እግዚአብሔርን ማወቅ

የሐዋርያት ሥራ ጥናት :: ክፍል 22 :: የኢትዮጵያዊው ጃንደረባ ታሪክ ::   የጌታም መልአክ ፊልጶስን፡- ተነሥተህ በደቡብ በኩል ከኢየሩሳሌም ወደ ጋዛ ወደሚያወርደው ምድረ በዳ ወደ ሆነ መንገድ ሂድ አለው። ተነሥቶም ሄደ። እነሆም፥ ህንደኬ የተባለች የኢትዮጵያ ንግሥት አዛዥና ጃንደረባ የነበረ በገንዘብዋም ሁሉ የሠለጠነ አንድ የኢትዮጵያ ሰው ሊሰግድ ወደ ኢየሩሳሌም መጥቶ ነበር፤ ሲመለስም በሰረገላ ተቀምጦ የነቢዩን የኢሳይያስን መጽሐፍ ያነብ ነበር። መንፈስም ፊልጶስን፡- ወደዚህ ሰረገላ ቅረብና ተገናኝ አለው። ፊልጶስም ሮጦ የነቢዩን የኢሳይያስን መጽሐፍ ሲያነብ ሰማና፡- በውኑ የምታነበውን ታስተውለዋለህን? አለው። እርሱም፡- የሚመራኝ ሳይኖር ይህ እንዴት ይቻለኛል? አለው። ወጥቶም ከእርሱ ጋር ይቀመጥ ዘንድ ፊልጶስን ለመነው። ያነበውም የነበረ የመጽሐፉ ክፍል ይህ ነበረ፤ እንደ በግ ወደ መታረድ ተነዳ፥ የበግ ጠቦትም በሸላቹ ፊት ዝም እንደሚል፥ እንዲሁ አፉን አልከፈተም። በውርደቱ ፍርዱ ተወገደ፤ ሕይወቱ ከምድር ተወግዳለችና ትውልዱንስ ማን ይናገራል? ጃንደረባውም ለፊልጶስ መልሶ፡- እባክህ፥ ነቢዩ ይህን ስለ ማን ይናገራል? ስለ ራሱ ነውን ወይስ ስለ ሌላ? አለው። ፊልጶስም አፉን ከፈተ፥ ከዚህም መጽሐፍ ጀምሮ ስለ ኢየሱስ ወንጌልን ሰበከለት። በመንገድም ሲሄዱ ወደ ውኃ ደረሱ፤ ጃንደረባውም፡- እነሆ ውኃ፤ እንዳልጠመቅ የሚከለክለኝ ምንድር ነው? አለው። ፊልጶስም፡- በፍጹም ልብህ ብታምን፥ ተፈቅዶአል አለው። መልሶም፡- ኢየሱስ ክርስቶስ የእግዚአብሔር ልጅ እንደ ሆነ አምናለሁ አለ። ሰረገላውም ይቆም ዘንድ አዘዘ፥ ፊልጶስና ጃንደረባው ሁለቱም ወደ ውኃ ወረዱ፥ አጠመቀውም። ከውኃውም ከወጡ በኋላ የጌታ መንፈስ ፊልጶስን ነጠቀው፤ ጃንደረባውም ሁለተኛ አላየውም፥ ደስ ብሎት መንገዱን ይሄድ ነበርና። ፊልጶስ ግን በአዛጦን ተገኘ፥ ወደ ቂሣርያም እስኪመጣ ድረስ እየዞረ በከተማዎች ሁሉ ወንጌልን ይሰብክ ነበር ( የሐዋ 8 ፥ 26 - 40 ) ።   ማብራሪያ ኢትዮጵያዊው ጃንደረባ እግዚአብሔርን የሚያምን በመሆኑ ካገሩ ድረስ ተነሥቶ የመጣው በኢየሩሳሌም ለእግዚአብሔር ለመስገድ ነው፡፡ ፊልጶስ የጌታ መልአክ ሂድ ወዳለው ወደ ምድረ በዳ ጃንደረባው ወደሚያልፍበት መንገድ አመራ፡፡ ጃንደረባው የልቡን መሻት ፈጽሞ ማለት ለእግዚአብሔር ሰግዶ በሰረገላው እየተመለሰ ነበር፡፡ ሰግዶም ብቻ አልተወም፤ የአምላኩን ቃል ከነቢዩ ኢሳይያስ መጽሐፍ ያነብ ነበር፡፡ የሚያነበው ክፍል ደግሞ ኢሳይያስ ከ700 ዓመት በፊት ክርስቶስ መከራ እንደሚቀበል የተነበየውን ነበር ፡፡ ጃንደረባው ግን ስለ ክርስቶስ መሆኑን አላወቀም፡፡ ጃንደረባው ወደ ፊልጶስ እየቀረበ ሲመጣ መንፈስ ፊልጶስን፡- ወደ ጃንደረባው እንዲቀርብ አዘዘው ፡፡ መንፈስ የተባለው ከሦስቱ አካል አንዱ የሆነውን መንፈስ ቅዱስን ሲሆን መንፈስ ቅዱስ አካል ስላለው ነው ፊልጶስን፡- ወደዚህ ሰረገላ ቅረብና ተገናኝ ያለው። ፊልጶስ  