္စတန်ဝန်ကြီးချုပ် ရှာဘတ်ဇ် ရှရစ်ဖ်ကလည်း သဘောတူညီချက် ရရှိခဲ့မှုကို အတည်ပြု ကြေညာခဲ့သည်။ အဆိုပါ နားလည်မှုစာချွန်လွှာကို လာမည့်သောကြာနေ့တွင် ဆွစ်ဇာလန်နိုင်ငံ၌ တရားဝင်လက်မှတ်ရေးထိုးရန် စီစဉ်ထားသည်။ နှစ်နိုင်ငံ သဘောတူညီချက်၏ အသေးစိတ်အချက်အလက်များကို ချက်ချင်းမသိရသေးသော်လည်း လက်ဘနွန်အရေးအပါအဝင် စစ်မျက်နှာအားလုံးတွင် စစ်ဆင်ရေးများကို ချက်ချင်းနှင့် အပြီးတိုင်ရပ်ဆိုင်းရန် ပါဝင်ကြောင်း သိရသည်။ အီရန်အမျိုးသားလုံခြုံရေးကောင်စီကလည်း လက်ဘနွန်အပါအဝင် စစ်မျက်နှာအားလုံးက စစ်ရေးလှုပ်ရှားမှုများ တနင်္လာနေ့ညပိုင်းမှစ၍ အပြီးတိုင် ရပ်စဲသွားမည်ဟု ဆိုသည်။ ယခုဆွေးနွေးပွဲတွင် မိမိတို့ ပါဝင်ပတ်သက်ခြင်းမရှိဟု ပြောဆိုထားသည့် အစ္စရေးဘက်ကမူ တစ်စုံတစ်ရာ ချက်ချင်းတုံ့ပြန်ခြင်း မရှိသေးပေ။ အမေရိကန်သမ္မတထရမ့်က အီရန်ဘက်က လပေါင်းများစွာ ပိတ်ဆို့ထားခဲ့သည့် ကမ္ဘာ့ရေနံနှင့် သဘာဝဓာတ်ငွေ့ သယ်ယူပို့ဆောင်ရေး အဓိကလမ်းကြောင်းဖြစ်သော ဟော်မုဇ်ရေလက်ကြားကို သောကြာနေ့တွင် ပြန်ဖွင့်ပေးမည်ဖြစ်ပြီး အမေရိကန်စစ်တပ်၏ အီရန်ဆိပ်ကမ်းများအပေါ် ပိတ်ဆို့ထားမှုကိုလည်း ရုပ်သိမ်းရန် အမိန့်ပေးထားကြောင်း ပြောကြားခဲ့ရာ ကမ္ဘာ့ရေနံဈေးနှုန်းများ သိသိသာသာ ထိုးဆင်းသွားခဲ့ပြီး အာရှစတော့ဈေးကွက်များ မြင့်တက်လာခဲ့သည်။ သို့သော်လည်း အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူဟောင်း မက်သရူး မီလာက ထရမ့်အနေဖြင့် အီရန်ထံ အရေးပါသည့် အလျှော့ပေးမှုများ ပြုလုပ်ခဲ့ရကြောင်းနှင့် အီရန်၏ နျူကလီးယားအစီအစဉ်ကို ဖြေရှင်းနိုင်မည့် သေချာမှုမရှိဘဲ ကမ္ဘာ့စီးပွားရေးကို ဓားစာခံလုပ်ကာ အမေရိကန်ထံမှ အလိုရှိရာ တောင်းဆိုသွားနိုင်ကြောင်း ဝေဖန်ခဲ့သည်။ အီရန်ဒုတိယနိုင်ငံခြားရေးဝန်ကြီးကမူ ရက်ပေါင်း ၆၀ အပစ်အခတ်ရပ်စဲရေးကာလအတွင်း စီးပွားရေးပိတ်ဆို့မှုများ ရုပ်သိမ်းရေးအပါအဝင် ပိုမိုကျယ်ပြန့်သည့် သဘောတူညီချက်များကို ဆက်လက်ဆွေးနွေးသွားမည်ဟု ဆိုသည်။ ပြီးခဲ့သည့် ဖေဖော်ဝါရီ ၂၈ ရက်က အမေရိကန်နှင့် အစ္စရေးတို့ အီရန်ကို စတင်တိုက်ခိုက်ခဲ့စဉ်ကတည်းက အီရန်နှင့် လက်ဘနွန်တို့တွင် လူပေါင်းထောင်ချီ သေဆုံးခဲ့ရပြီး ဖြစ်သည်။ ယခုစစ်ပွဲကြောင့် ကမ္ဘာ့စွမ်းအင်ဈေးနှုန်းများ မြင့်တက်လာမှုမှာ လာမည့်နိုဝင်ဘာလ ကြားဖြတ်ရွေးကောက်ပွဲမတိုင်မီ သမ္မတထရမ့်နှင့် ရီပတ်ဘလစ်ကန်ပါတီအတွက် နိုင်ငံရေးအရ အကြပ်အတည်းဖြစ်လာစေခဲ့သလို၊ အီရန်၏ နျူကလီးယားအစီအစဉ်ကို လုံးဝပိတ်ပစ်ရန် ပြည်တွင်း၌ ဖိအားပေးမှုများနှင့်လည်း ရင်ဆိုင်နေရသည်။ ရီပတ်ဘလစ်ကန်အမတ် လင်ဆေးဂရေဟမ်ကမူ ယခုသဘောတူညီချက်ကို ချီးကျူးခဲ့ပြီး အီရန်နှင့်ပြုလုပ်မည့် မည်သည့်နျူကလီးယားသဘောတူညီချက်မဆို လွှတ်တော်၏ ပြန်လည်သုံးသပ်မှုနှင့် မဲခွဲဆုံးဖြတ်မှုကို ခံယူရမည်ဖြစ်ကြောင်း ပြောကြားခဲ့သည်။ အဆိုပါငြိမ်းချမ်းရေးသဘောတူညီချက်ကို အစ္စရေးက လက်ဘနွန်အပေါ် တနင်္ဂနွေနေ့တွင် လေကြောင်းတိုက်ခိုက်မှုများ ပြုလုပ်ခဲ့သည့်ကြားကပင် ရရှိအောင် ဆောင်ရွက်နိုင်ခဲ့ခြင်း ဖြစ်သည်။ အစ္စရေးဝန်ကြီးချုပ် ဘင်ဂျမင် နေတန်ယာဟုသည် အမေရိကန်နှင့် အီရန်တို့ သဘောတူညီချက်ရရှိနိုင်ရေးအတွက် လက်ဘနွန်ရှိ စစ်ရေးလှုပ်ရှားမှုများကို ထိန်းချုပ်ရန် အမေရိကန်၏ တောင်းဆိုချက်အပေါ် သဘောထားကွဲလွဲနေခဲ့သူ ဖြစ်သည်။ အမေရိကန် သမ္မတထရမ့်က အစ္စရေးဝန်ကြီးချုပ် နေတန်ယာဟုကို အလွန်ခက်ခဲသည့်လူတစ်ယောက်ဟု နယူးယောက်တိုင်းမ်နှင့် အင်တာဗျူးတွင် ပြောဆိုခဲ့ပြီး အီရန်၏ နျူက လီးယားအန္တရာယ်မှ ကာကွယ်ပေးခဲ့သည့်အတွက် ၎င်းကို ကျေးဇူးတင်သင့်ကြောင်း ပြောကြားခဲ့သည်။ နှစ်နိုင်ငံသဘောတူညီချက်မူကြမ်းအရ အမေရိကန်က ပိတ်ဆို့ထားတားဆီးထားသည့် အီရန်၏ ပိုင်ဆိုင်မှု ဒေါ်လာ ၂၅ ဘီလီယံကို ပြန်လည်လွှဲပြောင်းပေးရန် သဘောတူညီထားပြီး အီရန်၏ နျူကလီးယားအစီအစဉ်ကို ဖျက်သိမ်းကာ ယူရေနီယံများကို နိုင်ငံအတွင်း၌ပင် ဖျက်သိမ်းသွားရန် သဘောတူညီထားသည်ဟု သိရှိရသည်။

Khit Thit သတင်းဌာန၏ ဇွန် ၁၅ ရက် မနက်ပိုင်း ရုပ်သံသတင်းအစီအစဉ် By ရန်ကုန်ခေတ်သစ် ဒီကနေ့ ဇွန် ၁၅ ရက် မနက်ပိုင်း တင်ဆက်ပေးမယ့် သတင်းတွေကတော့ -မန္တလေး၊ စစ်ကိုင်းနဲ့ ကချင်ပြည်နယ်အစပ်ဒေသတွေမှာဖြစ်ပွားခဲ့တဲ့တိုက်ပွဲတွေအတွင်း ဗိုလ်မှူးချုပ် အောင်နိုင်ဦးနဲ့ ဗိုလ်မှူးချုပ်သူရဝဏ္ဏလွင်တို့ ဒဏ်ရာရရှိခဲ့ပြီး ခလရ (၄) တပ်ရင်းမှူး ဗိုလ်မှူး နေအောင်ထွန်း အပါအဝင် စစ်ကောင်စီတပ်ဖွဲ့ဝင် ၁၈ ဦး သေဆုံးခဲ့တယ်လို့ အမျိုးသားညီညွတ်ရေး အစိုးရ (NUG) ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော် စစ်ရုံးချုပ်က ထုတ်ပြန်ထားပါတယ်။ ရန်ကုန်မြို့က အမျိုးသားတစ်ဦးလို နေထိုင်ပြုမူနေတဲ့ LGBT တစ်ဦးဖြစ်သူ မစောယဉ်ထွေးဟာ လမ်းခရီးမှာ ပေါ်တာဆွဲ ဖမ်းဆီးခံခဲ့ရပြီးနောက် ရှမ်းပြည်နယ်၊ တန့်ယန်းမြို့နယ်က အမှတ် (၈) တပ်မတော်တန်းမြင့် လေ့ကျင့်ရေးကျောင်း (မန်ကတ်) မှာ စစ်မှုထမ်းသင်တန်း အဓမ္မတက်ရောက် နေရတာကြောင့် မိခင်ဖြစ်သူ ဒေါ်လှရင်က နေပြည်တော်က စစ်မှုထမ်းဆင့်ခေါ်ရေးအဖွဲ့ထံ ဇွန်လ ၁၂ ရက်နေ့မှာ တိုင်ကြားခဲ့တယ်လို့ သိရပါတယ်။ ချင်းပြည်နယ်အတွင်း ဇိုဖေရမ်ကောင်စီ ရုံးစိုက်ရာ CDF-Zophei ဌာနချုပ်ကို စစ်ကောင်စီတပ်က တိုက်ခိုက်ရေး လေယာဉ်အုပ်စုလိုက် အသုံးပြုပြီး ဗုံးအများအပြား ကျဲချတိုက်ခိုက်ခဲ့မှုအပေါ် ချင်းတစ်မျိုးသားလုံးအင်အားနဲ့ ပြန်လည်တုံ့ပြန်တိုက်ခိုက်သွားမယ်လို့ ဇိုဖေရမ်ကောင်စီက ထုတ်ပြန်ကြေညာလိုက်ပါတယ်။ -မြောက်ကိုရီးယားနိုင်ငံက ၎င်းတို့အနေနဲ့ နျူကလီးယားလက်နက်ပိုင်ဆိုင်တဲ့ နိုင်ငံတစ်နိုင်ငံအဖြစ် "နောက်ကြောင်းပြန်မလှည့်နိုင်တော့ဘဲ" ပြောင်းလဲလို့မရတော့ကြောင်း ပြောကြားလိုက်ပြီး၊ အမေရိကန်နဲ့ ၎င်းရဲ့မဟာမိတ်တွေရဲ့ နျူကလီးယားဖျက်သိမ်းရေးတောင်းဆိုချက်တွေကို ပယ်ချလိုက်ပါတယ်။ https://youtu.be/TZI6YGXd9SE?si=mYJKbN00rqTU79pE

