እግዚአብሔርን ማወቅ

የሐዋርያት ሥራ ጥናት ፡፡ ክፍል 25 ፡፡ ፈውስ ፡፡   ጴጥሮስም በየስፍራው ሁሉ ሲዞር በልዳ ወደሚኖሩ ቅዱሳን ደግሞ ወረደ። በዚያም ከስምንት ዓመት ጀምሮ በአልጋ ላይ ተኝቶ የነበረውን ኤንያ የሚሉትን አንድ ሰው አገኘ፤ እርሱም ሽባ ነበረ። ጴጥሮስም፡- ኤንያ ሆይ፥ ኢየሱስ ክርስቶስ ይፈውስሃል፤ ተነሣ ለራስህም አንጥፍ አለው። ወዲያውም ተነሣ። በልዳና በሰሮናም የሚኖሩ ሁሉ እርሱን አይተው ወደ ጌታ ዘወር አሉ። በኢዮጴም ጣቢታ የሚሉአት አንዲት ደቀ መዝሙር ነበረች፥ ትርጓሜውም ዶርቃ ማለት ነው፤ እርስዋም መልካም ነገር የሞላባት ምጽዋትም የምታደርግ ነበረች። በዚያም ወራት ታመመችና ሞተች፤ አጥበውም በሰገነት አኖሩአት። ልዳም ለኢዮጴ ቅርብ ናትና ደቀ መዛሙርት ጴጥሮስ በዚያ እንዳለ ሰምተው፥ ወደ እነርሱ ከመምጣት እንዳይዘገይ እየለመኑ ሁለት ሰዎች ወደ እርሱ ላኩ። ጴጥሮስም ተነሥቶ ከእነርሱ ጋር መጣ፤ በደረሰም ጊዜ በሰገነት አወጡት መበለቶችም ሁሉ እያለቀሱ ዶርቃ ከእነርሱ ጋር ሳለች ያደረገቻቸውን ቀሚሶችንና ልብሶችን ሁሉ እያሳዩት በፊቱ ቆሙ። ጴጥሮስም ሁሉን ወደ ውጭ አስወጥቶ ተንበርክኮም ጸለየ፥ ወደ ሬሳውም ዘወር ብሎ። ጣቢታ ሆይ፥ ተነሺ አላት። እርስዋም ዓይኖችዋን ከፈተች ጴጥሮስንም ባየች ጊዜ ተቀመጠች። እጁንም ለእርስዋ ሰጥቶ አስነሣት፤ ቅዱሳንንና መበለቶችንም ጠራ ሕያውም ሆና በፊታቸው አቆማት። ይህም በኢዮጴ ሁሉ የታወቀ ሆነ፥ ብዙ ሰዎችም በጌታ አመኑ። በኢዮጴም ስምዖን ከሚሉት ከአንድ ቍርበት ፋቂ ጋር አያሌ ቀን ኖረ ( የሐዋ 9 ÷ 32 - 43 ) ።   ማብራሪያ በችኩልነቱ እንዲሁም ፡- አላውቅህም ብሎ ክርስቶስን የካደው ጴጥሮስ ከስምንት ዓመት ጀምሮ ሽባ ሆኖ የኖረውን ሰው ፡- ኢየሱስ ክርስቶስ ይፈውስሃል በማለት ፈወሰው፡፡ ፈውስ የሚደረገው በጌታችን በኢየሱስ ክርስቶስ ስም ነው፡፡ የፈውሱ ዓላማ ደግሞ ሰዎች በጌታችን በኢየሱስ ክርስቶስ እንዲያምኑ ነው፡፡ ሌላው በጴጥሮስ የተፈጸመው ተአምር ደግሞ ከሞት የተነሣችው ጣቢታ የምትባል ሴት ናት፡፡ ጣቢታ ምጽዋት የምታደርግ ሴት ነበረች፡፡ ምጽዋት ለሌሎች ካለን ላይ ማካፈልን ያመለክታል፡፡ ምጽዋት በእግዚአብሔር ዘንድ ደስ የሚያሰኝ ሥራ ነው፡፡ ይህች ሴት ደቀ መዝሙር ነበረች ስለሚል በጌታችን በኢየሱስ ክርስቶስ ያመነች ነበረች፡፡ ታማ ብትሞትም ቅዱስ ጴጥሮስ ሲጸልይላት ከሞት ተነሥታለች፡፡ በእርስዋም በተሠራው ተአምር ብዙዎች በጌታችን በኢየሱስ ክርስቶስ አምነዋል፡፡ በቅዱሳን ሐዋርያት ስብከትና በሚያደርጉትም ተአምራት ወንጌል እየተስፋፋ መምጣቱን እናያለን፡፡ በኢ/ኦ/ተ/ቤ/ክ በጥር 30ና በሐምሌ 1 ቅዳሴ ሲቀደስ ከበላይ ከጠቀስኩት ከፊሉ ከቁ . 36 - ቁ.43 ያለው ይነበባል ( መጽሐፈ ግጻዌ ) ፡፡ ወስብሐት ለእግዚአብሔር ፡፡ አሜን! ይቀጥላል፡፡ ✍ ዘማሪ ዲያቆን ንጉሤ ጥላሁን ( ሰባኬ ወንጌል ) በተጨማሪም የንድፍና የኮምፒዩተር ባለሙያ ▶️ ስብከቶቼንና መዝሙሮቼን በዩቱቤ ቻናል  ማግኘት ትችላላችሁ https://youtube.com/channel/UC5CXetEDzzsnMHbPAT-b_0w ▶️ ቴሌግራም ቻናል https://t.me/EMaweq ▶️ ፌስቡክ fb.me/yeglie