Pressuzb

Мирзо Улуғбек ва Шайхонтоҳур тумани солиқ инспекциялари собиқ раҳбарларининг иши судда кўрилмоқда Жорий йил 27 январь куни Президент Шавкат Мирзиёев раислигида ўтказилган йиғилишда Мирзо Улуғбек тумани солиқ инспекцияси бошлиғи Дилшод Усмановга нисбатан жиноят иши қўзғатилгани маълум қилинган эди. Йиғилишда у инспекция биносининг бир қисмини шахсий мақсадларда ижарага бериб, 315 миллион сўм маблағни ўзлаштиргани, шунингдек, иш фаолиятида гуруҳбозлик ва маишатбозликка йўл қўйгани қайд этилган. Шу билан бирга, Президент топшириғига асосан Шайхонтоҳур тумани солиқ инспекцияси бошлиғи Хожиакбар Мулладжановни лавозимидан озод этиш, унинг фаолиятини ўрганиш ҳамда қонун устуворлигини таъминлаш бўйича чоралар кўриш белгиланган эди. Маълумотларга кўра, айни пайтда Дилшод Усманов ва Хожиакбар Мулладжановга оид жиноят иши Жиноят ишлари бўйича Мирзо Улуғбек туман судида кўриб чиқилмоқда. Дилшод Усмановга Жиноят кодексининг 165-модда 1-қисми (товламачилик); 167-модда 3-қисми “а” банди (ўзлаштириш ёки растрата йўли билан талон-торож қилиш); 205-модда 2-қисми “а” банди (ҳокимият ёки мансаб ваколатини суиистеъмол қилиш) бўйича айблов қўйилган. Хожиакбар Мулладжановга Жиноят кодексининг 167-модда 3-қисми “а” банди (ўзлаштириш ёки растрата йўли билан талон-торож қилиш); 205-модда 2-қисми “а” банди (ҳокимият ёки мансаб ваколатини суиистеъмол қилиш) бўйича айблов эълон қилинган. @pressuzb

Президент Шавкат Мирзиёев Қирғиз Республикаси Президенти Садир Жапаровнинг таклифига биноан 30 июль – 1 август кунлари давлат ташрифи билан ушбу мамлакатда бўлади. Ташриф дастурига мувофиқ, Ўзбекистон етакчиси Марказий Осиё ва Озарбайжон давлат раҳбарларининг норасмий Маслаҳат учрашуви ва бошқа тадбирларда ҳам иштирок этади. @pressuzb

