Halal Fkr

ዓይንም የአለቃውን ትእዛዝ ተቀብሎ አፈጠጠ። ነገር ግን አቅራቢያዋ በደረሰች ቁጥር የለበሰችው ሜካፕ እየተገለጠ ይመጣና፣ ሜካፑ ተንሳፎ ከስር የሚቀረውን እውነተኛ ማንነቷን ሲያይ ዓይኔ ይጨነቃል። "አሁን ምን ብዬ ነው ለአለቃዬ የምነግረው?" ብሎ ያስባል፣ ያሰላስላል። በመጨረሻም፦ "ይቅርታ አለቃ… የቅድሟ እቃ እንደጠበቅናት አይደለችም (ፌክ ነች)፤ከላይ በባዕድ ነገር ተሸፋፍና አታላናለች። ግድ የለም ሌላ እንሞክራለን" ብሎ ሪፖርት ይልካል። አለቃ ልብም በዓይን መታለል ተናዶ፣ የፍለጋ ስራው በዘመናዊ ቴክኖሎጂ የታገዘ እንዲሆን ትእዛዝ ሳይሆን ጠንካራ ግሳጼ ያስተላልፋል። ዓይን አሁንም የአለቃውን ትእዛዝ በመቀበል መነፅሩን «ገጭ» አድርጎ ወደ ስምሪቱ ተመልሷል። ይሁን እንጂ በተደጋጋሚ ቢሞክርም ውጤቱ ያው ነው። ተስፋ ቆርጦ ወደ ሌላ ስራ መለስ ካለ ከደቂቃዎች በኋላ ቀና ሲል ግን… ያየውን ማመን አቅቶት ፈዘዘ፣ ደነዘዘ፣ ቀረዘዘ! ለማጣራት ያደረገው የላቦራቶሪ ምርመራ ውጤት «75% Original» በመሆኑ ተደስቶ ለአለቃው የ«እንኳን ደስ አለዎት» መልእክት አቀበለ። … ግን ምን ያደርጋል! ያቺ ቆንጆ የልቤን ጥሪ ሳታስተውል እርሷ በሌላ መስመር አልፋ ሄደች። ምስኪኑ ልቤ… የሚፈልገውን በማጣቱ የተፈጠረው ጉድለት ወደ ዘላቂ ደስታ ሊቀየር አይችልም። ምክንያቱም በየመንገዱ የሚያገኛቸውን 100% ኦሪጅናል ቆንጆዎች ሁሉ የራሱ ማድረግ አይችልምና! ታድያ ከዚህ ሁሉ «ጥናትና ምርምር» ምስኪኑ ልቤ የሚተርፈው ዓይን አንስቶ የላከለት «ፎቶዎች» ብቻ ናቸው። እነዚያን ምስሎች እያጠነጠነ… "ብያገኛት ኖሮ አካላቴን ተጠቅሜ እንዴት እንደማማልላት፣ ከአንደበቴ በሚወጡ በጣፋጭ ቃላት እንዴት እንደምይዛት፣ ከዛም እንዴት አብረን ያማረ ጊዜ እንደምናሳልፍ…" እያለ ያመሰጥራል። ስራ ፈትቶ ተመስጧል! ስንት ሀላፊነት፣ ስንት ሸክም ያለበት ትልቁ ልቤ በስሜቱ ተሸንፎ ይንደፋደፋል፣ ይንከራተታል። አንድ ቀን ግን… መጨረሻዬን፣ የነፍሴን ውድቀት አሰብኩ። ልቤን ከዚህ መከራ የማዳን ሀላፊነት አለብኝና በከፍተኛ ፀፀት ሆኜ «No More! ከእንግዲህ ይበቃል!» ብዬ ወሰንኩ። ነገር ግን ፈተናዬ በዚህ አላበቃም! «በቃኝ» ብዬ መንገዴን ስቀጥል፣ አንዷ ድንገት ፊትለፊቴ ትሰየምና «ፋሽን ሾው» ትጀምራለች። (ውዝዋዜና መወረግረግስ አይቀራት!) አቤት ተንኮላቸው… ጌታዬ አላህ (ሱ.ወ) በቅዱስ ቁርኣኑ እንዲህ ይላል፦فَلَمَّا رَأَىٰ قَمِيصَهُ قُدَّ مِن دُبُرٍ قَالَ إِنَّهُ مِن كَيْدِكُنَّ ۖ إِنَّ كَيْدَكُنَّ عَظِيمٌ "ቀሚሱንም ከበስተኋላ ተቀድዶ ባየ ጊዜ «እርሱ (የተናገርሺው) ከተንኮላችሁ ነው፤ (ሴቶች) ተንኮላችሁ በእርግጥ ብርቱ ነውና» አላት።" (ሱረቱ ዩሱፍ፡ 28) ታዲያ ምን ይሻለኛል? እርሷን ላለማየት ስሞክር ወደ ላይ ካየሁ እንቅፋት ሊመታኝ ነው፤ ወደ ቀኝ ወይ ወደ ግራ ከዞርኩ ደግሞ ከሰው ወይም ከግድግዳ ልጋጭ ነው። ስለዚህ ያለኝ ብቸኛ አማራጭ አንገቴን ሳይሆን እይታዬን ወደ ታች ሰበር ማድረግ ብቻ ሆነ! እንደምንም ብዬ ዓይኔን ቀለበስኩት። (ፌሮ ማጠፍ እንኳ እንዲህ አይከብድም!).....ግን ይህን በተጋደሎ ባደረግኩበት ቅፅበት በውስጤ የተሰማኝ ደስታና የኢማን ጥፍጥና… ከከፈልኩት ልፋት በላይ እጅግ የላቀ ነበር! አላህም እውነትን ተናገረ፦

قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ۚ ذَٰلِكَ أَزْكَىٰ لَهُمْ ۗ إِنَّ اللَّهَ خَبِيرٌ بِمَا يَصْنَعُونَ

"ለምእመናን ንገራቸው፡- ዓይኖቻቸውን (ያልተፈቀደን ከማየት) ይከልክሉ፤ ብልቶቻቸውንም ይጠብቁ፤ ይህ ለነሱ የተሻለ (የጠራ) ነው፤ አላህ በሚሠሩት ሁሉ ውስጥ ዐዋቂ ነው ።" (ሱረቱ አን-ኑር፡ 30)

በሉ ወንድሞች/ምእመናን… የልባችንን ሰላም፣ የነፍሳችንን ጥራት ከፈለግን — ዓይናችንን ሰበር እናድርግ! እንደሱ እንደሆነ... JOIN US: ❯❯ 𝓗𝓪𝓵𝓪𝓵 𝓕𝓴𝓻 ™