ကိုယ်ပိုင်ပြဌာန်း အုပ်ချုပ် ခွင့်ရှိသော “ကော်သူးလေ ကရင်ပြည်”ထူထောင်ရေး အတူတကွ အင်တိုက်အားတိုက် ကြိုးပမ်း ဖော်ဆောင်တည်ဆောက်ကြရန် KNU ဥက္ကဋ္ဌ တိုက်တွန်း ရန်ကုန်၊ ဇွန် ၁၅ လွတ်လပ်မှု၊ တန်းတူညီမျှမှုနှင့် ကိုယ်ပိုင်ပြဋ္ဌာန်းအုပ်ချုပ်ခွင့်တို့ဖြင့် ပြည့်စုံသော “ကော်သူးလေ ကရင်ပြည်” တည်ထောင်ရေးနှင့် နိုင်ငံရေးကံကြမ္မာကို ကိုယ်တိုင်ဖန်တီးနိုင်ရေးအတွက် ခေတ်ကာလနှင့်အညီ အတူတကွ အင်တိုက်အားတိုက် ကြိုးပမ်းတည်ဆောက်ကြရန် KNU-ကရင်အမျိုး သားအစည်းအရုံး ဥက္ကဋ္ဌ ပဒိုစောကွယ်ထူးဝင်းက တိုက်တွန်းလိုက်သည်။ ယမန်နေ့ ဇွန်လ ၁၄ ရက်နေ့ ကျရောက်သည့် ၇၇ နှစ်မြောက် ကော်သူးလေနေ့သို့ ပေးပို့သော သဝဏ်လွှာတွင် ၎င်းက ယခုကဲ့သို့ တိုက်တွန်းပြောကြားလိုက်ခြင်းဖြစ်သည်။ ကရင့်လက်နက်ကိုင်တော်လှန်ရေး စတင်ခဲ့သည့် ၁၉၄၉ ခုနှစ်အတွင်း မြို့ရွာများကို သိမ်း ပိုက်နိုင်ခဲ့သော်လည်း အုပ်ချုပ်ရေးနှင့် ပြည်သူ့ရေးရာစီမံခန့်ခွဲမှုပိုင်းတွင် အားနည်းချက်များ ရှိခဲ့သဖြင့် တောင်ငူမြို့၌ အရေးပေါ်အစည်းအဝေးတစ်ရပ် ခေါ်ယူကာ ၁၉၄၉ ခုနှစ် ဇွန်လ ၁၄ ရက်နေ့တွင် “ကော်သူးလေအစိုးရ” (KGB) ကို စတင်ဖွဲ့စည်းခဲ့ကြောင်း ၊ ထို့နောက် ၁၉၅၀ ပြည့်နှစ် ဧပြီလတွင် ပထမဆုံးအကြိမ် အစည်းအဝေး ကျင်းပခဲ့ပြီး ဇွန်လ ၁၄ ရက်နေ့ကို “ကော်သူးလေနေ့” အဖြစ် သတ်မှတ်ကာ ယနေ့တိုင် ဂုဏ်ပြုကျင်းပခဲ့ခြင်း ဖြစ်ကြောင်း ၎င်းက ပြောဆိုသည်။ သမိုင်းကြောင်းအရ မဟာလူမျိုးကြီးဝါဒ၏ ဖိနှိပ်မှုများကြောင့် နိုင်ငံပျောက်ဆုံးခဲ့ရသည့် ကရင်အမျိုးသားများသည် လွတ်မြောက်ရေးနှင့် ကိုယ်ပိုင်ပြဋ္ဌာန်းခွင့်အတွက် တော်လှန်တိုက်ပွဲဝင်နေကြရပြီး၊ ၎င်းတို့၏ ရည်မှန်းချက်ဖြစ်သော “ကော်သူးလေ ကရင်ပြည်” ထူထောင်ရေးကို လက်ရှိ နိုင်ငံရေးအခင်းအကျင်းအောက်တွင် အောက်ခြေပြည်သူလူထုက မိမိတို့နယ်မြေ၊ အုပ်ချုပ်ရေးနှင့် အစိုးရကို မိမိတို့ကိုယ်တိုင် သတ်မှတ်လက်ခံသည့် အားကောင်းသော တည်ဆောက်မှုဖြင့် အကောင်အထည်ဖော်နေကြောင်း ကေအဲန်ယူ ဥက္ကဋ္ဌက ဆိုသည်။ ထိုသို့ အကောင်အထည်ဖော်ဆောင်ရာတွင် ပြီးခဲ့သည့် ၂၀၂၆ ခုနှစ် ဧပြီလ ၃ ရက်နေ့၌ “တော်လှန်ရေးကာလ ကော်သူးလေပဋိညာဉ်” ကို အတည်ပြုခဲ့ကြပြီး၊ “တော်လှန်ရေးကာလ ကော်သူးလေအတိုင်ပင်ခံကောင်စီ” နှင့် “တော်လှန်ရေးကာလ ကော်သူးလေအုပ်ချုပ်ရေးကောင်စီ” တို့ကို စနစ်တကျ ဖွဲ့စည်းခဲ့ကြောင်း၊ ယင်းကောင်စီများမှတစ်ဆင့် ကောင်းမွန်သော ခေါင်းဆောင်မှု၊ ပြည်သူ့ရေးရာစီမံအုပ်ချုပ်မှု၊ လူထုလုံခြုံရေးနှင့် စီးပွား ရေး စသည်တို့ကို ဖြည့်ဆည်းပေးခြင်းဖြင့် ကိုယ်ပိုင်ပြဋ္ဌာန်းခွင့်ရှိသော ကော်သူးလေအဖြစ် အသိအမှတ်ပြုမှုကို တည်ဆောက်သွားမည် ဖြစ်ကြောင်း သူက ပြောဆိုသည်။ ထို့ကြောင့် နောင်အနာဂတ်ကာလတွင် မိမိတို့၏ ကံကြမ္မာကို မိမိတို့ကိုယ်တိုင် စီမံအုပ် ချုပ်နိုင်ရန်အတွက် ကဏ္ဍအသီးသီးတွင် အုပ်ချုပ်ရေးနှင့် ပြည်သူ့ရေးရာစီမံခန့်ခွဲမှုကို တတ် ကျွမ်းနားလည်သည့် မျိုးဆက်သစ်များကို ပြုစုပျိုးထောင်ကာ “ကော်သူးလေ” ထူထောင်ရေးလုပ်ငန်းစဉ်များတွင် ကရင်တစ်မျိုးသားလုံး အတူတကွ အင်တိုက်အားတိုက် ပါဝင်ကြိုးပမ်းကြရန် KNU ဥက္ကဋ္ဌ ပဒိုစောကွယ်ထူးဝင်းက တိုက်တွန်းနှိုးဆော်ထားသည်။

ဒေါ်အောင်ဆန်းစုကြည်၏ ၈၁ နှစ်ပြည့်မွေးနေ့ ဇွန်လ ၁၉ ရက်နေ့တွင် “နှင်းဆီလှုပ်ရှားမှု” အဖြစ် နိုင်ငံလုံးဆိုင်ရာနှင့် နိုင်ငံတကာလှုပ်ရှားမှုအဖြစ် တစ်ခဲနက်ဆင်နွှဲမည်ဟု ကြေညာ ရန်ကုန်၊ ဇွန် ၁၅ စစ်အာဏာရှင်တော်လှန်ရေး လုပ်ငန်းစဉ်များကို တန်ပြန်ပံ့ပိုးပေးရန်နှင့် နိုင်ငံရေးအကျဉ်း သားများအားလုံး ရုန်းထွက်လွတ်မြောက်ရေးအတွက် ပြည်တွင်း၊ ပြည်ပရှိ ပြည်သူလူထုတစ်ရပ်လုံး ပါဝင်မည့် "နိုင်ငံတကာလှုပ်ရှားမှု - ROSE Movement: Roses of Hope" သို့မဟုတ် နှင်းဆီလှုပ်ရှားမှုကို နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ၈၁ နှစ်ပြည့်မွေးနေ့ဖြစ်သော လာမည့် ဇွန်လ ၁၉ ရက်နေ့တွင် တစ်ခဲနက် ဆင်နွှဲသွားမည်ဖြစ်ကြောင်း တရားဝင် ထုတ်ပြန်ကြေညာလိုက်သည်။ အဆိုပါ လှုပ်ရှားမှုကြီးသည် ၂၀၂၆ ခုနှစ်၏ ပထမဦးဆုံးသော နိုင်ငံလုံးဆိုင်ရာ လူထုလှုပ် ရှားမှုကြီးဖြစ်ပြီး အွန်လိုင်းနှင့် မြေပြင်အပြင် မိမိဒေသနှင့် ရန်သူ့ဒေသပါမကျန် အသွင်သဏ္ဌာန်မျိုးစုံဖြင့် ဖော်ဆောင်သွားမည်ဖြစ်ကာ မဏ္ဍိုင်လှုပ်ရှားမှုကို "Proof of Life" ကမ်ပိန်းနှင့်လည်း အတူပူးတွဲ၍ လှုပ်ရှားစည်းရုံးသွားမည် ဖြစ်သည်။ ယခုလှုပ်ရှားမှု၏ ကြွေးကြော်သံအဖြစ် “အမေစုနှင့်အတူ ဆက်လက်တိုက်ပွဲဝင်ကြ” ဟု သတ်မှတ်ထားပြီး ပြည်သူလူထုအနေဖြင့် ဇွန်လ ၁၉ ရက်နေ့တွင် မိမိတို့ သက်ဆိုင်ရာဒေသ၏ လုံခြုံရေးအခြေအနေများအရ သင့်လျော်မည့် နည်းလမ်းများဖြင့် ပါဝင်လှုပ်ရှားနိုင်ကြောင်း သိရသည်။ ပြည်သူများအနေဖြင့် ပါဝင်နိုင်မည့်ပုံစံများမှာ နှင်းဆီပန်းများ သို့မဟုတ် လက်လှမ်းမီရာ အခြားပန်းတစ်မျိုးမျိုးကို ဘုရားတင်ခြင်း၊ ပန်းဆင်ခြင်း၊ အပြန်အလှန် ဝေငှခြင်း၊ လူမှုကွန်ရက်စာမျက်နှာများတွင် ဓာတ်ပုံများ တင်ပြခြင်းနှင့် မြေပြင်လူထုသပိတ်လှုပ်ရှားမှုများတွင် ကိုင်ဆောင်ဆန္ဒပြခြင်းတို့ ဖြစ်ပြီး အဆိုပါနှင်းဆီလှုပ်ရှားမှုကြီးတွင် ပြည်တွင်းပြည်ပ ပြည်သူတစ်ရပ်လုံး အင်တိုက်အားတိုက် ပါဝင်ကြရန်လည်း တိုက်တွန်းနှိုးဆော်ထားသည်။ ယင်းလှုပ်ရှားမှုမှတစ်ဆင့် လူထုခေါင်းဆောင် အမေစုနှင့်တကွ နိုင်ငံရေးအကျဉ်းသားများအားလုံး ခြွင်းချက်မရှိ ချက်ချင်းလွှတ်ရန်၊ အဓမ္မစစ်မှုထမ်းဥပဒေကို ချက်ချင်းဖျက်သိမ်းရန်နှင့် မြန်မာပြည်၏ သမ္မတသည် ဦးဝင်းမြင့် ဖြစ်ပြီး ဒေါ်အောင်ဆန်းစုကြည်သည် နိုင်ငံတော်၏ အတိုင်ပင်ခံပုဂ္ဂိုလ် ဖြစ်ကြောင်း ထပ်လောင်းအတည်ပြုဖော်ပြရန်ဟူသော လူထု၏ ကြေညာချက် ၃ ရပ်ကို လူထုအသံအဖြစ် ဖော်ထုတ်ပြသသွားမည် ဖြစ်သည်။ စစ်အုပ်စုက နိုင်ငံတကာနှင့် ဒေသတွင်း ဖိအားများကြောင့် နိုင်ငံရေးအကျဉ်းသားများ လွှတ်ပေးရေးကို အကျပ်ရိုက်လျက်ရှိသော်လည်း အလုံးစုံလွတ်ငြိမ်းခွင့်ပေးရန် မရဲဘဲ ဒေါ်အောင်ဆန်းစုကြည်အား နေအိမ်အကျယ်ချုပ်ပြောင်းခြင်း၊ သမ္မတဦးဝင်းမြင့်ကို စောင့်ကြည့်ထိန်းချုပ်ခြင်းတို့ဖြင့် လှည့်စားနေပြီး နိုင်ငံရေးအကျဉ်းသားများကို အလုံးစုံလွတ်ငြိမ်းချမ်းသာခွင့် မပေးဘဲ နိုင်ငံရေးစားပွဲခုံများအဖြစ် အသုံးချကစားနေကြောင်း ထုတ်ပြန်ချက်တွင် ထောက်ပြထားသည်။ တစ်ဖက်တွင်လည်း စစ်အုပ်စုက တရားဝင်မှုနှင့် တည်ငြိမ်မှုရရှိရန် ဟန်ဆောင်နေသော်လည်း လက်တွေ့တွင် အကျဉ်းပျက်ချစားမှုများ၊ တရားဥပဒေစိုးမိုးမှု ကင်းမဲ့မှုများနှင့်အတူ ပြည်သူကို ဥပဒေမဲ့ ဖိနှိပ်ခေါင်းပုံဖြတ်လျက်ရှိပြီး၊ စစ်အင်အားပြန်လည်ဖြည့်တင်းရန်အတွက် မြို့ပေါ်နှင့် ကျေးလက်ဒေသများတွင် လူငယ်၊ လူရွယ်များအား ရုတ်ရက်ဆင်းဖမ်းကာ အဓမ္မစစ်မှုထမ်းခိုင်းခြင်း၊ ပြည်သူစစ် (ပသ) အဖြစ် ရှေ့တန်းတွင် အသေခံခိုင်းခြင်းများကို ပြုလုပ်နေသည်။ စစ်တပ်က စစ်အာဏာသက်ဆိုးရှည်ရေးအတွက် ကြိုးပမ်းနေသောကြောင့် အတွင်းမီး၊ အပြင်မီး ဝိုင်းနေသည့် စစ်အုပ်စု၏ အတုအယောင် ရွေးကောက်ပွဲလွန် အရပ်သားစစ်တစ်ပိုင်းအာဏာရှင် တည်ဆောက်ရေး ကြိုးပမ်းမှုများနှင့် ဟန်ပြနိုင်ငံရေးခြေလှမ်းများကို ရိုက်ချိုးရန်အတွက် အခုလို လှုပ်ရှားမှုကို ဖော်ဆောင်ရခြင်းဖြစ်ကြောင်း ဆိုသည်။ အဆိုပါလှုပ်ရှားမှုကို နွေဦးတော်လှန်ရေး၏ ပြည်တွင်း၊ ပြည်ပ လှုပ်ရှားမှုများတွင် ပါဝင်နေကြသည့် သပိတ်အင်အားစုများ၊ နိုင်ငံတကာရောက် မြန်မာနိုင်ငံသားအစုအဖွဲ့များနှင့် အရပ်ဘက်အဖွဲ့အစည်းများကို စုစည်းထားသည့် လှုပ်ရှားမှုကြီးပြလက်မောင်းတစ်ခုဖြစ်သော People Movement Platform က ဦးဆောင်ဖော်ဆောင်ခြင်း ဖြစ်သည်။ အဆိုပါအဖွဲ့အနေဖြင့် People Survey၊ Silent Strike၊ Comment Campaign နှင့် Profile Campaign စသည့် အတုအယောင်ရွေးကောက်ပွဲ ဆန့်ကျင်ရေးလှုပ်ရှားမှု (Anti-Sham Election Campaign) များကို အတူတကွ အောင်မြင်စွာ ဖော်ဆောင်ခဲ့ကြပြီးဖြစ်ကာ ယခုအခါတွင်လည်း အာဏာရှင်စနစ် အမြစ်ပြတ်ချေမှုန်းနိုင်ရေးအတွက် နောက်ထပ်လှုပ်ရှားမှုများကို ဆက်လက်အကောင် အထည်ဖော်ဆောင်ရွက်သွားမည်ဖြစ်သည်။ မြန်မာနိုင်ငံတွင် ဖက်ဒရယ်ဒီမိုကရေစီတည်ဆောက်ရေးနှင့် အကာအကွယ်စနစ် အပြည့်အဝရရှိစေရေးဆိုသော တူညီသည့် ရည်မှန်းချက်ဖြင့် ပြည်တွင်းနှင့် ပြည်ပလှုပ်ရှားမှုများကို ဟန်ချက်ညီညီ ပေါင်းစပ်ဖော်ဆောင်သွားမည်ဖြစ်ကြောင်း အဆိုပါ အင်အားစုများကတ ရားဝင် ထုတ်ပြန်ကြေညာသည်။

