እግዚአብሔርን ማወቅ

ክርስቶስ ስለ ኃጢአታችን ሞተ፥ ተቀበረም፥ በሦስተኛው ቀን ተነሣ ::   እኔ ደግሞ የተቀበልሁትን ከሁሉ በፊት አሳልፌ ሰጠኋችሁ እንዲህ ብዬ፡- መጽሐፍ እንደሚል ክርስቶስ ስለ ኃጢአታችን ሞተ፥ ተቀበረም፥ መጽሐፍም እንደሚል በሦስተኛው ቀን ተነሣ፥ ለኬፋም ታየ በኋላም ለአሥራ ሁለቱ፤ ከዚያም በኋላ ከአምስት መቶ ለሚበዙ ወንድሞች በአንድ ጊዜ ታየ፤ ከእነርሱም የሚበዙቱ እስከ አሁን አሉ አንዳንዶች ግን አንቀላፍተዋል፤ ከዚያም በኋላ ለያዕቆብ ኋላም ለሐዋርያት ሁሉ ታየ፤ ከሁሉም በኋላ እንደ ጭንጋፍ ለምሆን ለእኔ ደግሞ ታየኝ። እኔ ከሐዋርያት ሁሉ የማንስ ነኝና፥ የእግዚአብሔርን ቤተ ክርስቲያን ስላሳደድሁ ሐዋርያ ተብዬ ልጠራ የማይገባኝ፤ ነገር ግን በእግዚአብሔር ጸጋ የሆንሁ እኔ ነኝ፤ ለእኔም የተሰጠኝ ጸጋው ከንቱ አልነበረም ከሁላቸው ይልቅ ግን ደከምሁ፥ ዳሩ ግን ከእኔ ጋር ያለው የእግዚአብሔር ጸጋ ነው እንጂ እኔ አይደለሁም። እንግዲህስ እኔ ብሆን እነርሱም ቢሆኑ እንዲሁ እንሰብካለን እንዲሁም አመናችሁ ( 1ቆሮ 15 ÷ 3 - 11 ) ።   ማብራሪያ ሐዋርያው ጳውሎስ ክርስቶስ ከሙታን መነሣቱንና ለዘረዘራቸው ሰዎች መታየቱን ይገልጣል ፡፡ 1)   ለኬፋ ኬፋ የሐዋርያው የጴጥሮስ ሌላኛው ስሙ ነው ( ዮሐ 1 ÷ 43 ) ፡፡ ክርስቶስ፡- አላውቅህም ብሎ ለካደው ለጴጥሮስ ተገልጦ ታይቶአል ፡፡ ጴጥሮስ የቀድሞ ስሙ ስምዖን ነበር ( ሉቃ 24 ÷ 34 ) ። 2)  ለአሥራ ሁለቱ መድኃኒታችን ኢየሱስ ክርስቶስ ለአሥራ ሁለቱ ሐዋርያት ሲገለጥላቸው ይሁዳ ስለሌለ አሥራ አንድ ነበሩ ፡፡ በመጀመሪያው ሲገለጥላቸው ቶማስም ስላልነበረ አሥር ነበሩ ( ዮሐ 20 ÷ 19 - 29 ) ፡፡ በሁለተኛው ለአሥራ አንዱ ሲገለጥ ቶማስ ነበረ ፡፡ ይሁዳም ጎድሎ ስማቸው አሥራ ሁለቱ ተብለው ይጠቀሳሉ ፡፡ በይሁዳ ፋንታ ማትያስ 12ተኛ ሆኖ የተቆጠረው ጌታችን ካረገ በኋላ ነው ( የሐዋ 1 ÷ 15 - 26  )  ፡፡ 3)  ከአምስት መቶ ለሚበዙ ወንድሞች አንዳንዶች ያላቸው በሕይወተ ሥጋ የሌሉ ቢሆኑም 1ኛ ቆሮንቶስን እስከ ጻፈበት ጊዜ ድረስ የሚበዙት ግን በሕይወተ ሥጋ ስለ ነበሩ ፡፡ 4)  ለያዕቆብ ያዕቆብን ለብቻው ያመጣዋል ፡፡ የጌታ ወንድም ተብሎ የሚጠራው ነው የሚሆነው ፡፡ ራሱን ግን የኢየሱስ ክርስቶስ ባሪያ ብሎ ነው የሚጠራው ( ያዕ 1 ÷ 1 ) ፡፡ ከትንሣኤ በፊት አላመነም ነበር ( ማቴ 13 ÷ 