❗️Янги ўқув йилидан талабаларни баҳолаш ва имтиҳон олиш бутунлай ўзгаради Ҳукумат қарори лойиҳасига кўра, 2026/2027 ўқув йилидан бошлаб олий таълим ташкилотларида талабалар билимини баҳолаш ва назорат қилишнинг янги тартиби жорий этилиши кутилмоқда. ➖ Якуний назорат имтиҳонларини овозли ва видео кузатув камералари билан жиҳозланган аудиторияларда ўтказиш тизими жорий этилади. ➖ Ўтказиладиган якуний назорат турларини кенг жамоатчилик учун олий таълим ташкилотларининг расмий веб-сайтидаги ҳавола орқали бевосита онлайн кузатиш имконияти яратилади. ➖ Якуний назорат имтиҳонлари саволларини шакллантиришда талаба билим ва кўникмаларини чуқур таҳлил қилиш имконини берувчи ёзма топшириқларнинг аниқ мезонлари ишлаб чиқиладм ҳамда профессор-ўқитувчилар томонидан баҳолашда изоҳ ёзиш тизими жорий этилади. ➖ Якуний назорат имтиҳонлари вақтида уяли алоқа воситалари, микроқулоқчин, компьютер ҳамда кўчирмачиликка сабаб бўладиган ҳар қандай воситаларни олиб кириш ва улардан фойдаланиш тақиқланади. Бундай ҳолат видеокузатув орқали кейинчалик аниқланса ҳам, имтиҳон натижаси бекор қилинади. ➖ Якуний назорат имтиҳонларига талабалар паспорт, ID карта, талабалик гувоҳномаси ёки ҳайдовчилик гувоҳномасини кўрсатган ҳолда киритилади. ➖ Имтиҳон бошланганидан кейин кечикиб келган талабалар имтиҳонда иштирок этишига рухсат берилмайди. Узрли сабабларсиз аудиториядан чиққан талабалар ҳам имтиҳонга қайта қўйилмайди. ➖ Ҳар бир кафедра фан бўйича баҳолаш рубрикалари (мезонлар матрицаси)ни ишлаб чиқади ва улар ўқув дастурида акс эттирилади. ➖ Ҳар бир фан бўйича талабанинг ўзлаштириши 100 баллик тизимда баҳоланади. Балл жорий назорат учун — 30, оралиқ назорат учун — 20, якуний назорат учун — 50 балл қилиб тақсимланади. ➖ Жорий, оралиқ ва якуний назоратларнинг ҳар бири бўйича максимал баллнинг 60 фоизи саралаш бали этиб белгиланади. Жорий ёки оралиқ назоратдан саралаш балини тўпламаган талабалар якуний назоратга киритилмайди. ➖ Академик гуруҳ учун бир кунда биттадан ортиқ якуний назорат ўтказилишига йўл қўйилмайди. Якуний назоратлар камида бир кун оралиғида белгиланади. ➖ Якуний назорат натижалари бўйича қониқарсиз балл олган талабага семестр якунида икки ҳафта муддатда бир марта бепул қайта топшириш имконияти берилади. ➖ Семестр ва ўқув йили якунида академик қарздорлиги мавжуд талабалар ўқишдан четлаштирилмайди. Улар фақат қарздор бўлган фанларни қайта ўзлаштириб, шу фанлар учун шартнома маблағини тўлайди. ➖ Академик қарздор талабалар учун ёзги семестр ташкил этилиши мумкин. Ёзги семестрда қайта ўқиш фақат тўлов асосида амалга оширилади (бир марта бепул қайта топшириш ҳолати бундан мустасно). ➖ Талаба баҳолаш натижасидан норози бўлса, баҳолаш муддати якунланганидан кейин 48 соат ичида апелляция бериш ҳуқуқига эга. Апелляция комиссияси шикоятни 2 иш куни ичида кўриб чиқади. @pressuzb

