Halal Fkr

"መድረሻ አልባ" ክፍል አንድ (1) " ነቢል አዱኛ " "እዚህ ጋር ወራጅ አለ" ብሎ ወረደና ወደ ትምህርት ቤቱ አስፓልቱን ተሻግሮ ሄደ። መታውቂያ አሳይቶ አረንጓዴ ቀለም የተቀባውን የግቢውን በር አልፎ ገባ።ከፊት ለፊት የኢትዮጵያ ባንዲራ ይታያል።ተማሪዎች የኳስ መጫወቻ ሜዳው ላይ ተሰልፈዋል።አስተማሪዎች ከተማሪዎቹ ፊት ቆመዋል። እሱም ሄዶ ከተማሪዎቹ ጋር ሰልፉን ተቀላቀለ። ተማሪዎች እስኪሰባሰቡ ሲጠብቅ የነበረው የት/ቤቱ ዳይሬክተር ወደ ፊት ወጣ ብሎ መናገር ጀመረ።"....እኔ የትምህርት ቤታችሁ ዳይሬክተርነኝ።የዛሬ አመት እዚህ የነበራችሁ ታውቁኛላችሁ፤አዲስ ተማሪዎችም ስላላችሁ.... ስሜ ሠለሞን ታደሰ ይባላል።በመቀጠል እንኳን ለአዲሱ የትምህርት አመት በሰላም አደረሳችሁ።ከሁለት ወራት እረፍት በኋላ ዛሬ ትምህርት የምንጀምርበት ቀን ነው።የተመዘገባችሁ ጊዜ ፎርም ላይ እንዳነበባችሁት በአሁኑ አመት በርካታ ማሻሻያዎችን አድርገናል፡፡ምንም አይነት የዲሲፒሊን ችግር ያለበትን ተማሪ ት/ቤቱ የማያስተናግድ መሆኑን እና በዲሲፕሊንም ሆነ በሌላ የተማሪ ባህሪይ ያልሆነን ተግባርየሚያከናውንን ተማሪ የምናባርር መሆኑን ለመግለፅ እወዳለሁ። አሉ ብዙ ተማሪዎች ለትምህርትም ለትምህርት ቤትም ጠንቅ የሆኑ።እንደነሱ አይነቶቹን ወደ ቤታቸው እንሸኛለን እነሱ ለት/ቤት ለቤተሰብ ብሎም የሀገር ሸክም ናቸው...." እያለ ይናገራል ነገር ግን የሚያዳምጠው ተማሪ ትንሽ ነው።እሱም ዳይሬክተሩን እያዳመጠ ተማሪዎቹን እየታዘበ ቆሟል።"...ዛሬ የመጀመሪያ ቀን ስለሆነ ፀጉራችሁን አንጨባራችሁ፣ዩኒፎርም ሳትለብሱ የመጣችሁ ተማሪዎች ነገ እንደዚህ ሆናችሁ ብትመጡ የማናስገባችሁ መሆኑን እወቁ።እናንተም ችግሮችን ቀርፋችሁ በጥሩ ሁኔታ እንደምትማሩ ተስፋ አለኝ።በመጨረሻም የኢትዮጵያን ብሔራዊ ህዝብ መዝሙር እንዘምርና ወደ ክፍላችሁ ትገባላችሁ። ለመዘመር ተዘጋጁ 1...2...3 "የዜግነት ክብር በኢትዮጵያችን ፀንቶ፣ ታዬ ህዝባዊነት ዳር እስከ ዳር በርቶ። እንጠብቅሻለን አለብን አደራ፣ ኢትዮጵያችን ኑሪ እኛም ባንቺ እንኩራ፡፡" ወደ ክፍላቸው መግባት ጀመሩ።እሱም ወደ ክፍል ገባ።ክፍል ውስጥ ብዙ ተማሪ አልነበረም፡፡ሁለት ልጆች ከተቀመጡበት ቦታ ፊት ለፊት ተቀመጠ። አዲስ ተማሪ ስለሆነ የሚያውቀው ሰው የለም።