ሲቀርብ ጃንደረባው ከሚያነበው ክፍል፡- የበግ ጦቦት በሸላቹ ፊት ዝም እንደሚል እንዲሁ አፉን አልከፈተም የሚለውን ሲያነብ ስለሰማ ፡- የምታነበውን ታስተውለዋለህ? አለው፡፡ ፊልጶስን ወደ ሰረገላው እንዲወጣ ለመነውና ነቢዩ የሚያወራው ስለ ራሱ ወይስ ስለ ሌላ እንደሆነ እንዲያስረዳው ጠየቀው ፡፡ ፊልጶስ ካነበበው ተነሥቶ ስለ ኢየሱስ ወንጌል ሰበከለት፡፡ ክርስቶስን በማመኑም አጠመቀው፡፡ ጃንደረባውም ሰግዶ ሲመለስ ያላገኘውን ደስታ አሁን አግኝቶ ደስ እያለው ይሄድ ጀመር፡፡ ይህ ሰው እግዚአብሔርን ፈልጎ ካገሩ ድረስ ያን ሁሉ መንገድ ተጉዞ  የመጣው በሰረገላ ነበር፡፡ የሚስተምረው ሰው ለሌለው፤ ዝም ብሎ ለሚያነበው በምድረ በዳ አስተማሪ ላከለት ፡፡ ምድረ በዳ ምንም የማንጠብቅበት ቦታ ነው፡፡ ልፋቱ መና እንዳይቀር እግዚአብሔር በምሕረቱ ምድረ በዳ ላይ ጎበኘው፡፡ ምንም ነገር የለም ብለን ተስፋ በቆረጥነበት ምድረ በዳ ላይ እርሱ ይጎበኘናል፡፡ እግዚአብሔር ስለ አንድ ሰው የሚገደው አምላክ ነው፡፡ ስለ እኛም ስለ አንዳችን ይገደዋል፡፡ ጃንደረባው ክርስትና ተጀምሮ እርሱ ግን በቀድሞ የአይሁድ እምነት እግዚአብሔርን ፍለጋ  ሄደ ፡፡ ሲመለስ ግን እግዚአብሔር በሚበልጠው ወንጌል እንዲያምን አደረገው፡፡ አንዳንዴ እግዚአብሔር በሌለበት የእግዚአብሔር ፈቃድ ያለበት መስሎን  እንወጣለን፡፡ እንደዛም ሆኖ አይተወንም፤ ምሕረቱን አብዝቶ በራሱ መንገድ ይጎበኛናል፡፡ ኢትዮጵያና የክርስትና ሃይማኖት የተዋወቁት በዚህ ጃንደረባ በ34 ዓ.ም ነው፡፡ ለሀገሩ ሕዝብም አስተምሯል ተብሎ ይታመናል (የኢትዮጵያ ኦርቶዶክስ ተዋሕዶ ቤተ ክርስቲያን ታሪክ በብፁዕ በአቡነ ጎርጎርዮስ ገጽ 18)፡፡ እንግዲህ እስከዚህ የሐዋርያት ሥራ ም 8 ድረስ መመልከት የቻልነው ወንጌል ይኸውም የምሥራቹ ቃል እየተስፋፋ መምጣቱን ነው፡፡ ዛሬም ሊሰበክ የሚገባው ወንጌል እንደ ሆነ ያስተምረናል፡፡ የክርስቶስ ጉዳይ አስቀድሞ በነቢያትም ትኩረት የተሰጠው ጉዳይ ነበር፡፡ ኢትዮጵያዊው ጃንደረባውም በሚያነበው በነቢዩ ኢሳይያስ የትንቢት መጽሐፍ ሰፍሮ አግኝተነዋል፡፡ ነቢያት የተናገሩለትን ክርስቶስን ያመነው ጃንደረባው በልቡ ደስታ  ሞልቶታል፡፡ የሰበከው ፊልጶስም በሌሎች አገሮች ሁሉ ወንጌልን መስበኩን አልተወም፡፡ ለጃንደረባው ቃሉን የገለጠ መንፈስ ቅዱስ በዚህ ዘመን ላለነው ኢትዮጵያውያንም ቃሉን ይግለጥልን ፤ በልቦናችንም ያሳድርልን፡፡ በኢ/ኦ/ተ/ቤ/ክ በጥቅምት 14  ቅዳሴ ሲቀደስ የሐዋ 8 ፥ 26 - 40 ያለው ይነበባል ( መጽሐፈ ግጻዌ ) ፡፡ ወስብሐት ለእግዚአብሔር ፡፡ አሜን! ይቀጥላል፡፡ ✍ ዘማሪ ዲያቆን ንጉሤ ጥላሁን ( ሰባኬ ወንጌል ) በተጨማሪም የንድፍና የኮምፒዩተር ባለሙያ ▶️ ስብከቶቼንና መዝሙሮቼን በዩቱቤ ቻናል  ማግኘት ትችላላችሁ https://youtube.com/channel/UC5CXetEDzzsnMHbPAT-b_0w ▶️ ቴሌግራም ቻናል https://t.me/EMaweq ▶️ ፌስቡክ fb.me/yeglie