Президент Шавкат Мирзиёевнинг Ўзбекистонга янги тайинланган хорижий элчилар билан учрашувидаги нутқидан энг муҳим фикрлар ➖ Бугунги мураккаб геосиёсий шароитда дипломатлар зиммасидаги масъулият ҳар қачонгидан ҳам муҳим; ➖ Очиқлик сиёсати туфайли инвестиция муҳити яхшиланиб, экспорт салоҳияти оширилмоқда ва хусусий сектор учун кенг имкониятлар яратилмоқда; ➖ Ўтган йили мамлакат ялпи ички маҳсулоти 7,7 фоизга ўсди, иқтисодиётга 43 миллиард доллар инвестиция жалб қилинди; ➖ Халқаро захиралар 70 миллиард доллардан ортди, жорий йилда ЯИМ ҳажми 180 миллиард доллардан кўпайиши кутилмоқда; ➖ Ўзбекистон 170 давлат билан дипломатик алоқалар ўрнатган, 90 дан ортиқ давлат билан визасиз режим амал қилмоқда; ➖ Ўзбекистон бундан буён ҳам прагматик ва ташаббускор ташқи сиёсатни изчил давом эттиради; ➖ Ўзбекистон келгуси йилдан Қўшилмаслик ҳаракатига раислик қилади. 2027 йил апрель ойида мамлакатимизда ташкилот саммити ўтказилади; ➖ Италия Ўзбекистоннинг нафақат Европа Иттифоқидаги, балки жаҳон миқёсидаги муҳим сиёсий ва иқтисодий шерикларидан бири; ➖ Италия билан муносабатлар стратегик шериклик даражасига кўтарилди, “Италия – Марказий Осиё” саммитининг биринчи йиғилиши ўтказилди; ➖ Италия компаниялари билан “яшил” энергетика, металлургия, кимё, қишлоқ хўжалиги, фармацевтика, таълим, туризм ва миграция соҳаларида йирик лойиҳалар амалга оширилмоқда; ➖ Исроил-Фаластин муаммоси бўйича Ўзбекистон азалдан қатъий ва принципиал позицияни эгаллаб келган. Масалани халқаро ҳуқуқнинг умумэътироф этилган меъёрлари асосида тинч йўл билан, “икки халқ учун икки давлат” тамойилига таянган ҳолда ҳал этиш тарафдоримиз; ➖ Саудия Арабистони билан ҳамкорлик доирасида 25 миллиард долларлик инвестиция лойиҳалари портфели шакллантирилган. Саудия тараққиёт жамғармаси ҳам ислоҳотларимизга фаол кўмак кўрсатмоқда; ➖ Қувайт инвестиция агентлиги билан нефть-кимё, давлат-хусусий шериклик асосида инфратузилма лойиҳаларини амалга ошириш имконияти мавжуд; ➖ Жазоир билан Ҳукуматлараро қўшма комиссияни таъсис этиш, Ишбилармонлар кенгашини тузиш, Имтиёзли савдо битимини имзолаш иқтисодий алоқаларимизга янги шиддат бағишлайди; ➖ Малайзия билан муносабатларни стратегик шериклик даражасига кўтариш учун асос яратилди, Имтиёзли савдо битими йил якунигача имзоланиши кутилмоқда; ➖ Малайзия жамиятида Имом Бухорий, Имом Мотуридий ва Баҳоуддин Нақшбанд меросига қизиқиш тобора ортиб бормоқда; ➖ Покистон билан ҳафталик авиақатновлар сони 6 тага етди, сентябрдан Тошкент–Карочи йўналишида тўғридан-тўғри рейслар ҳафтасига икки марта амалга оширилади; ➖ Жорий йилда Покистонда “Ўзбекистон маданияти ҳафталиги” ва унинг доирасида “Ўзбек киноси кунлари” ўтказилади; ➖ Бу йил бошидан буён Озарбайжон билан ўзаро савдо 40 фоизга ошди, қўшма корхоналар сони салкам 450 тага етди. Юк ташиш ҳажми икки баробарга ўсди; ➖ Ўзбекистон ва Озарбайжон ўртасидаги инвестиция портфелини яқин истиқболда 10 миллиард долларга етказиш режалаштирилган; ➖ Қозоғистон билан ўзаро савдо ҳажми ўтган йили 5 миллиард долларга яқинлашди. Жорий йил бошидан буён бу рақам 26 фоизга ўсди. Яқин йилларда ушбу кўрсаткични 10 миллиард долларга етказиш асосий мақсад ҳисобланади; ➖ Айни пайтда 8 миллиард долларга яқин қўшма инвестиция лойиҳалари портфели шакллантирилиб, “Йўл харитаси” имзоланди. @pressuzb

Марказий банк асосий ставкани 14 фоиз даражасида ўзгаришсиз қолдирди. @pressuzb

Муминов Фарид Туробович “Ўзбекнефтгаз” АЖ бошқаруви раисининг маҳаллийлаштириш, саноатда кооперация алоқаларини кенгайтириш ҳамда ахборот технологиялари масалалари бўйича ўринбосари лавозимига тайинланди. @pressuzb

Президент Шавкат Мирзиёев Қозоғистон Президенти Қaсим-Жомарт Тоқаевнинг таклифига биноан 29 июль куни амалий ташриф билан ушбу мамлакатда бўлади. Давлат раҳбари Остона шаҳрида “Келажак ўйинлари” учинчи халқаро мусобақасининг тантанали очилиш маросимида иштирок этади. Мусобақа 29 июлдан 9 августга қадар 50 дан ортиқ мамлакат вакиллари, жумладан, Ўзбекистон спортчилари иштирокида ўтказилади. @pressuzb