ክርኑን ጠረቤዛው ላይ አስደግፎ አገጩን መዳፉ ላይ አስቀምጦ ተማሪዎቹን ያያል። "አዲስ ተማሪ ነህ መሠለኝ" አለው ከኋላ ከተቀመጡት ቀጠን ረዘም ያሐው ልጅ "አዎ አዲስ ነኝ" አለ ወደኋላ ዞሮ "ብቻህን ከምትሆን እኛ ጋር ተቀመጥ" "እሺ" አለና ቦርሳውን ይዞ ሄደ። "ዳኒ እባላለሁ" አለው እጁን እየዘረጋለት እሱም "ሠለሀዲን" ብሎ መለሰለት እየጨበጠው ከዳኒ አጠገብ የተቀመጠው"እኔ ደግሞ ካሊድ" ተጨባበጡ እና ተቀመጠ። -ዳኒ እና ካሊድ ሰው አብሯቸው የሌለ ይመስል ሠለሀዲንን ረስተው(ትተው) ሁለቱ ያወራሉ።ሠለሀዲንም ተማሪዎቹን እያየ ነው ይገባሉ፣ይወጣሉ፣ሠላም ይባባላሉ 'እንትና ወደቀ? እንትናስ የት ገባች?' ይባባላሉ። -ትምህርት የጀመሩት ዛሬ ስለሆነ ሁሉም ተማሪዎች አልመጡም።አስተማሪዎችም ለትውውቅ እየገቡ ይወጣሉ።እስከ ስድስት ሠዐት ከቆዩ በኋላ ወደ ቤት እንዲሄዱ ተለቀቁ።ሶስቱ አብረው ወጡ። በፊት የት ት/ቤት ይማር እንደነበር....... የት ሠፈር እንደሆነ እየተጠያየቁ መሄድ ጀመሪ።ከት/ቤቱ ግቢ ወጥተው ወደ ታክሲ መያዣው መንገድ ከጀመሩ በኋላ ካሊድ "እ....ከኛ ጋርትሄዳለህ ወይስ?....." አለው ሠለሀዲንን "የት ነው የምትሄዱት?" "እዛ" አለ አስፓልቱን ተሻግሮ ወደሚገኘው ፑል ቤት እያመለከተው"አይ እኔ ልሂድ" ብሎ ተሰናብቷቸው ወደ ታክሲ መያዧው ሄደ። + የመጀመሪያው ሁለት ሳምንታት ላይ ብዙም ትምህርት አልነበረም።ሠለሀዲን ከነ ካሊድ ጋርበደንብ እየተግባቡ ነው።ተማሪዎችም ቀስ በቀስ እየመጡ ነው።ሰለሀዲን በዚች ሁለት ሳምንት ባየው የካሊድ ፀባይ እንደተገረመ ነው።ባወራ ቁጥር በተደጋጋሚ 'ወላሂ' ከሚለው ቃል ውጭ ምንም ኢስላማዊ አደብ አይታይበትም።ሁልጊዜ የሚያወራው፣ የሚከራከሩት ስለ ዘፈን እና ስለ ኳስ ነው። በሠላት ሰዐትም ሰግዶ አያውቅም አብረው ከክፍል ይወጡና እነ ካሊድ ወደ ፑል ቤት ሰለሀዲን ወደ መስጂድ። -በሚቀጥለው ቀን የመጀመሪያውን ክፍለ ጊዜ እየተማሩ በር ተንኳኳ።አስተማሪው ከፈተው አንዲት ልጅ ገባች።ሶስቱም ቀና ብለው አዩአት፡፡ "በ......ለው!!" አለ ካሊድ በመገረም... ይቀጥላል .. . ♡ ㅤ     ❍ㅤ       ⎙ㅤ     ⌲             ˡᶦᵏᵉ    ᶜᵒᵐᵐᵉⁿᵗ    ˢᵃᵛᵉ       ˢʰᵃʳᵉ JOIN US: ❯❯ 𝓗𝓪𝓵𝓪𝓵 𝓕𝓴𝓻 ™