မြန်မာနိုင်ငံတစ်ဝန်း စစ်ကောင်စီတပ်ဖွဲ့ဝင် ၂၁ ဦးသေဆုံး ရန်ကုန်၊ ဇွန် ၁၄ မြန်မာနိုင်ငံတစ်ဝန်း ဇွန်လ ၁၄ ရက်နေ့ ရရှိထားသော အချက်အလက်များအရ စစ်ကောင်စီ တပ်ဖွဲ့ဝင် ၂၁ ဦး သေဆုံးကြောင်း ပြည်သူ့ကာကွယ်ရေးတပ်ဖွဲ့များ၏ ထုတ်ပြန်ချက်နှင့်ပြောဆို ချက်များအရ သိရှိရသည်။ ရန်ကုန်ခေတ်သစ်အနေဖြင့် နေ့စဉ် စစ်သား သေဆုံးမှု စာရင်းများကို ထုတ်ပြန် ရာတွင် ဒေသကာ ကွယ်ရေးတပ်ဖွဲ့များ၏ ထုတ်ပြန်ချက်များနှင့် ပြောဆိုချက် များကို စုစည်းဖော် ပြရခြင်းဖြစ်ပြီး မြေပြင် အခြေအနေတွင် အမှန်တကယ် စစ်သားများ သေဆုံးမှု ရှိ၊ မရှိ ကွင်းဆင်း အတည်ပြုနိုင်ခြင်း မရှိသည်ကို သိစေအပ်ပါသည်။

ထို့ကြောင့် ဇွန်လ ၁၃ ရက်နေ့မှ စတင်၍ တော်လှန်ရေးပူးပေါင်းအဖွဲ့များနှင့် အကြမ်းဖက် စစ်တပ် အကြား အချိန်မရွေးထိတွေ့ပစ်ခတ်မှုများ ဖြစ်ပွားလာနိုင်သောကြောင့် လေညာ-ပြည်ကြီးမဏ္ဍိုင်၊ ရတနာပုံလမ်းပိုင်းနှင့် ပြည်ထောက်စုလမ်းမကြီးတလျှောက် နေထိုင်လျက်ရှိသော ပြည်သူများ စစ်တပ်နှင့် နီးကပ်စွာနေထိုင်ခြင်း၊ နီးကပ်စွာသွားလာခြင်းများ ရှောင်ကြဥ်ကြပါရန်နှင့် အနီးနားရှိခြံပိုင်ရှင်များ၊ တော်လှန်ရေးအဖွဲ့များမှ ပြောင်းရွှေ့နေထိုင်ရန် သတိပေးထားသော ပြည်သူများအနေဖြင့် ‌ရွှေ့ခိုင်းထားသောနေရာများတွင် နေထိုင်ပေးကြရန် ကော့သောင်းခရိုင်တပ်ရင်း ၁ က အသိပေးပြောဆိုထားသည်။

မြစ်ခြေမြို့ကို စစ်တပ်က ထပ်မံစစ်ကြောင်းထိုး ဝင်ရောက်လာပြီး ရိက္ခာ ပြန်ယူသည့် ပြည်သူ ၃ ဦးကို ထပ်မံဖမ်းဆီးထား၊ ဘုတ်ပြင်းမြို့နယ်တွင်လည်း တိုက်ပွဲများ ပြင်းထန်နေ၍ လမ်းပိုင်းတချို့ ပိတ်ထား ရန်ကုန်၊ ဇွန် ၁၄ မကွေးတိုင်း၊ ပခုက္ကူမြို့နယ်၊ မြစ်ခြေမြို့အတွင်းကို အကြမ်းဖက် စစ်တပ်က ထပ်မံစစ်ကြောင်းထိုး ဝင်ရောက်လာပြီး ရိက္ခာပြန်ယူသည့် ပြည်သူ ၃ ဦးကို ထပ်မံဖမ်းဆီးသွားကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။ ပြီးခဲ့သည့် ဇွန်လ ၁၂ ရက်နေ့တွင် ပုဂံ-ညောင်ဦးဘက်မှ အကြမ်းဖက် စစ်တပ် စစ်ကြောင်းသည် စက်လှေ ၃ စီးဖြင့် လက်နက်ကြီးပစ်ကူများယူကာ မြစ်အနောက်ဘက်ကမ်းသို့ ကူးလာခဲ့ရာ ညောင်နီပင်ရွာနှင့် ညောင်လှရွာအတွင်းကို သေနတ်များ ရမ်းသမ်းပစ်ခတ်ကာ စစ်ကြောင်းထိုးလာပြီး BPI စက်ရုံအတွင်းသို့ ဝင်ရောက်တပ်စွဲခဲ့ကြောင်း သိရသည်။ လက်ရှိချိန်တွင် မြစ်ခြေစခန်းသိမ်းတိုက်ပွဲဖြစ်ပွားပြီးနောက် ရောက်ရှိလာသည့် စစ်ကြောင်းနှင့် ဇွန်လ ၁၂ ရက်နေ့ ညပိုင်းတွင် ထပ်မံအားဖြည့်လာသည့် စစ်ကြောင်းများသည် အင်အား ၂၀၀ ခန့် ရှိပြီး BPI စက်ရုံအတွင်း၌ တပ်စွဲထားပြီး မြစ်ခြေမြို့အတွင်းသို့ တပ်ဖြန့်နေရာယူထားကြောင်း၊ အဆိုပါ အကြမ်းဖက် စစ်တပ်သည် ထပ်မံဝင်ရောက်လာစဉ် မြစ်ခြေမြို့အတွင်းသို့ ရိက္ခာပြန်လည်ယူဆောင်ရန် လာသည့် ရွာသာအေးရွာနှင့် မြို့မရွာတို့မှ အသက် ၄၈ နှစ်အရွယ် ကိုဝင်းကြိုင်၊ အသက် ၄၃ နှစ်အရွယ် ကိုကျော်သူရနှင့် အသက် ၅၆ နှစ်အရွယ် ဦးကြည်အေးတို့ ၃ ဦးကို စစ်တပ်က