Президент Шавкат Мирзиёевнинг энергетика бўйича видеоселектордаги асосий фикрлари: ➖ Ўн йиллик ислоҳотлар натижасида ички эҳтиёжни тўлиқ қоплайдиган генерация қувватлари яратилди; ➖ Энергетикадаги асосий муаммо маблағда эмас, тизим бошқарувида; ➖ Бир хил тармоқларда натижа турлича. Бунга талаб, назорат ва интизомнинг ҳар хиллиги сабаб; ➖ Аҳоли ва тадбиркорлар энергетика тизимига масъул раҳбарлар ишидан мутлақо норози; ➖ Подстанция ва трансформаторлардаги авариялар аҳоли, тадбиркорлар ва иқтисодиётга катта зарар келтирмоқда; ➖ Энергия истеъмоли баланси аниқ ҳисобланмагани учун миллиардлаб маблағ самарасиз сарфланмоқда; ➖ Энергия самарадорлиги фақат қуёш панели эмас. Аввало уйларнинг самарадорлигини ошириш зарур; ➖ Ходимлар ишини бошқариш рақамлаштирилмагани сабабли тизимда кундалик назорат суст; ➖ 3,7 миллион хонадон суюлтирилган газдан фойдаланади, аммо уни ўз вақтида етказиш муаммоси сақланиб қолмоқда; ➖ Хусусий тадбиркорлар суюлтирилган газ етказиб беради, Ижтимоий реестрдаги оилаларга субсидия ажратилади; ➖ Суюлтирилган газни ташиш, сақлаш ва тарқатиш тизими халқаро стандартлар асосида қайта кўриб чиқилади; ➖ Янги энергетика лойиҳалари минглаб замонавий мутахассисларга эҳтиёжни оширади; ➖ Таълим амалиёт билан боғланмагани учун битирувчининг ишга мослашишига 2–3 йил кетмоқда. @pressuzb

Жалолов Музаффар Мухитдинович Сарбон университети ректори этиб тайинланди Музаффар Жалолов 2018-2025 йилларда Тошкент шаҳридаги ИНҲА университети ректори сифатида фаолият юритган. Тайинловга қадар у Жаҳон иқтисодиёти ва дипломатия университетида рақамли трансформация йўналиши раҳбари сифатида ишлаётган эди. Маълумот учун, Сарбон университети 2024 йил Вазирлар Маҳкамасининг қарори асосида ташкил этилган хусусий олий таълим муассасаси ҳисобланади. @pressuzb

