EBS TV

" አንዳንድ አስመጪዎች ቢሮው እየወሰደ ያለው እርምጃ ጊዜያዊ ነው፣ ከሆነ ጊዜ በኋላ ይቀራል የሚል እሳቤ አላቸው። ግን እርምጃው ይቀጥላል " - አቶ መሐመድ አብዱራህማን የአዲስ አበባ ገቢዎች ቢሮ፣ በክልል የመኪና አስመጪነት የንግድ ፈቃድ ያለው አካል አዲስ ያመጣውን መኪና መሸጥ ያለበት ፈቃድ ባወጣበት ክልል ላይ መሆኑን እና በመዲናዋ ውስጥ መነገድ ከፈለገ ደግሞ የክልል ንግድ ፈቃዱን በመጥቀስ የሽያጭ ደረሰኙንና የሽያጭ መመዝገቢያ ማሽኑን ከገቢዎች ቢሮ ጋር አያይዞ ወርሃዊ ተጨማሪ እሴት ታክሱንም ሆነ ዓመታዊ ግብሩን መክፈል እንዳለበት በቢሮው የሕግ ተገዢነት ዘርፍ ምክትል ቢሮ ኃላፊ አቶ መሐመድ አብዱራህማን አስታወቀዋል። ኃላፊው፤ ​​" ያገለገሉ መኪናዎችን የሚሸጡ ኤጀንቶች በምንም ዓይነት ተአምር አዲስ መኪና ከአስመጪው ተቀብለው መሸጥ የለባቸውም " ብለዋል። " እያንዳንዱ የኮሚሽን ኤጀንት መሸጫ ቦታው ውስጥ የተቀመጡትን መኪኖች የመኪና የባለቤትነት ማረጋገጫ ደብተር (ሊብሬ)፣ የታርጋ ቁጥር እና የተለያዩ ዝርዝር መረጃዎችን በአቅራቢያው ለሚገኝ የታክስ ባለስልጣኑ ቅርንጫፍ ጽህፈት ቤት ማሳወቅ አለበት " ሲሉ ገልጸዋል። በተጨማሪም " ያገለገሉ መኪናዎች ወደ መሸጫ ቦታቸው ሲያስገቡ 24 ሰዓት ባልሞላ ጊዜ ውስጥ የማስመዝገብ ግዴታ የሚጥል ውልና ቃለ መሃላ ፈርመው ኤጀንቶች ወደ ስራ እንዲገቡ ተደርጓል " ብለዋል። ከዚህ በፊት ያገለገሉ መኪናዎች ሲሸጡ ምንም ዓይነት ትራንዛክሽን አይመዘገብም ያሉት ኃላፊው አመታዊ ግብር ብቻ ሲከፍሉ መቆየታቸውን አስታውሰዋል። " አሁን ላይ ቢሮ ከዚህ እያጣ ያለው ታክስ አሳሳቢ በመሆኑ የኮሚሽን ኤጀንቶች ያገለገሉ መኪኖችን ሲሸጡ በየጊዜው የመኪናዎች ትራንዛክሽን ግብር በሚከፍሉበት ቅርንጫፍ ጽህፈት ቤት ማሳወቅ አለባቸው " ሲሉ ተናግረዋል። " የኮሚሽን ኤጀንት ንግድ ፈቃድ ባላቸው ግለሰቦች መሸጫ ቦታ የሚሸጡት አዳዲስ መኪኖችን የሚያመጡ  አስመጪዎች እነማን እንደሆኑ አይታወቁም፣ ግን አዳዲስ መኪኖቹ በከተማዋ ባሉ መሸጫ ቦታዎች ላይ ተደርድረው ይሸጣሉ። መኪኖቹ ባሉበት መሸጫ ያለው ፈቃድ ሲታይ የግለሰብ ወይም የኮሚሽን ኤጀንት ፈቃድ ነው " ብለዋል። " መኪና አስመጪዎቹ መኪኖቻቸውን ሲሸጡ የመኪናውን ትክክለኛ የመሸጫ ዋጋ በደረሰኙ ላይ ሳይጽፉ አነስተኛ አድርገው በመጻፍ (Under-invoice) በሁለት እና በሦስት የባንክ ሂሳቦች ገቢ በማድረግ ሰፊ የግብር ስወራ ሲፈጽሙ እንደነበር ደርሰንበታል " ብለዋል። " አንዳንዶቹ ደግሞ የመኪና አስመጪነት ንግድ ፈቃድ ይለጥፋሉ፣ ግን ከውጪ የሚያስመጡት ሁለት ወይም ሦስት አዲስ መኪና ነው። በመሸጫ ቦታው ግን ከ40 እስከ 60 አዳዲስ መኪኖች ይገኛሉ። እነዚህ መኪኖች ከየት መጡ ? ብለን ስናጣራ በተለያዩ ማንነታቸው በማይታወቁ የመኪና አስመጪዎች የመጡ ናቸው " ሲሉ ገልጸዋል። " ያገለገሉ መኪኖች የሚሸጡ የኮሚሽን ኤጀንት ፈቃድ ያላቸው ግለሰቦችንም አግኝተናል። ማንነታቸው የማይታወቁ አስመጪዎችም በኮሚሽን ኤጀንት ፈቃድ ሲሰሩ ተገኝተዋል " ብለዋል። " በየቀኑ ትልቅ የመኪና ትራንዛክሽኖች በመዲናዋ ይደረጋሉ፣ ግን አስመጪው በውል አይታወቅም። በዚህም በኮሚሽን ፈቃድ የስራ ዘርፍ  የተሰማሩ ግለሰቦችን ፈቃዳቸውን ለጊዜው አግደናል " ሲሉ አሳውቀዋል። " በኮሚሽን ኤጀንት ፈቃድ አላግባብ ተደርድረው ሲሸጡ የተገኙ አዳዲስ መኪኖች በቀጥታ ለአስመጪዎች እንዲመለሱ ተደርጓል " ሲሉም ገልጸዋል። " አንዳንድ አስመጪዎች ቢሮው እየወሰደ ያለው እርምጃ ጊዜያዊ ነው፣ ከሆነ ጊዜ በኋላ ይቀራል የሚል እሳቤ አላቸው። በዚህም መኪኖቻቸውን በተለያዩ የግለሰብ ቦታዎች፣ መጋዘኖች አስቀምጠው እየሰሩ ነው። በእነዚህም ላይ እርምጃ እንወስዳለን " ሲሉ አስጠንቅቀዋል። " ቢሮው የቁጥጥር ሰራተኞች አሉት፣ እነዚህ ሰራተኞች የበር ለበር ቁጥጥር፣ የመጋዘን ክትትል፣ የመኪና ላይ ቁጥጥር ያደርጋሉ፣ በዚህም በመኪኖች ተጭነው ከአንድ ቦታ ወደ ሌላ ቦታ ሲጓጓዙ እየተገኙ ነው፣ በር ለበር ቁጥጥር ወቅትም የተደበቁ መኪኖች ተገኝተዋል " ብለዋል። " አዲስ አበባ ውስጥ ምን ያህል የመኪና መጋዘኖች አሉ የሚለውን በቢሮ ደረጃ ለይተን ጨርሰናል " ያሉት ኃላፊው በመጋዘኖች ውስጥ ከሕግ አግባብ ውጪ የተቀመጡ መኪናዎች ካሉ ቢሮ አስፈላጊውን እርምጃ እንደሚወስድ አስታውቀዋል። አክለውም " ማንኛውም የመኪና አስመጪ ያስመጣቸውን መኪኖች መሸጥ ያለበት በራሱ የመሸጫ ቦታ ላይ ብቻ በመሆኑ፣ በመንገዶች ላይም ሆነ በተለያየ የግለሰቦች ቤት ውስጥ ሲሸጥ የተገኘ አስመጪ ላይ ቢሮው ቀጣይነት ያለው ህጋዊ እርምጃ ይወስዳል " ሲሉ አስጠንቅቀዋል። ቲክቫህ ኢትዮጵያ አዲስ አበባ ነሐሴ 30 ቀን 2018 ዓ/ም @tikvahethiopia