လမ်းတွင်ဖမ်းဆီးသွားခဲ့ပြီး လက်ရှိအချိန်အထိ အဆက်အသွယ်မရဘဲ ပျောက်ဆုံးနေကြောင်း သိရသည်။ "စစ်ခွေးစစ်ကြောင်းက ဇွန်လ ၁၂ ရက်နေ့ ကူးလာတဲ့ စက်လှေ ၃ စီးက လက်နက်ပစ်ကူယူပြီးတော့မှ မြစ်အနောက်ဘက်ကို ကူလာတယ်။ အဲ့စစ်ကြောင်းက ညောင်နီပင်နဲ့ ညောင်လှရွာနား ရောက်တော့ သေနတ်တွေပစ်ပေါက်ပြီး BPI စက်ရုံထဲကို ဝင်သွားတယ်။ BPI ကနေပြီး မြစ်ခြေမြို့ထဲကူးသွားတယ်။ ပုံဂံ-ညောင်ဦးဘက်က လာတဲ့စစ်ကြောင်းက အခုလက်ရှိ မြစ်ခြေမြို့ထဲ တပ်စွဲထားပြီး လာတဲ့ပြည်သူတွေကို ထပ်ဖမ်းဆီးထားတယ်။ အဲ့နေ့ကပဲ အဲ့စစ်ကြောင်းက အသက် ၄၈ နှစ် ကိုဝင်းကြိုင်၊ အက် ၄၃ နှစ်ကိုကျော်သူရ၊ အသက် ၅၆ ဦးကြည်အေးတို့ ၃ ဦးကို ဖမ်းသွားတယ် အခုထိ အဆက်မသွယ်မရဘူး။ အဲ့နေမနက်က သူ ၃ ဦးက မြစ်ခြေမြို့ထဲ ရိက္ခာပြန်ယူရင်းလမ်းမှာထိုးပြီး ဖမ်ဆီးခံရတာ။ လက်ရှိတော့ စစ်ကြောင်း လှုပ်ရှားမှုမရှိသေးဘဲ မြစ်ခြေမြို့ထဲမှာ ကင်းပုန်ဝပ်နေတယ်လို့ သိရတယ်။ အဲ့ဖမ်းခံရတဲ့သူတွေက ရွာသာအေးရွာနဲ့ မြို့မဘက်က လို့သိရတယ် ကျန်တာမသိရသေးဘူး။ ပုံဂံညောင်ဦးဘက်က မြစ်ခြေစခန်းသိမ်းတဲ့နေက လာတဲ့ စစ်ကြောင်းနဲ့ ဇွန်လ ၁၂ ရက်နေ့ ည ၉ နာရီကလာတဲ့ စစ်ကြောင်းတွေက ဘယ်မှမထွက်ဘဲ BPI ထဲဝင်ပြီး မြစ်ခြေမြု့မှာတပ်ဖြန့်ထားတယ်။ ပုံဂံညောင်ဦးဘက်ကလာတဲ့ စစ်ကြောင်းကတော့ မြစ်ခြေမြို့မှာပဲ BPI ကစစ်ကြောင်း ဆက်ချိတ်ပြီးတော့ ခြေကုတ်ယူထားတယ်။ အင်အားက ၂၀၀ လောက်ရှိမယ်" ဟု ဒေသပြည်သူတစ်ဦးက ပြောဆိုသည်။ ထိုသို့ အကြမ်းဖက် စစ်တပ်က ထပ်မံစစ်ကြောင်းထိုး ဝင်ရောက်လာမှုကြောင့် ညောင်နီပင်ရွာ၊ ညောင်လှရွာ၊ သိမ်တော်ရွာ၊ အိုင်ကြီးရွာ၊ ကံကြီးစုရွာ၊ မုံ့ကုံးရွာ၊ ဖက်ပင်ရွာ၊ သဇင်ရွာ၊ ကြည်စုရွာ၊ သရက်တောရွာ၊ တိုးချဲ့ ၃၊ တိုးချဲ့ ၁၊ အိုင်ရှည်ရွာ၊ ကြက်ရှာရွာ၊ ရွာသာအေးရွာ၊ ထနောင်းကုန်းရွာ၊ မြို့သစ်ရွာ၊ မြို့မရွာ၊ ကြောင်ပန်းခုံရွာနှင့် ဖိုကုန်းရွာများ အပါအဝင် ကျေးရွာပေါင်း ၃၀ ကျော်မှ ပြည်သူ ၈ သောင်းခန့်သည် နေအိမ်များကို စွန့်ခွာကာ ဘေးလွတ်ရာ ထွက်ပြေးတိမ်းရှောင်နေကြရကြောင်း၊ ယခုရက်ပိုင်းအတွင်း မိုးသည်းထန်စွာ ဆက်တိုက်ရွာသွန်းမှုကြောင့် စစ်ဘေးရှောင်ပြည်သူများမှာ စားနပ်ရိက္ခာ၊ မိုးကာများနှင့် ဆေးဝါးများ အရေးပေါ် လိုအပ်လျက်ရှိပြီး ကျန်းမာရေးဆိုင်ရာ အခက်အခဲများနှင့် ဆိုးဝါးစွာ ကြုံတွေ့နေရကြောင်း သိရှိရသည်။ အဆိုပါ အကြမ်းဖက် စစ်တပ်သည် ပြီးခဲ့သည့် မေလနှောင်းပိုင်းနှင့် ဇွန်လဆန်းပိုင်းအတွင်းကလည်း မြစ်ခြေမြို့ပေါ်သို့ စစ်ကြောင်းထိုးဝင်ရောက်ပြီး အမျိုးသမီးများ၊ ကလေးသူငယ်များနှင့် လူငယ်များအပါအဝင် ပြည်သူ ၅၀ နီးပါးကို ဖမ်းဆီး၍ အစုလိုက်အပြုံလိုက် ရက်ရက်စက်စက် သတ်ဖြတ်ခဲ့ပြီး နေအိမ်များကိုလည်း မီးရှို့ဖျက်ဆီးခဲ့ကြောင်း သိရှိရသည်။ ထို့ပြင် တနင်္သာရီတိုင်း၊ ဘုတ်ပြင်းမြို့နယ်တွင်လည်း တိုက်ပွဲများ ပြင်းထန်နေ၍ လမ်းပိုင်းတချို့ ပိတ်ထားကြောင်း ကော့သောင်းခရိုင်တပ်ရင်း ၁ က ထုတ်ပြန်ထားသည်။ ဇွန်လပိုင်းမှ စတင်၍ ဘုတ်ပြင်းမြို့နယ်၊ ပြည်ကြီးမဏ္ဍိုင်မြို့၊ လေညာကျေးရွာ၊ ရတနာပုံလမ်းပိုင်းနှင့် ပြည်ထောင်စု လမ်းမကြီးတလျှောက်ရှိ နယ်မြေများတွင် အကြမ်းဖက်စစ်ကောင်စီတပ်များနှင့် တော်လှန်ရေးအဖွဲ့ များကြား နှစ်ဖက်ပြန်လှန်ပစ်ခတ်တိုက်ခိုက်မှုများ မကြာခဏဖြစ်ပွားနေကြောင်း သိရသည်။

ပုလဲနှင့် တနင်္သာရီမြို့နယ်ရှိ ကျေးရွာများကို စစ်တပ်က လက်နက်ကြီး၊ ဒရုန်းများဖြင့် တိုက်ခိုက်မှု ပြည်သူ ၁ ဦးသေဆုံး ရန်ကုန်၊ ဇွန် ၁၄ စစ်ကိုင်းတိုင်း၊ ပုလဲမြို့နယ်တွင် စစ်တပ်က လက်နက်ကြီးဖြင့် ရမ်းသမ်းပစ်ခတ်ခြင်းကြောင့် လက်တောင်းကြီးရွာမှ အသက် ၆၀ အရွယ် အမျိုးသမီး ၁ ဦး ကျည်ထိမှန်ကာ သေဆုံးခဲ့ကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။ ယမန်နေ့ ဇွန်လ ၁၃ ရက်နေ့ နံနက် ၁၀ နာရီခန့်တွင် ပုလဲမြို့နယ်၊ အလယ်ပုံကျေးရွာအတွင်းသို့ ရောက်ရှိနေသော အကြမ်းဖက် စစ်တပ်စစ်ကြောင်းသည် တိုက်ပွဲဖြစ်ပွားခြင်းမရှိဘဲ မြောက်ဘက်ကို လက်နက်ကြီးများဖြင့် ရမ်းသမ်းပစ်ခတ်ခဲ့ရာ လက်တောင်းကြီးကျေးရွာအတွင်းသို့ ကျရောက်ပေါက်ကွဲခဲ့ပြီး ကျေးရွာပြည်သူ အသက် ၆၀ ဝန်းကျင်အရွယ် အမျိုးသမီး ၁ ဦး ဗုံးစထိမှန်ကာ နေရာတင် သေဆုံးသွားခဲ့ပြီး ပြည်သူ ၁ ဦးလည်း ထိခိုက် ဒဏ်ရာရရှိခဲ့ကြောင်း သိရသည်။ "စစ်ခွေးတွေက အလယ်ပုံရွာထဲကနေပြီး ဘာတိုက်ပွဲမှလည်း မရှိဘဲ နံနက်ပိုင်းမှာ လက်နက်ကြီးတွေနဲ့ လှမ်းပစ်တာ။ အဲဒီကျည်က လက်တောင်းကြီးရွာထဲ ကျပေါက်ပြီး အသက် ၆၀ ကျော် အဖွားအိုတစ်ယောက် ဗုံးစမှန်ပြီး ဆုံးသွားတယ်။ နောက်တစ်ယောက်လည်း ဒဏ်ရာရလို့ ဆေးကုနေရတယ်" ဟု ဒေသပြည်သူတစ်ဦးက ပြောဆိုသည်။ လက်ရှိချိန်တွင် အကြမ်းဖက် စစ်တပ်သည် ပုလဲမြို့နယ်အတွင်းရှိ ကျေးရွာများသို့ စစ်ကြောင်းထိုးဝင်ရောက်ကာ တပ်စွဲထားပြီး နေအိမ်များမှပြည်သူပိုင် ပစ္စည်းများကို ခိုးယူရောင်းစားနေပြီး ပြည်သူများ နေထိုင်ရာ ကျေးရွာများများအတွင်းသို့ လက်နက်ကြီးများဖြင့် ရမ်းသမ်းပစ်ခတ်မှုများပြုလုပ်နေကြောင်း သိရှိရသည်။ အလားတူ တနင်္သာရီတိုင်း၊ တနင်္သာရီမြို့နယ်၊ မော်တုံးရွာကိုလည်း စစ်တပ်က ဒရုန်းဖြင့် ဗုံးကျဲ တိုက်ခိုက်ခဲ့ကြောင်း ဒေသစစ်ရေးသတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။ ယနေ့ ဇွန်လ ၁၄ ရက်နေ့ နံနက် ၁၁ နာရီခန့်တွင် အမတ ၃၀၆ မှ အကြမ်းဖက် စစ်သားများက မော်တုံးရွာကို ဒရုန်းဖြင့် ဗုံးကျဲ တိုက်ခိုက်ခဲ့ကြောင်း၊ ထိုဗုံးကျဲ တိုက်ခိုက်မှု အတွင်း ပြည်သူများ ထိခိုက်မှုမရှိကြောင်း သိရသည်။ "မော်တုံးရွာဘက်မှာတိုက်ပွဲဖြစ်တာ မရှိပါဘူး။ စစ်ခွေးတွေ ဒီနေ့ နံနက်ပိုင်းက ဒရုန်းနဲ့ ရွာထဲကို ကျဲချ တိုက်ခိုက်တယ်လို့ သိရတယ်။ လူထိခိုက်တယ်လို့တော့ မကြားမိဘူး" ဟု ဒေသစစ်ရေးသတင်းရင်းမြစ်က ပြောဆိုသည်။