FIDE’га раҳбарлик қилиш навбати Ўзбекистонга ҳам келмадими? Европа Иттифоқининг санкцияларидан сўнг FIDE президенти Аркадий Дворкович ваколатларини вақтинча тўхтатди. Бу йил сентябрь ойида эса Самарқандда 46-Бутунжаҳон шахмат олимпиадаси, FIDE Конгресси, Бош Ассамблеяси ҳамда Халқаро шахмат федерацияси (FIDE) президенти сайлови бўлиб ўтади. Эътиборли жиҳати шундаки, 1995 йилдан буён FIDE’га узлуксиз россияликлар раҳбарлик қилиб келмоқда. Аввал 1995–2018 йилларда ташкилотга Кирсан Илюмжинов бошчилик қилган бўлса, 2018 йилдан буён бу лавозимни Аркадий Дворкович эгаллаб келди. Сўнгги йилларда Ўзбекистон жаҳон шахматида ўз мавқеини сезиларли даражада мустаҳкамлади. Мамлакат жаҳон чемпионлари, Олимпиада ғолиблари ва элита гроссмейстерларни етиштирди, нуфузли халқаро мусобақаларга мунтазам мезбонлик қилмоқда. Самарқанднинг FIDE’нинг энг муҳим тадбирларига мезбонлик қилиши ҳам мамлакатнинг халқаро шахмат ҳамжамиятидаги ўрни тобора ортиб бораётганини кўрсатади. Афсуски, 2026 йилги сайлов учун номзодларни кўрсатиш муддати ҳам тугади. FIDE қоидаларига кўра, президентликка номзодлар сайловдан икки ой аввал тақдим этилиши лозим эди ва бу муддат 26 июль куни якунланди. Албатта, FIDE президенти бўлиш осон эмас. Бунинг учун юзлаб миллий федерациялар қўллаб-қувватлаши, узоқ йиллик халқаро спорт дипломатияси ва менежмент соҳасида катта тажриба талаб этилади. Муддат якунлангач, FIDE офиси президентлик учун учта номзодни қабул қилди. Улар — Қозоғистон шахмат федерацияси президенти, Freedom Holding раҳбари Тимур Турлов, германиялик тадбиркор ва Freestyle Chess лойиҳаси асосчиларидан бири Ян Ҳенрик Бюттнер ҳамда Германиянинг WR Chess раҳбари Вадим Розенштейн. Шу билан бирга, бугун Ўзбекистонда ҳам бундай даражадаги раҳбарни етиштириш учун етарли салоҳият шаклланганини инкор этиб бўлмайди. Мамлакат нафақат кучли шахматчиларни, балки халқаро спорт бошқарувида фаолият юритишга қодир мутахассисларни ҳам тайёрлаш имкониятига эга. Сўнгги йилларда орттирилган тажриба, халқаро нуфуз ва йирик мусобақаларни юқори савияда ташкил этиш қобилияти бунга мустаҳкам замин яратди. Самарқанд FIDE президенти сайловига мезбонлик қилаётган бир пайтда, Ўзбекистоннинг ўз номзоди йўқлиги ўтказиб юборилган имконият сифатида баҳоланиши мумкин. Зеро, мамлакат бугун жаҳон шахматида юқори спорт натижаларига эришиш босқичидан ўтди. Энди навбат халқаро шахмат бошқарувида ҳам муносиб ўрин эгаллашга келмоқда. Жаҳон чемпионлари ва Олимпиада ғолибларини етиштирган давлат халқаро федерация раҳбариятида ҳам ўз сўзини айтишга интилиши табиий жараёндир. Кейинги сайловларга тайёргарликни бугундан бошлаш, халқаро спорт дипломатиясида тажрибага эга мутахассисларни қўллаб-қувватлаш ва келажакда FIDE раҳбариятида Ўзбекистон вакили бўлиши учун тизимли иш олиб бориш вақти келгандек. @pressuzb

Энергетика вазирлиги ходимлари кабинетдан маҳаллага тушади — Президент топшириғи Енергетика вазирлиги тизими ходимлари 90 фоиз вақтини пастда — маҳаллаларда инфратузилма объектларидаги муаммоларни бартараф етиш ишлари билан ўтказиши керак. Бу ҳақида Президент Шавкат Мирзиёев енергетика вазири Шерзод Хўжаевга топшириқ берди. Шунингдек, тизимни такомиллаштириш ва бозор тамойилларига ўтишни жадаллаштириш бўйича аниқ ҳисоб-китоблар ва таклифлар киритилади. Суюлтирилган газ етказиб беришдан тортиб, барча йўналишларда рақобат механизмлари жорий етилади. Соҳада фақат ҳисоблагичлар ёки биллинг емас, балки ходимларнинг кунлик иш фаолияти, берилган топшириқлар ижроси ва меҳнат самарадорлигини (KPI) баҳолаш жараёнлари ҳам тўлиқ рақамлаштирилади. Кўзда тутилган барча ўзгаришларнинг бош мақсади — енергетика соҳасининг иқтисодиётдаги улушини ошириш ва енг муҳими, аҳоли кайфиятига ижобий таъсир кўрсатишдан иборат. @pressuzb

Бекмурод Абдуллаев иши жиноят ишлари бўйича Янгиҳаёт туман судида кўрилмоқда Ички ишлар вазирининг собиқ ўринбосари Абдуллаев Бекмурод Тожимирзаевич Жиноят кодексининг 167-моддаси (Ўзлаштириш ёки растрата йўли билан талон-торож қилиш)нинг бир қатор қисм ва бандлари бўйича айбланмоқда. Б.Абдуллаев билан бирга жами 30 кишига оид иш жиноят ишлари бўйича Янгиҳаёт туман судида кўриб чиқилмоқда. @pressuzb