55 ፡ 56 ፣ ዮሐ 7 ÷ 5 ) ፡፡ በመጀመሪያው የሐዋርያት ጉባኤ ላይ ንግግር ያደረገም ነበር ( የሐዋ 15 ÷ 13 - 21 ) ፡፡ 5)  ለሐዋርያት ሁሉ 12ቱ ደቀ መዛሙርት ሐዋርያት ተብለው ይጠራሉ ፡፡ ከበላይ እንደ ተገለጠላቸው ጠቅሶ ነበር ፡፡ መልሶ አምጥቶአቸዋል ፡፡ ሲያርግም ከማረጉ በፊትም አርባ ቀን ይታያቸው ነበር ( የሐዋ 1 ÷ 1 - 3 ) 6)  ለራሱ ለጳውሎስም ጳውሎስ የቀድሞ ስሙ ሳውል ነበር ፡፡ በክርስቶስ ያመኑትን ያሳድድ ነበር ፡፡ የሚሳድዳቸውን የእግዚአብሔር ቤተ ክርስቲያን ብሎ ጠርቶአቸዋል ፡፡ ያመኑትን በሚያሳድድ ሰዓት ጌታ ኢየሱስ ክርስቶስ ተገልጦለት አምኖአል ( የሐዋ 9 ÷ 1 - 9 ) ፡፡ ጌታችን ኢየሱስ ክርስቶስ ቢገለጥለትም ራሱን፡- ጭንጋፍ በማለት ይጠራል ፡፡ ከሐዋርያት የሚያንስና ሐዋርያም ተብሎ ሊጠራ የማይገባው መሆኑን ጠቅሶ የሆነለት በሥራው ሳይሆን በእግዚአብሔር ጸጋ መሆኑን ተናግሮአል ፡፡ ሐዋርያው ጳውሎስ ያልጠቀሳቸው ጌታ የተገለጠላቸው ሌሎችንም ከወንጌል መጥቀስ ይቻል ነበር ፡፡ ሐዋርያው ስለ ክርስቶስ መነሣት ምስክሮች የሚሆኑትን ከበላይ ያሉትን ሰዎች ያቀረበው ከቆሮንቶስ ሰዎች አንዳንዶች ስለ ትንሣኤ ሙታን የተጠራጠሩ ስለ ነበሩ ነው ( 1ቆሮ  15 ÷ 12 - 19 ) ፡፡ ሐዋርያት ፡- ተነሥቶአል ብለው እንዳስተማሩ እርሱም፡- ተነሥቶአል ብሎ ማስተማሩንና ያመኑትን ደግሞ ፡- እናንተም እንዲህ አመናችሁ ብሎአቸዋል ፡፡ ሞተ ፣ ተቀበረ ፤ ተነሣ የሚሉት ቁልፍ ቃላት ትኩረት ሊሰጣቸው የሚገቡ ናቸው ፡፡ ክርስትና ስለ ክርስቶስ የምንሰብከውና የምናስተምረው ሃይማኖት ነው ፡፡ ክርስቶስ የሞተው ስለ ኃጢአታችን ነው ፡፡ ሁሌም ልንዘነጋው የማይገባ ቃል ነው ፡፡ ስለ ኃጢአታችን ሞተ ፤ ተቀበረ ፤ ሞቶ አልቀረም በሦስተኛው ቀን ከሙታን ተለይቶ ተነሥቶአል ፡፡ በኢ/ኦ/ተ/ቤ/ክ በሌላ ጊዜ እንዲሁም በግንቦት 30 ቅዳሴ ሲቀደስና ከቁ.1 - 12 ያለው በሚነበብ ሰዓት ከበላይ የጠቀስኩት ክፍል ይነበባል ( መጽሐፈ ግጻዌን ይመልከቱ ) ፡፡ ✍ ዘማሪ ዲያቆን ንጉሤ ጥላሁን ( ወንጌል ሰባኪ ) በተጨማሪም የንድፍና የኮምፒዩተር ባለሙያ ▶️ ስብከቶቼንና መዝሙሮቼን በዩቱቤ ቻናል  ማግኘት ትችላላችሁ https://youtube.com/channel/UC5CXetEDzzsnMHbPAT-b_0w ▶️ ቴሌግራም ቻናል https://t.me/EMaweq ▶️ ፌስቡክ fb.me/yeglie