እግዚአብሔርን ማወቅ

የሐዋርያት ሥራ ጥናት :: ክፍል 53 :: ለጳውሎስ የተሰጠው ሀብተ ፈውስ ፡፡   ክፍል 52 ባጭሩ :: ..ጳውሎስ ..ወደ ኤፌሶን መጣ፥ ..ወደ ምኵራብም ገብቶ ስለ እግዚአብሔር መንግሥት እየተነጋገረና እያስረዳቸው ..በግልጥ ይናገር ነበር። ..ጢራኖስም በሚሉት በትምህርት ቤት ዕለት ዕለት ይነጋገር ነበር። በእስያም የኖሩት ሁሉ አይሁድም የግሪክ ሰዎችም የጌታን ቃል እስኪሰሙ ድረስ ሁለት ዓመት ያህል እንዲህ ሆነ ( የሐዋ 19 ÷ 1 - 10 )። ------///------   እግዚአብሔርም በጳውሎስ እጅ የሚያስገርም ተአምራት ያደርግ ነበር፤ ስለዚህም ከአካሉ ጨርቅ ወይም ልብስ ወደ ድውዮች ይወስዱ ነበር፥ ደዌያቸውም ይለቃቸው ነበር ክፉዎች መናፍስትም ይወጡ ነበር። አጋንንትንም እያወጡ ይዞሩ ከነበሩት አይሁድ አንዳንዶች፡- ጳውሎስ በሚሰብከው በኢየሱስ እናምላችኋለን እያሉ ክፉዎች መናፍስት ባሉባቸው ላይ የጌታን የኢየሱስን ስም ይጠሩባቸው ዘንድ ሞከሩ። የካህናትም አለቃ ለሆነ አስቄዋ ለሚሉት ለአንድ አይሁዳዊ ይህን ያደረጉ ሰባት ልጆች ነበሩት። ክፉው መንፈስ ግን መልሶ፡- ኢየሱስንስ አውቀዋለሁ ጳውሎስንም አውቀዋለሁ፤ እናንተሳ እነማን ናችሁ? አላቸው። ክፉው መንፈስም ያለበት ሰው ዘለለባቸው ቆስለውም ከዚያ ቤት ዕራቁታቸውን እስኪሸሹ ድረስ በረታባቸው አሸነፋቸውም። ይህም በኤፌሶን በሚኖሩት ሁሉ በአይሁድና በግሪክ ሰዎች ዘንድ የታወቀ ሆነ፥ በሁላቸውም ላይ ፍርሃት ወደቀባቸው፥ የጌታም የኢየሱስ ስም ተከበረ፤ አምነውም ከነበሩት እጅግ ሰዎች ያደረጉትን እየተናዘዙና እየተናገሩ ይመጡ ነበር። አስማተኞችም ብዙዎቹ መጽሐፋቸውን ሰብስበው በሰው ሁሉ ፊት አቃጠሉት፤ ዋጋውም ቢታሰብ አምሳ ሺህ ብር ሆኖ ተገኘ። እንዲህም የጌታ ቃል በኃይል ያድግና ያሸንፍ ነበር ( የሐዋ 19 ÷ 11 - 20 )።   ማብራሪያ ጳውሎስ በኤፌሶን ሁለት ዓመት ያህል ወንጌልን እየሰበከ እንደ ቆየ አይተናል፡፡ ቆይታው በሁለት ዓመት ሳያበቃ ቀጥሎአል፡፡ መፈወስ ከመንፈስ ቅዱስ ስጦታዎች አንዱ ነው፡፡ እግዚአብሔር በጳውሎስ የሚያስገርም ተአምራት ያደርግ ነበር፡፡ የሚስገርመው ተአምራቱ ደግሞ በሽተኞች ጳውሎስ ጋር ሳይመጡ መፈወሳቸው ነበር፡፡ ወደ ጳውሎስ የመጡ ሰዎች ከአካሉ ጨርቅ ወይም ልብስ ወስደው በሽተኞቹን ሲያስነኩ ከበሽታቸው ይፈወሱ ነበር፡፡ ከክፉ መናፍስትም ጭምር ነጻ ይወጡ ነበር፡፡ ፈውስ መደረጉ ሰዎች ወንጌልን እንዲያምኑ ነው፡፡ አንዳንዶች በፈውስ ምክንያት ወደ ክርስትና ሕይወት የሚመለሱ አሉ፡፡ ወደ ክርስትና ለመመለስ ግን የግድ ፈውስ መጠበቅ አያስፈልግም፡፡ ጳውሎስ ርኩሳን መናፍስትን ሲያወጡ ያዩ ያላመኑ አይሁድ ደግሞ ፡- ጳውሎስ በሚሰብከው በኢየሱስ ስም ውጡ እያሉ ክፉዎች መናፍስት ያሉባቸው ሰዎች ላይ የጌታችን የኢየሱስን ስም ጠሩባቸው፡፡  ክፉው መንፈስ ያደረበት ሰው ኢየሱስን እንደሚያውቀው፣ ጳውሎስንም እንደሚያውቀው ነግሮአቸው ፡- እናንተሳ እነማን ናችሁ? አላቸው። በዚህ ብቻ ሳያበቃ አቆሰላቸውም፡፡ ሲበረታባቸው ከነበሩበት ቤት ዕራቁታቸውን ሸሹ፡፡ ይህን ታሪክ የሰሙ ሁሉ ፈሩ፡፡ የጌታችን የኢየሱስ ስምም ተከበረ፡፡ በጌታችን በኢየሱስ ያመኑ ሰዎች ያደረጉትን እየተናዘዙና እየተናገሩ ይመጡ ነበር፡፡ አስማት ከሚሠሩ ብዙዎቹ መጽሐፋቸውን ሰብስበው በመምጣት ሰው እያያቸው አቃጠሉት፡፡ የጌታ ቃል ተብሎ የተጠቀሰው ወንጌል እየተስፋፋ መሄዱን ቀጠለ፡፡ ወንጌል አስማተኞችን ከአስማታቸው ነጻ እንዳወጣቸው በተለያዩ ሱስ ውስጥና በክፉ ዲያብሎስ አሠራር ያሉትን ነጻ የሚያወጣ ነው፡፡ ወንጌል ያሸንፋል እንጂ አይሸነፍም፡፡ እግዚአብሔር ለጳውሎስ ሀብተ መንፈስ ቅዱስን እንዳሳደረበት በኛም የመንፈስ ቅዱስን ሀብታት ያሳድርብን፡፡ በኢ/ኦ/ተ/ቤ/ያን ለምሳሌ ታህሳስ 30 ቅዳሴ ሲቀደስ በሐዋ 19 ÷ 8 – 21 ያለው ሲነበብ ከበላይ የጠቀስኩት ክፍል ይነበባል ( መጽሐፈ ግጻዌ) ፡፡ ይቀጥላል፡፡ ወስብሐት ለእግዚአብሔር ፡፡ አሜን! ✍ ዘማሪ ዲያቆን ንጉሤ ጥላሁን ( ሰባኬ ወንጌል ) በተጨማሪም የንድፍና የኮምፒዩተር ባለሙያ ▶️ ስብከቶቼንና መዝሙሮቼን በዩቱቤ ቻናል  ማግኘት ትችላላችሁ https://youtube.com/channel/UC5CXetEDzzsnMHbPAT-b_0w ▶️ ቴሌግራም ቻናል https://t.me/EMaweq ▶️ ፌስቡክ fb.me/yeglie