Чўлпон маҳалласида баҳсли қурилиш бекор қилинди Президент администрацияси раҳбари Саида Мирзиёева илгари сураётган пойтахтда яшил ҳудудлар ва очиқ жамоат майдонларини сақлаш сиёсати Чўлпон маҳалласидаги қарорда ҳам ўз аксини топди. Бир йилдан ортиқ вақтдан буён баҳсларга сабаб бўлиб келган қурилиш лойиҳаси тўхтатилиб, ҳудуд аҳоли эҳтиёжларидан келиб чиққан ҳолда қайта ободонлаштирилади. 25 июль куни Яшнобод тумани ҳокими Бахтиёр Раҳмонқулов маҳалла аҳолиси билан учрашувда мазкур ҳудудда қурилиш амалга оширилмаслигини маълум қилди. Қурилиш учун қазилган котлован кўмилди, ҳудудни ўраб турган тўсиқлар олиб ташланди. Энди бу ер аҳоли таклифлари асосида болалар ва спорт майдончалари ҳамда яшил ҳудуд сифатида қайта ташкил этилади. Мазкур қарор Саида Мирзиёева илгари сураётган “яшил шаҳар” ёндашувига ҳамоҳангдир. Хусусан, 24 июль куни Президент администрацияси раҳбари Тошкент шаҳрида амалга оширилаётган ободонлаштириш ишлари билан танишиб, пойтахтга “яшил шаҳар” мақомини қайтариш, кўкаламзорлаштириш ишларини изчил давом эттириш, очиқ жамоат майдонларини кўпайтириш ва мавжуд инфратузилмадан самарали фойдаланиш бўйича қатор топшириқлар берган эди. Шу тариқа, бир йилдан ортиқ вақт давом этган баҳсга нуқта қўйилди. Энди мазкур ҳудудда кўп қаватли турар жой эмас, балки аҳоли учун болалар ва спорт майдончалари ҳамда яшил ҳудуд барпо этилади. Бу эса пойтахтда шаҳар муҳитини ривожлантиришда жамоат манфаати ва яшил маконларни сақлаш устувор аҳамият касб этаётганини кўрсатади. @pressuzb

Президентнинг тегишли қарорлари билан: Ахадхон Икромжонович Исоқжонов Вазирлар Маҳкамаси ҳузуридаги Электр энергияси, нефт маҳсулотлари ва газдан фойдаланишни назорат қилиш инспекцияси бошлиғи лавозимига тайинланди; Дадажон Айнақулович Исақулов бошқа ишга ўтиши муносабати билан Вазирлар Маҳкамаси ҳузуридаги Электр энергияси, нефт маҳсулотлари ва газдан фойдаланишни назорат қилиш инспекцияси бошлиғи лавозимидан озод этилди. @pressuzb

Ходжаев Шерзод Хикматуллаевич энергетика вазири этиб тайинланди Бунга қадар у энергетика бозорини ривожлантириш ва тартибга солиш агентлиги директори лавозимида ишлаган. @pressuzb

Мирзамаҳмудов Жўрабек Турсунпулатович энергетика вазири лавозимидан озод этилди. @pressuzb

Президент Шавкат Мирзиёев таваллуд куни муносабати билан табрик йўллаган барчага миннатдорлик изҳор этди Таваллуд куним муносабати билан чин дилдан табриклаб, самимий қутловлар ва эзгу тилакларини йўллаган давлат ва ҳукумат бошлиқларига, хорижий сиёсат ва жамоат арбоблари, ишбилармон доиралар вакилларига, халқаро ташкилотлар раҳбарларига, юртимиздаги маҳаллалар ва меҳнат жамоаларига, нуронийлар, ёшлар, хотин-қизлар ва тадбиркорларга, турли касб эгалари бўлган барча ватандошларимизга чуқур миннатдорлик изҳор этаман. Менинг шаънимга билдирилган бу табрик ва тилакларни, аввало, кўпмиллатли халқимиз ва давлатимизга юксак ҳурмат ва эҳтиром ифодаси, Янги Ўзбекистоннинг дунё миқёсида ортиб бораётган обрў-эътибори ва нуфузининг эътирофи сифатида қабул қиламан.  Фурсатдан фойдаланиб, бағрикенг ва олийжаноб халқимизга яна бир бор чин дилдан ўзимнинг чексиз меҳрим ва ҳурматимни билдираман. Жонажон Ватанимизда эркин ва фаровон, обод ҳаёт қуришга қаратилган ислоҳотларимизни қўллаб-қувватлаб, уларда фаол иштирок этаётган кўпмиллатли халқимизнинг ақл-заковати ва фидокорона меҳнати билан олдимизга қўйган юксак ва шарафли мақсадларга албатта эришамиз, деб ишонаман.                                            Шавкат Мирзиёев, Ўзбекистон Республикаси Президенти @pressuzb

Саида Мирзиёева судьялар ва суд тизими ходимларига табрик йўллади Президент Администрацияси раҳбарининг таъкидлашича, суд тизими ходимлари ҳар куни инсонлар дарди, фожиавий тақдирлар ва мураккаб ҳаётий вазиятларга дуч келадилар. Судьялар инсон тақдирини ҳал қилувчи қарорлар қабул қиладилар ва бу билан юксак маънавий масъулиятни ўз зиммаларига оладилар. Қайд этилишича, суд қарорларининг адолатли бўлиши одил судловга хизмат қилаётганларнинг жисмоний, руҳий ва эмоционал ҳолатига бевосита боғлиқ. Шу боис судьялар ва суд тизими ходимлари ҳақида ғамхўрлик қилиш адолатли, мустақил ва самарали одил судловнинг муҳим шартларидан бири ҳисобланади.

“Янги Ўзбекистонда инсон қадри ва қонун устуворлиги олий қадрият ҳисобланган суд тизимини изчил барпо этмоқдамиз”, — деди Саида Мирзиёева.

Президент Администрацияси раҳбари барча судьялар ва суд тизими ходимларига мустаҳкам соғлиқ, ирода ва қатъият, адолат принципларига доимо содиқлик ва оқилона қарорлар ҳамроҳ бўлишини тилади. @pressuzb

СҚБ раҳбарияти Қорақалпоғистондаги маҳаллаларда “Долзарб 40 кунлик” доирасида ўрганишлар ўтказди Жорий йилнинг 20–23 июль кунлари "Долзарб 40 кунлик" доирасида Ўзсаноатқурилишбанк АТБ раҳбарияти томонидан Қорақалпоғистон Республикасининг Нукус шаҳри ҳамда Тахиаташ ва Қўнғирот туманларидаги "оғир" тоифадаги маҳаллалар билан тузилган "ҳамкорлик шартномалари" ижроси ўрганилди. Ўрганишлар давомида камбағаллик рўйхатига киритилган фуқароларнинг хонадонларига ташриф буюрилиб, уларнинг муаммо ва таклифлари тингланди. Шунингдек, аҳоли бандлигини таъминлаш, ишга жойлаштириш ва кредит маблағлари ажратиш юзасидан амалий таклифлар берилди. Жумладан, Тахиаташ туманидаги "Айдин жўл" МФЙда яшовчи Абдужамилова Токтагул Абибуллаевнага уй шароитида нон ва пишириқ маҳсулотлари тайёрлаш учун электр печка топширилди. Қўнғирот тумани "Ханжап" МФЙда яшовчи Ешбаева Ширингул Бердимуратовна ҳамда Сатенова Жанар Отемисовналарга эса хонадон шароитида паррандачиликни йўлга қўйиш мақсадида 10 тадан товуқ берилди. Шунингдек, мазкур маҳаллаларда маҳалла ходимлари ва аҳоли иштирокида ҳашар ташкил қилиниб, ҳудудларни ободонлаштириш ишлари амалга оширилди. @pressuzb

Президент фармонига мувофиқ, таваллудининг 70 йиллиги муносабати билан Ўзбекистон Республикаси Олий Мажлиси Сенати Раиси Нарбаева Танзила Камаловна “Эл-юрт ҳурмати” ордени билан мукофотланди. @pressuzb